Ezequiel 11:1-25
-
Ku yaʼalaʼal bix kun tsʼoʼokol le kʼasaʼan príncipeʼoboʼ (1-13)
-
Le kaajoʼ ku keʼetel yéetel junpʼéel olla (3-12)
-
-
Ku yaʼalaʼal yaan u kaʼa suʼutuloʼob tu luʼumoʼob (14-21)
-
Ku tsʼaʼabal «junpʼéel túumben tuukul» (19)
-
-
U kiʼichkelmil Jéeobaeʼ lukʼ yóokʼol Jerusalén (22, 23)
-
Ichil junpʼéel náayeʼ Ezequieleʼ ku suut tu luʼumil Caldea (24, 25)
11 Junpʼéel baʼal yaan u muukʼeʼ* tu chʼúuyeneʼ ka tu bisen tu joonajil u yotoch Jéeoba, le joonaj yaan tu tojil lakʼinoʼ.+ Tu yookbal le joonajoʼ tin wilaj 25 máakoʼobiʼ, ichiloʼobeʼ tiaʼan Jaazanías u paal Azur bey xan Pelatías u paal Benaya, u príncipeiloʼob le kaajoʼ.+
2 Dios túuneʼ tu yaʼalajten: «U paal máak, le jeʼeloʼobaʼ letiʼe máakoʼob táan u chʼaʼtuklikoʼob baʼaloʼob maʼ maʼalobtak yéetel táan u tsʼáaikoʼob maʼ maʼalob nuʼuktaj tiʼ le kaajoʼ.
3 Letiʼobeʼ táan u yaʼalikoʼob: ‹Bejlaʼeʼ u kʼiinil k-beetik najoʼob.+ Le kaajaʼ* bey junpʼéel ollaeʼ*+ toʼoneʼ beyoʼon le bakʼ yaan ichiloʼ›.
4 U paal máak, aʼal baʼax kun úuchultiʼob, aʼaltiʼob baʼax ku taal u kʼiin».+
5 Ka tsʼoʼokeʼ taal u poder Jéeoba tin wóokʼoleʼ+ ka tu yaʼalajten: «Techeʼ unaj a waʼalik: ‹Jéeobaeʼ ku yaʼalik: «U kaajil Israel, jaaj le baʼax tsʼoʼok a waʼalikeʼexoʼ. Teneʼ in wojel baʼax ka tuklikeʼex.
6 Yaʼab máakoʼob tsʼoʼok a beetkeʼex u kíimil way kaajeʼ, le bejoʼoboʼ chuup yéetel kimenoʼob»›».+
7 «Le oʼolal Jéeoba, le máax yaan tuláakal autoridad tiʼoʼ, ku yaʼalik: ‹Le u wíinklil le kimenoʼob tsʼoʼok a beetkeʼex u jaytal tiʼ tuláakal le kaajoʼ beyoʼob jeʼex le bakʼoʼ, yéetel le kaajoʼ bey jeʼex le ollaoʼ.+ Chéen baʼaleʼ teʼexeʼ yaan a jóoʼsaʼaleʼex ichil›».
8 «Jéeoba, le máax yaan tuláakal autoridad tiʼoʼ, ku yaʼalik: ‹Teʼexeʼ saajkeʼex a kíimsaʼaleʼex yéetel espada,+ le oʼolal yaan in beetik a kíimsaʼaleʼex yéetel espada.
9 Teneʼ yaan in jóoʼskeʼex tiʼ le kaajoʼ, yaan in kʼubkeʼex tu kʼab le j-táanxel luʼumiloʼoboʼ yéetel yaan in taasik ta wóokʼoleʼex le baʼax in waʼalmoʼ.+
10 Yaan a kíimsaʼaleʼex yéetel espada.+ Yaan in castigarkeʼex tu jáal u luʼumil Israel.+ Yaan a wojéeltikeʼex máax Jéeoba.+
11 Le kaajoʼ maʼ kun pʼáatal bey junpʼéel olla tuʼux a wantaleʼexeʼ, teʼexeʼ maʼ kan pʼáatleʼex jeʼex le bakʼ yaan ichiloʼ. Yaan in castigarkeʼex tu jáal u luʼumil Israel.
12 Teʼexeʼ yaan a wojéeltikeʼex máax Jéeoba, tumen maʼ ta tsʼoʼokbeseʼex in leyoʼobiʼ mix ta beeteʼex baʼaxoʼob kin waʼalikiʼ,+ baʼaxeʼ ta beeteʼex le baʼaxoʼob ku yaʼalik le kaajoʼob yaan ta baʼpacheʼexoʼ›».+
13 Le ka tsʼoʼok in waʼalik baʼax ku taal u kʼiineʼ kíim Pelatías u paal Benaya. Teen túuneʼ xolajen luʼumeʼ ka tin kʼaʼam aʼalaj: «Jéeoba, teech le máax yaan tuláakal autoridad tiʼoʼ. ¿Yaan wa a láaj kíimsik le máaxoʼob pʼaatloʼob tu luʼumil Israeloʼ?».+
14 Jéeobaeʼ tu kaʼa tʼaneneʼ ka tu yaʼalajten:
15 «U paal máak, u kajnáaliloʼob Jerusaléneʼ yaan baʼax ku yaʼalikoʼob tiʼ a sukuʼunoʼob, le máaxoʼob yaan u derechoil u kaʼa manikoʼob le luʼumoʼ, bey xan u yaʼalikoʼob tiʼ tuláakal u kajnáaliloʼob Israel: ‹Maʼ a suuteʼex tu yiknal Jéeoba. Le luʼumaʼ tsʼoʼok u tsʼaʼabaltoʼon, beoraaʼ k-tiaʼal›.
16 Le oʼolal techeʼ unaj a waʼalik: ‹Jéeoba, le máax yaan tuláakal autoridad tiʼoʼ, ku yaʼalik: «Teneʼ tin bisoʼob tiʼ náanach kaajoʼob yéetel tin kʼiʼitbesoʼob tiʼ jejeláas luʼumoʼob,+ chéen baʼaleʼ chéen junpʼíit kʼiinoʼob kun xáantal. Mientraseʼ teʼ tuʼux bijaʼanoʼoboʼ teneʼ yaan in pʼáatal bey junpʼéel lugar santo tuʼux u yantaloʼobeʼ»›.+
17 Techeʼ unaj a waʼalik: ‹Jéeoba, le máax yaan tuláakal autoridad tiʼoʼ, ku yaʼalik: «Teneʼ yaan in molkoʼob ichil le kaajoʼob yéetel ichil le luʼumoʼob tuʼux kʼiʼitbesaʼaboʼoboʼ, kéen tsʼoʼokkeʼ yaan in kʼubiktiʼob u luʼumil Israel.+
18 Letiʼobeʼ yaan u suutoʼob teʼ luʼumoʼ, yaan u beetkoʼob u xuʼulul u beetaʼal baʼaloʼob kʼaastakiʼ yéetel yaan u luʼskoʼob tuláakal le x-lalaʼ baʼaloʼob yanoʼoboʼ.+
19 Yaan in beetik u yantaltiʼob junpʼéeliliʼ puksiʼikʼal+ bey xan junpʼéel túumben tuukul.+ Yaan in luʼsik le puksiʼikʼal de tuunich yaantiʼoboʼ+ utiaʼal ka in tsʼáatiʼob junpʼéel puksiʼikʼal de bakʼ.*+
20 Bey túunoʼ yaan u tsʼoʼokbeskoʼob in leyoʼob, yaan u beetkoʼob baʼax kin waʼalik yéetel yaan u yuʼubikoʼob in tʼaan. Letiʼobeʼ yaan u beetkubaʼob in kaajal yéetel teneʼ yaan in beetkinba u Diosoʼob»›.
21 ‹Jéeoba, le máax yaan tuláakal autoridad tiʼoʼ, ku yaʼalik: «Le máaxoʼob maʼ tu pʼatkoʼob le x-lalaʼ baʼaloʼob yaantiʼob yéetel maʼ tu xuʼulul u beetkoʼob baʼaloʼob kʼaastakoʼ yaan in beetik u taal tu yóokʼoloʼob le baʼax ku náajaltikoʼob tu yoʼolal le baʼax ku beetkoʼoboʼ»›».
22 Le ka tsʼoʼokeʼ le querubínoʼoboʼ tu líiʼsaj u xiikʼoʼob, naatsʼ tiʼ letiʼobeʼ tiaʼan le ruedasoʼ+ yéetel tu yóokʼoloʼobeʼ ku yilaʼal le páajtalil yéetel le kiʼichkelmil yaan tiʼ u Dios Israeloʼ.+
23 Tsʼoʼoleʼ tin wileʼ le baʼax eʼesik u páajtalil yéetel u kiʼichkelmil Jéeobaoʼ+ lukʼ tu yóokʼol le kaajoʼ ka bin tu yóokʼol le montaña yaan tu lakʼinil le kaajoʼ.+
24 Le ka tsʼoʼokeʼ tin wileʼ junpʼéel baʼal yaan u muukʼeʼ* tu chʼúuyeneʼ ka tu bisen tu luʼumil Caldea, le tuʼux bisaʼan in wéet kaajaloʼoboʼ. Bey úuchik u xuʼulul le baʼax tsʼaʼab in wil tumen u poder Diosoʼ.
25 Le ka tsʼoʼokeʼ tuláakal le baʼaxoʼob eʼesaʼabten tumen Jéeobaoʼ káaj in tsikbaltik tiʼ in wéet kaajaloʼob bisaʼanoʼob táanxel luʼumiloʼ.
Notas
^ Maʼ xaaneʼ teʼelaʼ táan u tʼaan tiʼ u poder Dios wa tiʼ juntúul ángel.
^ Teʼelaʼ táan u tʼaan tiʼ u kaajil Jerusalén. Le judíoʼoboʼ ku tuklikoʼob kaʼach mix baʼal jeʼel u yúuchultiʼob tumen tiaʼanoʼob ichileʼ.
^ Wa «olla kóoch u chiʼ».
^ Teʼelaʼ táan u tʼaan tiʼ junpʼéel puksiʼikʼal ku kʼamik baʼax ku yaʼalik Dios.
^ Maʼ xaaneʼ teʼelaʼ táan u tʼaan tiʼ u poder Dios wa tiʼ juntúul ángel.
