Apocalipsis 15:1-8
15 Ka tin wilaj uláakʼ junpʼéel señal teʼ kaʼanoʼ, junpʼéel señal jakʼbeʼen yéetel nojoch: tiʼ siete ángeloʼobeʼ+ kʼubéentaʼantiʼob siete castigoʼob. Leloʼobaʼ letiʼe u tsʼook castigoʼob kun antaloʼ, tumen tu yéeteloʼobeʼ yaan u xuʼulul u pʼujaʼanil Dios.+
2 Tin wilaj xan junpʼéel baʼal bey jeʼex junpʼéel kʼáaʼnáab de vidrio+ xaʼakʼtaʼan yéetel kʼáakʼeʼ bey xan le máaxoʼob maʼ béeychaj u ganartaʼaloʼob+ tumen le tsʼíitsʼik baʼalcheʼoʼ, tumen u imagen+ bey xan tumen u númeroil u kʼaabaʼoʼ.+ Le máakoʼobaʼ waʼalakbaloʼob tu jáal le kʼáaʼnáab de vidriooʼ yéetel u machmoʼob u arpaʼob Dios.
3 Táan xan u kʼaykoʼob u kʼaay Moisés+ u esclavo Dios bey xan u kʼaay le Tamanoʼ,+ ku yaʼalikoʼob:
«Jéeoba Dios, techeʼ jach táaj yaan a poder,+ tuláakal baʼax ka beetkeʼ nuuktak yéetel jach kiʼichkelemtak.+ Teech le Rey minaʼan xuʼulultiʼoʼ,+ a beeloʼobeʼ tojtak yéetel maʼalobtak.+
4 Jéeoba, ¿máax maʼ ken u respetartech? ¿Máax maʼ ken u alabart a kʼaabaʼ? Chéen teech chúukaʼan a wóol.+ Tuláakal le kaajoʼoboʼ yaan u taaloʼob ta táan yéetel yaan u adorarkechoʼob+ tumen tsʼoʼok u yilkoʼob ka beetik justicia».
5 Ka tsʼoʼokeʼ tin wilaj u jeʼepajal le lugar santo yaan teʼ tabernáculooʼ,*+ le yaan teʼ kaʼanoʼ.+
6 Teʼ lugar santooʼ tiʼ jóokʼ le siete ángeloʼob kʼubéentaʼantiʼob le siete castigoʼoboʼ.+ Letiʼobeʼ u búukintmoʼob nookʼ de lino, limpio yéetel táan u léembal. U kʼaxmaj xan u tseemoʼob yéetel kʼaxnakʼoʼob de oro.
7 Juntúul tiʼ le kantúul querubínoʼoboʼ tu tsʼáaj junpʼéel taza de oro tiʼ cada juntúul tiʼ le siete ángeloʼoboʼ, le tazaʼobaʼ chuuptak yéetel u pʼujaʼanil Dios,+ le máax kuxaʼan utiaʼal kʼiinoʼob minaʼan u xuuloʼ.
8 Ka túun chuʼup le lugar santo yéetel buutsʼ tu yoʼolal u kiʼichkelem sáasil Dios+ bey xan tu yoʼolal u poderoʼ. Mix máak ku páajtal u yokol kaʼach teʼ lugar santo hasta ken máanak le siete castigoʼob+ kʼubéentaʼan tiʼ le siete ángeloʼoboʼ.
Notas
^ Wa «le naj de nookʼ tuʼux yaan le baʼax u yaʼalmaj Diosoʼ».
