Ezequiel 13:1-23
13 Jéeobaeʼ tu kaʼa tʼaneneʼ ka tu yaʼalajten:
2 «U paal máak, aʼal baʼax kun úuchul tiʼ le profetaʼob yaan Israeloʼ.+ Tiʼ le profetaʼob ku patjoʼoltikoʼob* baʼax ku taal u kʼiinoʼ+ unaj a waʼalik: ‹Uʼuyeʼex baʼax ku yaʼalik Jéeoba.
3 Jéeoba, le máax yaan tuláakal autoridad tiʼoʼ, ku yaʼalik: «¡Le j-maʼ naʼat profetaʼoboʼ mix baʼal tsʼaʼabak u yiloʼob, letiʼobeʼ yaj bix kun tsʼoʼokoloʼob tumen ku yaʼalikoʼob chéen baʼax ku tuklikoʼob!+
4 Óotsilech Israel tumen a profetaʼobeʼ tsʼoʼok u pʼáatloʼob jeʼex le chʼomakoʼob kajaʼanoʼob teʼ tuʼux yaan jutul pakʼoʼoboʼ.
5 Le máakoʼobaʼ maʼ ken u yutskíintoʼob a baʼpakʼiloʼob jomchajaʼanoʼoboʼ,+ le oʼolal Israeleʼ maʼ kun páajtal u pʼáatal waʼatal tu kʼiinil u baʼateʼel Jéeoba».+
6 «Letiʼobeʼ tsʼoʼok u wayakʼtikoʼob* baʼaloʼob maʼ jaajtakiʼ yéetel chéen táan u tuusoʼob le kéen u yaʼaloʼob baʼax ku taal u kʼiin. Kex maʼ Jéeoba túuxtikoʼobeʼ ku yaʼalikoʼob: ‹Jéeobaeʼ ku yaʼalik›, tsʼoʼoleʼ láayliʼ táan u páaʼtkoʼob ka béeychajak le baʼax ku yaʼalikoʼoboʼ.+
7 Profetaʼex, le baʼaxoʼob ka wayakʼtikeʼexoʼ maʼ jaajtakiʼ yéetel chéen táan a tuuseʼex le kéen a waʼaleʼex baʼax ku taal u kʼiin. Kex maʼ in waʼalteʼex mix baʼaleʼ teʼexeʼ ka waʼalikeʼex: ‹Jéeobaeʼ ku yaʼalik›»›.
8 ‹Tu yoʼolal leloʼ Jéeoba, le máax yaan tuláakal autoridad tiʼoʼ, ku yaʼalik: «‹Teneʼ tiaʼanen ta contraʼexeʼ tumen chéen tuus ka beetkeʼex, yéetel le baʼaxoʼob ka wayakʼtikeʼexoʼ maʼ jaajtakiʼ›, leloʼ bey u yaʼalik Kiʼichkelem Yuum Jéeoba».+
9 Teneʼ in líiʼsmaj in kʼab tu contra le profetaʼob ku wayakʼtikoʼob baʼaloʼob maʼ jaajtak yéetel chéen ku tuusoʼob le kéen u yaʼaloʼob baʼax ku taal u kʼiinoʼ.+ Letiʼobeʼ maʼ kun antaloʼob ichil le máaxoʼob jach kin biskinba tu yéeteloʼoboʼ mix kun tsʼíibtbil u kʼaabaʼob ichil u kajnáaliloʼob Israel, yéetel maʼ kun suutoʼob tu luʼumil Israel. Teʼex túuneʼ yaan a wojéeltikeʼex máax Jéeoba, le máax yaan tuláakal autoridad tiʼoʼ.+
10 Tuláakal leloʼ yaan u yúuchultiʼob tumen tsʼoʼok u tuskoʼob in kaajal ikil u yaʼalikoʼob: «¡Yaan jeetsʼelil!», kex u jaajileʼ minaʼan jeetsʼelil.+ Tak junpʼéel pakʼ maʼ maʼalob beetaʼanileʼ letiʼobeʼ ku jáan lechartikoʼob yéetel taʼan›.*+
11 Tiʼ le máaxoʼob lechartik le pakʼoʼ aʼaltiʼob yaan u lúubul le pakʼoʼ. Yaan u taal kʼaʼamkach jaʼ, yaan u kʼáaxal nukuch bat* yéetel yaan u taal kʼaʼamkach iikʼ, le baʼaloʼob túunaʼ yaan u lúuʼskoʼob le pakʼoʼ.+
12 Le kéen lúubuk le pakʼoʼ yaan u kʼáataʼalteʼex: ‹¿Baʼax biilal ta lecharteʼex?›.+
13 Tu yoʼolal leloʼ Jéeoba, le máax yaan tuláakal autoridad tiʼoʼ, ku yaʼalik: ‹Tumen pʼujaʼaneneʼ yaan in beetik u taal kʼaʼamkach iikʼ, tumen táan in kʼuuxileʼ yaan in beetik u taal kʼaʼamkach jaʼ, yéetel tumen táan in tsʼíikileʼ yaan in beetik u kʼáaxal nukuch bat utiaʼal in taasik xuʼulsajil.
14 Teneʼ yaan in xiixkúuntik le pakʼ ta lecharteʼexoʼ yéetel yaan in beetik u níikil, le kéen tsʼoʼokkeʼ chéen u chuunpakʼiloʼob kun pʼáatal. Le kéen xuʼulsaʼak tiʼ le kaajoʼ tiʼ kan kíimleʼex ichileʼ. Bey túunoʼ yaan a wojéeltikeʼex máax Jéeoba›.
15 ‹Le kéen tsʼoʼokok in láalik in pʼujaʼanil tu yóokʼol le pakʼ yéetel tu yóokʼol le máaxoʼob lechartoʼ yaan in waʼalikteʼex: «Bey tsʼoʼokik tiʼ le pakʼ yéetel tiʼ le máaxoʼob lechartoʼ.+
16 Tsʼoʼok u saʼatal le profetaʼob yaan kaʼach Israeloʼ, le máaxoʼob ku wayakʼtikoʼob baʼaloʼob maʼ jaajtak yéetel ku yaʼalikoʼob yaan u yantal jeetsʼelil Jerusalén kex u jaajileʼ minaʼan jeetsʼelil»›,+ leloʼ bey u yaʼalik Jéeoba, le máax yaan tuláakal autoridad tiʼoʼ.
17 U paal máak, aʼal baʼax ku taal u kʼiin u yúuchul tiʼ le koʼoleloʼob yaan ta kaajaloʼ, le koʼoleloʼob chéen ku patjoʼoltikoʼob baʼax ku taal u kʼiinoʼ. Waʼalen tu táanoʼobeʼ
18 ka a waʼaltiʼob: ‹Jéeoba, le máax yaan tuláakal autoridad tiʼoʼ, ku yaʼalik: «¡Yaj bix kun tsʼoʼokol tiʼ le koʼoleloʼob taak u beetkoʼob u lúubul in kaajal tiʼ junpʼéel trampaoʼ, le koʼoleloʼob ku chuykoʼob cintaʼob jejeláas u medidaʼob utiaʼal u kʼab máak* yéetel ku chuykoʼob xan veloʼob jejeláas u medidaʼob utiaʼal u pool máakoʼ! Teʼexeʼ táan a beetkeʼex u lúubul in kaajal tiʼ junpʼéel trampa, kex beyoʼ taak a salvartik a kuxtaleʼex.
19 Koʼoleleʼex, teʼexeʼ chéen tu yoʼolal junpʼíit cebada yéetel tu yoʼolal junpʼíit waajeʼ ka taaskeneʼex bey mix baʼalil tu táan in kaajaleʼ.+ Teʼexeʼ ka kíimskeʼex le máaxoʼob maʼ unaj u kíimsaʼaloʼoboʼ yéetel ka chaʼikeʼex u seguer u kuxtal le máaxoʼob unaj u kíimsaʼaloʼoboʼ. Leloʼ letiʼe baʼax ku yúuchul le kéen a tuseʼex in kaajaloʼ»›.+
20 Tu yoʼolal leloʼ Jéeoba, le máax yaan tuláakal autoridad tiʼoʼ, ku yaʼalik: ‹Koʼoleleʼex, teneʼ in pʼekmaj le cintaʼob ku meyajteʼex utiaʼal a chukikeʼex le máakoʼob jeʼex u chuʼukul juntúul chʼíichʼeʼ. Yaan in kóotspaytik le cintaʼob yaan ta kʼabeʼexoʼ, beyoʼ yaan in jáalkʼabtik le máaxoʼob tsʼoʼok a chukikeʼex jeʼex u chuʼukul chʼíichʼoʼ.
21 Yaan in jáatpaytik a veloʼex utiaʼal in tokik in kaajal ta kʼabeʼex. Le kéen tsʼoʼokkeʼ maʼ kun kaʼa lúubloʼob ta kʼabeʼex. Bey túunoʼ yaan a wojéeltikeʼex máax Jéeoba.+
22 Tumen yéetel a tuuseʼexeʼ tsʼoʼok a beetkeʼex u lúubul u yóol le utsul máakoʼoboʼ,+ kex maʼ táan in beetik kaʼach u muʼyajoʼobiʼ, yéetel tsʼoʼok a líiʼskeʼex u yóol le kʼasaʼan máakoʼob utiaʼal maʼ u xuʼulul u beetkoʼob baʼaloʼob kʼaastakoʼ,+ tu yoʼolal leloʼ le kʼasaʼan máakoʼoboʼ maʼ kun seguer u kuxtaloʼob.+
23 Koʼoleleʼex, tu yoʼolal leloʼ maʼ ken a kaʼa wayakʼteʼex baʼaloʼob maʼ jaajtakiʼ, yéetel yaan u xuʼulul a chuchuknaʼatkeʼex baʼax ku taal u kʼiin.+ Teneʼ yaan in tokik in kaajal ta kʼabeʼex. Bey túunoʼ yaan a wojéeltikeʼex máax Jéeoba›».
Notas
^ Wa «chéen ku yaʼalikoʼob baʼax yaan tu puksiʼikʼaloʼob».
^ Tuláakʼ tuʼuxeʼ ku yaʼalaʼal «náay».
^ Lelaʼ ku beetkoʼob kaʼach utiaʼal ka tuklaʼak muʼukʼaʼan le pakʼoʼ.
^ Wa «granizo».
^ Leloʼobaʼ cintaʼob yaan u yil yéetel magia, ku tsʼaʼabaloʼob kaʼach tu kúuk wa tu kaal u kʼab máak.
