Ester 9:1-32
9 Teʼ día 13 tiʼ le mes 12 ku kʼaabaʼtik Adaroʼ+ kʼuch u kʼiinil kaʼach u tsʼoʼokbesaʼal+ le baʼax tu yaʼalaj le rey bey xan le ley tu tsʼáajoʼ. Letiʼe kʼiin kaʼach ku páaʼtaʼal utiaʼal u xanaʼchaʼataʼal le judíoʼob tumen u enemigoʼoboʼ, pero u kúulpachil úuchi tumen le judíoʼoboʼ tu xanaʼchaʼatoʼob le máaxoʼob pʼekmiloʼoboʼ.+
2 Le judíoʼoboʼ tu muchʼubaʼob tu kaajaloʼob, teʼ kaajoʼob yaan tiʼ tuláakal le luʼumoʼob yaan yáanal u páajtalil le rey Asuerooʼ+ utiaʼal u atacarkoʼob le máaxoʼob taak u beetik loob tiʼoboʼ. Mix juntúul máak páajchaj u pʼáatal waʼatal tu táanoʼob, tumen ook saajkilil tiʼ tuláakal le kaajoʼob tu yoʼolal letiʼoboʼ.+
3 Tsʼoʼoleʼ tuláakal u príncipeiloʼob le luʼumoʼob yanoʼob yáanal u páajtalil le reyoʼ, le nukuch gobernadoroʼoboʼ,*+ le u maasil gobernadoroʼob yéetel le uláakʼ máaxoʼob tsʼaʼan meyaj u beetoʼob tumen le reyoʼ táan kaʼach u yáantkoʼob le judíoʼoboʼ tumen saajkoʼob tiʼ Mardoqueo.
4 Mardoqueoeʼ jach anchajtiʼ páajtalil+ tu yotoch* le reyoʼ, u tsikbalil Mardoqueoeʼ bin u kʼiʼitpajal tiʼ tuláakal le luʼumoʼoboʼ tumen cada kʼiin ku máaneʼ táan kaʼach u maas antal páajtalil tiʼ.
5 Le judíoʼoboʼ tu ganartoʼob tuláakal u enemigoʼob, tu kíimsoʼob yéetel espada, tu xuʼulsoʼobtiʼob, tu beetoʼob jeʼel baʼaxak u kʼáatoʼob tiʼ le máaxoʼob pʼekmiloʼoboʼ.+
6 Le judíoʼoboʼ tu kíimsoʼob yéetel tu xuʼulsoʼob tiʼ 500 u túulal máakoʼob kajaʼanoʼob teʼ nukuch najoʼob* yaan Susaoʼ.+
7 Tu kíimsoʼob xan Parsandatá, Dalfón, Aspatá,
8 Poratá, Adalía, Aridatá,
9 Parmastá, Arisay, Ariday yéetel Vaizata,
10 letiʼe diez u túulal u hijoʼob Amán u hijo Amedataoʼ, u enemigo kaʼach le judíoʼoboʼ.+ Pero ka tsʼoʼok u kíimskoʼobeʼ maʼ tu chʼaʼajoʼob mix junpʼéel tiʼ le baʼaxoʼob yaantiʼoboʼ.+
11 Teʼ kʼiin jeʼeloʼ aʼalaʼab tiʼ le rey jaytúul máakoʼob kíimsaʼaboʼob teʼ nukuch najoʼob yaan Susaoʼ.
12 Le rey túunoʼ tu yaʼalaj tiʼ reina Ester: «Le judíoʼoboʼ tsʼoʼok u kíimskoʼob yéetel tsʼoʼok u xuʼulskoʼob tiʼ 500 u túulal máakoʼob kajaʼanoʼob teʼ nukuch najoʼob yaan Susaoʼ bey xan tiʼ le 10 u túulal u hijoʼob Amán kajaʼanoʼob teʼeloʼ. ¿Baʼax tsʼoʼok u beetik le judíoʼob teʼ tuláakʼ luʼumoʼob yaan yáanal u páajtalil le reyoʼ?+ ¿Yaan wa baʼax a kʼáat beoraaʼ? Teneʼ jeʼel in tsʼáaiktecheʼ. ¿Yaan wa uláakʼ baʼax a kʼáat? Teneʼ jeʼel in tsʼáaiktecheʼ».
13 Ester túuneʼ tu yaʼalaj: «Wa maʼalob u yilik le reyoʼ+ ka chaʼabak tiʼ le judíoʼob kajaʼanoʼob Susa ka u beetoʼob xan sáamal le baʼax ku yaʼalik le leyoʼ+ jeʼex úuchik u beetkoʼob bejlaʼoʼ, yéetel ka chʼuykíintaʼak u hijoʼob Amán tiʼ cheʼ».+
14 Le rey túunoʼ tu yaʼalaj ka beetaʼak beyoʼ. Beetaʼab junpʼéel ley tu kaajil Susaeʼ ka chʼuykíintaʼab le diez u túulal u hijoʼob Amánoʼ.
15 Le judíoʼob kajaʼanoʼob Susaoʼ tu muchʼubaʼob tu kaʼatéen teʼ día 14 teʼ mes ku kʼaabaʼtik Adaroʼ+ ka tu kíimsoʼob 300 u túulal máakoʼob tu kaajil Susa, chéen baʼaleʼ maʼ tu chʼaʼajoʼob mix junpʼéel tiʼ le baʼaxoʼob yaantiʼoboʼ.
16 Le u maasil judíoʼob yanoʼob teʼ tuláakʼ luʼumoʼob yaan yáanal u páajtalil le reyoʼ tu muchʼubaʼobeʼ ka tu defendertaj u kuxtaloʼob.+ Letiʼobeʼ tu xuʼulsoʼob tiʼ u enemigoʼob,+ tu kíimsoʼob 75,000 u túulal tiʼ le máaxoʼob pʼekmiloʼoboʼ, chéen baʼaleʼ maʼ tu chʼaʼajoʼob mix junpʼéel tiʼ le baʼaloʼob yaantiʼoboʼ.
17 Leloʼ tu beetoʼob teʼ día 13 tiʼ u mesil Adaroʼ, tsʼoʼoleʼ ka jeʼeloʼob teʼ día 14. Teʼ kʼiin jeʼeloʼ joʼopʼ u festejaroʼob yéetel u kiʼimakkúuntik u yóoloʼob.
18 Le judíoʼob kajaʼanoʼob Susaoʼ tu muchʼubaʼob teʼ día 13+ yéetel teʼ día 14,+ letiʼobeʼ jeʼeloʼob teʼ día 15, teʼ kʼiin jeʼeloʼ joʼopʼ u festejaroʼob yéetel u kiʼimakkúuntik u yóoloʼob.
19 Chéen baʼaleʼ le judíoʼob kajaʼanoʼob tiʼ le kaajoʼob náach yaniloʼoboʼ joʼopʼ u festejaroʼob yéetel u kiʼimakkúuntik u yóoloʼob teʼ día 14 tiʼ u mesil Adaroʼ, tu kʼiinbesoʼob le kʼiin jeʼeloʼ+ yéetel joʼopʼ u paklan síikoʼob janal tu baatsiloʼob.+
20 Mardoqueoeʼ+ tu tsʼíibtaj le baʼaxoʼob úuchoʼ, ka tsʼoʼokeʼ tu túuxtaj cartaʼob tiʼ tuláakal le judíoʼob yanoʼob tiʼ tuláakal le luʼumoʼob yaan yáanal u páajtalil rey Asuerooʼ, le naatsʼ yaniloʼoboʼ bey xan le náach yaniloʼoboʼ.
21 Letiʼeʼ tu yaʼalajtiʼob ka u kʼiinbesoʼob le día 14 yéetel 15 tiʼ u mesil Adaroʼ, maʼ unaj u máan junpʼéel año maʼ u beetkoʼobiʼ.
22 Teʼ kʼiinoʼob jeʼeloʼ le judíoʼoboʼ xuʼul u baʼateltaʼaloʼob tumen u enemigoʼob, teʼ mes jeʼeloʼ xuʼul u yaatal u yóoloʼobeʼ ka kiʼimakchaj u yóoloʼob, tu lugar u yaatal u yóoloʼobeʼ+ joʼopʼ u festejaroʼob. Teʼ kʼiinoʼoboʼ unaj u festejaroʼob, unaj u kiʼimakkúuntik u yóoloʼob, unaj u paklan síikoʼob janal tu baatsiloʼob yéetel unaj u síikoʼob baʼaloʼob tiʼ le óotsiloʼoboʼ.
23 Le judíoʼoboʼ tu yaʼaloʼobeʼ yaan u seguer u festejaroʼob jeʼex tsʼoʼok u káajal u beetkoʼoboʼ yéetel yaan u beetkoʼob le baʼax tsʼíibtaʼabtiʼob tumen Mardoqueooʼ.
24 Tumen Amán+ u hijo Amedata, le agaguita,+ u enemigo tuláakal le judíoʼoboʼ yaan baʼax tu chʼaʼtuklaj tu contra le judíoʼob utiaʼal u xuʼulsiktiʼoboʼ+ yéetel tu jóoʼsaj Pur+ wa Suerte utiaʼal u sajakkúuntkoʼob yéetel utiaʼal u xuʼulsiktiʼob.
25 Pero le ka ook Ester tu táan le reyoʼ letiʼeʼ tu yaʼalaj ka tsʼíibtaʼak+ lelaʼ: «Le baʼax kʼaas tu chʼaʼtuklaj tu contra le judíoʼoboʼ+ suunak tu yóokʼol». Le oʼolal letiʼ yéetel u hijoʼobeʼ chʼuykíintaʼaboʼob tiʼ cheʼ.+
26 Tu yaʼaloʼobeʼ le kʼiinoʼob jeʼeloʼ yaan u kʼaabaʼtikoʼob Purim tumen ku taal tiʼ le tʼaan Puroʼ.*+ Tu yoʼolal tuláakal le baʼax tsʼíibtaʼab teʼ carta, yéetel tu yoʼolal le baʼax tu yiloʼob yoʼolal le asunto jeʼeloʼ bey xan tu yoʼolal le baʼax taal tu yóokʼoloʼoboʼ,
27 le judíoʼoboʼ tu comprometertubaʼob. Tu yaʼaloʼobeʼ letiʼob, u paalaloʼob yéetel tuláakal le máaxoʼob ken u muchʼubaʼob tu yéeteloʼoboʼ+ maʼ kun fallar u kʼiinbeskoʼob le kaʼapʼéel kʼiinoʼobaʼ yéetel yaan u beetkoʼob tuláakal le baʼax tsʼíibtaʼan tu yoʼolaloʼoboʼ. Maʼ kun máan junpʼéel año maʼ u kʼiinbeskoʼob teʼ kʼiinoʼob aʼalaʼanoʼ.
28 Le kʼiinoʼobaʼ unaj u kʼaʼajsaʼal yéetel u kʼiinbesaʼal tumen cada generación, cada familia, cada luʼumil yéetel cada kaaj. Le u kʼiinbesaʼal u kʼiiniloʼob Purimoʼ maʼ unaj u xuʼulul u beetaʼal tumen le judíoʼoboʼ maʼ xan unaj u xuʼulul u kʼaʼajsaʼal tumen u paalaloʼobiʼ.
29 Le reina Ester u hija Abiyail bey xan Mardoqueo le judíooʼ meyajnajtiʼob le autoridad yaantiʼob utiaʼal u múul tsʼíibtikoʼob uláakʼ junpʼéel carta utiaʼal u maas jetsʼikoʼob u kʼiinbesaʼal le Purimoʼ.
30 Ka tsʼoʼokeʼ túuxtaʼab cartaʼob tiʼ tuláakal le judíoʼob yanoʼob tiʼ le 127 luʼumoʼob+ yanoʼob yáanal u reino rey Asuerooʼ,+ beetaʼab yéetel tʼaanoʼob ku taasik jeetsʼelil yéetel ku yaʼalikoʼob u jaajil.
31 Beetaʼab utiaʼal u maas jéetsʼel u kʼiinbesaʼal u kʼiiniloʼob Purim teʼ kʼiinoʼob aʼalaʼanoʼ, jeʼex tu yaʼalil Mardoqueo le judío yéetel reina Ester unaj u beetaʼaloʼ,+ yéetel jeʼex tsʼoʼok u comprometerkuba le judíoʼob yéetel u paalaloʼob u beetkoʼoboʼ.+ Ichil le baʼax ken u beetoʼoboʼ táakaʼan xan u ayunaroʼob+ yéetel u kʼáatkoʼob áantaj tiʼ Dios.+
32 Le baʼax tu yaʼalaj Esteroʼ tu maas jetsʼaj tuláakal le baʼaloʼob yaan yil yéetel u kʼiinbesaʼal Purimoʼ,+ ka tsʼoʼokeʼ tsʼíibtaʼab tiʼ junpʼéel libro.
Notas
^ Wa «sátrapaʼob».
^ Wa «palacio».
^ Wa «palacio; tiʼ junpʼéel lugar seguro».
^ «Pur», u kʼáat u yaʼal «Suerte». U pluralil le tʼaan «Puroʼ», «Purim». Bey kʼaj óoltaʼabik le fiesta ku beetaʼal teʼ mes 12 tiʼ le calendario sagradooʼ. Ilawil «Purim», página 2577.
