Deuteronomio 11:1-32
11 Teʼexeʼ unaj a yaabiltikeʼex Jéeoba a Dioseʼex+ yéetel unaj a beetkeʼex mantatsʼ le baʼaxoʼob ku páaʼtik ka a beeteʼexoʼ, le baʼaxoʼob ku yaʼalik u leyoʼoboʼ bey xan le baʼaxoʼob ku yaʼalik u mandamientoʼoboʼ.
2 A wojleʼexeʼ bejlaʼeʼ teʼex kin tʼankeʼex, maʼ táan in tʼanik a paalaleʼex maʼ u kʼaj óoloʼob wa mix u yiloʼob bix tu kaʼansileʼex Jéeoba a Dioseʼexiʼ+ mix u yiloʼob bukaʼaj u nojchil Diosiʼ,+ u muʼukʼaʼan kʼab+ bey xan u poder.
3 Letiʼobeʼ maʼ tu yiloʼob le señaloʼob yéetel le baʼaloʼob tu beetaj tiʼ Faraón u reyil Egipto yéetel le baʼaloʼob tu beetaj tiʼ tuláakal u luʼumoʼ.+
4 Maʼ tu yiloʼob xan le baʼax tu beetaj tiʼ u ejércitoʼob Egipto, tiʼ u tsiiminoʼob mix tiʼ u carroiloʼob u baʼateʼel Faraón le táan u chʼaʼpachtikeʼexoʼoboʼ. Tuláakloʼobeʼ piʼixoʼob yéetel u jaʼil le Mar Rojooʼ yéetel xuʼulsaʼabtiʼob tumen Jéeoba Dios utiaʼal mantatsʼ.+
5 Letiʼobeʼ maʼ tu yiloʼob le baʼax tu beetaj Dios ta woʼolaleʼex* teʼ desiertooʼ tak le ka kʼucheʼex teʼ lugaraʼ.
6 Maʼ tu yiloʼob xan le baʼax tu beetaj tiʼ Datán yéetel tiʼ Abiram, u hijoʼob Eliab, u hijo Rubén. Le día jeʼeloʼ jeʼepaj le luʼumoʼ ka luʼukʼoʼob junmúuchʼ yéetel u yotochoʼob bey xan yéetel tuláakal baʼal kuxaʼan tiaʼan tu yéeteloʼobeʼ. Lelaʼ úuch tu táan u yich tuláakal u kaajil Israel.+
7 Teʼexeʼ tsʼoʼok a jach ilkeʼex tuláakal le nukuch baʼaloʼob tu beetaj Jéeobaoʼ.
8 Teʼexeʼ unaj a tsʼoʼokbeskeʼex tuláakal le mandamientoʼob táan in tsʼáaikteʼex bejlaʼoʼ utiaʼal ka muʼukʼaʼanchajkeʼex yéetel utiaʼal ka ookkeʼex a chʼaʼex le luʼumoʼ,
9 yéetel utiaʼal ka kuxlakeʼex yaʼab tiempo+ teʼ luʼum tu jurartaj u tsʼáaik Jéeoba tiʼ a úuchben láakʼtsileʼex yéetel tiʼ u paalaloʼ,+ junpʼéel luʼum tuʼux ku tuul leche yéetel kaabiʼ.+
10 Le luʼum kan okol a chʼaʼexoʼ maʼ jeʼex u luʼumil Egipto tuʼux jóokʼeʼexo’, teʼeloʼ ka paakʼaleʼex kaʼachi yéetel ka jóoyabtikeʼex yéetel a wookeʼex* bey jeʼex a jóoyabtikeʼex paakʼaleʼ.
11 Chéen baʼaleʼ le luʼum tuʼux kan ookleʼexoʼ junpʼéel luʼum tuʼux yaan montañaʼob yéetel táax luʼumoʼob.+ Junpʼéel luʼum ku yukʼik le jaʼ ku kʼáaxal desde teʼ kaʼanoʼoboʼ,+
12 junpʼéel luʼum táan u kanáantaʼal tumen Jéeoba a Dioseʼex. U yichoʼob Jéeoba a Dioseʼexeʼ mantatsʼ tiaʼan tu yóokʼoleʼ desde tu káajbal le añooʼ tak tu tsʼoʼokbal.
13 Wa ka tsʼoʼokbeskeʼex in mandamientoʼob táan in tsʼáaikteʼex bejlaʼoʼ yéetel ka yaabiltikeʼex Jéeoba a Dioseʼex yéetel tuláakal a puksiʼikʼaleʼex bey xan yéetel tuláakal a kuxtaleʼexeʼ,+
14 yaan in beetik u taal cháak jach tu kʼiinil ta luʼumeʼex: le yáax cháakoʼ bey xan le pachal cháakoʼ, yéetel yaan a juntarkeʼex trigo,* yaan u yantalteʼex túumben vino bey xan aceite.+
15 Yaan in beetik u yantal xíiw utiaʼal u jaant a walakʼ baʼalcheʼex, yéetel teʼexeʼ yaan a janaleʼex yéetel yaan a naʼajtaleʼex.+
16 Kanáantabaʼex utiaʼal maʼ a chaʼikeʼex u tuʼusul a puksiʼikʼaleʼex yéetel utiaʼal maʼ a bineʼex tu paach yaanal diosoʼob, utiaʼal maʼ a adorarkeʼexoʼob yéetel utiaʼal maʼ a chintaleʼex tu táanoʼob.+
17 Tumen wa maʼeʼ Jéeobaeʼ yaan u sen pʼuʼujul ta contraʼex, yaan u kʼalik le kaʼanoʼob utiaʼal maʼ u kʼáaxal jaʼoʼ+ yéetel yaan u beetik maʼ u tsʼáaik u yich le luʼumoʼ. Teʼex túuneʼ yaan a kíimleʼex tu séebaʼanil teʼ maʼalob luʼum táan u tsʼáaikteʼex Jéeobaoʼ.+
18 Kʼaʼabéet a wilkeʼex u pʼáatal ta puksiʼikʼaleʼex le in tʼaanoʼobaʼ yéetel kʼaʼabéet a tsʼáaikeʼex ichil a kuxtaleʼex, kʼaʼabéet xan a kʼaxkeʼex ta kʼabeʼex utiaʼal a kʼaʼajsikeʼex yéetel kʼaʼabéet a kʼaxkeʼex ta táanpoolaleʼex.*+
19 Kaʼanseʼex tiʼ a paalaleʼex, tsikbalteʼextiʼob le kéen kulakeʼex ta wotocheʼex yéetel le kéen xíimbalnakeʼex teʼ bejoʼoboʼ, le kéen chilakeʼex yéetel le kéen líiʼkeʼex.+
20 Tsʼíibteʼex tu marcoiloʼob bey xan tu joonajil a wotocheʼex,
21 beyoʼ teʼex bey xan a paalaleʼexeʼ yaan u xáantal a kuxtaleʼex+ teʼ luʼum tu jurartaj Jéeoba u tsʼáaik tiʼ a úuchben láakʼtsileʼexoʼ,+ yaan u xáantal bey jeʼex le tiempo ku xáantal le kaʼanoʼob yóokʼol le luʼumoʼ.
22 Wa teʼex ka jach kanáantik a beetkeʼex le baʼax ku yaʼalik le mandamientoʼob táan in tsʼáaikteʼex, ka yaabiltikeʼex Jéeoba a Dioseʼex,+ ka xíimbaleʼex tiʼ u beeloʼob yéetel ka pʼáatleʼex naatsʼ tiʼ letiʼeʼ,+
23 Jéeobaeʼ yaan u tojolchʼintik tuláakal le naciónoʼob ta táaneʼexoʼ,+ yéetel teʼexeʼ yaan a chʼaʼikeʼex naciónoʼob maas nuuktak yéetel maas yaʼaboʼob ke teʼex.+
24 Tuláakal le tuʼuxoʼob ken a tsʼáa a wookeʼexeʼ yaan u kʼuchul a tiaʼalinteʼex.+ Le fronteraoʼ yaan u náakal desde teʼ desiertooʼ tak teʼ Líbanooʼ, desde teʼ Río wa río Éufratesoʼ tak teʼ kʼáaʼnáab* yaan teʼ chikʼinoʼ.+
25 Mix máak kun pʼáatal waʼatal ta táaneʼex.+ Jéeoba a Dioseʼexeʼ yaan u beetik ka sen chʼaʼabak saajkil teʼex yóokʼol tuláakal le luʼum tuʼux ka máaneʼexoʼ,+ jeʼex tsʼoʼok u prometertikteʼexoʼ.
26 Ilawileʼex, teneʼ táan in tsʼáaik ta táaneʼex bejlaʼeʼ junpʼéel bendición yéetel junpʼéel maldición:+
27 bendición wa ka tsʼoʼokbeskeʼex le u mandamientoʼob Jéeoba a Dioseʼex táan in tsʼáaikteʼex bejlaʼoʼ,+
28 yéetel maldición wa maʼ ta tsʼoʼokbeskeʼex le u mandamientoʼob Jéeoba a Dioseʼexoʼ,+ yéetel ka kʼéechleʼex tiʼ le bej táan in waʼalikteʼex bejlaʼa ka a seguerteʼexoʼ bey xan wa ka bineʼex tu paach uláakʼ diosoʼob maʼ a kʼaj óoleʼexoʼobiʼ.
29 Le kéen u yokseʼex Jéeoba a Dioseʼex teʼ luʼum ken a tiaʼalinteʼexoʼ le bendiciónoʼ yaan a waʼalik* yóokʼol le Montaña Guerizimoʼ yéetel le maldiciónoʼ yóokʼol le Montaña Ebaloʼ.+
30 ¿Maʼ wa letiʼe yanoʼob teʼ tuláakʼ u tséel le Jordán teʼ banda chikʼinoʼ,* teʼ tu luʼum le cananeoʼob kajaʼanoʼob teʼ Arabáoʼ? ¿Maʼ wa letiʼe yanoʼob aktáan tiʼ Guilgaloʼ, naatsʼ tiʼ u nukuch cheʼiloʼob Moréoʼ?+
31 Tumen teʼexeʼ yaan a kʼáatmáanskeʼex le Jordán utiaʼal a wokol a chʼaʼex le luʼum táan u tsʼáaikteʼex Jéeoba a Dioseʼexoʼ.+ Le kéen a chʼaʼex le luʼum yéetel le kéen kajlakeʼex teʼeloʼ,
32 unaj a wilik a beetkeʼex tuláakal le baʼax ku yaʼalik le leyoʼob yéetel le baʼaxoʼob táan in waʼalikteʼex bejlaʼaʼ.+
Notas
^ Wa «tiʼ teʼex».
^ Teʼelaʼ yaan u meyaj tiʼ máak u yookoʼob, maʼ xaaneʼ utiaʼal u beetik u suut junpʼéel rueda ku jóoʼsik jaʼ wa utiaʼal u páanik u beel le jaʼoʼ.
^ Wa maʼ xaaneʼ cebada.
^ Ich hebreoeʼ ku yaʼalaʼal kaʼach «entre tu kaʼapʼéelil a wichoʼob».
^ Le kʼáaʼnáabaʼ letiʼe Mar Grande wa Mediterráneooʼ.
^ Wa «a tsʼáaik».
^ Wa «tuʼux ku tʼúubul kʼiin».
