Deuteronomio 31:1-30
31 Moisés túuneʼ bineʼ ka tu yaʼalaj tiʼ tuláakal u kaajil Israel:
2 «Beoraaʼ teneʼ yaanten 120 años.+ Maʼ tu páajtal u seguer in nuʼuktikeʼex, tumen Jéeobaeʼ tsʼoʼok u yaʼalikten: ‹Techeʼ maʼ ken a kʼáatmáans le Jordánoʼ›.+
3 Jéeoba a Dioseʼex kun kʼáatmáan ta wéeteleʼex, letiʼ ken u xuʼuls tiʼ le naciónoʼob ta táaneʼexoʼ yéetel teʼexeʼ yaan a wookleʼex kajtal teʼ luʼumoʼob jeʼeloʼ.+ Josué ken u nuʼukteʼex utiaʼal a kʼáatmáaneʼex+ jeʼex tsʼoʼok u yaʼalik Jéeobaoʼ.
4 Jéeobaeʼ yaan u xuʼulsik tiʼ le naciónoʼob jeʼex úuchik u xuʼulsik tiʼ Seón+ yéetel tiʼ Og,+ u reyoʼob le amorreoʼoboʼ bey xan jeʼex úuchik u xuʼulsik tiʼ u luʼumoʼoboʼ.+
5 Jéeobaeʼ yaan u ganarkoʼob ta woʼolaleʼex, teʼex túuneʼ unaj a beetkeʼextiʼob jach jeʼex tsʼoʼok in waʼalikteʼexoʼ.+
6 Maʼ a chʼaʼikeʼex saajkil mix u péek a wóoleʼex.+ Maʼ a sajaktaleʼex mix a kikilankileʼex tu táanoʼob,+ tumen Jéeoba a Dioseʼexeʼ letiʼe máax táan u bin ta wéeteleʼexoʼ. Letiʼeʼ maʼ ken u pʼateʼex ta juunaleʼex yéetel junpuliʼ maʼ ken u xúumpʼatteʼex».+
7 Moisés túuneʼ tu tʼanaj Josuéeʼ ka tu yaʼalajtiʼ tu táan u kaajil Israel: «Maʼ a chʼaʼik saajkil mix u péek a wóol,+ tumen teech kan oksik le kaaj teʼ luʼum tu jurartaj Jéeoba tiʼ u yúuchben láakʼtsiloʼob u tsʼáaiktiʼoboʼ, yéetel teech kan tsʼáaiktiʼob bey herenciaeʼ.+
8 Jéeoba kun bin táanil tiʼ teech, mantatsʼ yaan u yantal ta wéetel.+ Letiʼeʼ maʼ ken u pʼatech ta juunal yéetel junpuliʼ maʼ ken u xúumpʼattech. Maʼ a chʼaʼik saajkil mix a kikilankil».+
9 Moisés túuneʼ tu tsʼíibtaj le Leyaʼ+ ka tu tsʼáaj tiʼ le sacerdoteʼob levitaʼob bisik u cajail u pacto Jéeoba bey xan tiʼ tuláakal u nuuktakil u kaajil Israeloʼ.
10 Moiséseʼ tu yaʼalajtiʼob: «Le kéen u chuk le año sieteoʼ, le año utiaʼal u pʼaʼatal libreil tuláakaloʼ,+ durante u Fiestail le Paseloʼoboʼ,+
11 le kéen u muchʼuba tuláakal u kaajil Israel tu táan Jéeoba+ a Dios teʼ lugar ken u yéeyoʼ, unaj a xokik le Leyaʼ utiaʼal ka uʼuyaʼak tumen tuláakal u kaajil Israel.+
12 Muchʼkíint le kaajoʼ,+ le xiiboʼoboʼ, le koʼoleloʼoboʼ, le mejen paalaloʼoboʼ yéetel le j-táanxel luʼumiloʼob kajaʼanoʼob ta kaajaleʼexoʼ, utiaʼal ka u yuʼuboʼob, ka kaanbalnakoʼob yéetel ka u kan u respetartoʼob Jéeoba a Dioseʼex, yéetel utiaʼal ka u beetoʼob tuláakal le baʼax ku yaʼalik le Leyaʼ.
13 Le u hijoʼob maʼ u kʼaj óoloʼob kaʼach le Leyaʼ yaan u yuʼubikoʼob baʼax ku yaʼalik,+ yéetel yaan u kanik u respetartoʼob Jéeoba a Dioseʼex tuláakal le kʼiinoʼob kan kuxtaleʼex teʼ luʼum kan okol a chʼaʼexoʼ, le luʼum ken a chʼaʼex le kéen a kʼáatmáanseʼex le Jordánoʼ».+
14 Jéeoba túuneʼ tu yaʼalaj tiʼ Moisés: «¡Ilawile! Tsʼoʼok u náatsʼal u kʼiinil a kíimil.+ Tʼan Josuéeʼ ka xiʼikech tu yéetel teʼ najil reuniónoʼ teʼeloʼ tiʼ ken in yéey utiaʼal ka u nuʼukt le kaajoʼ».+ Moisés yéetel Josué túuneʼ binoʼob tak teʼ tuʼux yaan le najil reuniónoʼ.
15 Jéeoba túuneʼ tu chíikbesuba teʼ najil reunión ichil le múuyaloʼ,* yéetel le múuyaloʼ tiʼ pʼáat tu entradail le najil reuniónoʼ.+
16 Jéeobaeʼ tu yaʼalaj túun tiʼ Moisés: «¡Ilawile! Jach taʼaytak a kíimil, yéetel le kaajaʼ yaan u káajal u traicionarken yéetel u diosoʼob le kaajoʼob yanoʼob tu baʼpachoʼoboʼ, le yanoʼob teʼ luʼum tuʼux kun binoʼoboʼ.+ Yaan u pʼatkenoʼob+ yéetel yaan u xuʼulul u beetkoʼob baʼax ku yaʼalik le pacto tin beetaj tu yéeteloʼoboʼ.+
17 Le kéen úuchuk leloʼ teneʼ yaan in jach pʼuʼujul tu contraʼob,+ yaan in pʼatkoʼob+ yéetel maʼ ken in beet u cuentailoʼob+ hasta ken xuʼulsaʼaktiʼob. Le kéen taalak túun tu yóokʼoloʼob yaʼab problemas yéetel le kéen muʼyajnakoʼobeʼ+ yaan u yaʼalikoʼob: ‹¿Maʼ wa ta tʼaan táan k-sen muʼyaj tumen minaʼan Dios t-éeteliʼ?›.+
18 Chéen baʼaleʼ teʼ kʼiin jeʼeloʼ láayliʼ maʼ ken in beet u cuentailoʼob yoʼolal tuláakal le baʼaloʼob kʼaastak tu beetoʼob úuchik u adorarkoʼob uláakʼ diosoʼoboʼ.+
19 Beora túunaʼ tsʼíibteʼex le kʼaayaʼ+ yéetel kaʼanseʼex tiʼ le israelitaʼoboʼ.+ Beeteʼex u kankoʼob utiaʼal ka meyajnak bey in testigo tu contra u kaajil Israeleʼ.+
20 Le kéen in woksoʼob teʼ luʼum tuʼux ku tuul leche yéetel kaab, le luʼum tin waʼalaj in tsʼáaik tiʼ u yúuchben láakʼtsiloʼoboʼ,+ yéetel le kéen jaankoʼob tak ken naʼajchajkoʼob+ yéetel le kéen xiʼiktiʼob maʼalobileʼ,*+ letiʼobeʼ yaan u joʼopʼol u adorarkoʼob uláakʼ diosoʼob yéetel maʼ ken u respetartenoʼob, yaan u xuʼulul u beetkoʼob le baʼax ku yaʼalik le pacto tin beetaj tu yéeteloʼoboʼ.+
21 Le kéen taalak túun tu yóokʼoloʼob yaʼab problemas yéetel le kéen muʼyajnakoʼobeʼ,+ le kʼaayaʼ yaan u meyajtiʼob bey in testigo tu contraʼobeʼ (u paalaloʼobeʼ maʼ unaj u tuʼubsikoʼobiʼ), tumen teneʼ in wojel baʼax tuukulil tsʼoʼok u yantaltiʼob+ tak antes tiʼ in woksikoʼob teʼ luʼum tin jurartaj in tsʼáaiktiʼoboʼ».
22 Teʼ kʼiin jeʼeloʼ Moiséseʼ tu tsʼíibtaj le kʼaayoʼ yéetel tu kaʼansaj tiʼ le israelitaʼoboʼ.
23 Letiʼ* túuneʼ tu tsʼáaj Josué u hijo Nun utiaʼal ka u nuʼukt le kaajoʼ+ yéetel tu yaʼalajtiʼ: «Maʼ a chʼaʼik saajkil mix u péek a wóol,+ tumen teech ken a beet u yokol le israelitaʼob teʼ luʼum tin jurartaj kun ookloʼoboʼ,+ teneʼ yaan in wantal ta wéetel».
24 Chéen pʼelak tsʼoʼokik u tsʼíibtik Moisés tuláakal u tʼaaniloʼob le Ley tiʼ junpʼéel librooʼ,+
25 Moiséseʼ tu yaʼalaj tiʼ le levitaʼob bisik u cajail u pacto Jéeobaoʼ:
26 «Chʼaʼex u libroil le Leyaʼ+ ka a tsʼáaʼex tu tséel u cajail u pacto+ Jéeoba a Dioseʼex, lelaʼ yaan u meyaj bey juntúul testigo ta contraʼexeʼ.
27 Tumen teneʼ in wojleʼ teʼexeʼ jach tercoʼex+ yéetel ka tsʼáaikabaʼex tu contra le baʼax ku yaʼalaʼalteʼexoʼ.+ Wa mientras tiaʼanen ta wéeteleʼex tercoʼex yéetel ka tsʼáaikabaʼex tu contra Jéeobaeʼ, ¡bukaʼaj maas wal ken a beet a tercoileʼex le kéen kíimkeneʼ!
28 Muchʼkíinteʼex tuláakal u nuuktakil a tribuʼex bey xan u jefeiloʼob le kaajoʼ utiaʼal ka u chʼenxikintoʼob tuláakal le tʼaanoʼobaʼ, yéetel utiaʼal ka in tsʼáa le kaʼan yéetel le luʼum bey testigo tu contraʼoboʼ.+
29 Tumen in wojleʼ le kéen kíimkeneʼ yaan a beetkeʼex baʼax kʼaas+ yéetel yaan a pʼatkeʼex le bej tin waʼalajteʼex ka a biseʼexoʼ. In wojel xaneʼ le kéen máanak kʼiineʼ bíin taalak ta wóokʼoleʼex baʼaloʼob kʼaastak+ yoʼolal le baʼax kʼaas ken a beeteʼex tu táan Jéeobaoʼ yéetel tumen yaan a ofenderkeʼex yéetel le baʼaxoʼob ken a beeteʼexoʼ».
30 Moisés túuneʼ tu yaʼalaj tu táan tuláakal u kaajil Israel le baʼax ku yaʼalik le kʼaayaʼ, desde tu káajbal tak tu tsʼoʼokbal,+ tu yaʼalaj:
Notas
^ Ich hebreoeʼ ku yaʼalaʼal kaʼach «junpʼéel múuyal de u forma junpʼéel columna».
^ Ich hebreoeʼ ku yaʼalaʼal kaʼach «le kéen polokchajkoʼob».
^ Teʼelaʼ táan u yúuchul tʼaan tiʼ Dios.
