Apocalipsis 7:1-17
7 Ka tsʼoʼok lelaʼ, tin wilaj kantúul ángeloʼob waʼalakbaloʼob tu kantiʼitsil le yóokʼol kaaboʼ. Letiʼobeʼ u kʼatmoʼob u beel le iikʼoʼob ku taaloʼob tu kantiʼitsil le luʼumoʼ, utiaʼal beyoʼ maʼ u taal mix junpʼéel iikʼ yóokʼol le luʼumoʼ, yóokʼol le kʼáaʼnáaboʼ mix yóokʼol le cheʼoboʼ.
2 Ka tin wilaj uláakʼ juntúul ángel táan u líikʼil tu tojil tuʼux ku tíipʼil kʼiin,* u machmaj u sello le kuxaʼan Diosoʼ. Letiʼeʼ tu kʼaʼam tʼanaj le kantúul ángeloʼob tsʼaʼantiʼob u páajtalil u beetkoʼob loob tiʼ le luʼum yéetel tiʼ le kʼáaʼnáaboʼ,
3 ka tu yaʼalaj: «Maʼ a beetkeʼex loob tiʼ le luʼumoʼ, mix tiʼ le kʼáaʼnáaboʼ, mix tiʼ le cheʼoboʼ, tak ken tsʼoʼokok k-sellartik+ u esclavoʼob k-Dios tu táanpoolaloʼob».+
4 Ka túun tin wuʼuyaj jaytúul le sellartaʼaboʼ: 144,000 u túulaloʼob.+ Letiʼobeʼ yéeyaʼaboʼob tiʼ tuláakal u tribuiloʼob u paalal Israel.+
5 Tiʼ u paalal Judáeʼ 12,000 sellartaʼabiʼ;tiʼ u paalal Rubéneʼ 12,000;tiʼ u paalal Gadeʼ 12,000;
6 tiʼ u paalal Asereʼ 12,000;tiʼ u paalal Neftalíeʼ 12,000;tiʼ u paalal Manaséseʼ+ 12,000;
7 tiʼ u paalal Simeóneʼ 12,000;tiʼ u paalal Levíeʼ 12,000;tiʼ u paalal Isacareʼ 12,000;
8 tiʼ u paalal Zabulóneʼ 12,000;tiʼ u paalal Joséeʼ 12,000;tiʼ u paalal Benjamíneʼ 12,000 sellartaʼabiʼ.
9 Le ka tsʼoʼok lelaʼ, paakatnajeneʼ ka tin wilaj yaʼabkach máakoʼob mix máak ku páajtal u xokik. Letiʼobeʼ taaljaʼanoʼob tiʼ tuláakal luʼumoʼob, tribuʼob, kaajoʼob yéetel tiʼ jejeláas idiomaʼob,+ waʼalakbaloʼob tu táan le trono yéetel tu táan le Tamanoʼ. Le máakoʼobaʼ u búukintmoʼob chowak sak nookʼoʼob+ yéetel u machmoʼob xaʼanoʼob.+
10 Letiʼobeʼ maʼ tu xuʼulul kaʼach u kʼaʼam awtikoʼob: «K-salvacióneʼ tiʼ Dios u taal, le máax kulukbal teʼ tronooʼ,+ bey xan tiʼ le Tamanoʼ».+
11 Tuláakal le ángeloʼoboʼ waʼalakbaloʼob kaʼach tu baʼpach le tronooʼ bey xan tu baʼpach le ancianoʼob+ yéetel le kantúul querubínoʼoboʼ. Letiʼob túuneʼ xolajoʼobeʼ ka chinlajoʼob tu táan le tronooʼ ka tu adorartoʼob Dios
12 táan u yaʼalikoʼob: «¡Ka béeyak!* Le bendiciónoʼ, le alabanzaoʼ, le naʼatiloʼ, le graciasoʼ, le respetooʼ, le páajtaliloʼ yéetel le muukʼoʼ unaj u tsʼaʼabal tiʼ k-Dios utiaʼal kʼiinoʼob minaʼan u xuul.+ Ka béeyak».
13 Tu yoʼolal lelaʼ, juntúul tiʼ le ancianoʼoboʼ tu yaʼalajten: «Le máakoʼob u búukintmoʼob chowak sak nookʼoʼobaʼ,+ ¿máaxoʼobiʼ yéetel tuʼux u taaloʼob?».
14 Ka túun tin jáan núukajtiʼ: «In Yuumtsil, teech a wojel leloʼ». Ka tu yaʼalajten: «Le jeʼeloʼobaʼ letiʼe máaxoʼob ku jóokʼloʼob tiʼ le nojoch muʼyajiloʼ,+ tsʼoʼok u pʼoʼik u chowak nookʼoʼob yéetel tsʼoʼok u sakkúuntikoʼob yéetel u kʼiʼikʼel le Tamanoʼ.+
15 Le oʼolal waʼalakbaloʼob tu táan u trono Dios, yéetel táan u beetkoʼob junpʼéel meyaj santo bul kʼiin yéetel bul áakʼab tu templo Dios. Le máax kulukbal teʼ tronooʼ+ yaan u jayik u nookʼil u yotoch tu yóokʼoloʼob.+
16 Maʼ ken u muʼyajtoʼob wiʼijil, mix ukʼajil, maʼ kun tóokbiloʼob tumen kʼiin, mix ken u muʼyajtoʼob ooxol,+
17 tumen le Taman+ waʼalakbal chúumuk tiʼ le tronooʼ letiʼ kun kanáantkoʼob+ yéetel letiʼ kun nuʼuktikoʼob tak tu sayabiloʼob u jaʼil le kuxtaloʼ.+ Dios xaneʼ yaan u choʼik tuláakal u jaʼil u yichoʼob».+
