Deuteronomio 19:1-21
19 Le kéen u xuʼuls Jéeoba a Dios le naciónoʼoboʼ, le kéen u tsʼáatech Jéeoba a Dios u luʼumoʼoboʼ yéetel le kéen kajlakech tu kaajaloʼob yéetel tu yotochoʼoboʼ,+
2 techeʼ unaj a separartik óoxpʼéel kaajoʼob teʼ luʼum táan u tsʼáaiktech Jéeoba a Dios utiaʼal a pʼáatleʼex kajtaloʼ.+
3 Unaj a jóoʼsik óoxjaats tiʼ tuláakal le territorio táan u tsʼáaiktech Jéeoba a Diosoʼ. Preparart xan le bejoʼoboʼ, beyoʼ le máax ku kíimsik wa máaxoʼ jeʼel u páajtal u bin u taʼakuba tiʼ junpʼéel tiʼ le kaajoʼob jeʼeloʼ.
4 Wa yaan máax maʼ u yóoliliʼ úuchik u kíimsik wa máax, yéetel maʼ u pʼekmaj kaʼacheʼ, utiaʼal u salvartik u kuxtaleʼ unaj u bin tiʼ junpʼéel tiʼ le kaajoʼobaʼ.+
5 Koʼox aʼalikeʼ juntúul máakeʼ ku bin yéetel uláakʼ máak u kaxtoʼob siʼ teʼ kʼáaxoʼ. Le máakoʼ le kéen u líiʼs le báat utiaʼal u chʼakik junpʼéel cheʼeʼ ku jóotsʼol le báat tiʼ u yookoʼ. Le báat túunoʼ ku tsaʼayal tiʼ le uláakʼ máakoʼ yéetel ku kíimsik. Le máax kiimsajnaj túunoʼ unaj u bin u taʼakuba tiʼ junpʼéel tiʼ le kaajoʼob utiaʼal maʼ u kíimsaʼaloʼ.+
6 Wa maʼeʼ, le máax vengartik u kʼiʼikʼel le máax kíimsaʼaboʼ,+ tumen jach pʼujaʼaneʼ jeʼel u bin tu paacheʼ, jeʼel u chukpachtikeʼ yéetel jeʼel u kíimsik wa jach náach yanil u bejil le kaajoʼ. Chéen baʼaleʼ letiʼeʼ maʼ tu merecertik u kíimsaʼal, tumen maʼ u pʼekmaj kaʼach u yéet máakiloʼ.+
7 Le oʼolal kin waʼaliktech: ‹Separart óoxpʼéel kaajoʼob›.
8 Wa Jéeoba a Dios ku beetik u yaʼabtal a territorio jeʼel bix tu jurartaj tiʼ a úuchben láakʼtsiloʼob+ yéetel ku tsʼáaiktech tuláakal le luʼum tu prometertaj u tsʼáaik tiʼ a úuchben láakʼtsiloʼoboʼ,+
9 letiʼeʼ ku beetik beyoʼ tumen techeʼ ka tsʼoʼokbesik tuláakal le mandamientoʼob táan in tsʼáaiktech bejlaʼoʼ: yaabilt Jéeoba a Dios yéetel xíimbalnen mantatsʼ tu beeloʼob,+ beyoʼ yaan a yéeyik uláakʼ óoxpʼéel kaajoʼob aparte tiʼ le yáax óoxpʼéeloʼoboʼ.+
10 Wa ka beetik beyoʼ mix máak inocente kun wekbil u kʼiʼikʼel+ teʼ luʼum táan u tsʼáaiktech Jéeoba a Dios bey herenciaoʼ, yéetel maʼ kun antal a culpa wa ku kíimsaʼal wa máax.+
11 Koʼox aʼalikeʼ juntúul máakeʼ u odiarmaj u yéet máakil+ yéetel ku chʼúuktik utiaʼal u atacarte, ku beetik junpʼéel nojoch loob tiʼ yéetel ku kíimsik, tsʼoʼoleʼ ku bin u taʼakuba tiʼ junpʼéel tiʼ le kaajoʼobaʼ.
12 U nuuktakil túun u kaajal le máak kiimsajnajoʼ unaj u túuxtikoʼob chʼaʼabil teʼ kaaj tuʼux binoʼ yéetel yaan u kʼubkoʼob tu kʼab le máax vengartik u kʼiʼikʼel le máax tu kíimsoʼ, letiʼ túuneʼ unaj u kíimil.+
13 Techeʼ maʼ unaj a chʼaʼik óotsilil tiʼ le máakoʼ yéetel unaj a luʼsik tu kaajil Israel le culpa yanchaj úuchik u weʼekel u kʼiʼikʼel le máax inocenteoʼ,+ beyoʼ yaan u bintech utsil.
14 Le kéen a kʼam a herencia teʼ luʼum táan u tsʼáaiktech Jéeoba a Diosoʼ maʼ unaj a péeksik le marca tuʼux ku náakal u luʼum a vecinooʼ,+ le marca tsʼaʼab tumen a úuchben láakʼtsiloʼoboʼ.
15 Wa juntúul máak ku yaʼalaʼal tu beetaj junpʼéel baʼax maʼ maʼalob wa kʼebanchajeʼ,+ maʼ tu páajtal u yaʼalaʼal culpable wa chéen juntúul testigo yaan. Utiaʼal u yojéeltaʼal wa jaaj le baʼax ku yaʼalaʼal tu contraoʼ kʼaʼabéet u yantal kaʼatúul wa óoxtúul testigoʼob aʼalik le baʼax úuchoʼ.+
16 Wa juntúul kʼasaʼan máak ku testificar tu contra uláakʼ máak yéetel ku yaʼalik yaan baʼax maʼ maʼalob tu beetaj le máakoʼ,+
17 le kaʼatúul máakoʼob táan u baʼateloʼob túunoʼ yaan u waʼataloʼob tu táan Jéeoba, tu táan le sacerdoteʼoboʼ yéetel tu táan le juezoʼob yanoʼob teʼ kʼiinoʼob jeʼeloʼ.+
18 Le juezoʼoboʼ yaan u investigarkoʼob tubeel.+ Wa chéen táan u tuus le testigo yéetel chéen táan u yaʼalik junpʼéel baʼax maʼ jaaj tu contra u sukuʼunoʼ,
19 techeʼ unaj a beetik tiʼ letiʼ jach jeʼel bix tu tuklil u beetik kaʼach tiʼ u sukuʼunoʼ,+ unaj a luʼsik le baʼax kʼaas ichileʼexoʼ.+
20 Le u maasil máakoʼob túun kun uʼuyikoʼ yaan u chʼaʼikoʼob saajkil yéetel mix bikʼin ken u kaʼa beetoʼob ichileʼex junpʼéel baʼal kʼaas jeʼel bix lelaʼ.+
21 Techeʼ maʼ unaj a chʼaʼik óotsililiʼ:+ kuxtal yoʼolal kuxtal, le máax kun puchʼik u yich wa máaxeʼ unaj xan u puʼuchʼul u yich, le máax kun jutik u koj wa máaxeʼ unaj xan u juʼutul u koj, le máax kun kachik u kʼab wa máaxeʼ unaj xan u kaʼachal u kʼab, le máax kun kachik u yook wa máaxeʼ unaj xan u kaʼachal u yook.+
