Daniel 12:1-13
12 Teʼ kʼiinoʼob jeʼeloʼ yaan u líikʼil Miguel,*+ le nojoch príncipe+ tiaʼan tu favor a kaajaloʼ.* Yéetel yaan u yantal kʼiinoʼob tuʼux kun sen muʼyaj máak, le baʼax kun úuchloʼ mix juntéen ilaʼak desde ka yanchaj le yáax kaajoʼ. Teʼ kʼiinoʼob jeʼeloʼ a kaajaleʼ yaan u salvarkuba,+ yaan u salvarkuba tuláakal le máaxoʼob tsʼíibtaʼan u kʼaabaʼob teʼ librooʼ.+
2 Yaʼab tiʼ le máaxoʼob kimenoʼoboʼ* yaan u yaajloʼob, jujuntúuloʼobeʼ utiaʼal u kuxtaloʼob utiaʼal minaʼan u xuul, yéetel uláakʼoʼobeʼ utiaʼal u pʼaʼatloʼob ich suʼtsilil yéetel utiaʼal u pʼektaʼaloʼob mantatsʼ.
3 Le máaxoʼob yaan u naʼatoʼoboʼ yaan u léembal u sáasiloʼob jeʼex u léembal le kaʼanoʼoboʼ. Yéetel le máaxoʼob kun áantik le yaʼabkach máakoʼob utiaʼal u beetkoʼob baʼax maʼaloboʼ yaan u léembaloʼob utiaʼal mantatsʼ jeʼex u léembal le estrellaʼoboʼ.
4 Chéen baʼaleʼ Daniel, techeʼ taʼak le tʼaanoʼobaʼ yéetel pʼat selladoil le libro tak ken kʼuchuk le u tsʼook kʼiinoʼoboʼ.+ Yaʼab máakoʼobeʼ yaan u jach xakʼalxoktikoʼob le librooʼ,* yéetel le u jaajil kʼaj óolaloʼ yaan u sen yaʼabtal».+
5 Teen, Danieleʼ, paakatnajeneʼ ka tin wilaj uláakʼ kaʼatúul ángeloʼob waʼalakbaloʼob, juntúuleʼ waʼalakbal tiʼ junpʼéel u tséel le ríooʼ yéetel uláakʼeʼ tiʼ le uláakʼ u tséeloʼ.+
6 Juntúul tiʼ letiʼobeʼ tu tʼanaj le máak u búukintmaj junpʼéel nookʼ de lino+ yéetel waʼalakbal tu yóokʼol le ríooʼ. Tu tʼaneʼ ka tu kʼáatajtiʼ: «¿Bukaʼaj tiempo kun máan utiaʼal ka béeychajak le jakʼbeʼen baʼaloʼobaʼ?».
7 Le máak túun u búukintmaj junpʼéel nookʼ de lino yéetel waʼalakbal tu yóokʼol le ríooʼ, tu líiʼsaj u x-noʼoj kʼab yéetel u x-tsʼíik kʼab tu tojil le kaʼanoʼ. Letiʼ túuneʼ tu jurartaj tu kʼaabaʼ le Máax kuxaʼan utiaʼal mantatsʼoʼ:+ «Yaan u béeytal ichil junpʼéel año, kaʼapʼéel año yéetel táanchumuk año.*+ Tuláakal le baʼaloʼobaʼ yaan u béeytal chéen pʼelak u tsʼoʼokol u xuʼulsaʼal tiʼ u páajtalil le kaaj santooʼ».
8 Teen túuneʼ tin wuʼuyaj le baʼaloʼobaʼ, chéen baʼaleʼ maʼ páajchaj in naʼatikiʼ.+ Le oʼolal tin waʼalaj: «Aay, in yuum, ¿bix bíin tsʼoʼokok le baʼaloʼobaʼ?».
9 Letiʼ túuneʼ tu yaʼalajten: «Daniel, xeen, tumen le tʼaanoʼobaʼ yaan u taʼakaʼaloʼob yéetel yaan u pʼáatloʼob selladoil tak teʼ tu tsʼook kʼiinoʼoboʼ.+
10 Yaʼab máakoʼobeʼ yaan u limpiokíinkubaʼob yéetel yaan u sakkúuntikubaʼob, letiʼobeʼ yaan u maas maʼalobkíintaʼaloʼob.+ Le kʼasaʼan máakoʼoboʼ yaan u beetkoʼob baʼaloʼob kʼaastak, yéetel mix juntúul kʼasaʼan máak ken u naʼat le tʼaanoʼobaʼ. Chéen baʼaleʼ le máaxoʼob yaan u naʼatoʼoboʼ yaan u naʼatkoʼob.+
11 Desde le kéen xuʼuluk u kʼuʼubul le ofrendaʼob ku kʼuʼubul sáamsamaloʼ+ yéetel desde le kéen tsʼaʼabak tu lugar le x-laʼ baʼal ku taasik xuʼulsajiloʼ+ yaan u máan 1,290 días.
12 ¡Kiʼimak u yóol le máax ku chúukpajal u yóol u páaʼt* u kʼuchul tu xuul le 1,335 díasoʼ!
13 Chéen baʼaleʼ Daniel, techeʼ chúukpajak a wóol tak tu xuul. Yaan a jeʼelel, chéen baʼaleʼ le kéen xuʼuluk u kʼiiniloʼob a páaʼtajeʼ yaan a líikʼil utiaʼal a kʼamik a boʼol».*+
Notas
^ U kʼáat u yaʼal «¿Máax Jeʼex Dioseʼ?».
^ Ich hebreoeʼ ku yaʼalaʼal kaʼach «u paalal a kaajaloʼ».
^ Ich hebreoeʼ ku yaʼalaʼal kaʼach «le máaxoʼob táan u weenloʼob tu polvoil le luʼumoʼ».
^ Ich hebreoeʼ ku yaʼalaʼal kaʼach «Yaʼab máakoʼobeʼ yaan u máan u kaaxanoʼob».
^ Ich hebreoeʼ ku yaʼalaʼal kaʼach «junpʼéel tiempo, tiempos yéetel u táanchumukil junpʼéel tiempo».
^ Wa «le máax maʼ tu náayal u yóol u páaʼt».
^ Wa «utiaʼal a wantal teʼ lugar yéeyaʼan a tiaʼaloʼ».
