Nehemías 4:1-23
4 Chéen pʼelak tu yojéeltil Sanbalat+ táan k-jel líiʼsik u baʼpakʼiloʼob le kaajoʼ pʼuʼuji yéetel sen tsʼíikilnaji,* tsʼoʼoleʼ joʼopʼ u burlarkuba tiʼ le judíoʼoboʼ.
2 Letiʼeʼ tu yaʼalaj tu táan u sukuʼunoʼob yéetel tu táan u ejércitoil Samaria: «¿Baʼax táan u beetik le óotsil judíoʼoboʼ? ¿Tu juunaloʼob wa ken u beetoʼob le meyajoʼ? ¿Yaan wa u kʼubkoʼob sacrificioʼob? ¿Yaan wa u tsʼoʼoksikoʼob le meyaj tiʼ junpʼéel kʼiinoʼ? ¿Yaan wa u kaʼa kuxkíintikoʼob le tuunichoʼob elaʼanoʼob yanoʼob teʼ tuʼux nikikbal le escombrooʼ?».+
3 Teʼ súutukoʼ Tobías+ le ammonita,+ le máax waʼalakbal tu tséeloʼ tu yaʼalaj: «Wa ka naʼakak juntúul chʼomak tu yóokʼol le pakʼ ku beetkoʼoboʼ jeʼel u níikil le tuunichoʼoboʼ».
4 In Dios, uʼuy bix u taaskoʼonoʼob mix baʼalil.+ Beet u suut tu yóokʼoloʼob le baʼax ku yaʼalikoʼoboʼ.+ Kʼuboʼob tu kʼab u enemigoʼob utiaʼal ka bisaʼakoʼob táanxel luʼumil.
5 Maʼ a chéen ilik le baʼaxoʼob maʼ maʼalobtak ku beetkoʼoboʼ mix a tupik u kʼebanoʼob,+ tumen tsʼoʼok u yaʼalikoʼob baʼal tiʼ le máaxoʼob ku meyajoʼoboʼ.
6 Toʼoneʼ seguernaj k-beetik le pakʼoʼ, le oʼolal t-nupaj tuláakal u baʼpakʼiloʼob le kaaj tak táanchumuk u kaʼanliloʼ. Le kaajoʼ seguernaj u meyaj yéetel tuláakal u puksiʼikʼal.
7 Sanbalat, Tobías,+ le árabeʼob,+ le ammonitaʼob yéetel le asdoditaʼoboʼ+ tu yojéeltoʼob táan u avanzar u yutskíintaʼal u baʼpakʼiloʼob Jerusalén bey xan táan u buʼutʼul tuláakal u jooliloʼob. Letiʼobeʼ sen pʼuʼujoʼob chéen pʼelak tu yojéeltiloʼob.
8 Letiʼob túuneʼ tu muchʼubaʼobeʼ ka tu chʼaʼtukloʼob u taaloʼob baʼateʼel tu contra Jerusalén, lelaʼ chéen utiaʼal u beetkoʼob u yantal problemas.
9 Pero toʼoneʼ orarnajoʼon tiʼ k-Dios yéetel t-tsʼáaj máakoʼob de kʼiin yéetel de áakʼab utiaʼal u kanáantkoʼonoʼob tiʼ letiʼob.
10 Chéen baʼaleʼ u kajnáaliloʼob Judáeʼ joʼopʼ u yaʼalikoʼob: «Tsʼoʼok u lúubul u muukʼ le máaxoʼob ku meyajoʼoboʼ, tsʼoʼoleʼ yaʼab escombro yaan, mix bikʼin kun páajtal k-beetik u baʼpakʼiloʼob le kaajoʼ».
11 Tsʼoʼoleʼ k-enemigoʼobeʼ seguernaj u yaʼalikoʼob: «Mix ken u yojéeltoʼob yéetel mix ken u tsʼáaʼob cuenta le kéen ookkoʼon chúumuk tiʼ letiʼob, le kéen tsʼoʼokkeʼ yaan k-kíimskoʼob yéetel yaan k-jeʼelsik le meyajoʼ».
12 Le kéen taalak kaʼach le judíoʼob kajaʼanoʼob naatsʼ tiʼ letiʼoboʼ, maʼ tu xuʼulul u yaʼalikoʼobtoʼon:* «Yaan u taaloʼob t-contra tiʼ tuláakal dirección».
13 Le oʼolaleʼ tin waʼakúuntaj máakoʼob paachil tiʼ le pakʼoʼ utiaʼal u kanáantkoʼob le tuʼux maas kabaloʼ, le tuʼux maas chéen chʼaʼabil jeʼel k-atacartaʼaloʼ. Tin muchʼkíintoʼob según tiʼ baʼax familiail u taaloʼob. Letiʼobeʼ u chʼaʼamoʼob u espadaʼob, u lanzaʼob yéetel u flechaʼob.
14 Le ka tin wilaj saajkoʼobeʼ tu séebaʼanil líikʼeneʼ ka tin waʼalaj tiʼ le tsʼuuloʼob+ yéetel tiʼ le máaxoʼob ku nuʼuktajoʼoboʼ bey xan tiʼ le u maasil le kaajoʼ: «Maʼ a chʼaʼikeʼex saajkil tiʼ letiʼob.+ Maʼ u tuʼubulteʼexeʼ Jéeobaeʼ jach nojoch u poder yéetel ku beetik nukuch baʼaloʼob ku beetik u jaʼakʼal u yóol máak.+ Baʼatelneneʼex tu yoʼolal a sukuʼuneʼex, a hijoʼex, a hijaʼex, a wataneʼex yéetel tu yoʼolal a wotocheʼex».
15 Le ka tu yuʼubaj k-enemigoʼob tsʼoʼok k-ojéeltik le baʼax ku tuklik u beetkoʼoboʼ yéetel tsʼoʼok u juʼubul tumen u jaajil Dios le baʼax ku tuklik u beetkoʼoboʼ, tuláakloʼoneʼ suunajoʼon teʼ meyaj utiaʼal k-utskíintik le pakʼoʼoboʼ.
16 Desde teʼ kʼiin jeʼeloʼ táanchumuk tiʼ in j-meyajoʼobeʼ táan kaʼach u yutskíintikoʼob le pakʼoʼoboʼ,+ yéetel uláakʼ táanchumukeʼ u chʼaʼamoʼob kaʼach u lanzaʼob, u escudoʼob, u flechaʼob yéetel u takmoʼob u nookʼil u baʼateloʼob. Le príncipeʼob+ xanoʼ tiʼ waʼalakbaloʼob kaʼach paachil tiʼ le u kajnáaliloʼob Judá
17 táan u beetkoʼob le pakʼoʼoboʼ. Le máakoʼobaʼ táan kaʼach u meyajoʼob yéetel juntsʼíit u kʼaboʼob, yéetel uláakʼ juntsʼíit u kʼaboʼobeʼ u chʼaʼamoʼob kaʼach u nuʼukulil u baʼateloʼob.
18 Cada juntúul tiʼ le máaxoʼob ku meyajoʼoboʼ u kʼaxnakʼmaj kaʼach junpʼéel espada mientras táan u meyaj. Le máax kun ustik le baakoʼ+ tiaʼan kaʼach tin tséeleʼ.
19 Ka tsʼoʼokeʼ tin waʼalaj tiʼ le tsʼuuloʼob yéetel tiʼ le máaxoʼob ku nuʼuktajoʼoboʼ bey xan tiʼ le u maasil u kajnáaliloʼob le kaajoʼ: «Jach nojoch le meyajoʼ. Kʼiʼitpajaʼanoʼon yóokʼol le pakʼoʼ, maʼ múuchʼ yaniloʼoniʼ.
20 Le kéen a wuʼuyeʼex u yustaʼal le baakoʼ taalakeʼex teʼ tuʼux yanoʼon toʼonoʼ. K-Dios kun baʼateʼel t-oʼolal».+
21 Le oʼolal táanchumuk tiʼ toʼoneʼ seguernaj u meyaj, mientras uláakʼ táanchumukeʼ u chʼaʼamaj u lanzaʼob, bey k-beetik desde ken tíipʼik kʼiin tak ken áakʼabchajak le tsʼoʼok tak u chíikpajal le estrellaʼoboʼ.
22 Teʼ kʼiinoʼob jeʼeloʼ tin waʼalaj tiʼ le kaajoʼ: «Le xiiboʼob yéetel le máaxoʼob áantkoʼoboʼ unaj u máanskoʼob áakʼab tu kaajil Jerusalén. Letiʼobeʼ yaan u kanáantkoʼonoʼob de áakʼab yéetel yaan u meyajoʼob de kʼiin».
23 Le oʼolaleʼ mix teen, mix in sukuʼunoʼob yéetel mix le máaxoʼob ku kananoʼob+ yanoʼob tin tséeloʼ maʼ t-kʼexaj k-nookʼiʼ. Cada juntúul tiʼ toʼoneʼ tiaʼan kaʼach u nuʼukulil u baʼateʼel tu x-noʼoj kʼabeʼ.
