Ezequiel 1:1-28
1 Teʼ año treintaoʼ* jeʼepaj le kaʼanoʼoboʼ ka tsʼaʼab in wil jujunpʼéel baʼaloʼob tumen Dios. Lelaʼ úuch teʼ día cinco tiʼ le mes cuatro le tiaʼanen ichil le máaxoʼob bisaʼaboʼob Babilonia+ tu jáal le río Kebaroʼ.+
2 Tu día cinco le mesoʼ, tu cinco años bisaʼak rey Joaquín+ tu luʼumil Babiloniaeʼ,
3 Jéeobaeʼ* tu tʼanaj Ezequiel* u paal Buzí le sacerdoteoʼ, lelaʼ úuch le tiaʼan tu jáal le río Kebar tu luʼum le caldeoʼoboʼ.+ Le tiaʼan teʼeloʼ taal u poder Jéeoba tu yóokʼol.+
4 Teneʼ tin wilaj táan u taal junpʼéel kʼaʼamkach iikʼ+ tu tojil xaman.* Tin wilaj junwóol múuyal yéetel junpʼéel kʼáakʼ ku jóopbal,*+ yéetel jach táaj sáasil tu baʼpachoʼob. Chúumuk tiʼ le kʼáakʼoʼ yaan junpʼéel baʼal ku léetsʼbal jeʼex u léetsʼbal sak oroeʼ.*+
5 Chúumuk xan tiʼ le kʼáakʼoʼ tin wilaj yaan baʼaloʼob kuxaʼanoʼobiʼ,+ kantúuloʼob yéetel chíikaʼanoʼob tiʼ máak.
6 Cada juntúuleʼ yaan kanpʼéel u táan u yich yéetel kanpʼéel u xiikʼ.+
7 U yookoʼobeʼ tojtakoʼob yéetel chíikaʼanoʼob tiʼ u yook juntúul chan wakax, yéetel ku léetsʼbaloʼob jeʼex u léetsʼbal cobre pulirtaʼaneʼ.+
8 Tu yáanal cada junpʼéel tiʼ le kanpʼéel xiikʼoʼoboʼ yaan junpʼéel kʼab jeʼex u kʼab máakeʼ. Tu kantúulil le baʼaloʼob kuxaʼanoʼoboʼ yaan u xiikʼoʼob yéetel yaan u táan u yichoʼob.
9 U xiikʼoʼobeʼ ku nupkuba* yéetel uláakʼ u xiikʼoʼob. Le kéen péeknakoʼobeʼ táanil ku binoʼob, maʼatech u kʼaʼabéettal u sutkubaʼob.+
10 Cada juntúuleʼ kanpʼéel u táan u yich: yáaxeʼ u táan u yich máak, tu x-noʼojeʼ u táan u yich león,+ tu x-tsʼíikeʼ u táan u yich wakax,+ yaan xan u táan u yich+ águila+ tiʼob.
11 Bey u táan u yich cada juntúuloʼ. U xiikʼoʼobeʼ tichʼikbaloʼob kaʼanal. Kaʼapʼéel tiʼ u xiikʼoʼobeʼ ku nupkubaʼob, yéetel le uláakʼ kaʼapʼéeloʼ ku pixik u wíinkliloʼob.+
12 Cada juntúuleʼ táanil ku bin, jeʼel tuʼuxak ka nuʼuktaʼak tumen u poder Dioseʼ.+ Letiʼobeʼ maʼatech u kʼaʼabéettal u sutkubaʼob.
13 Tu kantúuliloʼobeʼ beyoʼob chakjoleʼen chúukoʼobeʼ, tsʼoʼoleʼ chúumuk tiʼ letiʼobeʼ yaan baʼaloʼob bey kʼáakʼoʼob ku jóopbaloʼobeʼ, leloʼobaʼ ku péekoʼob utiaʼal u binoʼob táanil wa utiaʼal u binoʼob paachil. Ichil le kʼáakʼoʼ ku jóokʼol rayoʼobiʼ.+
14 Tu kantúuliloʼobeʼ beyoʼob rayoʼob le kéen péeknakoʼob utiaʼal u binoʼob wa utiaʼal u taaloʼobeʼ.
15 Le táan kaʼach in wilik le kantúul baʼaloʼob kuxaʼanoʼob yaan kanpʼéel u táan u yichoʼoboʼ,+ tin wileʼ tu tséel cada juntúuleʼ yaan junpʼéel rueda ku kóojol teʼ luʼumoʼ.
16 Le kanpʼéel ruedasoʼ ku léembaloʼob jeʼex u léembal u jatsʼuts tuunichil crisólitoeʼ yéetel jach igual u yilaʼaloʼob. Ichil cada junpʼéel ruedaeʼ bey yaan uláakʼ rueda kʼatakbal ichileʼ.
17 Le kéen péeknakoʼobeʼ ku binoʼob jeʼel tuʼuxakeʼ, maʼ kʼaʼabéet u sutkubaʼobiʼ.
18 Le kanpʼéel ruedasoʼ jach táaj nuuktakoʼob yéetel chuupoʼob yéetel ichoʼob.+
19 Le kéen péeknak le kantúul baʼaloʼob kuxaʼanoʼoboʼ ku péek xan le ruedasoʼ, yéetel le kéen líiʼkoʼob yóokʼol le luʼumoʼ ku chʼúuypajal xan le ruedasoʼ.+
20 Letiʼobeʼ ku binoʼob jeʼel tuʼuxak ka nuʼuktaʼakoʼob tumen u poder Dioseʼ, jach jeʼel tuʼuxak ka bisaʼakoʼob tumen u poder Dioseʼ. Le kéen líiʼkoʼobeʼ ku chʼúuypajal xan le ruedasoʼ, tumen le u poder Dios nuʼuktikoʼoboʼ letiʼ xan nuʼuktik le ruedasoʼ.
21 Le kéen péeknakoʼobeʼ ku péek xan le ruedasoʼ. Le kéen jeʼelkoʼobeʼ ku jeʼelel xan le ruedasoʼ. Le kéen líiʼkoʼob yóokʼol le luʼumoʼ ku chʼúuypajal xan le ruedasoʼ, tumen le u poder Dios nuʼuktikoʼoboʼ letiʼ xan nuʼuktik le ruedasoʼ.
22 Tu yóokʼol u pooloʼobeʼ yaan junpʼéel baʼaliʼ, lelaʼ chíikaʼan tiʼ junpʼéel piso ku léetsʼbal jeʼex u léetsʼbal le cristaloʼ,* junpʼéel baʼal maʼ suuk u yilaʼaliʼ.+
23 Le kantúul baʼaloʼob kuxaʼanoʼoboʼ tiaʼanoʼob yáanal le pisooʼ. Letiʼobeʼ u tichʼmaj u xiikʼoʼob,* cada junpʼéel xiikʼeʼ ku nupkuba yéetel uláakʼ junpʼéel. Yéetel kaʼapʼéel u xiikʼoʼobeʼ ku pixkoʼob juntséel u wíinkliloʼob, yéetel le uláakʼ kaʼapʼéeloʼ ku pixkoʼob uláakʼ juntséel u wíinkliloʼob.
24 Teneʼ tin wuʼuyaj u juum u xiikʼoʼob, ku juumoʼob jeʼex u juum yaʼabkach jaʼeʼ, bey jeʼex kéen tʼaanak le Dios jach táaj yaan u poderoʼ.+ Le kéen péeknakoʼobeʼ ku yuʼubaʼal bey junpʼéel ejército ku péekeʼ. Le kéen jeʼelkoʼobeʼ ku yéemsikoʼob* u xiikʼoʼob.
25 Tin wuʼuyaj yaan máax ku tʼaan tu yóokʼol le piso yaan tu yóokʼol u pooloʼoboʼ. (Le kéen jeʼelkoʼobeʼ ku yéemsikoʼob u xiikʼoʼob).
26 Tu yóokʼol le piso yaan yóokʼol u pooloʼoboʼ yaan junpʼéel baʼal bey u jatsʼuts tuunichil zafiroeʼ+ yéetel chíikaʼan tiʼ junpʼéel trono.+ Tu yóokʼol le tronooʼ yaan máax kulukbaliʼ, letiʼeʼ chíikaʼan tiʼ juntúul máak.+
27 Tin wilaj bey táan u léetsʼbal jeʼex u léetsʼbal le sak orooʼ.+ Desde tu chúumuk u wíinklil tak kaʼanaleʼ tin wilaj bey táan u jóokʼol kʼáakʼeʼ. Desde tu chúumuk u wíinklil tak kabaleʼ tin wilaj junpʼéel baʼal bey kʼáakʼeʼ.+ Tu baʼpacheʼ yaan junpʼéel baʼal ku léembaliʼ.
28 Lelaʼ bey jeʼex le arco iris+ ku jóokʼol teʼ kaʼan tu kʼiinil táan jaʼoʼ. Bey kaʼach le sáasil baʼpachtmiloʼ. Lelaʼ chíikaʼan tiʼ le páajtalil yéetel tiʼ le kiʼichkelmil yaan tiʼ Jéeobaoʼ.+ Le ka tin wileʼ xolajeneʼ ka chinlajen, ka túun káaj in wuʼuyik yaan máax ku tʼaan.
Notas
^ Maʼ xaaneʼ táan u yaʼalik jaypʼéel años yaan tiʼ Ezequiel.
^ Ilawil página 2566.
^ U kʼáat u yaʼal «Dioseʼ ku tsʼáaik muukʼ».
^ Wa «norte».
^ Lelaʼ oro xaʼakʼtaʼan yéetel plata.
^ Wa «yéetel rayoʼob».
^ Wa «ku náakal wa ku kóojol».
^ Ich hebreoeʼ ku yaʼalaʼal kaʼach «le hielooʼ».
^ Uláakʼ bix u traducirtaʼaleʼ «u toj xitʼmaj u xiikʼoʼob».
^ Wa «ku kʼalikoʼob».
