Ester 7:1-10
7 Ka tsʼoʼokeʼ le rey yéetel Amánoʼ+ binoʼob teʼ janal tu beetaj reina Esteroʼ.
2 Le ka binoʼob teʼ janal tu kaʼatéenoʼ, le táan u piʼichil le vinooʼ, le reyoʼ tu kaʼa aʼalaj tiʼ le reinaoʼ: «Ester, ¿yaan wa baʼax a kʼáat? Teneʼ jeʼel in tsʼáaiktecheʼ. ¿Yaan wa baʼax a kʼáat ka in beete? ¡Tak wa ka a kʼáatten táanchumuk tiʼ in reinoeʼ teneʼ jeʼel in tsʼáaiktecheʼ!».+
3 Le reina Esteroʼ tu yaʼalaj: «Yuum rey, wa tsʼoʼok in lúubul utsil tech yéetel wa maʼalob a wilkeʼ, kin kʼáatiktech ka a salvart in kuxtal bey xan ka a salvart in kaajal.+
4 Tumen teen yéetel in kaajaleʼ tsʼoʼok k-koʼonol+ utiaʼal k-kíimsaʼal yéetel k-xuʼulsaʼal.+ Wa chéen ka koʼonokoʼon kaʼach utiaʼal k-beetik k-esclavoil wa k-esclavaileʼ mix baʼal kaʼach ken in waʼale. Yuum rey, maʼ unaj a chaʼik u yúuchul le nojoch loobaʼ tumen tak teech ken u perjudicartech».
5 Le rey Asuero túunoʼ tu yaʼalaj tiʼ reina Ester: «¿Máax le ku atrever u beet junpʼéel baʼal beyoʼ? ¿Tuʼux yaan letiʼ?».
6 Ester túuneʼ tu yaʼalaj: «Le máax pʼekmiloʼon yéetel k-enemigooʼ letiʼe kʼasaʼan Amánaʼ».
Le oʼolal Amáneʼ jach sajakchaj tiʼ le rey yéetel tiʼ le reinaoʼ.
7 Le reyoʼ tumen jach pʼujaʼaneʼ lukʼ teʼ naj tuʼux ku yúuchul le janaloʼ ka bin tu jardínil le palaciooʼ. Teʼ súutukoʼ Amáneʼ líikʼeʼ ka joʼopʼ u kʼáatik tiʼ Ester ka perdonartaʼak u kuxtal, tumen tu tsʼáaj cuenta yaan baʼax kun beetbiltiʼ tumen le reyoʼ.
8 Le reyoʼ lukʼ tu jardínil le palaciooʼ ka ook tu kaʼatéen teʼ naj tuʼux ku yúuchul le janaloʼ ka tu yileʼ nokokbal Amán teʼ tuʼux yaan le reinaoʼ, le rey túunoʼ tu kʼaʼam aʼalaj: «¿A kʼáat wa xan a violart le reina tin wotochoʼ?». Chéen pʼel jóokʼik tu chiʼ le rey le tʼaanoʼobaʼ le ku piʼixil u yich Amán.
9 Ka tsʼoʼokeʼ aʼalaʼab tumen Arboná,+ juntúul tiʼ le máaxoʼob yaan autoridad tiʼoboʼ: «Amáneʼ u prepararmaj junpʼéel cheʼ utiaʼal u chʼuykíintaʼal Mardoqueo,+ le máax salvart u kuxtal le reyoʼ.+ Le cheʼoʼ tiʼ pakʼaʼan tu yotoch Amáneʼ kex 22 metros* u kaʼanlil». Le rey túunoʼ tu yaʼalaj: «Chʼuykíinteʼex Amán teʼ cheʼoʼ».
10 Ka tsʼoʼokeʼ chʼuykíintaʼab Amán teʼ cheʼ u prepararmaj utiaʼal kaʼach Mardoqueooʼ. Le rey túunoʼ xuʼul u pʼujaʼanil.
Notas
^ Ich hebreoeʼ ku yaʼalaʼal kaʼach «50 codos».
