Ester 5:1-14
5 Tu yóoxpʼéel kʼiineʼ+ reina Estereʼ tu takaj junpʼéel kiʼichkelem nookʼeʼ ka bin waʼatal tu táankabil u yotoch* le reyoʼ, aktáan teʼ tuʼux yaan le reyoʼ. Teʼ súutuk jeʼeloʼ le reyoʼ tiʼ kulukbal kaʼach tu tronoeʼ, aktáan tu entradail u yotoch.
2 Chéen pʼel tu yilil le rey tiʼ waʼalakbal le reina Ester teʼ táankaboʼ jach kiʼimakchaj u yóoleʼ ka tu tichʼaj tu tojil Ester le xóolteʼ de oro+ yaan tu kʼaboʼ. Ester túuneʼ náatsʼeʼ ka tu machaj u punta le xóolteʼoʼ.
3 Le rey túunoʼ tu yaʼalaj tiʼ le reinaoʼ: «Ester, ¿yaan wa baʼax ku yúuchul? ¿Yaan wa baʼax a kʼáat? ¡Tak wa ka a kʼáatten táanchumuk tiʼ in reinoeʼ teneʼ jeʼel in tsʼáaiktecheʼ!».
4 Estereʼ tu yaʼalaj: «Yuum rey, wa maʼalob a wilkeʼ koʼoten yéetel Amán+ utiaʼal junpʼéel janal in beetmajtech».
5 Le oʼolal le reyoʼ tu yaʼalaj tiʼ u j-meyajoʼob: «Aʼaleʼex tiʼ Amán ka taalak tu séebaʼanil, utiaʼal u béeytal le baʼax ku kʼáatik Esteroʼ». Ka tsʼoʼokeʼ le reyoʼ bin yéetel Amán teʼ janal tu beetaj Esteroʼ.
6 Le táan kaʼach u janaloʼob yéetel le táan u piʼichil le vinooʼ le reyoʼ tu yaʼalaj tiʼ Ester: «¿Yaan wa baʼax a kʼáat? ¡Teneʼ jeʼel in tsʼáaiktecheʼ! ¿Yaan wa baʼax a kʼáat ka in beete? ¡Tak wa ka a kʼáatten táanchumuk tiʼ in reinoeʼ teneʼ jeʼel in tsʼáaiktecheʼ!».+
7 Ester túuneʼ tu yaʼalaj: «Teneʼ letiʼe baʼax kin kʼáatikaʼ
8 yuum rey, wa tsʼoʼok in lúubul utsil tech, yéetel wa maʼalob a wilik a tsʼáaikten le baʼax ken in kʼáat bey xan a beetik le baʼax ken in kʼáatoʼ, ka taalakech yéetel Amán teʼ janal ken in beet sáamal a tiaʼaleʼexoʼ. Sáamal túuneʼ kin waʼaliktech baʼax in kʼáat».
9 Teʼ kʼiin jeʼeloʼ ka jóokʼ Amáneʼ kiʼimak u yóol u puksiʼikʼal yéetel jach maʼalob u yuʼubikuba. Pero jach pʼuʼuj le ka tu yilaj tiʼ kulukbal Mardoqueo tu jool u palacio le reyoʼ tumen Mardoqueoeʼ+ maʼ waʼalajiʼ mix joʼopʼ u kikilankil tu táaniʼ.
10 Chéen baʼaleʼ Amáneʼ tu controlartubaeʼ ka bin tu yotoch, ka kʼucheʼ tu túuxtaj tʼanbil u amigoʼob bey xan Zeres+ u yatan.
11 Amáneʼ joʼopʼ u yaʼalik le bukaʼaj ayikʼalil yaantiʼoʼ, le jaytúul u paalal yanoʼ,+ le bix úuchik u tsʼaʼabaltiʼ maas autoridad tumen le reyoʼ yéetel le bix úuchik u tsʼaʼabal tu yóokʼol le príncipeʼob yéetel le máaxoʼob ku meyajoʼob yiknal le reyoʼ.+
12 Amáneʼ tu yaʼalaj xan: «Tsʼoʼoleʼ le reinaoʼ chéen tiʼ teen yéetel tiʼ le rey tu yaʼalaj ka xiʼikoʼon teʼ janal tu beetoʼ,+ tiʼ mix máak uláakʼ tu yaʼalaj. Tu yaʼalaj xan ka xiʼiken sáamal utiaʼal in janal yéetel le reina bey xan yéetel le reyoʼ.+
13 Pero tuláakal lelaʼ maʼ tu kiʼimakkúuntik in wóol mientras tin wilik tiʼ kulukbal Mardoqueo le judío tu jool u palacio le reyoʼ».
14 Le oʼolal aʼalaʼabtiʼ tumen u amigoʼob yéetel tumen Zeres u yatan: «Aʼal ka paʼakʼak junpʼéel cheʼ, kex 22 metros* u kaʼanlil. Sáamal tempranoeʼ ka kʼáatik tiʼ le rey ka chʼuykíintaʼak Mardoqueo teʼ cheʼoʼ,+ tsʼoʼoleʼ ka bin yéetel le rey a disfrutart le janaloʼ». Le baʼax aʼalaʼabaʼ jach maʼalob tu yuʼubil Amán, le oʼolal tu yaʼalaj ka paʼakʼak le cheʼoʼ.
