Ezequiel 10:1-22
10 Le táan kaʼach in paakatoʼ tin wilaj junpʼéel baʼal bey u jatsʼuts tuunichil zafiroeʼ, yéetel chíikaʼan tiʼ junpʼéel trono,+ lelaʼ tiaʼan tu yóokʼol le piso yaan tu yóokʼol u pool le querubínoʼoboʼ.
2 Dios túuneʼ tu yaʼalaj tiʼ le máak u takmaj junpʼéel nookʼ de linooʼ:+ «Ookkech teʼ tuʼux yaan le ruedasoʼ,+ yáanal tiʼ le querubínoʼoboʼ. Chup a kʼaboʼob yéetel le chakjoleʼen chúukoʼob+ yanoʼob teʼ tuʼux yaan le querubínoʼoboʼ ka a píikchʼint yóokʼol le kaajoʼ».+ Teen túuneʼ tin wilaj u yokol.
3 Le ka ook le máakoʼ, le querubínoʼoboʼ waʼalakbaloʼob tu x-noʼoj le templooʼ. Tu chan táankabil le templooʼ yaan junpʼéel múuyaliʼ.
4 U kiʼichkelem sáasil Jéeobaeʼ+ lukʼ tu yóokʼol le querubínoʼoboʼ ka náatsʼ tu joonajil le templooʼ, le templooʼ jujunpʼíitil úuchik u chuʼupul yéetel le múuyaloʼ.+ U juul u kiʼichkelem sáasil Jéeobaeʼ u chupmaj u táankabil le templooʼ.
5 U juum u xiikʼ le querubínoʼoboʼ ku páajtal u yuʼubaʼal tak tu nojoch táankabil le templooʼ, ku juum jeʼex u juum u tʼaan le Dios jach táaj yaan u poderoʼ.+
6 Dios túuneʼ tu yaʼalaj tiʼ le máak u takmaj le nookʼ de linooʼ: «Chʼaʼ kʼáakʼ ichil le ruedasoʼ, teʼ tuʼux yaan le querubínoʼoboʼ». Letiʼeʼ ookeʼ ka pʼáat waʼatal yiknal junpʼéel tiʼ le ruedasoʼ.
7 Ka tsʼoʼokeʼ juntúul tiʼ le querubínoʼoboʼ tu tichʼaj u kʼab tu tojil le kʼáakʼ yaan ichiloʼoboʼ,+ tu chʼaʼaj junpʼíiteʼ ka tu tsʼáaj tu kʼab le máak u takmaj junpʼéel nookʼ de linooʼ.+ Le máak túunoʼ tu chʼaʼajeʼ ka jóokʼi.
8 Tu yáanal u xiikʼoʼob le querubínoʼoboʼ yaan junpʼéel baʼal bey u kʼab máakeʼ.+
9 Le táan in paakatoʼ tin wilaj kanpʼéel ruedas tu tséel le querubínoʼoboʼ. Tu tséel cada querubíneʼ yaan junpʼéel ruedaiʼ, le ruedasoʼ bey táan u léembaloʼob jeʼex u léembal u jatsʼuts tuunichil crisólitoeʼ.+
10 Le kanpʼéel ruedasoʼ igual u yilaʼaloʼob, ichil cada ruedaeʼ bey yaan uláakʼ rueda kʼatakbal ichileʼ.
11 Le kéen péeknakoʼobeʼ jeʼel u páajtal u binoʼob jeʼel tuʼuxakeʼ, maʼ kʼaʼabéet u suutoʼobiʼ, tumen ku binoʼob tu tojil tuʼux ku paakat le querubínoʼoboʼ.
12 U puʼuchoʼob,* u kʼaboʼob, yéetel u xiikʼoʼob le kantúul querubínoʼoboʼ chuup yéetel ichoʼob, bey yanil tuláakal u wíinkliloʼoboʼ. Tsʼoʼoleʼ tu tséel cada juntúul tiʼ letiʼobeʼ yaan xan junpʼéel rueda chuup yéetel ichoʼobiʼ.+
13 Teneʼ tin wuʼuyaj u kʼaʼam aʼalaʼal tiʼ le ruedasoʼ: «¡Péekneneʼex!».
14 Cada juntúul querubíneʼ yaan kanpʼéel u táan u yich: le yáaxoʼ u táan u yich le querubínoʼ, le u kaʼapʼéeloʼ u táan u yich juntúul máak, le u yóoxpʼéeloʼ u táan u yich juntúul león, le u kanpʼéeloʼ u táan u yich juntúul águila.+
15 Le querubínoʼobaʼ letiʼe kantúul baʼaloʼob kuxaʼanoʼob tin wilaj tu jáal le río Kebaroʼ.+ Le querubínoʼobaʼ ku líikʼloʼob kaʼanal,
16 le kéen péeknakoʼobeʼ ku péek xan le ruedasoʼ, le kéen u líiʼs u xiikʼ le querubínoʼob utiaʼal u binoʼob kaʼanaloʼ le ruedasoʼ maʼatech u sutkubaʼob yéetel maʼatech u lukʼloʼob tu tséel le querubínoʼoboʼ.+
17 Le kéen jeʼelkoʼobeʼ ku jeʼelel xan le ruedasoʼ, le kéen líiʼkoʼobeʼ ku chʼúuypajal xan le ruedasoʼ, tumen le u poder Dios nuʼuktik le baʼaloʼob kuxaʼanoʼoboʼ letiʼ xan nuʼuktik le ruedasoʼ.
18 Ka tsʼoʼokeʼ u kiʼichkelem sáasil Jéeobaeʼ+ lukʼ tu yóokʼol u joonajil le templooʼ ka bin tu yóokʼol le querubínoʼoboʼ.+
19 Teneʼ tin wileʼ le querubínoʼoboʼ tu líiʼsaj u xiikʼoʼobeʼ ka chʼúuypajoʼob tu yóokʼol le luʼumoʼ, le ka túun binoʼobeʼ tiaʼan le ruedas tu tséeloʼoboʼ. Letiʼobeʼ jeʼeloʼob tu joonajil u yotoch Jéeoba, le yaan tu tojil lakʼinoʼ. Tu yóokʼol le querubínoʼoboʼ tiaʼan u kiʼichkelem sáasil u Dios Israeliʼ.+
20 Le jeʼeloʼobaʼ letiʼe kantúul baʼaloʼob kuxaʼanoʼob tin wiloʼob yáanal u trono u Dios Israel tu jáal le río Kebaroʼ.+ Bey úuchik in wojéeltik querubínoʼob le tin wiloʼ.
21 Cada juntúuleʼ yaan kanpʼéel u táan u yichoʼob bey xan kanpʼéel u xiikʼoʼob, yéetel tu yáanal cada junpʼéel xiikʼeʼ yaan junpʼéel baʼal bey u kʼab máakeʼ.+
22 U táan u yichoʼobeʼ bey jeʼex u táan u yich le baʼaloʼob kuxaʼanoʼob tin wilaj tu jáal le río Kebaroʼ.+ Cada juntúul querubíneʼ táanil ku bin.+
Notas
^ Tuláakʼ tuʼuxeʼ ku yaʼalaʼal «u paachoʼob».
