Nehemías 13:1-31
13 Teʼ kʼiin jeʼeloʼ xoʼok u yuʼub le kaaj le libro u tsʼíibtmaj Moisésoʼ,+ ka ilaʼabeʼ mix juntúul ammonita wa moabita+ unaj u yokol ichil le máaxoʼob adorartik u jaajil Diosoʼ,+
2 tumen letiʼobeʼ maʼ tu tsʼáajoʼob jaʼ u yukʼ le israelitaʼoboʼ mix tu tsʼáajoʼob baʼal u jaantoʼobiʼ, baʼaxeʼ tu contratartoʼob Balaam utiaʼal u maldecirtik le israelitaʼoboʼ.+ Chéen baʼaleʼ k-Dioseʼ tu beetaj u suut junpʼéel bendición le maldiciónoʼ.+
3 Chéen pʼel tu yuʼubil le israelitaʼob le baʼax ku yaʼalik le Leyoʼ ka joʼopʼ u jóoʼskoʼob tu kaajil Israel tuláakal le máaxoʼob táanxel luʼumil u taaloʼoboʼ paʼteʼ yéetel u paalaloʼob.+
4 Chéen baʼaleʼ antes tiʼ tuláakal lelaʼ Eliasib+ le sacerdoteoʼ letiʼ kaʼach ilik tuláakal le baʼax ku beetaʼal teʼ bodegaʼob* yaan tu yotoch* Diosoʼ,+ letiʼeʼ u láakʼtsil kaʼach Tobías.+
5 Eliasibeʼ tu tsʼáaj junpʼéel nojoch bodega tiʼ Tobías, le bodega* tuʼux ku tsʼaʼabal kaʼach u ofrendail janal, le sak inciensooʼ, le u nuʼukuliloʼob le templooʼ, bey xan le u diez por cientoil* le trigo yéetel uláakʼ baʼaxoʼob ku cosechartaʼaloʼ, le túumben vinooʼ, yéetel le aceiteoʼ.+ Tuláakal le baʼaloʼobaʼ letiʼe aʼalaʼan ka tsʼaʼabak kaʼach tiʼ le levitaʼoboʼ,+ tiʼ le máaxoʼob ku kʼaayoʼoboʼ yéetel tiʼ le máaxoʼob ku kananoʼoboʼ, tiʼ xan ku bisaʼal kaʼach le baʼaxoʼob ku tsʼaʼabal utiaʼal le sacerdoteʼoboʼ.+
6 Teʼ kʼiinoʼob jeʼeloʼ minaʼanen kaʼach tu kaajil Jerusalén, tumen teneʼ binen tu yiknal rey Artajerjes+ teʼ año 32+ táan u gobernar Babiloniaoʼ. Chéen baʼaleʼ ka máan tiempoeʼ tin kʼáataj permiso tiʼ le rey utiaʼal in suut Jerusalénoʼ.
7 Ka suunajen Jerusaléneʼ tin wilaj le baʼax jach kʼaas tu beetaj Eliasib+ tu favor Tobíasoʼ,+ letiʼeʼ tu tsʼáaj tiʼ Tobías junpʼéel tiʼ le bodegaʼob yaan tu táankabil u yotoch u jaajil Diosoʼ.
8 Leloʼ jach táaj kʼaas tin wilil, le oʼolal tin pipikchʼintaj táankab tuláakal le u nuʼukuloʼob Tobías yaan kaʼach teʼ bodegaoʼ.*
9 Ka tsʼoʼok leloʼ tin waʼalaj ka limpiartaʼak le bodegaʼoboʼ* ka tsʼoʼokeʼ tin kaʼa tsʼáaj le nuʼukuloʼob ku meyaj tu yotoch u jaajil Diosoʼ+ bey xan le u ofrendail janal yéetel le sak inciensooʼ.+
10 Tin wojéeltaj xaneʼ le baʼaxoʼob unaj u tsʼaʼabal tiʼ le levitaʼoboʼ+ maʼatech u tsʼaʼabaltiʼob,+ le oʼolal le levitaʼob yéetel le máaxoʼob ku kʼaayoʼob kʼubéentaʼantiʼob le meyaj unaj u beetaʼal teʼ templooʼ bin u meyajt u luʼumoʼob.+
11 Le oʼolal tin waʼalaj tiʼ le máaxoʼob ku nuʼuktajoʼoboʼ:+ «¿Baʼaxten chéen ka wilkeʼex u kʼastal u yotoch u jaajil Dios?».+ Ka tsʼoʼokeʼ tin muchʼaj le máaxoʼob binoʼoboʼ ka tin kaʼa sutoʼob tu meyajoʼob.
12 Tuláakal u kajnáaliloʼob Judáeʼ tu taasoʼob teʼ bodegaʼob+ u diez por cientoil+ le trigo yéetel uláakʼ baʼaloʼob ku cosechartaʼaloʼ, le túumben vino yéetel le aceiteoʼ.
13 Teen túuneʼ tin tsʼáaj máakoʼob utiaʼal u yiloʼob tuláakal le baʼaxoʼob ku beetaʼal teʼ bodegaʼoboʼ, tin tsʼáaj Selemías le sacerdoteoʼ, Sadok le escribaoʼ yéetel juntúul levita ku kʼaabaʼtik Pedaya. Tsʼoʼoleʼ tin tsʼáaj Aanán u hijo Zakur u hijo Matanías utiaʼal áantkoʼob. Tuláakloʼobeʼ ojéelaʼan jeʼel u páajtal u confiar máak tiʼ letiʼobeʼ. Letiʼob unaj xan u tʼoxkoʼob le baʼaloʼob unaj u tsʼaʼabal tiʼ u láakʼtsiloʼoboʼ.
14 In Dios, maʼ a tuʼubsik le baʼax tsʼoʼok in beetkoʼ,+ yéetel maʼ a tuʼubsik le baʼaxoʼob tsʼoʼok in beetik utiaʼal in weʼesik in nojoch yaabilaj tu yoʼolal a wotoch yéetel tu yoʼolal le meyajoʼob ku beetaʼaloʼ.+
15 Teʼ kʼiinoʼob jeʼeloʼ tin wileʼ tu kʼiinil sábadoeʼ yaan tiʼ u kajnáaliloʼob Judá táan u yayaʼchaʼatkoʼob uva tiʼ junpʼéel pila.+ Tu kʼiinil sábado xaneʼ ku muchʼkíintikoʼob neekʼoʼob yéetel ku tsʼáaikoʼob tu yóokʼol burroʼob utiaʼal u taaskoʼob kaʼach tu kaajil Jerusalén, ku taaskoʼob xan kaʼach vino, uvaʼob, higoʼob bey xan le jejeláas baʼaloʼob ku cosecharkoʼoboʼ. Le oʼolal tin waʼalajtiʼob junpuliʼ maʼ unaj u konkoʼob tu kʼiinil sábado*+ le baʼaloʼob beyoʼ.
16 Tsʼoʼoleʼ le tirioʼob kajaʼanoʼob teʼ kaajoʼ táan kaʼach u taaskoʼob kay yéetel tuláakal u jejeláasil baʼaloʼob utiaʼal u konoʼob tiʼ u kajnáaliloʼob Judá bey xan tu kaajil Jerusalén tu kʼiinil sábado.+
17 Le oʼolal tin waʼalaj tiʼ le tsʼuuloʼob yaan Judáoʼ: «¿Baʼaxten táan a beetkeʼex le baʼax maʼ maʼalobaʼ? Teʼexeʼ táan a mixbaʼalkúuntikeʼex u kʼiinil sábado.
18 ¿Maʼ wa letiʼe baʼax tu beetaj xan a úuchben láakʼtsileʼex, le oʼolal k-Dioseʼ tu taasaj t-óokʼol yéetel tu yóokʼol le kaaj le baʼax ku yúuchultoʼonaʼ? Beoraaʼ teʼexeʼ táan a beetkeʼex u maas pʼuʼujul Dios tu contra Israel ikil a mixbaʼalkúuntikeʼex le Sábadooʼ».+
19 Le oʼolal tin waʼalaj ka kʼaʼalak u joonajiloʼob Jerusalén antes tiʼ u yáakʼabtal, antes tiʼ u káajal u kʼiinil sábado. Tin waʼalaj xan maʼ u jeʼebel le joonajoʼob hasta u máan u kʼiinil sábadooʼ. Tsʼoʼoleʼ tin waʼakúuntaj jujuntúul tiʼ in j-meyajoʼob teʼ joonajoʼoboʼ utiaʼal maʼ u yoksaʼal mix junpʼéel kuuch tu kʼiinil sábado.
20 Le oʼolal le comercianteʼob yéetel le máakoʼob ku konkoʼob jejeláas baʼaloʼoboʼ tu máansoʼob áakʼab paachil tiʼ Jerusalén kex juntéen wa kaʼatéen.
21 Teen túuneʼ tin waʼalajtiʼob: «¿Baʼaxten táan a máanskeʼex áakʼab aktáan tiʼ le pakʼoʼ? Wa ka beetkeʼex tu kaʼatéeneʼ teneʼ yaan in tojolchʼintkeʼex». Desde teʼ kʼiin jeʼeloʼ maʼ kaʼa taaloʼob utiaʼal sábadoiʼ.
22 Tin waʼalaj xan tiʼ le levitaʼoboʼ mantatsʼ unaj u limpiokíinkubaʼob tu táan Dios utiaʼal u kanáantkoʼob u joonajiloʼob le kaajoʼ, beyoʼ u kʼiinil sábadoeʼ yaan u pʼáatal santoil.+ In Dios, maʼ a tuʼubsik xan le baʼax tsʼoʼok in beetkaʼ, chʼaʼten óotsilil tu yoʼolal a nojoch yaabilaj.+
23 Teʼ kʼiinoʼob jeʼeloʼ tin wilaj xaneʼ yaan judíoʼob tsʼokaʼan u beeloʼob yéetel* koʼoleloʼob+ asdoditaʼob,+ ammonitaʼob yéetel moabitaʼob.+
24 Táanchumuk tiʼ u paalaloʼobeʼ ku tʼankoʼob asdodeo yéetel le uláakʼ táanchumukoʼ ku tʼankoʼob le idiomaʼob ku tʼaʼanal tiʼ le jejeláas kaajoʼoboʼ, pero mix juntúul tiʼ letiʼob u yojloʼob tʼaan ichil u idioma le judíoʼoboʼ.
25 Le oʼolal tin kʼeyaj le judíoʼoboʼ, tin maldecirtoʼob, tin jaʼajatsʼaj jujuntúul tiʼ letiʼobiʼ,+ tin jóokpaytaj u tsoʼotsel u pooloʼob, tsʼoʼoleʼ ka tin beetaj u jurarkoʼob tu kʼaabaʼ Dios: «Maʼ unaj a tsʼáaik a hijaʼex tiʼ u hijoʼob letiʼobiʼ, yéetel maʼ unaj a kʼamkeʼex mix juntúul tiʼ u hijaʼob utiaʼal a hijoʼex teʼexiʼ mix teʼex unaj a chʼaʼikeʼex u hijaʼob.+
26 ¿Maʼ wa tu yoʼolal letiʼobeʼ kʼebanchaj Salomón u reyil Israel? Ichil u maasil kaajoʼobeʼ maʼ yanchaj juntúul rey jeʼex letiʼeʼ.+ Letiʼeʼ jach yaabiltaʼab tumen u Dios,+ le oʼolal beetaʼab reyil tu yóokʼol tuláakal Israel tumen u Dios. Chéen baʼaleʼ tak letiʼ beetaʼab u kʼebantal tumen le u yatanoʼob ku taaloʼob táanxel luʼumiloʼ.+
27 ¡Bix atrevernajikeʼex u tsʼoʼokol a beeleʼex yéetel koʼoleloʼob táanxel luʼumil u taaloʼob utiaʼal a traicionarkeʼex k-Dios!».+
28 Juntúul tiʼ u hijo Joyadá+ u hijo Eliasib+ le maas nojoch sacerdoteoʼ kʼuch u beetuba u jaʼan Sanbalat+ le oronitaoʼ, le oʼolal tin tojolchʼintaj.
29 In Dios, maʼ a tuʼubsik le baʼax tsʼoʼok u beetkoʼoboʼ tumen tsʼoʼok u mixbaʼalkúuntikoʼob le meyaj ku beetik le sacerdoteʼoboʼ, le pacto beetaʼan yéetel le sacerdoteʼoboʼ+ bey xan yéetel le levitaʼoboʼ.+
30 Ka tsʼoʼokeʼ tin limpiokíintoʼob tu táan Dios úuchik in beetik u náachtaloʼob tiʼ le baʼaloʼob kʼaastak ku beetik le j-táanxel luʼumiloʼoboʼ. Tsʼoʼoleʼ tin tsʼáaj meyaj u beet le sacerdoteʼob yéetel le levitaʼoboʼ, beyoʼ cada juntúuleʼ yaan u beetik u meyaj.+
31 Tin beetaj xan u planesil utiaʼal u taasaʼal tu kʼiinil le bukaʼaj siʼ+ kun kʼaʼabéettaloʼ bey xan le u yáax ich le luʼum unaj u taasaʼaloʼ.
In Dios, kʼaʼajsen yéetel utsil.+
Notas
^ Wa «tuʼuxoʼob ku yúuchul janal».
^ Wa «templo».
^ Wa «u diezmoil».
^ Wa «tuʼux ku yúuchul janal».
^ Wa «tuʼux ku yúuchul janaloʼ».
^ Wa «tuʼuxoʼob ku yúuchul janaloʼ».
^ Uláakʼ bix u traducirtaʼaleʼ «Teʼ kʼiin jeʼeloʼ tin waʼalajtiʼob bik koonolnakoʼob».
^ Wa «u bismaj tu yotochoʼob».
