Zacarías 12:1-14
12 Lelaʼ letiʼe baʼax ku yaʼalaʼalaʼ:
lelaʼ letiʼe baʼax ku yaʼalik Jéeoba tu yoʼolal Israelaʼ, lelaʼ u tʼaan Jéeoba,le máax jaymil le kaʼanoʼ,+le máax tsʼáa u cimientoil le luʼumoʼ,+yéetel le máax tsʼaamil u muukʼil u kuxtal wíinikoʼ, letiʼeʼ ku yaʼalik:
2 «Nikaʼaj in beet u pʼáatal Jerusalén jeʼex junpʼéel taza* ku beetik u káaltal yéetel u takchalankil le kaajoʼob yanoʼob tu baʼpachoʼ. Tsʼoʼoleʼ yaan u baʼpachtaʼal Judá bey xan Jerusalén tumen u enemigoʼob.+
3 Teʼ kʼiin jeʼeloʼ yaan in beetik u pʼáatal Jerusalén bey junpʼéel tuunich jach aal utiaʼal tuláakal le kaajoʼoboʼ. Tuláakal le máaxoʼob ken u tsʼáauba u chʼúuyoʼobeʼ yaan u jach loobiltkubaʼob.+ Tuláakal le kaajoʼob yanoʼob teʼ luʼumaʼ yaan u muʼuchʼloʼob utiaʼal u tsʼáaikubaʼob tu contra».+
4 Jéeobaeʼ ku yaʼalik: «Teʼ kʼiin jeʼeloʼ yaan in beetik u sen sajaktal tuláakal tsíimin, yéetel yaan in beetik u chokotal u pool le máaxoʼob natʼik le tsíiminoʼoboʼ. Teneʼ maʼ ken in luʼs in paakat tu yóokʼol Judá, chéen baʼaleʼ yaan in beetik u chʼóoptal tuláakal le tsíiminoʼob yanoʼob teʼ kaajoʼoboʼ.
5 U nuuktakil Judáeʼ yaan u yaʼalikoʼob ichil u puksiʼikʼaloʼob: ‹U kajnáaliloʼob Jerusalén tsʼáaiktoʼon muukʼ, le muukʼ ku tsʼáaikoʼobtoʼonoʼ ku taal tiʼ Jéeoba, le máax gobernartik le ángeloʼoboʼ›.+
6 Teʼ kʼiin jeʼeloʼ yaan in beetik ka pʼáatak u nuuktakil Judá bey junpʼéel nuʼukul ku tóochʼbal u kʼáakʼil ichil le cheʼoboʼ. Yaan in beetik ka pʼáatak bey junpʼéel antorcha táan u tóochʼbal u kʼáakʼil ichil u kúukuchal* trigo tsolaʼantakeʼ.+ Letiʼobeʼ unaj u xuʼulskoʼob tuláakal le kaajoʼob yanoʼob tu x-noʼojoʼob yéetel tu x-tsʼíikoʼoboʼ.+ U kajnáaliloʼob Jerusaléneʼ yaan u kaʼa pʼáatloʼob kajtal tu kaajaloʼob,* tu kaajil Jerusalén.+
7 Jéeobaeʼ yáaxeʼ yaan u salvartik le najoʼob de nookʼ yaan Judáoʼ, utiaʼal beyoʼ u paalal David yéetel u kajnáaliloʼob Jerusaléneʼ maʼ u tuklikoʼob wa maas maʼaloboʼob ke le uláakʼ kaajoʼob yanoʼob Judáoʼ.
8 Teʼ kʼiin jeʼeloʼ Jéeobaeʼ yaan u defendertik u kajnáaliloʼob Jerusalén,+ teʼ kʼiin jeʼeloʼ le máax maas débil yaniloʼ* yaan u yantal u muukʼ jeʼex Davideʼ, yéetel u paalal Davideʼ yaan u yantal u muukʼoʼob jeʼex Dioseʼ yéetel yaan u pʼáatloʼob jeʼex le u ángel Jéeoba ku bin táanil tiʼoboʼ.+
9 Teʼ kʼiin jeʼeloʼ teneʼ jach tu jaajil yaan in xuʼulsik tiʼ tuláakal le naciónoʼob kun taaloʼob tu contra Jerusalénoʼ.+
10 Teneʼ yaan in tsʼáaik in poder tu yóokʼol u paalal David bey xan tu yóokʼol u kajnáaliloʼob Jerusalén. Letiʼobeʼ yaan u lúubloʼob utsil tin táan yéetel yaan u kʼáat óolaloʼob tiʼ teen. Tsʼoʼoleʼ yaan u paktikoʼob le máax tu táatsʼlomtoʼoboʼ+ yéetel yaan u yoʼtikoʼob, yaan u beetkoʼob jeʼex u beetaʼal kéen kíimik u juntúuliliʼ hijo máakeʼ. Yaan u sen awat okʼoloʼob tu yoʼolal, yaan u beetkoʼob jeʼex le kéen kíimik u yáax hijo máakeʼ.
11 Teʼ kʼiin jeʼeloʼ u kajnáaliloʼob Jerusaléneʼ jach kʼaʼam kun okʼoloʼob, jeʼex úuchik u yokʼol le máakoʼob teʼ Adadrimónoʼ, teʼ Llanura de Meguidóoʼ.+
12 Tuláakal u kajnáaliloʼob le luʼumoʼ yaan u yawat okʼoloʼob, yaan u yawat okʼol cada junpʼéel familia. Yaan u yawat okʼol u familia David, le koʼoleloʼoboʼ junpáayil kun awat okʼoloʼob. Láayliʼ bey ken u beetil u familia Natánoʼ.+
13 Yaan u yawat okʼol u familia Leví,+ le koʼoleloʼoboʼ junpáayil kun awat okʼoloʼoboʼ. Láayliʼ bey ken u beetil u familia le simeyitaʼoboʼ.+
14 Bey xan ken u beetil le uláakʼ familiaʼob pʼaatloʼoboʼ. Yaan u yawat okʼol cada junpʼéel familia, le koʼoleloʼoboʼ junpáayil kun awat okʼoloʼob.
Notas
^ Wa «junpʼéel nuxiʼ taza».
^ Wa «u rollosil».
^ Wa «teʼ tuʼux unaj u kajtaloʼoboʼ».
^ Wa «le máax táan u takchalankiloʼ».
