Deuteronomio 21:1-23
21 Wa teʼ luʼum ken u tsʼáateʼex Jéeoba a Dios ku kaxtaʼal juntúul máak kimen yéetel maʼ ojéelaʼan máax kíimseʼ,
2 le u nuuktakil le kaaj yéetel le juezoʼoboʼ+ unaj u bin u pʼisoʼob bukaʼaj náachil yanil le kimen tiʼ le kaajoʼob yanoʼob tu baʼpachoʼ.
3 U nuuktakil le kaaj maas naatsʼ yanil tiʼ le kimenoʼ unaj u chʼaʼikoʼob ichil u yaalakʼoʼob juntúul chan vaca mix juntéen tsʼaʼabak meyaj, juntúul chan vaca mix juntéen tsʼaʼabak u cheʼil kuuch tu yóokʼol.
4 U nuuktakil le kaajoʼ unaj u biskoʼob le chan vaca tiʼ junpʼéel táax luʼum tuʼux ku yáalkab jaʼoʼ, junpʼéel lugar mix juntéen péeksaʼak u luʼumil* yéetel mix juntéen paʼakʼak mix baʼaliʼ, teʼeloʼ unaj u kachkoʼob u kaal le chan vacaoʼ.+
5 Le sacerdoteʼob levitaʼob túunoʼ unaj u náatsʼloʼob, tumen letiʼob yéeyaʼanoʼob utiaʼal u meyajtikoʼob Jéeoba a Dios+ yéetel utiaʼal u bendeciroʼob tu kʼaabaʼ Jéeoba.+ Letiʼob kun aʼalik bix kun utskíintbil junpʼéel problema tuʼux beetaʼab loob tiʼ wa máax.+
6 Tuláakal túun u nuuktakil le kaaj maas naatsʼ yanil tiʼ le kimenoʼ unaj u pʼoʼik u kʼaboʼob+ yóokʼol le chan vaca kaʼach u kaal teʼ táax luʼumoʼ,
7 yéetel unaj u yaʼalikoʼob: ‹Maʼ k-kʼaboʼob wek le kʼiʼikʼ jeʼelaʼ mix t-ilaj máax beetiʼ.
8 Kiʼichkelem Yuum Jéeoba, maʼ a culpartik a kaajal yoʼolal le baʼax úuchaʼ,+ —le u kaajil Israel ta salvartoʼ— yéetel maʼ a chaʼik ka pʼáatak yóokʼol Israel u culpail úuchik u weʼekel u kʼiʼikʼel le máax inocenteoʼ›.+ Beyoʼ maʼ kun pʼáatal tu yóokʼoloʼob le culpa úuchik u kíimsaʼal le máakoʼ.
9 Bey ken a luʼsil chúumuk tiʼ teʼex le culpa yoʼolal u kʼiʼikʼel juntúul máax inocenteoʼ, tumen táan a beetkeʼex le baʼax uts tu táan Jéeobaoʼ.
10 Wa le kéen xiʼikech baʼateʼel tu contra a enemigoʼob ku ganartaʼaloʼob tumen Jéeoba a Dios, yéetel ka cháachkoʼob utiaʼal a biskoʼobeʼ,+
11 wa ka wilik ichiloʼob juntúul x-kiʼichpan koʼolel ku yutstal ta wich yéetel a kʼáat a chʼaʼ utiaʼal a watanteʼ,
12 techeʼ jeʼel u páajtal a bisik ta wotocheʼ. Le koʼolel túunoʼ unaj u tsʼikik u pool, u arreglartik u yíichʼakoʼob
13 yéetel unaj u kʼexik le nookʼ u tsʼaamaj le ka cháachaʼab bisbiloʼ, yéetel unaj u pʼáatal ta wotoch. Le koʼoleloʼ yaan u yoʼtik u papá yéetel u maama durante junpʼéel mes,+ le kéen tsʼoʼokkeʼ jeʼel u páajtal u yantal baʼal a wil* tu yéeteleʼ. Teech túuneʼ yaan a kʼuchul a beetaba u yíicham, yéetel letiʼeʼ yaan u kʼuchul u beetuba a watan.
14 Pero wa maʼ kiʼimak a wóol tu yéeteleʼ unaj a chaʼik u bin+ jeʼel tuʼuxak u kʼáat bineʼ. Chéen baʼaleʼ maʼ unaj a konikiʼ mix unaj a maltratarkiʼ tumen techeʼ ta chʼaʼaj a watant kex maʼ u kʼáat kaʼachiʼ.
15 Wa juntúul máak yaan kaʼatúul u yatan yéetel maas u yaabiltmaj juntúul ke le uláakʼoʼ, yéetel tu kaʼatúulaloʼob ku yantal u hijoʼob, pero le yáax hijo síijoʼ utiaʼal le koʼolel maʼ u jach yaabiltmoʼ,+
16 le kʼiin ken u tsʼáa u herencia u hijoʼobeʼ, maʼ kun chaʼabil u tratartik bey u yáax hijo le u hijo le koʼolel u yaabiltmoʼ, tumen wa maʼeʼ jeʼel u beetik kʼaas tiʼ u hijo le koʼolel maʼ u yaabiltmoʼ, le u yáax hijooʼ.
17 Letiʼeʼ unaj u reconocertik bey u yáax hijo, le u hijo le koʼolel maʼ u jach yaabiltmoʼ, unaj u tsʼáaiktiʼ kaʼajaats tiʼ tuláakal le baʼax yaantiʼoʼ, tumen le hijo jeʼeloʼ letiʼe yanchaj teʼ kʼiinoʼob jach yaan u muukʼoʼ. Le derecho ku tsʼaʼabal tiʼ le yáax hijoʼoboʼ tiʼ letiʼ yaan.+
18 Wa juntúul máak yaan juntúul u hijo terco, ku tsʼáaikuba tu contra le baʼax ku yaʼalaʼaltiʼ yéetel maʼatech u yuʼubik u tʼaan u maama yéetel u papáeʼ,+ wa letiʼob tsʼoʼok u tratarkoʼob u yáantkoʼob utiaʼal u beetik baʼax maʼalob, pero le hijotsil maʼ u kʼáat u yuʼub u tʼaanoʼoboʼ,+
19 u papá yéetel u maama túuneʼ unaj u machik u bisoʼob tu táan u nuuktakil le kaaj teʼ tu joonajil u kaajaloʼoboʼ
20 yéetel yaan u yaʼalikoʼob tiʼ u nuuktakil u kaajaloʼoboʼ: ‹Le k-hijoaʼ terco, ku tsʼáaikuba t-contra yéetel maʼ tu yóotik u yuʼub k-tʼaan. Maʼ tu tsʼáaik u pʼiis u janal,+ tsʼoʼoleʼ káaltal máak›.+
21 Tuláakal túun le máakoʼob yanoʼob tu kaajaloʼ yaan u muruxtuntikoʼob hasta u kíimileʼ. Unaj a luʼsik le baʼax kʼaas ichileʼexoʼ, beyoʼ tuláakal u kaajil Israeleʼ yaan u yuʼubik le baʼax úuchoʼ yéetel yaan u chʼaʼik saajkil.+
22 Wa juntúul máak ku kíimsaʼal yéetel ku chʼuykíintaʼal tiʼ junpʼéel cheʼ+ úuchik u lúubul tiʼ junpʼéel kʼeban ku castigartaʼal yéetel kíimileʼ,+
23 u wíinklileʼ maʼ unaj u pʼáatal bul áakʼab chʼuyukbal teʼ cheʼoʼ.+ Baʼaxeʼ unaj a wilik a mukik teʼ mismo kʼiinoʼ, tumen le máax ku chʼuykíintaʼal tiʼ junpʼéel cheʼeʼ maldecirtaʼan tumen Dios,+ maʼ unaj a kʼaskúuntik le luʼum táan u tsʼáaiktech Jéeoba a Dios bey a herenciaoʼ.+
