Apocalipsis 22:1-21
22 Le ángel túunoʼ tu yeʼesajten u ríoil le kuxtaloʼ,+ le ríoaʼ sáaskʼaleʼen jeʼex le vidriooʼ yéetel ku jóokʼol desde tu trono Dios yéetel tu trono le Tamanoʼ,+
2 yéetel ku yáalkab chúumuk tiʼ le noj bejoʼ. Tu kaʼatséelil le ríooʼ yaan u cheʼiloʼob kuxtal ku yichankiloʼob 12 u téenel cada año, juntéen cada mes. U leʼ le cheʼoboʼ ku meyaj utiaʼal u tsʼaʼakal u kajnáaliloʼob le luʼumoʼoboʼ.+
3 Mix junpʼéel maldición kun lúubul tu yóokʼol le kaajaʼ. Baʼaxeʼ u trono Dios yéetel u trono le Tamanoʼ+ yaan u yantaloʼob ichil le kaajoʼ. Le máaxoʼob meyajtik Diosoʼ yaan u beetkoʼob junpʼéel meyaj santo,
4 yaan u yilkoʼob u táan u yich+ yéetel yaan u tsʼíibtaʼal u kʼaabaʼ Dios tu táanpoolaloʼob.+
5 Teʼeloʼ maʼ tun antal áakʼabiʼ,+ yéetel u kajnáaliloʼobeʼ maʼ tun kʼaʼabéettaltiʼob u sáasilil junpʼéel lámpara, mix u juul le Kʼiinoʼ, tumen Jéeoba Dios kun beetik u juul sáasil tu yóokʼoloʼob.+ Letiʼob túuneʼ yaan u reinaroʼob utiaʼal kʼiinoʼob minaʼan u xuul.+
6 Le ángeloʼ tu yaʼalajten: «Le tʼaanoʼobaʼ jach jaajtak* yéetel yaan u béeytaloʼob.+ Jach beyoʼ, Jéeoba Dios, le máax tu tsʼáaj tu tuukul le profetaʼob+ baʼax ken u yaʼaloʼoboʼ, tu túuxtaj u ángel utiaʼal ka u yeʼes tiʼ le máaxoʼob meyajtik le baʼaxoʼob kun úuchul ichil junpʼíit kʼiinoʼ.
7 ¡Ilawile!, táan in taal tu séebaʼanil.+ Kiʼimak u yóol jeʼel máaxak ku tsʼoʼokbesik u tʼaaniloʼob le profecía tsʼíibtaʼan teʼ rolloaʼ».+
8 Teen Juaneʼ, teen uʼuy yéetel il le baʼaloʼobaʼ. Le ka tin wilaj yéetel le ka tin wuʼuyeʼ xolajen in adorart le ángel tu yeʼesajten le baʼaloʼobaʼ.
9 Chéen baʼaleʼ letiʼeʼ tu yaʼalajten: «¡Maʼ! ¡Maʼ a beetik leloʼ! Teneʼ chéen juntúul esclavoen jeʼex teech yéetel a sukuʼunoʼob le profetaʼoboʼ bey xan jeʼex le máaxoʼob táan u tsʼoʼokbeskoʼob u tʼaaniloʼob le rolloaʼ. Adorart Dios».+
10 Tsʼoʼoleʼ tu yaʼalajten: «Maʼ a sellartik u tʼaaniloʼob le profecía tsʼíibtaʼan teʼ rolloaʼ, tumen tsʼoʼok u náatsʼal le kʼiin aʼalaʼanoʼ.
11 Le máax ku beetik injusticiaoʼ seguernak u beetik injusticia, yéetel le máax maʼ limpio tu táan Diosoʼ seguernak maʼ limpio tu táan Diosiʼ. Chéen baʼaleʼ le máax ku beetik baʼax tojoʼ seguernak u beetik baʼax toj, yéetel le máax limpio tu táan Diosoʼ seguernak limpio tu táan Dios.
12 ‹¡Ilawile! Táan in taal tu séebaʼanil, yéetel in chʼaʼamaj le premio ken in tsʼáaoʼ, utiaʼal beyoʼ ka in boʼot tiʼ cada juntúul le baʼax u náajaltmaj tu yoʼolal baʼax u beetmoʼ.+
13 Teen le Alfa yéetel le Omegaoʼ,*+ le yáax yéetel le u tsʼookoʼ, u káajbal yéetel u xuul.
14 Kiʼimak u yóol le máaxoʼob ku pʼoʼik u chowak nookʼoʼob+ utiaʼal ka chaʼabak u náatsʼloʼob yiknal u cheʼiloʼob le kuxtaloʼ+ bey xan utiaʼal ka chaʼabak u yookloʼob tu joonajiloʼob le kaajoʼ.+
15 Paachil tiʼ le kaajoʼ tiaʼan le máakoʼob beyoʼob peekʼoʼoboʼ,* le j-meenoʼoboʼ,* le ku núupkʼebantaloʼoboʼ,* le asesinoʼoboʼ, le ku adorarkoʼob imagenoʼoboʼ bey xan tuláakal le máaxoʼob uts tu yich u tuusoʼob yéetel maʼ tu xuʼulul u beetkoʼoboʼ›.+
16 ‹Teen Jesúseʼ, tin túuxtaj in ángel utiaʼal u tsʼáa a wojéelteʼex le baʼaloʼobaʼ, tumen ku taasik utsil tiʼ le múuchʼuliloʼoboʼ. Teen u moots yéetel teen u paal David+ yéetel teen xan le estrella ku jóopbal jaʼatskab kʼiinoʼ›».+
17 Le espíritu santo yéetel le noviatsiloʼ+ maʼ tu xuʼulul u yaʼalikoʼob: «¡Koʼoten!». Yéetel jeʼel máaxak ka u yuʼubeʼ ka u yaʼal xan: «¡Koʼoten!». Yéetel jeʼel máaxak ka ukʼajchajkeʼ taalak.+ Jeʼel máaxak xan u kʼáateʼ u yukʼ u jaʼil le kuxtaloʼ, maʼ kʼaʼabéet u boʼotik mix baʼaliʼ.+
18 «Tiʼ tuláakal máax ku yuʼubik u tʼaaniloʼob le profecía tsʼíibtaʼan teʼ rolloaʼ kin waʼalik lelaʼ: wa yaan máax ku tsʼáaik u maasil tiʼ le baʼaxoʼob tsʼíibtaʼanoʼ,+ Dioseʼ yaan u taasik tu yóokʼol le castigoʼob tsʼíibtaʼan teʼ rolloaʼ,+
19 yéetel wa yaan máax ku luʼsik wa baʼax tiʼ le profecía tsʼíibtaʼan teʼ rolloaʼ, Dioseʼ yaan u luʼsiktiʼ u páajtalil u kʼamik le maʼalob baʼaloʼob tsʼíibtaʼanoʼob teʼ rolloaʼ. Leloʼ u kʼáat u yaʼaleʼ Dioseʼ maʼ ken u chaʼa u jaantik u yich u cheʼiloʼob le kuxtaloʼ+ yéetel maʼ ken u chaʼa u yokol teʼ santo kaajoʼ.+
20 Le máax tsʼáaik ojéeltbil le baʼaloʼobaʼ ku yaʼalik: ‹Jach beyoʼ, táan in taal tu séebaʼanil›».+
«¡Ka béeyak!* Koʼoten, Yuumtsil Jesús».
21 Teneʼ kin kʼáatik tiʼ Dios ka u yeʼes Yuumtsil Jesucristo u nojoch utsil tiʼ le máaxoʼob santoʼoboʼ.
Notas
^ Wa «jeʼel u páajtal u kʼubik u yóol máak tiʼeʼ».
^ Wa «Teen le A yéetel le Z». Le Alfaoʼ letiʼe yáax letra yaan teʼ abecedario griegooʼ yéetel le Omegaoʼ letiʼ u tsʼook.
^ Letiʼe máaxoʼob beetik baʼaloʼob kʼaastak tu táan Diosoʼ.
^ Wa «espiritistaʼoboʼ».
^ Ilawil página 2573.
^ Wa «¡Amén!».
