Apocalipsis 17:1-18
-
Ku yaʼalaʼal baʼax kun úuchul tiʼ le «Nojoch Babiloniaoʼ» (1-18)
17 Taal túun juntúul tiʼ le siete ángeloʼob tsʼaʼan le siete tazaʼob+ tiʼoboʼ, ka tu yaʼalajten: «Koʼoten ka in weʼestech le castigo kun taal tu yóokʼol le koʼolel chéen bey u máanoʼ, le koʼolel jach yaan u páajtalil yéetel kulukbal yóokʼol yaʼab jaʼoboʼ.+
2 Le koʼolel yanchaj baʼax u yil yéetel u reyiloʼob yóokʼol kaab+ yéetel tu káalkunsaj u kajnáaliloʼob luʼum yéetel u vinoil u núupkʼebanoʼ».*+
3 Le ángel túunoʼ tu bisen tiʼ junpʼéel desierto yéetel u páajtalil le espíritu santooʼ. Ka tin wilaj juntúul koʼolel kulukbal yóokʼol juntúul chak tsʼíitsʼik baʼalcheʼ chuup yéetel kʼaabaʼob utiaʼal u yaʼalaʼal baʼaloʼob tu contra Dios, yéetel yaan siete u pooloʼob bey xan diez u baakoʼob.
4 Le nookʼ u búukintmaj le koʼolelaʼ chak+ yéetel morado.* U jatsʼutskíintmuba xan yéetel oro, jatsʼuts tuunichoʼob bey xan yéetel perlaʼob.+ U machmaj xan junpʼéel copa de oro chuup yéetel x-lalaʼ baʼaloʼob bey xan yéetel le baʼaloʼob kʼaastak tu beetaj utiaʼal u núupkʼebantaloʼ.
5 Tu táanpoolaleʼ tsʼíibtaʼan junpʼéel kʼaabaʼ, junpʼéel baʼax maʼ ojéelaʼan baʼax u kʼáat u yaʼaliʼ: «Le Nojoch Babiloniaoʼ, u maama le koʼoleloʼob chéen bey u máanoʼoboʼ,+ u maama xan le x-lalaʼ baʼaloʼob yaan way yóokʼol kaaboʼ».+
6 Tin wilaj xaneʼ le koʼolelaʼ kalaʼan yéetel u kʼiʼikʼel le máaxoʼob santoʼoboʼ bey xan yéetel u kʼiʼikʼel u testigoʼob Jesús.+
Le ka tin wilaj le koʼoleloʼ jach táaj jaʼakʼ in wóol.
7 Le ángel túunoʼ tu yaʼalajten: «¿Baʼaxten jaʼakʼ a wóol? Teen ken in waʼaltech baʼax ku chíikbesik le koʼoleloʼ+ bey xan le tsʼíitsʼik baʼalcheʼ kuchmiloʼ, le yaan siete u pooloʼob yéetel diez u baakoʼoboʼ.+
8 Le tsʼíitsʼik baʼalcheʼ ta wiloʼ yaan kaʼachi, pero pʼáat minaʼan, kex beyoʼ jach nukaʼaj jóokʼol tiʼ le taamkach jooloʼ+ yéetel táan u bin tiʼ xuʼulsajil. Le u kajnáaliloʼob luʼum —le maʼ tsʼíibtaʼan u kʼaabaʼob tu rolloil le kuxtal+ desde ka káaj u síijil wíinikoʼob way yóokʼol kaabeʼ— yaan u jaʼakʼal u yóoloʼob le kéen u yiloʼob le tsʼíitsʼik baʼalcheʼ yaan kaʼach pero pʼáat minaʼanoʼ yéetel táan u yantal tu kaʼatéenoʼ.
9 Utiaʼal lelaʼ kʼaʼabéet u yantal naʼat tiʼ máak: le siete pooloʼoboʼ+ u kʼáat u yaʼal siete montañaʼob tuʼux ku kutal le koʼoleloʼ.
10 Yaan siete reyoʼob: cinco u túulaleʼ tsʼoʼok u máanoʼob, juntúuleʼ way yaneʼ yéetel le uláakʼ juntúuloʼ maʼ kʼuchkiʼ, chéen baʼaleʼ le kéen kʼuchkeʼ chéen junpʼíit tiempo kun antal.
11 Le tsʼíitsʼik baʼalcheʼ yaan kaʼach yéetel pʼáat minaʼanoʼ,+ juntúul rey xan, letiʼ u ochoil. Letiʼeʼ tiʼ jóokʼ ichil le siete reyoʼoboʼ yéetel yaan xan u xuʼulsaʼal.
12 Le diez baakoʼob ta wilaj xanoʼ u kʼáat u yaʼal diez reyoʼob maʼ kʼuʼubuk u reinoʼobiʼ, chéen baʼaleʼ yaan u tsʼaʼabal autoridad tiʼob utiaʼal u reinaroʼob ichil junpʼéel hora junmúuchʼ yéetel le tsʼíitsʼik baʼalcheʼoʼ.
13 Le reyoʼobaʼ junpʼéeliliʼ u tuukuloʼob, le oʼolal ku tsʼáaik u muukʼoʼob yéetel u autoridadoʼob tiʼ le tsʼíitsʼik baʼalcheʼoʼ.
14 Letiʼobeʼ yaan u baʼateloʼob tu contra le Tamanoʼ,+ chéen baʼaleʼ yaan u ganartaʼaloʼob+ tumen le Tamanoʼ, tumen letiʼeʼ u Yuumtsil yuumtsiloʼob yéetel u Rey le reyoʼoboʼ.+ Le máaxoʼob xan yanoʼob tu yéeteloʼ, le máaxoʼob tʼanaʼanoʼob, yéeyaʼanoʼob yéetel chúukaʼan u yóoloʼoboʼ, yaan xan u ganaroʼob».+
15 Ka tu yaʼalaj xan ten: «Le jaʼob ta wilaj tuʼux kulukbal le koʼolel chéen bey u máanoʼ, u kʼáat u yaʼal yaʼab kaajoʼob, máakoʼob, luʼumoʼob yéetel jejeláas idiomaʼob.+
16 Le diez baakoʼob+ yéetel le tsʼíitsʼik baʼalcheʼ+ ta wiloʼ yaan u pʼektikoʼob le koʼolel chéen bey u máanoʼ.+ Tsʼoʼoleʼ yaan u tokikoʼob tuláakal baʼax yaantiʼ, yaan u pʼatkoʼob x-maʼ nookʼil, yaan u jaantikoʼob u bakʼel yéetel yaan u xuʼulskoʼob yéetel kʼáakʼ.+
17 Tumen Dioseʼ tu tsʼáaj ichil u puksiʼikʼaloʼob ka u tsʼoʼokbesoʼob le baʼax u tukultmoʼ.+ Jach beyoʼ, ka u tsʼoʼokbesoʼob le junpʼéeliliʼ tuukul yaantiʼoboʼ, ikil u kʼubik u reinoʼob tiʼ le tsʼíitsʼik baʼalcheʼoʼ+ tak ken béeychajak le baʼaxoʼob u yaʼalmaj Diosoʼ.
18 Le koʼolel+ ta wiloʼ u kʼáat u yaʼal le nojoch kaaj ku reinar tu yóokʼol u reyiloʼob yóokʼol kaaboʼ».
