Efesios 4:1-32
4 Teneʼ kʼalaʼanen+ tu yoʼolal Yuumtsil, táan in kʼáatikteʼex ka kuxlakeʼex+ jeʼex u páaʼtaʼal tiʼ teʼex le ka tʼaʼaneʼexoʼ,
2 ka yanakteʼex kabal óolal,+ jeetsʼelil, paciencia,+ yéetel tu yoʼolal yaabilajeʼ soportartabaʼex ta baatsileʼex.+
3 Ka yanakteʼex xan jeetsʼelil ta baatsileʼex yéetel ka a xachabaʼex utiaʼal ka múuchʼ pʼáatkeʼex jeʼex úuchik a muʼuchʼleʼex tumen le espíritu santooʼ.+
4 Junpʼéeliliʼ wíinklil yaan+ yéetel junpʼéeliliʼ espíritu santo yaan,+ teʼex xaneʼ junpʼéeliliʼ baʼax ka páaʼtkeʼex+ le ka tʼaʼaneʼexoʼ;
5 juntúuliliʼ Yuumtsil yaan,+ junpʼéeliliʼ fe, junpʼéeliliʼ okjaʼ,
6 juntúuliliʼ Dios yéetel Taatatsil tiʼ tuláakal máak. Letiʼeʼ tu yóokʼol tuláakal máak yaan, ku nuʼuktik tuláakal máak yéetel ku tsʼáaik muukʼ tiʼ tuláakal máak.
7 Cada juntúul tiʼ toʼoneʼ tu kʼamaj u nojoch utsil Dios, tu kʼamaj le bukaʼaj tu yilaj Cristo maʼalob ka u síi tiʼ cada juntúuloʼ.+
8 Le oʼolal u Tʼaan Dioseʼ ku yaʼalik: «Le ka naʼak kaʼaneʼ yaan máakoʼob tu bisaj; tu tsʼáaj máakoʼob bey junpʼéel regaloeʼ».+
9 ¿Baʼaxten ku yaʼalaʼal «naʼaki»? Ku yaʼalaʼal naʼaki tumen yáax táanileʼ éem way luʼumeʼ.
10 Le máax éemoʼ láayliʼ letiʼe máax naʼak+ tu maas kaʼanlil tuláakal le kaʼanoʼoboʼ,+ letiʼeʼ naʼak utiaʼal u chúukbesik tuláakal le baʼaloʼoboʼ.
11 Teʼ múuchʼuliloʼ tu tsʼáaj jujuntúul máakoʼob u beet u apóstoliloʼob,+ uláakʼoʼobeʼ u beet u profetailoʼob,+ uláakʼoʼobeʼ utiaʼal u máan u tsikbaltoʼob u tʼaan Dios,+ uláakʼoʼobeʼ utiaʼal ka u kanáantoʼob le tamanoʼoboʼ yéetel uláakʼoʼobeʼ utiaʼal ka kaʼansajnakoʼob.+
12 Lelaʼ tu beetaj utiaʼal ka tojkíintaʼak u beel* le máaxoʼob santoʼoboʼ, utiaʼal ka yanak máaxoʼob meyaj ichil le múuchʼuliloʼ yéetel utiaʼal ka muʼukʼaʼanchajak u wíinklil Cristo,*+
13 tak ken junpʼéeliliʼchajak le fe yaantoʼonoʼ yéetel tak ken k-kʼaj óolt tubeel u Paal Dios, utiaʼal ka kʼuchkoʼon k-beetba bey jeʼex juntúul nojoch wíinikeʼ,+ utiaʼal beyoʼ ka kuxlakoʼon jeʼex úuchik u kuxtal Cristoeʼ.
14 Bey túunoʼ unaj u xuʼulul k-beetikba bey jeʼex le mejen paalaloʼoboʼ. Tumen le máax ku bin tu paach kaʼansajoʼob maʼ jaajtak+ ku taal tiʼ máakoʼob jach yaan u naʼatoʼob utiaʼal u tuusoʼobeʼ bey jeʼex junpʼéel barco ku máan yóoʼ kʼáaʼnáab ku suʼusutaʼal tumen le iikʼoʼ yéetel ku yuyunchʼintaʼal tumen u olasil le jaʼoʼ.
15 Baʼax unaj k-beetkeʼ k-aʼalik u jaajil, yéetel yoʼolal le yaabilaj yaantoʼonoʼ unaj u seguer k-nojochtal tiʼ tuláakal baʼal utiaʼal ka pʼáatkoʼon jeʼex Cristo, u poolil le wíinkliloʼ.+
16 Tu yoʼolal letiʼeʼ tuláakal le wíinkliloʼ+ maʼalob u nupmiluba yéetel ku múuchʼ meyaj tu yoʼolal le jejeláas tuʼuxoʼob ku núupul u baakeloʼob le wíinkliloʼ, tuʼux yaan tuláakal baʼax kʼaʼabéet utiaʼal ka péeknak. Wa tuláakal le u xéexetʼal le wíinklil ku meyaj maʼaloboʼ tuláakal kun bin u nojochtal yéetel kun bin u muʼukʼaʼantal u yaabilajoʼob.+
17 Le oʼolaleʼ kin waʼalik yéetel kin kʼáat óoltikteʼex tu kʼaabaʼ Yuumtsileʼ maʼ u seguer a máaneʼex jeʼex u máan u máakiloʼob le yóokʼol kaabaʼ,+ tumen letiʼobeʼ chéen kunel baʼaloʼob ku beetkoʼob jeʼex u taal tu pooloʼobeʼ.+
18 U tuukuloʼobeʼ tiaʼan ich éeʼjochʼeʼenileʼ, tsʼoʼoleʼ náachchajaʼanoʼob tiʼ le kuxtal ku tsʼáaik Diosoʼ, tumen ikil u chichkúuntik u puksiʼikʼaloʼobeʼ mix baʼal u yojloʼob.
19 Letiʼobeʼ tsʼoʼok u pʼáatal jach junpuliʼ maʼ u yojloʼob baʼax uts yéetel baʼax kʼaasiʼ, tsʼoʼoleʼ jach u kʼubmaj u yóoloʼob kuxtal ich x-maʼ suʼtalil*+ utiaʼal ka páajchajak u chʼíikil u beetoʼob tuláakal u jejeláasil baʼaloʼob kʼaastakoʼob utiaʼal u tsʼoʼokbesik u tsʼíibolaloʼob.
20 Chéen baʼaleʼ jeʼex kaʼansaʼabik tiʼ teʼexeʼ Cristoeʼ maʼ bey úuchik u kuxtaliʼ.
21 Teʼexeʼ ta wuʼuyeʼex yéetel kaʼansaʼabteʼex baʼaloʼob yaan yil yéetel Jesús; letiʼeʼ mantatsʼ ku yaʼalik u jaajil.
22 Le oʼolaleʼ teʼexeʼ unaj a pitkeʼex le úuchben modos+ yanchajteʼex tu yoʼolal le baʼaxoʼob ka beetkeʼex kaʼachoʼ, le a modoseʼex táan u bin u maas kʼastal ikil a tuʼusleʼex tumen a tsʼíibolaleʼexoʼ.+
23 Teʼex túuneʼ unaj u seguer a túumbenkuntkeʼex le bix a tuukuleʼexoʼ,*+
24 yéetel unaj a búukintikeʼex le túumben modos+ beetaʼan jeʼex uts tu tʼaan Dioseʼ, jeʼex u yaʼalik le jaajil justiciaoʼ bey xan le fejoʼ.
25 Le beetkeʼ beora tsʼoʼok u xuʼulul a tuuseʼexaʼ cada juntúuleʼ u yaʼal u jaajil tiʼ u yéet máakil,+ tumen tuláakloʼoneʼ táakpajaʼanoʼon tiʼ junpʼéeliliʼ wíinklil.+
26 Wa ka kʼuuxileʼexeʼ maʼ a kʼebantaleʼex,+ maʼ a chaʼikeʼex u tʼúubul kʼiin láayliʼ kʼuuxilnajaʼaneʼexeʼ.+
27 Maʼ a tsʼáaikeʼex tuʼux u meyaj le Kʼaasilbaʼaloʼ.*+
28 Le máax ku yookoleʼ xuʼuluk u yookol, baʼaxeʼ ka u tsʼáa u yóol meyaj+ yéetel ka u beet utsil meyaj utiaʼal ka yanak baʼax u tsʼáa tiʼ le máax kʼaʼabéet wa baʼax tiʼoʼ.+
29 Maʼ u jóokʼol mix junpʼéel kʼaakʼas tʼaan ta chiʼex,+ baʼaxeʼ chéen le baʼax maʼalob jeʼel u líiʼsik u yóol máak jeʼex u kʼaʼabéettaleʼ, utiaʼal beyoʼ ka u taas utsil tiʼ le máaxoʼob chʼenxikintikeʼexoʼ.+
30 Maʼ a beetkeʼex xan u tristetal u espíritu santo Dios,+ le baʼax yéetel sellartaʼabeʼex+ utiaʼal u kʼiinil le jáalkʼabil tsʼoʼok u boʼotaʼaloʼ.+
31 Tseleʼex tiʼ teʼex tuláakal u jejeláasil kʼaakʼas kʼuuxilil,+ pʼujaʼanil, tsʼíikilil, awat tʼaan, poochʼil+ bey xan tuláakal baʼax jeʼel u beetik loobeʼ.+
32 Baʼaxeʼ eʼes a wutsileʼex ta baatsileʼex, paklan chʼaʼ óotsiltabaʼex+ yéetel paklan perdonartabaʼex tu jaajil a wóoleʼex jeʼex tu perdonartileʼex xan Dios yéetel u jaajil u yóol tu yoʼolal Cristoeʼ.+
Notas
^ Wa «utiaʼal u kaʼansaʼal».
^ Lelaʼ letiʼe múuchʼuliloʼ.
^ Ilawil «Kuxtal ich x-maʼ suʼtalil», página 2568.
^ Wa «le muukʼ péeksik a tuukuleʼexoʼ».
^ Ich griegoeʼ ku yaʼalaʼal kaʼach «Diablo». Ilawil «Kʼaasilbaʼal», página 2568.
