Apocalipsis 21:1-27
21 Teen túuneʼ tin wilaj junpʼéel túumben kaʼan yéetel junpʼéel túumben luʼum,+ tumen le kaʼan yéetel le luʼum yanoʼob kaʼachoʼ tsʼoʼok u pʼáatal minaʼanoʼob,+ yéetel le kʼáaʼnáaboʼ+ tsʼoʼok u pʼáatal minaʼan xan.
2 Ka tin wilaj xan le santo kaajoʼ, le Túumben Jerusalénoʼ, letiʼeʼ táan u yéemel desde teʼ kaʼan teʼ tuʼux yaan Diosoʼ.+ Le kaajaʼ jatsʼutskíintaʼan xan jeʼex u jatsʼutskíintaʼal juntúul noviatsil utiaʼal u yíichameʼ.+
3 Ka tsʼoʼokeʼ tin wuʼuyaj junpʼéel kʼaʼamkach tʼaan jóokʼ teʼ trono táan u yaʼalik: «¡Ilawile! U yotoch* Dioseʼ tiaʼan yiknal le máakoʼoboʼ. Dioseʼ yaan u kajtal tu yéeteloʼob, yéetel letiʼobeʼ yaan u kʼuchul u beetubaʼob u kaajal. Jach beyoʼ, Dioseʼ yaan u yantal tu yéeteloʼob.+
4 Letiʼeʼ yaan u choʼik tuláakal u jaʼil u yichoʼob,+ maʼ tun yantal kíimil,+ mix okʼol, mix kʼiʼinamil yéetel mix máak kun muʼyaj.+ Le baʼaloʼob suuk u yúuchul kaʼachoʼ tsʼoʼok u máanoʼob».
5 Le Máax kulukbal teʼ trono+ xanoʼ tu yaʼalaj: «¡Ilawile! Teneʼ táan in túumbenkuntik tuláakal baʼal».+ Tu yaʼalaj xan: «Tsʼíibt le tʼaanoʼobaʼ tumen jach jaajtakoʼob* yéetel yaan u béeytaloʼob».
6 Ka tu yaʼalajten: «¡Tsʼoʼok u béeytaloʼob! Teen le Alfa yéetel le Omegaoʼ,* teen u káajbal yéetel u xuul.+ Tiʼ jeʼel máaxak ukʼajeʼ yaan in tsʼáaik u yukʼ u jaʼil le kuxtal yaan teʼ sayaboʼ,+ mix baʼal unaj u boʼotik.
7 Tuláakal le baʼaloʼobaʼ yaan in síik tiʼ jeʼel máaxak ku ganartik le baʼateloʼ, teneʼ yaan in beetkinba u Dios yéetel letiʼeʼ yaan u beetkuba in paal.
8 Chéen baʼaleʼ le máaxoʼob saajkoʼoboʼ, le máaxoʼob minaʼan u fejoʼoboʼ,+ le máaxoʼob maʼ limpio yaniloʼob tu táan Dios yéetel ku beetkoʼob baʼaloʼob kʼaastakoʼ, le asesinoʼoboʼ,+ le ku núupkʼebantaloʼoboʼ,*+ le ku beetik u j-meeniloʼoboʼ,* le ku adorarkoʼob imagenoʼoboʼ bey xan tuláakal le máaxoʼob ku tuusoʼoboʼ+ yaan u náajaltikoʼob u puʼululoʼob teʼ kʼáaʼnáab ku tóochʼbal u kʼáakʼil yéetel azufreoʼ.+ Lelaʼ letiʼe kaʼa kíimiloʼ».+
9 Juntúul tiʼ le siete ángeloʼob tsʼaʼantiʼob le siete tazaʼob chuuptak yéetel le u tsʼook siete castigoʼoboʼ,+ taaleʼ ka tu yaʼalajten: «Koʼoten ka in weʼestech le noviatsiloʼ, u yatan le Tamanoʼ».+
10 Letiʼ túuneʼ tu bisen yéetel u páajtalil le espíritu santo tiʼ junpʼéel sen kaʼanal yéetel nojoch montañaeʼ ka tu yeʼesajten u santo kaajil Jerusalén, le kaaj táan u yéemel desde teʼ kaʼan teʼ tuʼux yaan Diosoʼ,+
11 le kaaj ku léembal yéetel u kiʼichkelem sáasil Diosoʼ.+ Le kaajaʼ ku jóopbal jeʼex junpʼéel tuunich jach táaj kiʼichkelmeʼ, jeʼex ka jóopbalnak junpʼéel u tuunichil jaspe sáaskʼaleʼen jeʼex le cristaloʼ.+
12 U baʼpakʼiloʼobeʼ nuuktak yéetel kaʼanaltak. Yéetel yaan 12 u joonajiloʼob, tiʼ cada junpʼéel joonajeʼ waʼalakbal juntúul ángel, tu kaʼanlil le joonajoʼoboʼ tsʼíibtaʼan u kʼaabaʼ u 12 tribuiloʼob u paalal Israel.
13 Tu lakʼinileʼ yaan óoxpʼéel joonajoʼobiʼ, tu xamanileʼ óoxpʼéel joonajoʼob, tu noojolileʼ óoxpʼéel joonajoʼob yéetel tu chikʼinileʼ óoxpʼéel joonajoʼob.+
14 U baʼpakʼiloʼob le kaajoʼ etsʼekbaloʼob yóokʼol 12 tuunichoʼob, tu yóokʼol le tuunichoʼobaʼ tsʼíibtaʼan le 12 kʼaabaʼob yaan tiʼ u 12 apóstoloʼob+ le Tamanoʼ.
15 Le máax ku tʼaan tin wéeteloʼ u machmaj kaʼach junpʼéel cheʼ* de oro utiaʼal u pʼisik le kaajoʼ, u joonajiloʼob bey xan u baʼpakʼiloʼob.+
16 Le kaajoʼ cuadrado bix beetaʼanil, jeʼex bukaʼaj u chowakileʼ bukaʼaj xan u kóochiloʼ. Letiʼeʼ tu pʼisaj le kaaj yéetel le cheʼoʼ, le ka tu pʼiseʼ tu tsʼáaj kex 2,220 kilómetros.* U chowakil, u kóochil yéetel u kaʼanlileʼ junpʼéeliliʼ medida yaantiʼob.
17 Tsʼoʼoleʼ tu pʼisaj xan le pakʼoʼob yaan tu baʼpachoʼ ka tu tsʼáaj 144 codos,* según le medida ku meyaj tiʼ máakoʼ yéetel según le medida ku meyaj tiʼ juntúul ángeloʼ.
18 U baʼpakʼiloʼob le kaajoʼ beetaʼan yéetel jaspe.+ Le kaajoʼ beetaʼan yéetel tsʼúuk oro chíikaʼan tiʼ sáaskʼaleʼen vidrio.
19 U cimientoiloʼob u baʼpakʼil le kaajoʼ jatsʼutskíintaʼan yéetel u jejeláasil jatsʼuts tuunichoʼob: le yáax junpʼéeloʼ jaspe, le u kaʼapʼéeloʼ zafiro, le u yóoxpʼéeloʼ calcedonia, le u kanpʼéeloʼ esmeralda,
20 le u cincooʼ sardónica, le u seisoʼ sardio, le u sieteoʼ crisólito, le u ochooʼ berilo, le u nueveoʼ topacio, le u diezoʼ crisoprasa, le u onceoʼ jacinto, le u doceoʼ amatista.
21 Tsʼoʼoleʼ le 12 joonajoʼoboʼ 12 perlaʼob, cada joonajeʼ beetaʼan yéetel junpʼéel perla. U noj bejil le kaajoʼ beetaʼan yéetel tsʼúuk oro, sáaskʼaleʼen jeʼex vidrioeʼ.
22 Ichil le kaajoʼ maʼ tin wilaj mix junpʼéel temploiʼ, tumen Jéeoba Dios le máax jach táaj yaan u poderoʼ+ bey xan le Tamanoʼ, letiʼob u temploil le kaajoʼ.
23 Le kaajoʼ maʼ kʼaʼabéet u sáasilkuntaʼal tumen le Kʼiinoʼ mix tumen le Lunaoʼ tumen u kiʼichkelem sáasil Dios sáasilkuntik,+ yéetel u lámparaeʼ letiʼe Tamanoʼ.+
24 U kajnáaliloʼob le luʼumoʼoboʼ yaan u máanoʼob yáanal u sáasilil,+ yéetel u reyiloʼob yóokʼol kaabeʼ yaan u tsʼáaikoʼob tiʼ le kaaj le páajtalil yaan tiʼ letiʼoboʼ.
25 U joonajiloʼobeʼ junpuliʼ maʼ kun kʼalbiloʼob de kʼiin, tumen teʼeloʼ maʼ bíin áakʼabchajkiʼ.+
26 U kajnáaliloʼob le luʼumoʼoboʼ yaan u kiʼichkelemkúuntikoʼob le kaajoʼ yéetel jach yaan u respetarkoʼob.+
27 Chéen baʼaleʼ jeʼel baʼalak maʼ limpio yanil tu táan Dios yéetel jeʼel máaxak ka tuusnak wa ka u beet wa baʼax jach táaj kʼaaseʼ, junpuliʼ maʼ kun ookliʼ.+ Chéen yaan u yokol le máaxoʼob tsʼíibtaʼan u kʼaabaʼob tu rolloil le kuxtal yaan tiʼ le Tamanoʼ.+
Notas
^ Ich griegoeʼ ku yaʼalaʼal kaʼach «u yotoch de nookʼ».
^ Wa «jeʼel u páajtal u kʼubik u yóol máak tiʼeʼ».
^ Wa «Teen le A yéetel le Z». Le Alfaoʼ letiʼe yáax letra yaan teʼ abecedario griegooʼ yéetel le Omegaoʼ letiʼ u tsʼook.
^ Wa «espiritistailoʼoboʼ».
^ Ilawil página 2573.
^ Ich griegoeʼ ku yaʼalaʼal kaʼach «junpʼéel caña».
^ Ich griegoeʼ ku yaʼalaʼal kaʼach «12,000 estadios».
^ Lelaʼ kex 64 metros.
