Deuteronomio 2:1-37
2 Toʼon túuneʼ t-tsʼáaj vueltaeʼ ka suunajoʼon teʼ desierto tu bejil le Mar Rojo jeʼex úuchik u yaʼalikten Jéeobaoʼ.+ T-máansaj yaʼab tiempo chéen táan k-tsʼáaik vueltaʼob tu baʼpach le Montaña Seíroʼ.
2 Hasta ka aʼalaʼabten tumen Jéeoba:
3 ‹Tsʼoʼok u xáantal táan a tsʼáaikeʼex vueltaʼob tu baʼpach le montañaaʼ. Beora túunaʼ tsʼáaʼex vueltaeʼ ka xiʼikeʼex tu tojil xaman.*
4 Aʼal xan tiʼ le káajoʼ: «Yaan a máaneʼex teʼ frontera tuʼux kajaʼan a láakʼtsileʼexoʼ, u paalal Esaú+ kajaʼanoʼob tu luʼumil Seíroʼ.+ Letiʼobeʼ yaan u chʼaʼikoʼob saajkil tiʼ teʼex,+ chéen baʼaleʼ teʼexeʼ unaj a kanáantkeʼex baʼax ken a beeteʼex.
5 Maʼ a kaxtikeʼex baʼateʼel tu yéeteloʼob, tumen maʼ ken in tsʼáateʼex mix junxéetʼ tiʼ le luʼum yaantiʼoboʼ, mix tak chéen jun chan xéetʼ utiaʼal a tsʼáaik juntsʼíit a wookeʼexiʼ. Tumen tsʼoʼok in tsʼáaik tiʼ Esaú le Montaña Seíroʼ.+
6 Kʼaʼabéet a boʼotkeʼextiʼob le baʼax ken a chʼaʼex a jaanteʼexoʼ bey xan le jaʼ ken a chʼaʼ a wukʼeʼexoʼ.+
7 Tumen Jéeoba a Dioseʼexeʼ tsʼoʼok u bendecirtik tuláakal baʼax ka beetkeʼex. Letiʼeʼ u yojel bix tsʼoʼok a máaneʼex teʼ nojoch desiertoaʼ. Ichil le 40 añosaʼ Jéeobaeʼ tsʼoʼok u yantal ta wéeteleʼex, yéetel mix baʼal u bineltteʼex»›.+
8 Toʼon túuneʼ máanoʼon tu tséel u luʼumil Seír, le lugar tuʼux kajaʼan k-láakʼtsiloʼoboʼ, u paalal Esaú.+ Máanoʼon náach tiʼ u bejil le Arabáoʼ bey xan tiʼ u bejil Elat yéetel Ezión-guéber.+
T-tsʼáaj vueltaeʼ ka viajarnajoʼon tu tojil le bej ku bin tak tu desiertoil Moaboʼ.+
9 Jéeoba túuneʼ tu yaʼalajten: ‹Maʼ unaj a kaxtik baʼateʼel mix u yantaltech problemas yéetel u kajnáaliloʼob Moabiʼ, tumen maʼ ken in tsʼáateʼex mix junxéetʼ tiʼ le luʼum yaantiʼoboʼ. Teneʼ tsʼoʼok in tsʼáaik Ar tiʼ u paalal Lot.+
10 (Teʼ lugaroʼ tiʼ kajakbal kaʼach le emimoʼoboʼ,+ letiʼobeʼ yaʼaboʼob yéetel jach yaan u páajtaliloʼob, kaʼanal u baakeloʼob jeʼex le anakimoʼoboʼ.
11 Le refaímoʼoboʼ+ beyoʼob xan jeʼex le anakimoʼoboʼ.+ Tiʼ letiʼobeʼ emim u yaʼalaʼaltiʼob tumen le moabitaʼoboʼ.
12 Kaʼacheʼ le oreoʼoboʼ+ tiʼ kajakbaloʼob tu luʼumil Seíreʼ, pero luʼsaʼabtiʼob tumen u paalal Esaú, xuʼulsaʼabtiʼobeʼ ka pʼáat u paalal Esaú kajtal teʼeloʼ.+ Bey xan ken u beetil u kaajil Israel utiaʼal u tiaʼalintik le luʼum tuʼux kun ookloʼ, le luʼum kun tsʼaabiltiʼ tumen Jéeobaoʼ).
13 Beora túunaʼ xeeneʼex, kʼáatmáanseʼex u Táax Lu’umil Zered›. Toʼon túuneʼ t-kʼáatmáansaj u Táax Lu’umil Zered.+
14 Le tiempo tu bisajtoʼon k-xíimbaltik desde Cadés-barnea tak tu Táax Lu’umil Zeredoʼ 38 años. Teʼ tiempo jeʼeloʼ kíim tuláakal u generación le máaxoʼob yaan kaʼach u edadil tiʼob utiaʼal u binoʼob baʼateloʼ, úuchtiʼob jach jeʼex aʼalaʼabiktiʼob tumen Jéeobaoʼ.+
15 Jéeobaeʼ yéetel u podereʼ tu tsʼáajuba tu contraʼob utiaʼal u tselikoʼob tiʼ le kaajoʼ, hasta ka tu láaj xuʼulsoʼob.+
16 Chéen pʼelak tsʼoʼokik u láaj kíimil le máaxoʼob yaan kaʼach u edadil tiʼob utiaʼal u binoʼob baʼateloʼ,+
17 Jéeobaeʼ tu kaʼa tʼaneneʼ ka tu yaʼalaj:
18 ‹Bejlaʼeʼ yaan a máan tu luʼumil Moab wa Ar.
19 Le kéen náatsʼkech teʼ tuʼux kajakbal le ammonitaʼoboʼ, maʼ a molestarkeʼexoʼob mix a kaxtikeʼex baʼateʼel tiʼob, tumen maʼ ken in tsʼáateʼex mix junxéetʼ tiʼ le luʼum yaantiʼoboʼ. Teneʼ tsʼoʼok in tsʼáaik Ar tiʼ u paalal Lot.+
20 Teʼ luʼumaʼ tiʼ kajakbal kaʼach le refaímoʼoboʼ. (Teʼ luʼum jeʼeloʼ tiʼ kajakbal kaʼach le refaímoʼoboʼ,+ yéetel ku yaʼalaʼaltiʼob zamzumimoʼob tumen le ammonitaʼoboʼ.
21 Letiʼob kaʼacheʼ yaʼaboʼob yéetel jach yaan u páajtaliloʼob, kaʼanal u baakeloʼob jeʼex le anakimoʼoboʼ.+ Chéen baʼaleʼ Jéeobaeʼ tu yáantaj le ammonitaʼob utiaʼal ka u xuʼulsoʼob le refaímoʼoboʼ yéetel ka kajlakoʼob tu lugaroʼob.
22 Leloʼ letiʼe baʼax tu beetaj Dios tu yoʼolal u paalal Esaú kajakbaloʼob bejlaʼa tu luʼumil Seíroʼ.+ Letiʼeʼ tu yáantaj u paalal Esaú utiaʼal ka u xuʼulsoʼob tiʼ le oreoʼob+ teʼ luʼumoʼ yéetel utiaʼal ka kajlakoʼob tu lugaroʼob tak tu kʼiinil bejlaʼeʼ.
23 Le kaajoʼob tuʼux kajakbal kaʼach le avimoʼoboʼ ku kʼuchloʼob tak tu kaajil Gaza.+ Chéen baʼaleʼ xuʼulsaʼabtiʼob ka chʼaʼab u luʼumoʼob tumen le caftorimoʼob+ taaloʼob teʼ lugar ku kʼaabaʼtik Caftoroʼ).*
24 Líikʼeneʼex ka a kʼáatmáanseʼex u Táax Lu’umil Arnón.+ Teneʼ tsʼoʼok in tsʼáaik ta kʼabeʼex Seón+ le amorreooʼ, u reyil Esbón. Le beetkeʼ xeeneʼex baʼateʼel tu contra, káajak a chʼaʼikeʼex le luʼum tuʼux yanoʼ.
25 Desde bejlaʼeʼ yaan in beetik u chʼaʼabal saajkil teʼex tumen tuláakal u kajnáaliloʼob le luʼum ken u yuʼuboʼob u yúuchul tʼaan ta woʼolaleʼexoʼ. Letiʼobeʼ yaan u sen chiʼichnaktaloʼob yéetel yaan u sen kikilankiloʼob* ta woʼolaleʼex›.+
26 Teen túuneʼ desde tu desiertoil Kedemoteʼ+ tin túuxtaj junjaats máakoʼob utiaʼal ka u yutsul aʼaloʼob tiʼ Seón u reyil Esbón:+
27 ‹Chaʼa in kʼáatmáan teʼ ta luʼumaʼ. Maʼ kin jóokʼol tiʼ le bej ken in bisoʼ, maʼ kin kʼéechel tin x-noʼoj mix tin x-tsʼíik.+
28 Yaan in jaantik yéetel yaan in wukʼik chéen le janal yéetel le jaʼ ken a kontenoʼ. Chéen kin kʼáatiktech ka a chaʼa in kʼáatal
29 tak tuláakʼ u tséel le Jordánoʼ, teʼ luʼum táan u tsʼáaiktoʼon Jéeoba k-Diosoʼ. Lelaʼ letiʼe baʼax tu beetoʼob tin woʼolal u paalal Esaú kajaʼanoʼob Seíroʼ, bey xan tu beetil le moabitaʼob kajaʼanoʼob Aroʼ›.
30 Chéen baʼaleʼ Seón u reyil Esbóneʼ maʼ tu chaʼaj k-kʼáatmáaniʼ, tumen Jéeoba a Dioseʼexeʼ tu chaʼaj u tercotal+ yéetel u chichtal u puksiʼikʼal utiaʼal u tsʼáaik ta kʼabeʼex jeʼex táan u beetik beoraaʼ.+
31 Jéeoba túuneʼ tu yaʼalajten: ‹Ilawile, tsʼoʼok u káajal in tsʼáaiktech Seón yéetel u luʼumoʼob. Káajak a chʼaʼik u luʼumoʼob›.+
32 Le ka jóokʼ túun Seón yéetel tuláakal u soldadoʼob utiaʼal u baʼateloʼob t-contra teʼ kaaj ku kʼaabaʼtik Jáazoʼ,+
33 Jéeoba k-Dioseʼ tu kʼuboʼob t-kʼab. Toʼoneʼ páajchaj k-ganartik le reyoʼ, u hijoʼob bey xan u soldadoʼob.
34 T-chʼaʼaj tuláakal le kaajoʼob yaantiʼob teʼ kʼiinoʼob jeʼeloʼ, yéetel t-láaj xuʼulsaj tiʼ u kaajaloʼob bey xan tiʼ le xiiboʼob, tiʼ le koʼoleloʼob yéetel tiʼ le mejen paalaloʼoboʼ. Mix juntúul pʼáat kuxaʼaniʼ.+
35 T-láaj chʼaʼaj u yalakʼ baʼalcheʼob bey xan le uláakʼ baʼaloʼob yanoʼob ichil le kaajoʼob t-ganartoʼ.
36 Mix junpʼéel kaaj púutsʼtoʼon, t-chʼaʼaj tuláakal le kaajoʼoboʼ, desde le yanoʼob tu kaajil Aroer,+ le kaaj yaan tu jáal u Táax Lu’umil Arnónoʼ (t-chʼaʼaj tak le kaaj yaan teʼ táax luʼumoʼ) tak le kaajoʼob yanoʼob tu luʼumil Galaadoʼ.* Jéeoba k-Dioseʼ tu kʼubajtoʼon tuláakal le kaajoʼoboʼ.+
37 Chéen baʼaleʼ teʼexeʼ maʼ náatsʼeʼex teʼ lugaroʼob tu prohibirtajteʼex Jéeoba k-Diosoʼ. Maʼ náatsʼeʼex teʼ tuʼux kajaʼan le ammonitaʼoboʼ+ mix teʼ lugar ku kʼaabaʼtik u Táax Luʼumil Jabokoʼ+ mix tiʼ le kaajoʼob yanoʼob teʼ montañaʼoboʼ.
Notas
^ Wa «norte».
^ Uláakʼ bix kʼaj óolaʼanileʼ Creta.
^ Wa «yaan u yuʼubikoʼob le dolor ku yuʼubik juntúul koʼolel táan u yantal u chaambaloʼ».
^ Ilawil página 2563.
