Deuteronomio 16:1-22
16 Kʼaʼajs u mesil Abib,* yéetel festejart le Pascua* utiaʼal Jéeoba a Diosoʼ,+ tumen tu mesil Abibeʼ Jéeoba a Dioseʼ de áakʼab ka tu jóoʼsech tiʼ u luʼumil Egipto.+
2 Unaj xan a kíimsik le baʼalcheʼ ku kʼuʼubul tu fiestail le Pascua utiaʼal Jéeoba a Diosoʼ,+ le baʼalcheʼoʼ yaan a chʼaʼik ichil a walakʼ tamanoʼob yéetel a walakʼ wakaxoʼoboʼ,+ yaan a beetik teʼ lugar ken u yéey Jéeoba a Dios utiaʼal u tsʼáaik u kʼaabaʼoʼ.+
3 Maʼ unaj a jaantik junmúuchʼ yéetel baʼaloʼob yaan u levadurailiʼ.+ Durante siete díaseʼ unaj a jaantik waaj minaʼan u levadurail utiaʼal a kʼaʼajsik bukaʼaj úuchik a sen muʼyaj yéetel bix úuchik a séeb jóokʼol tiʼ u luʼumil Egipto.+ Lelaʼ unaj a beetik mientras kuxaʼanech.+
4 Durante siete díaseʼ maʼ unaj u yantal mix junpʼíit harina yaan u levadurail teʼ tuʼux kajaʼanechoʼ.+ Tsʼoʼoleʼ u yalab u bakʼel le baʼalcheʼ ta kíimsaj de tarde teʼ yáax díaoʼ maʼ unaj u pʼáatal bul áakʼab tak tuláakʼ kʼiinoʼ.+
5 Maʼ kun páajtal a kíimsik le baʼalcheʼ utiaʼal le Pascua tiʼ jeʼel máakalmáak tiʼ le kaajoʼob táan u tsʼáaiktech Jéeoba a Diosoʼ.
6 Unaj u kíimsaʼal le baʼalcheʼ teʼ lugar ken u yéey Jéeoba a Dios utiaʼal u tsʼáaik u kʼaabaʼoʼ. Le baʼalcheʼ utiaʼal le Pascuaoʼ unaj a kíimsik de tarde le kéen tsʼoʼokok u tʼúubul kʼiinoʼ,+ jeʼex úuchik a beetik teʼ kʼiin ka jóokʼech tiʼ u luʼumil Egiptooʼ.
7 Unaj a kʼáaʼtik yéetel unaj a jaantik+ teʼ lugar ken u yéey Jéeoba a Diosoʼ,+ yéetel le kéen sáasakeʼ jeʼel u páajtal a suut ta wotocheʼ.
8 Durante seis díaseʼ unaj a jaantik waaj minaʼan u levadurail, yéetel teʼ día sieteoʼ yaan a muchʼkabaʼex utiaʼal a adorarkeʼex Jéeoba a Dioseʼex. Teʼ kʼiin jeʼeloʼ maʼ unaj a beetik mix junpʼéel meyajiʼ.+
9 Unaj a xokik siete semanaʼob. Unaj u káajal a xokik desde le kʼiin ken káajak a cosechartik le baʼax a pakʼmoʼ.+
10 Le kéen tsʼoʼokok túuneʼ yaan a festejartik u Fiestail le Semanaʼob utiaʼal Jéeoba a Diosoʼ,+ yaan a festejartik yéetel le ofrendaʼob ku síijil ta puksiʼikʼal a síikoʼ, según bukaʼaj tsʼoʼok u bendecirkech Jéeoba a Diosoʼ.+
11 Teech túuneʼ yaan u kiʼimaktal a wóol tu táan Jéeoba a Dios, teech yéetel a hijo, a hija, a esclavo, a esclava, le levita kajaʼan ichil a kaajaleʼexoʼ, le j-táanxel luʼumiloʼ, le paal minaʼan u papáoʼ* yéetel le viuda kajaʼan ichileʼexoʼ, yaan u kiʼimaktal a wóoleʼex teʼ lugar ken u yéey Jéeoba a Dios utiaʼal u tsʼáaik u kʼaabaʼoʼ.+
12 Kʼaʼajaktecheʼ esclavoech kaʼach tu luʼumil Egipto,+ beet tuláakal le baʼaxoʼob táan in waʼaliktechaʼ.
13 Le kéen a jóoʼs le neekʼoʼoboʼ, le kéen a beet vino yéetel le kéen a jóoʼs le aceiteoʼ, techeʼ unaj a festejartik u Fiestail le Paseloʼob*+ durante siete díasoʼ.
14 Kiʼimakkúunt a wóol durante le fiestaoʼ,+ teech yéetel a hijo, a hija, a esclavo, a esclava, le levitaoʼ, le j-táanxel luʼumiloʼ, le paal minaʼan u papáoʼ yéetel le viuda kajaʼan ichil a kaajaleʼexoʼ.
15 Durante siete díaseʼ unaj a beetik le fiesta+ utiaʼal Jéeoba a Dios teʼ lugar ken u yéey Jéeobaoʼ, tumen Jéeoba a Dioseʼ yaan u bendecirtik tuláakal a cosecha bey xan tuláakal baʼax ka beetik,+ yéetel techeʼ yaan u sen kiʼimaktal a wóol.+
16 Tuláakal le xiiboʼoboʼ unaj u binoʼob tu táan Jéeoba a Dios óoxtéen ichil junpʼéel año teʼ lugar ken u yéey utiaʼal u Fiestail le Waaj Minaʼan u Levadurailoʼ,*+ utiaʼal u Fiestail le Semanaʼoboʼ+ yéetel utiaʼal u Fiestail le Paseloʼoboʼ,+ mix juntúul tiʼ letiʼob unaj u bin pikʼil kʼabil tu táan Jéeobaiʼ.
17 Jéeoba a Dioseʼ tsʼoʼok u sen bendecirkech, le oʼolal cada juntúuleʼ unaj xan u bisik yaʼab baʼaloʼob u kʼub tiʼ Dios.+
18 Tiʼ tuláakal le kaajoʼob táan u tsʼáaiktech Jéeoba a Diosoʼ unaj a tsʼáaik juezoʼob+ yéetel jefeʼob utiaʼal cada tribu, letiʼobeʼ yaan u juzgaroʼob tubeel.
19 Unaj a chaʼik u beetaʼal justicia,+ maʼ unaj a tsʼáaikaba tu favor mix máakiʼ,+ maʼ unaj a chaʼik a maʼanliʼ, tumen leloʼ ku beetik u chʼóoptal le máaxoʼob yaan u naʼatoʼoboʼ+ yéetel ku beetik u kʼastal u tʼaan le utsul máakoʼoboʼ.
20 Justicia, justicia unaj a beetik,+ beyoʼ yaan u seguer a kuxtal yéetel yaan a chʼaʼik le luʼum táan u tsʼáaiktech Jéeoba a Diosoʼ.
21 Teʼ tuʼux ken a beet u altar Jéeoba a Diosoʼ maʼ unaj a pakʼik mix junpʼéel clase cheʼ utiaʼal a adorarkiʼ.+
22 Maʼ unaj xan a beetik junpʼéel columna utiaʼal a adorarkiʼ,+ tumen leloʼ jach pʼektaʼan tumen Jéeoba a Dios.
Notas
^ Ilawil página 2575.
^ Ilawil página 2554.
^ Wa «kimen u papáoʼ».
^ Ilawil «U Fiestail le Paseloʼoboʼ», página 2584.
^ Ilawil «U Fiestail le Waaj Minaʼan u Levadurailoʼ», página 2584.
