Zacarías 5:1-11
5 Teen túuneʼ tin líiʼsaj in paakat tu kaʼatéeneʼ ka tin wilaj junpʼéel rollo* táan u máan teʼ kaʼanoʼ.
2 Le ángel túunoʼ tu kʼáatajten: «¿Baʼax ka wilik?».
Teneʼ tin núukajtiʼ: «Táan in wilik junpʼéel rollo ku máan teʼ kaʼanoʼ, u chowakileʼ óoliʼ nueve metros,* yéetel u kóochileʼ óoliʼ cuatro metros y medio».*
3 Letiʼ túuneʼ tu yaʼalajten: «Lelaʼ letiʼe maldición ku kʼiʼitpajal yóokʼol tuláakal le luʼumoʼ tumen maʼ castigartaʼak le máaxoʼob ku yookoloʼoboʼ+ kex tiʼ juntséel le rollooʼ ku yaʼalik unaj u maldecirtaʼal le máax ku yookoloʼ. Tsʼoʼoleʼ maʼ castigartaʼak xan le máax ku jurartik junpʼéel baʼal maʼ jaajoʼ+ kex tiʼ uláakʼ juntséel le rollooʼ ku yaʼalik unaj u maldecirtaʼal le máax ku jurartik junpʼéel baʼal maʼ jaajoʼ.
4 Jéeoba, le máax gobernartik le ángeloʼoboʼ, ku yaʼalik: ‹Tsʼoʼok in túuxtik le maldiciónoʼ, letiʼ túuneʼ yaan u yokol tu yotoch le máax ku yookoloʼ, bey xan tu yotoch le máax ku chʼaʼchiʼitik in kʼaabaʼ utiaʼal u jurartik junpʼéel baʼal maʼ jaajoʼ. Le maldición túunoʼ yaan u pʼáatal ichil le najoʼ yéetel yaan u xuʼulsiktiʼ, yaan u xuʼulsik tiʼ u cheʼiloʼob bey xan tiʼ u tuunichiloʼob›».
5 Le ángel ku tʼaan kaʼach tin wéeteloʼ, náatsʼ tin wiknaleʼ ka tu yaʼalajten: «Beet uts a líiʼsik a paakateʼ ka a wil le baʼax ku chíikpajloʼ».
6 Teen túuneʼ tin kʼáatajtiʼ: «¿Baʼax leloʼ?».
Letiʼeʼ tu núukaj: «Leloʼ junpʼéel xúuxak* utiaʼal u yúuchul pʼiis». Tu yaʼalaj xan: «Lelaʼ letiʼe bix u yilaʼal le kʼasaʼan máakoʼob yanoʼob tiʼ tuláakal le luʼumaʼ».
7 Tin wilaj túuneʼ chʼúuyaʼab u maak le xúuxakoʼ, le u maakaʼ wóolis yéetel beetaʼan de plomo, ichil le xúuxakoʼ tiʼ kulukbal kaʼach juntúul koʼoleliʼ.
8 Letiʼ túuneʼ tu yaʼalaj: «U kʼaabaʼ le koʼolelaʼ Kʼasaʼanil». Letiʼ túuneʼ tu kaʼa júupchʼintaj le koʼolel ichil le xúuxakoʼ ka tu kaʼa makaj le xúuxak yéetel le u maak de plomooʼ.
9 Tin líiʼsaj in paakateʼ ka tin wilaj táan u taal kaʼatúul koʼoleloʼob, táan kaʼach u xikʼnaloʼob. U xiikʼoʼobeʼ bey jeʼex u xiikʼoʼob le cigüeñaoʼ. Le kaʼatúul koʼoleloʼob túunoʼ tu chʼúuyoʼob le xúuxakoʼ ka tu bisoʼob kaʼan.*
10 Le ka tin wilaj leloʼ, tin kʼáataj tiʼ le ángel ku tʼaan tin wéeteloʼ: «¿Tuʼux ku bisaʼal le xúuxakoʼ?».
11 Letiʼeʼ tu núukaj: «Táan u bisaʼal tu luʼumil Sinar,*+ teʼeloʼ yaan u beetaʼal junpʼéel naj utiaʼal u tsʼaʼabaliʼ, le kéen listochajkeʼ yaan u tsʼaʼabal ichil, yaan u pʼáatal teʼ tuʼux unaj u yantaloʼ».
Notas
^ Ilawil página 2577.
^ Ich hebreoeʼ ku yaʼalaʼal kaʼach «20 codos». Ilawil «Codo», página 2559.
^ Ich hebreoeʼ ku yaʼalaʼal kaʼach «diez codos».
^ Ich hebreoeʼ ku yaʼalaʼal kaʼach «Efá». Ilawil «Efá», página 2561.
^ Ich hebreoeʼ ku yaʼalaʼal kaʼach «entre le kaʼan yéetel le luʼumoʼ».
^ Wa «Babilonia».