Zacarías 3:1-10
3 Letiʼ túuneʼ tu beetaj in wilik Josué+ le u maas nojchil le sacerdoteʼoboʼ, letiʼeʼ tiʼ waʼalakbal kaʼach tu táan u ángel Jéeobaeʼ. Tin wilaj xan Satanás+ waʼalakbal tu x-noʼoj Josué yéetel táan u tsʼáaikuba tu contra.
2 U ángel Jéeoba túuneʼ tu yaʼalaj tiʼ Satanás: «¡Satanás, Jéeoba ka u kʼeyech!+ ¡Jéeoba, le máax yéey Jerusalénoʼ,+ letiʼ ka u kʼeyech! Josuéeʼ ¿maʼ wa bey junpʼéel siʼ jóoʼsaʼan ichil le kʼáakʼoʼ?».
3 Josuéeʼ tiʼ waʼalakbal kaʼach tu táan le ángeloʼ yéetel sucio le nookʼ u búukintmoʼ.
4 Le ángel túunoʼ tu yaʼalaj tiʼ le máaxoʼob waʼalakbaloʼob tu táanoʼ: «Luʼseʼex le nookʼ sucio yaantiʼoʼ». Le ángel túunoʼ tu yaʼalaj tiʼ Josué: «Ilawile, tsʼoʼok in pʼatkech limpioil tiʼ le baʼaloʼob maʼ maʼalobtak a beetmoʼ,* yéetel yaan u tsʼaʼabal a búukint kiʼichkelem nookʼoʼob».*+
5 Teen túuneʼ tin waʼalaj: «Baʼakʼak junpʼéel nookʼ limpio tu pool».+ Letiʼob túuneʼ tu chʼaʼajoʼob junpʼéel nookʼ limpioeʼ ka tu bakʼoʼob tu pool, tu tsʼáajoʼob xan u búukint uláakʼ nookʼ. Mientraseʼ u ángel Jéeobaeʼ tiʼ waʼalakbal naatsʼeʼ.
6 U ángel Jéeoba túuneʼ tu yaʼalaj tiʼ Josué:
7 «Lelaʼ letiʼe baʼax ku yaʼalik Jéeoba, le máax gobernartik le ángeloʼoboʼ: ‹Wa ka beetik tuláakal baʼax kin waʼalik yéetel ka beetik tuláakal le meyaj in kʼubéentmajtechoʼ, techeʼ yaan u páajtal a beetik a juezil tin wotoch+ yéetel yaan a kanáantik* u táankabiloʼob. Tsʼoʼoleʼ yaan u páajtal a wokol yéetel a jóokʼol teʼ tuʼux yanenaʼ, yaan u páajtal a beetik jeʼex u beetik le máaxoʼob yanoʼob tin táanaʼ›.
8 ‹Josué, u maas nojchil le sacerdoteʼoboʼ, uʼuy a wuʼuy lelaʼ yéetel uʼuyaʼak xan tumen le uláakʼ a wéet sacerdoteiloʼob ku kutaloʼob ta táanoʼ, tumen teʼexeʼ beyeʼex junpʼéel señal ku yeʼesik junpʼéel baʼax kun úuchleʼ. ¡Ilawileʼex! ¡Teneʼ táan in túuxtik le máax meyajtikenoʼ,+ u kʼaabaʼeʼ Kʼuʼukʼ!+
9 ¡Ilawileʼex le tuunich tsʼoʼok in tsʼáaik tu táan Josuéoʼ! Tu yóokʼol le tuunichaʼ yaan siete ichoʼobiʼ, yéetel tu yóokʼoleʼ yaan baʼax ken in tsʼíibtiʼ. Tiʼ junpʼéeliliʼ kʼiineʼ yaan in luʼsik le culpa yaan tiʼ le luʼumoʼ›, lelaʼ bey u yaʼalik Jéeoba, le máax gobernartik le ángeloʼoboʼ.+
10 Jéeoba, le máax gobernartik le ángeloʼoboʼ, ku yaʼalik: ‹Teʼ kʼiin jeʼeloʼ cada juntúul máakeʼ yaan u yaʼalik tiʼ u yéet máakil ka taalak kutal yáanal u boʼoy u pakʼal uva yéetel yáanal u boʼoy u pakʼal higo›».+
Notas
^ Wa «tiʼ le culpa yaantechoʼ».
^ Wa «u nookʼiloʼob fiesta».
^ Wa «yéetel yaan in kʼubéentiktech».
