Deuteronomio 10:1-22
10 Teʼ kʼiinoʼob jeʼeloʼ Jéeobaeʼ tu yaʼalajten: ‹Beet kaʼapʼéel jaajay tuunichoʼob jeʼex le yáaxoʼoboʼ,+ yéetel naʼaken teʼ montaña tuʼux yanenaʼ. Kʼaʼabéet xan a beetik junpʼéel caja* de cheʼ.
2 Yóokʼol le jaajay tuunichoʼoboʼ yaan in tsʼíibtik le tʼaanoʼob yaan kaʼach teʼ yáax jaajay tuunichoʼob ta kaʼakachoʼ. Le kéen tsʼoʼokkeʼ unaj a tsʼáaikoʼob ichil le cajaoʼ›.
3 Teen túuneʼ tin beetaj junpʼéel caja de u cheʼil acacia* bey xan kaʼapʼéel jaajay tuunichoʼob jeʼex le yáaxoʼoboʼ, ka naʼaken teʼ montaña in machmaj le kaʼapʼéel jaajay tuunichoʼoboʼ.+
4 Letiʼ túuneʼ tu tsʼíibtaj yóokʼol le jaajay tuunichoʼob le tʼaanoʼob tu yáax tsʼíibtaj kaʼachoʼ,+ le Diez Mandamientoʼoboʼ.*+ Lelaʼ letiʼe tʼaanoʼob tu yaʼalajteʼex Jéeoba tu yóokʼol le montaña desde ichil le kʼáakʼ+ le kʼiin ka ta muchʼabaʼexoʼ.+ Ka tsʼoʼok túuneʼ Jéeobaeʼ tu tsʼáajten le jaajay tuunichoʼoboʼ.
5 Teen túuneʼ tin sutinbaeʼ ka éemen tiʼ le montañaoʼ,+ ka tin tsʼáaj le jaajay tuunichoʼob teʼ caja tin beetoʼ, tiʼ pʼáatoʼobiʼ, jach jeʼex tu yaʼalilten Jéeoba ka in beetoʼ.
6 Le israelitaʼob túunoʼ lukʼoʼob Beerot Bene-jaakáneʼ ka binoʼob Moserá. Teʼeloʼ tiʼ kíim Aaróniʼ yéetel tiʼ muʼukiʼ.+ Tu lugar túuneʼ, Eleazar u hijoeʼ, káaj u beetik u sacerdoteil.+
7 Lukʼoʼob teʼeloʼ ka binoʼob Gudgoda, yéetel le ka lukʼoʼob Gudgodaeʼ binoʼob Jotbatá,+ junpʼéel luʼum tuʼux ku yáalkab yaʼabkach jaʼiʼ.
8 Teʼ kʼiinoʼob jeʼeloʼ Jéeobaeʼ tu separartaj u tribu Leví+ utiaʼal u biskoʼob u cajail u pacto*+ Jéeoba, utiaʼal ka waʼalakoʼob tu táan Jéeoba utiaʼal u meyajtikoʼob, yéetel utiaʼal ka u bendecirtoʼob le kaaj tu kʼaabaʼ Diosoʼ,+ jeʼel bix u beetkoʼob tak bejlaʼeʼ.
9 Le oʼolaleʼ Levíeʼ maʼ tsʼaʼab u herencia yéetel u sukuʼunoʼobiʼ. Jéeoba u herenciaʼob, jeʼex u yaʼalmil Jéeoba a Dioseʼex tiʼ letiʼoʼ.+
10 Teneʼ tiʼ pʼáaten yóokʼol le montaña 40 díasoʼ, bul kʼiin yéetel bul áakʼab.+ Teʼ kʼiin jeʼeloʼ Jéeobaeʼ tu yuʼuben xan.+ Jéeobaeʼ maʼ tu yóotaj u xuʼulsteʼexiʼ.
11 Jéeoba túuneʼ tu yaʼalajten: ‹Xeen táanil tiʼ le kaajoʼ yéetel preparartabaʼex utiaʼal u jóokʼol a binbaleʼex, utiaʼal ka xiʼikoʼob u chʼaʼob le luʼum in jurarmaj tiʼ u yúuchben láakʼtsiloʼob in tsʼáaiktiʼoboʼ›.+
12 Beoraaʼ, u kaajil Israel, ¿baʼax táan u kʼáatikteʼex Jéeoba a Dioseʼex?+ Chéen lelaʼ: respetarteʼex Jéeoba a Dioseʼex,+ xíimbalneneʼex tiʼ tuláakal u beeloʼob,+ yaabilteʼex, meyajteʼex Jéeoba a Dioseʼex yéetel tuláakal a puksiʼikʼaleʼex bey xan yéetel tuláakal a kuxtaleʼex,+
13 yéetel beeteʼex le baʼax ku yaʼalik u mandamientoʼob yéetel u leyoʼob Jéeoba táan in waʼalikteʼex bejlaʼa utiaʼal a wutsileʼexoʼ.+
14 Ilawileʼex, u tiaʼal Jéeoba a Dioseʼex le kaʼanoʼoboʼ tak u maas kaʼanlil le kaʼanoʼoboʼ bey xan le luʼum yéetel tuláakal le baʼaxoʼob chupmiloʼ.+
15 Kex beyoʼ Jéeobaeʼ chéen tiʼ a úuchben láakʼtsileʼex tu natsʼuba yéetel tu yeʼesaj u yaabilaj, yéetel tsʼoʼok u yéeyikeʼex teʼex, u paalal letiʼob,+ ichil u maasil kaajoʼoboʼ, jeʼex u yúuchul bejlaʼa ta wéeteleʼexoʼ.
16 Beoraaʼ teʼexeʼ unaj a limpiokíintik a puksiʼikʼaleʼex+ yéetel kʼaʼabéet u xuʼulul a beetik a tercoileʼex.+
17 Tumen Jéeoba a Dioseʼexeʼ, u Dios le diosoʼoboʼ,+ yéetel u Yuumtsil le yuumtsiloʼoboʼ, le nojoch Diosoʼ, le yaan u poderoʼ, le máax kʼaʼabéet u respetartaʼal yéetel u adorartaʼaloʼ, le máax igual u tratartik tuláakal máakoʼ+ yéetel le máax maʼ tu chaʼik u maʼanloʼ.
18 Letiʼeʼ ku beetik justicia tiʼ le paal minaʼan u papáʼoboʼ* bey xan tiʼ le viudaoʼ,+ yéetel u yaabiltmaj le j-táanxel luʼumiloʼ,+ ku tsʼáaiktiʼ baʼal u jaante bey xan nookʼ.
19 Kʼaʼabéet a yaabiltikeʼex le j-táanxel luʼumiloʼoboʼ tumen teʼexeʼ kajlajeʼex bey j-táanxel luʼumileʼex tu luʼumil Egiptoeʼ.+
20 Jéeoba a Dioseʼex unaj a respetarkeʼex yéetel letiʼ unaj a meyajtikeʼex,+ unaj a pʼáatleʼex naatsʼ tiʼ letiʼ, yéetel tu kʼaabaʼ unaj a jurareʼex.
21 Letiʼ unaj a alabarkeʼex.+ Letiʼ a Dioseʼex, le máax beet tu táan a wicheʼex tuláakal le nukuch baʼaloʼob beetik u jaʼakʼal u yóol máakoʼ.+
22 Le ka bin a úuchben láakʼtsileʼex tu luʼumil Egiptoeʼ chéen 70 u túulaloʼob,+ yéetel beoraaʼ Jéeobaeʼ tsʼoʼok u beetik a sen yaʼabtaleʼex jeʼex u estrellailoʼob le kaʼanoʼ.+
Notas
^ Ich hebreoeʼ ku yaʼalaʼal kaʼach «arca».
^ Le cheʼaʼ chíikaʼan tiʼ le chʼiʼimayoʼ.
^ Ich hebreoeʼ ku yaʼalaʼal kaʼach «le Diez Tʼaanoʼoboʼ».
^ Ilawil «U cajail pacto», página 2583.
^ Wa «kimen u papáʼoboʼ».
