Números 8:1-26
8 Jéeobaeʼ tu tʼanaj Moiséseʼ ka tu yaʼalajtiʼ:
2 «Tʼan Aaróneʼ ka a waʼaltiʼ: ‹Le kéen a tʼab le lámparaʼoboʼ, le siete lámparaʼoboʼ unaj u sáasilkuntikoʼob le parte yaan aktáan tiʼ le candelabrooʼ›».+
3 Aarón túuneʼ tu tʼabaj le lámparaʼob utiaʼal u sáasilkuntik le parte yaan aktáan tiʼ le candelabrooʼ,+ tu beetaj jach jeʼex aʼalaʼabik tiʼ Moisés tumen Jéeobaoʼ.
4 Le candelabrooʼ beetaʼab de oro, yéetel martillo tsʼaʼab forma tiʼ, desde tu yook tak tu looliloʼobeʼ yéetel martillo tsʼaʼab forma tiʼ.+ Le candelabrooʼ beetaʼab jeʼex tsʼaʼabik u yil+ Moisés tumen Jéeobaoʼ.
5 Jéeobaeʼ tu kaʼa tʼanaj Moiséseʼ ka tu yaʼalajtiʼ:
6 «Chʼaʼ le levitaʼob yanoʼob ichil le israelitaʼoboʼ ka a beet u pʼáatloʼob limpioil.+
7 Utiaʼal a pʼatkoʼob limpioileʼ unaj a wiʼiwitsʼik tu yóokʼoloʼob le jaʼ ku luʼsik u kʼeban máakoʼ, le kéen tsʼoʼokkeʼ letiʼobeʼ unaj u tsʼikik tuláakal u tsoʼotsel u wíinkliloʼob yéetel junpʼéel navaja, unaj u pʼoʼik u nookʼoʼob yéetel unaj u limpiokíinkubaʼob.+
8 Le kéen tsʼoʼokkeʼ letiʼobeʼ unaj u chʼaʼikoʼob juntúul táankelem toro+ bey xan maʼalob harina xaʼakʼtaʼan yéetel aceite utiaʼal u ofrendail janal.+ Teech xaneʼ yaan a chʼaʼik juntúul táankelem toro utiaʼal le ofrenda yoʼolal le kʼebanoʼ.+
9 Le kéen tsʼoʼokkeʼ unaj a bisik le levitaʼob aktáan tiʼ le najil reuniónoʼ yéetel unaj xan a muchʼik le israelitaʼoboʼ.+
10 Le kéen a bis le levitaʼob tu táan Jéeobaoʼ le israelitaʼoboʼ unaj u tsʼáaik u kʼaboʼob tu yóokʼol u pool le levitaʼoboʼ.+
11 Aarón túuneʼ yaan u kʼubik le levitaʼob tiʼ Jéeoba jeʼex u kʼuʼubul le ofrenda ku yúuntaʼaloʼ,+ u ofrenda le israelitaʼoboʼ letiʼe levitaʼoboʼ, letiʼobeʼ yaan u meyajoʼob utiaʼal Jéeoba.+
12 Le levitaʼob túunoʼ yaan u tsʼáaik u kʼaboʼob yóokʼol u pool le toroʼoboʼ,+ juntúuleʼ yaan u kʼubkoʼob bey u ofrendail kʼebaneʼ yéetel le uláakʼ juntúuloʼ yaan u kʼubkoʼob bey tóokbil ofrenda utiaʼal Jéeobaeʼ, yaan u kʼubkoʼob utiaʼal u perdonartaʼal+ le levitaʼoboʼ.
13 Yaan a beetik u waʼatal le levitaʼob tu táan Aarón yéetel tu táan u hijoʼoboʼ, yaan a kʼubkoʼob tiʼ Jéeoba jeʼex u kʼuʼubul le ofrenda ku yúuntaʼaloʼ.
14 Unaj a separartik le levitaʼob tiʼ u maasil israelitaʼoboʼ, tumen yaan in tiaʼalintikoʼob.+
15 Le kéen tsʼoʼokkeʼ le levitaʼoboʼ jeʼel u páajtal u beetik u meyajoʼob teʼ najil reuniónoʼ. Letiʼe baʼaxoʼob unaj a beetik utiaʼal a pʼatkoʼob limpioil yéetel utiaʼal a kʼubkoʼob jeʼex u kʼuʼubul le ofrenda ku yúuntaʼaloʼ.
16 Tumen tiʼ tuláakal le israelitaʼoboʼ letiʼe levitaʼob kʼubaʼanoʼob tiʼ tenoʼ, yaan in chʼaʼikoʼob tu lugar in chʼaʼik u yáax hijoʼob le israelitaʼoboʼ.+
17 In tiaʼal u yáax hijoʼob le israelitaʼoboʼ bey xan u yáax xiibil u yalakʼ baʼalcheʼob.+ Letiʼobeʼ tin separartoʼob desde le kʼiin ka tin xuʼulsaj tiʼ u yáax hijoʼob le egipcioʼoboʼ yéetel tiʼ u yáax xiibil u yalakʼ baʼalcheʼob.+
18 Yaan in chʼaʼik le levitaʼob tu lugar u yáax hijoʼob le israelitaʼoboʼ.
19 Tiʼ tuláakal le israelitaʼoboʼ letiʼe levitaʼob ken in kʼub tiʼ Aarón yéetel tiʼ u hijoʼoboʼ. Le levitaʼob túunoʼ yaan u beetik u meyajoʼob teʼ najil reunión+ utiaʼal u yutsil le israelitaʼoboʼ yéetel yaan u yáantajoʼob utiaʼal u perdonartaʼal u kʼeban le israelitaʼoboʼ.+ Beyoʼ le israelitaʼoboʼ maʼ kun náatsʼloʼob teʼ lugar santooʼ, yéetel maʼ kun taal mix baʼal kʼaas tu yóokʼoloʼob».
20 Moisés, Aarón yéetel le israelitaʼoboʼ bey úuchik u beetkoʼob tiʼ le levitaʼoboʼ. Jach jeʼex aʼalaʼabik tiʼ Moisés tumen Jéeobaeʼ bey tu beetil le israelitaʼob tiʼ le levitaʼoboʼ.
21 Le levitaʼob túunoʼ tu limpiokíintubaʼob yéetel tu pʼoʼaj u nookʼoʼob,+ ka tsʼoʼokeʼ kʼuʼuboʼob tumen Aarón jeʼex u kʼuʼubul le ofrenda ku yúuntaʼal tu táan Jéeobaoʼ.+ Tsʼoʼoleʼ Aaróneʼ tu kʼubaj junpʼéel ofrenda utiaʼal u pʼáatloʼob limpioil tu táan Dios.+
22 Ka tsʼoʼokeʼ ook le levitaʼob teʼ najil reunión utiaʼal u beetik u meyajoʼob tu táan Aarón yéetel tu táan u hijoʼoboʼ. Jach jeʼex aʼalaʼabik tiʼ Moisés tumen Jéeobaeʼ bey tu beetiloʼob tiʼ le levitaʼoboʼ.
23 Jéeoba túuneʼ tu tʼanaj Moiséseʼ ka tu yaʼalajtiʼ:
24 «Lelaʼ letiʼe baʼax unaj u beetik le levitaʼoboʼ: desde ken u tsʼáa 25 años tiʼ juntúul xiibeʼ yaan u múul meyaj yéetel le máaxoʼob ku meyajoʼob teʼ najil reuniónoʼ.
25 Chéen baʼaleʼ le kéen u tsʼáa 50 años tiʼeʼ yaan u xuʼulul u múul meyaj tu yéeteloʼob.
26 Letiʼeʼ jeʼel u páajtal u yáantik le levitaʼob kʼubéentaʼantiʼob le meyajoʼob ku beetaʼal teʼ tabernáculooʼ, pero maʼ unaj u meyaj teʼ najil reuniónoʼ. Lelaʼ letiʼe baʼax unaj a beetik yoʼolal le levitaʼoboʼ bey xan yoʼolal le meyaj kʼubéentaʼantiʼoboʼ».+
