Nahúm 1:1-15
1 Lelaʼ junpʼéel baʼax ku yaʼalaʼal tu contra Nínive.+ Lelaʼ tsʼíibtaʼan teʼ libro tuʼux yaan le baʼaxoʼob tsʼaʼab u yil Nahúm* le elcositaoʼ.
2 Jéeobaeʼ* juntúul Dios u kʼáat ka adorartaʼak chéen letiʼ,+ letiʼeʼ ku vengarkuba.
Jéeobaeʼ ku vengarkuba yéetel u líiʼsmuba utiaʼal u yeʼesik pʼujaʼan.+
Jéeobaeʼ ku vengarkuba tiʼ u enemigoʼob,yéetel le kéen u yil tsʼoʼok u kʼuchul u kʼiinileʼ ku yeʼesik u pʼujaʼanil tiʼob.
3 Jéeobaeʼ maʼatech u séeb pʼuʼujul,+ yéetel jach nojoch u poder,+chéen baʼaleʼ Jéeobaeʼ mix bikʼin kun pʼáatal maʼ u castigartik le máaxoʼob ku kʼebantaloʼoboʼ.+
Le kéen xíimbalnakeʼ ku yantal kʼaʼamkach iikʼ bey xan junpʼéel ciclón.
Le polvo ku líikʼil le kéen máanakoʼ bey múuyaloʼobeʼ.+
4 Letiʼeʼ ku kʼeyik le kʼáaʼnáaboʼ,+ le kʼáaʼnáab túunoʼ ku saʼapʼal.
Ku beetik xan u saʼapʼal u jaʼil tuláakal le ríoʼoboʼ.+
U kʼáaxiloʼob Basán yéetel Carmeloeʼ ku tijloʼob,+ku beetik xan u tijil u looliloʼob le Líbanooʼ.
5 Tu yoʼolal letiʼeʼ le montañaʼoboʼ ku yúumbaloʼob,yéetel le puʼukoʼoboʼ* ku yíibiloʼob.+
Tu táan letiʼeʼ le luʼumoʼ ku tíitkuba,ku tíitkuba xan le yóokʼol kaaboʼ bey xan tuláakal le baʼaloʼob yanoʼob tu yóokʼoloʼ.+
6 ¿Máax jeʼel u pʼáatal waʼatalil tu táan u pʼujaʼanileʼ?+
¿Máax jeʼel u pʼáatal kuxaʼanil le kéen u yeʼes jach pʼujaʼaneʼ?+
U pʼujaʼanileʼ yaan u tóochʼbal jeʼex u tóochʼbal le kʼáakʼoʼ,yéetel tu táaneʼ yaan u xiixtal le tuunichoʼoboʼ.
7 Jéeobaeʼ uts+ yéetel bey junpʼéel lugar jach maʼalob utiaʼal u taʼakikuba máak tu kʼiinil yaj óolaleʼ.+
Letiʼeʼ jach u yojel* máaxoʼob kaxtik utiaʼal ka kanáantaʼakoʼob.+
8 Letiʼeʼ yaan u taasik yaʼabkach jaʼ utiaʼal u xuʼulsik tiʼ Nínive.
U enemigoʼobeʼ yaan u yantaloʼob ich éeʼjochʼeʼenil.
9 Teʼexeʼ, ¿baʼax táan a tuklik a beetkeʼex tu contra Jéeoba?
Letiʼeʼ yaan u láaj xuʼulsikteʼex,maʼ kun kʼaʼabéettal u xuʼulsikteʼex tu kaʼatéen.+
10 Letiʼobeʼ u kʼaʼakʼaxmubaʼob jeʼex le kʼiʼixoʼoboʼ,yéetel ku yuʼubikubaʼob jeʼex le máakoʼob tsʼoʼok u káaltaloʼob yéetel cervezaoʼ.*
Chéen baʼaleʼ yaan u yeleloʼob jeʼex u yelel tikin xíiweʼ.
11 Tiʼ teech kun jóokʼol juntúul máak kun chʼaʼtuklik baʼaloʼob kʼaastak tu contra Jéeoba,letiʼeʼ yaan u yaʼalik baʼaloʼob mix baʼal u biilaloʼob.
12 Lelaʼ letiʼe baʼax ku yaʼalik Jéeobaaʼ:
«Kex jach yaʼaboʼob yéetel kex jach yaan u páajtaliloʼobeʼ,yaan u xuʼulsaʼaloʼob yéetel bey kun tsʼoʼokoltiʼoboʼ.*
Teneʼ tsʼoʼok in castigarkech,* chéen baʼaleʼ maʼ kun seguer in castigarkech.
13 Teneʼ yaan in kachik le cheʼ u tsʼaamaj ta wóokʼoloʼ,+yéetel yaan in kotsik le cadena tuʼux kʼaxaʼanechoʼ.
14 Lelaʼ letiʼe baʼax tsʼoʼok u yaʼalikten Jéeoba kun úuchultechaʼ:*
‹Yaan u xuʼulul tiʼ a kʼaabaʼ.
Yaan in xuʼulsik tiʼ le a póolbil imagenoʼob bey xan le imagenoʼob de metal yaan tu templo a diosoʼoboʼ.
Yaan in beetik junpʼéel muknal a tiaʼal, tumen techeʼ mix baʼal a biilal›.
15 ¡Ilawile!, tu yóokʼol le montañaʼoboʼ tiʼ ku xíimbal juntúul máax ku tsʼáaik ojéeltbil baʼaloʼob maʼalobtak,+juntúul máax aʼalik yaan u yantal jeetsʼelil.
Judá, beet le a fiestaʼoboʼ+ yéetel beet le baʼax tsʼoʼok a prometerkoʼ,tumen le kʼasaʼan máakoʼoboʼ maʼ ken u kaʼa atacartechoʼob,letiʼobeʼ yaan u láaj xuʼulsaʼaltiʼob».
Notas
^ U kʼáat u yaʼal «Juntúul Máax ku Líiʼsaj Óol».
^ Ilawil página 2566.
^ Wa «cerroʼoboʼ».
^ Wa «ku kanáantik». Ich hebreoeʼ ku yaʼalaʼal kaʼach «u kʼaj óol».
^ Wa «cerveza beetaʼan de trigooʼ».
^ Uláakʼ bix u traducirtaʼaleʼ «yéetel letiʼeʼ yaan u kʼáatmáan».
^ Teʼelaʼ táan u yúuchul tʼaan tiʼ Judá.
^ Teʼelaʼ táan u yúuchul tʼaan tiʼ Asiria.
