Ester 6:1-14
-
Ku nojbaʼalkúuntaʼal Mardoqueo tumen le reyoʼ (1-14)
6 Teʼ áakʼaboʼ bin u wenel* le reyoʼ, le oʼolal tu yaʼalaj ka taasaʼak le libro tuʼux ku tsʼíibtaʼal le baʼaxoʼob ku yúuchloʼ,+ ka tsʼoʼokeʼ xoʼok tu táan.
2 Ka túun ilaʼab tsʼíibtaʼan teʼ libro le baʼax tu yaʼalaj Mardoqueo yoʼolal Bigtana yéetel Teres, le kaʼatúul máakoʼob yaan autoridad tiʼob yéetel táan kaʼach u kanáantkoʼob u joonajil le palaciooʼ. Le kaʼatúul máakoʼobaʼ tu chʼaʼtukloʼob kaʼach u kíimskoʼob rey Asuero.+
3 Le reyoʼ tu kʼáataj: «¿Baʼax beetaʼab tu yoʼolal Mardoqueo wa baʼax tsʼoʼok u tsʼaʼabaltiʼ tu yoʼolal lelaʼ?». Le máaxoʼob atendertik le reyoʼ tu yaʼaloʼob: «Mix baʼal beetaʼak tu yoʼolal».
4 Maʼ sáam tiʼ leloʼ le reyoʼ tu yaʼalaj: «¿Máax yaan teʼ táankaboʼ?». Amáneʼ tsʼoʼok kaʼach u kʼuchul tak tu táankabil u yotoch*+ le rey utiaʼal u kʼáatik tiʼ le rey ka chʼuykíintaʼak Mardoqueo tiʼ le cheʼ tsʼoʼok u beetik u preparartaʼaloʼ.+
5 Le máaxoʼob atendertik le reyoʼ tu yaʼaloʼob: «Amán+ le waʼalakbal teʼ táankaboʼ». Le rey túunoʼ tu yaʼalaj: «Aʼaleʼextiʼ ka okok».
6 Le ka ook Amáneʼ aʼalaʼabtiʼ tumen le reyoʼ: «¿Baʼax unaj u beetaʼal tiʼ juntúul máak taak u yeʼesik u yutsil le rey tiʼoʼ?». Ka tu yuʼubaj Amán leloʼ tu yaʼalaj ichil u puksiʼikʼal: «¿Tiʼ máax maas jeʼel u taaktal u yeʼesik u yutsil le rey wa maʼ tiʼ tenoʼ?».+
7 Amán túuneʼ tu yaʼalaj tiʼ le reyoʼ: «Wa le rey taak u yeʼesik u yutsil tiʼ juntúul maakoʼ, letiʼe baʼax unaj u beetaʼal tu yoʼolalaʼ:
8 taasaʼak junpʼéel tiʼ le nookʼoʼob ku takik le reyoʼ+ bey xan juntúul tiʼ le tsíiminoʼob ku natʼkoʼ, tu pool le tsíiminoʼ unaj tsʼaʼan junpʼéel adorno especial.
9 Le nookʼ yéetel le tsíiminoʼ unaj u tsʼaʼabal tiʼ juntúul tiʼ u maas nojoch príncipeʼob le reyoʼ. Kéen tsʼoʼokkeʼ ku chʼaʼabal le nookʼoʼ ku taʼakal tiʼ le máax taak u yeʼesik u yutsil le rey tiʼoʼ. Le máak túunoʼ ku natʼik le tsíiminoʼ, tsʼoʼoleʼ ku máansaʼal tu kʼíiwikil le kaaj mientras táan u kʼaʼam aʼalaʼal tu táanoʼ: ‹¡Bey u beetaʼal tiʼ le máak taak u yeʼesik u yutsil le rey tiʼoʼ!›».+
10 Ka tsʼoʼokeʼ le reyoʼ tu séebaʼanil tu yaʼalaj tiʼ Amán: «Jeʼel bix táant a waʼalikoʼ, jáan chʼaʼ le nookʼ yéetel le tsíiminoʼ ka a beet bey tiʼ Mardoqueooʼ, le judío kulukbal tu jool u palacio le reyoʼ. Ilawil a beetik tuláakal le baʼax tsʼoʼok a waʼalikoʼ».
11 Amán túuneʼ tu chʼaʼaj le nookʼ yéetel le tsíiminoʼ. Ka tsʼoʼok u vestirtik Mardoqueo+ yéetel le nookʼoʼ tu beetaj u natʼik le tsíiminoʼ ka tu xíimbalkuntaj tu kʼíiwikil le kaaj táan u yaʼalik tu táanoʼ: «¡Bey u beetaʼal tiʼ le máak taak u yeʼesik u yutsil le rey tiʼoʼ!».
12 Ka tsʼoʼokeʼ Mardoqueoeʼ suunaj tu jool u palacio le reyoʼ, pero Amáneʼ tu séebaʼanil bin tu yotoch, jach yaachajaʼan u yóol hasta u pixmaj u pool.
13 Le ka tu yaʼalaj Amán tiʼ tuláakal u amigoʼob yéetel tiʼ Zeres+ u yatan tuláakal le baʼax tsʼoʼok u yúuchloʼ, le máaxoʼob yaan u naʼatoʼob yanoʼob tu yiknal bey xan Zeres u yatanoʼ tu yaʼaloʼobtiʼ: «Wa tiʼ le judíoʼob u taal Mardoqueooʼ, maʼ kan pʼáatal waʼatal tu táan. Wa tsʼoʼok u káajal a lúubul tu táaneʼ seguro yaan u xuʼulsaʼaltech».
14 Mientras táan kaʼach u tʼaanoʼob tu yéeteleʼ kʼuch le máaxoʼob tsʼaʼan autoridad tiʼoboʼ ka tu bisoʼob Amán tu séebaʼanil teʼ janal u beetmaj Esteroʼ.+
