Ezequiel 18:1-32
18 Jéeobaeʼ tu kaʼa tʼaneneʼ ka tu yaʼalajten:
2 «¿Baʼaxten suuk a waʼalikeʼex tu luʼumil Israel lelaʼ: ‹Letiʼe taatatsiloʼob jaant suʼutsʼ uvaoʼ, pero u paalaloʼob chaʼajchaj u kojoʼob›?+
3 Jéeoba, le máax yaan tuláakal autoridad tiʼoʼ, ku yaʼalik: ‹Jeʼex jach tu jaajil kuxaʼaneneʼ, yaan u xuʼulul a waʼalikeʼex le baʼax suuk a waʼalikeʼex tu luʼumil Israeloʼ.
4 ¡Uʼuy a wuʼuyeʼex! Tuláakal kuxtaleʼ in tiaʼal. In tiaʼal u kuxtal le taataoʼ bey xan u kuxtal le paaloʼ. Le máax ku kʼebantaleʼ yaan u kíimil.
5 Koʼox aʼalikeʼ juntúul máakeʼ uts yéetel ku beetik baʼax toj bey xan baʼax maʼalob.
6 Letiʼeʼ maʼatech u jaantik le baʼax ku kʼuʼubul tiʼ le imagenoʼob yaan teʼ montañaʼoboʼ,+ maʼatech u orar tiʼ le x-lalaʼ* imagenoʼob yaan tu kaajil Israeloʼ, maʼatech u yantal baʼal u yil yéetel u yatan u yéet máakil+ mix yéetel juntúul koʼolel tu kʼiiniloʼob u menstruación.+
7 Le máakaʼ maʼatech u beetik u kʼasaʼanil tiʼ mix máak,+ baʼaxeʼ ku sutik le baʼax tsʼaʼabtiʼ bey garantía tumen le máax pʼaxmiloʼ.+ Maʼatech u yookol,+ baʼaxeʼ tak le baʼax yaantiʼ utiaʼal u jaantoʼ ku tsʼáaik tiʼ le máax wiʼijoʼ,+ yéetel ku tsʼáaik nookʼ utiaʼal u búukint le máax minaʼan u nookʼoʼ.+
8 Tsʼoʼoleʼ maʼatech u cobrartik u interésil le taakʼin ku tsʼáaik majáantbiloʼ,+ maʼatech u kaxtik chéen u yutsil yéetel ku kanáantik maʼ u beetik injusticia.+ Baʼaxeʼ ku yilik ka beetaʼak justicia le kéen yanak problemas ichil kaʼatúul máakoʼob.+
9 Letiʼeʼ mantatsʼ ku tsʼoʼokbesik in leyoʼob yéetel ku beetik baʼax kin waʼalik utiaʼal u páajtal u beetik baʼax maʼalob. Juntúul máax ku kuxtal beyoʼ táan u beetik baʼax toj, le oʼolal yaan u seguer u kuxtal›,+ bey u yaʼalik Jéeoba, le máax yaan tuláakal autoridad tiʼoʼ.
10 ‹Chéen baʼaleʼ koʼox aʼalikeʼ le utsul máakoʼ ku yantal juntúul u hijo ku yookol+ wa ku kíimsik máak+ wa ku beetik junpʼéel tiʼ le baʼaloʼob kʼaastakoʼ
11 (kex u taata maʼ tu beetaj mix junpʼéel tiʼ le baʼaloʼob jeʼeloʼ). Le hijotsilaʼ ku jaantik le baʼax ku kʼuʼubul tiʼ le imagenoʼob yaan teʼ montañaʼoboʼ, ku yantal baʼal u yil yéetel u yatan u yéet máakil,
12 ku beetik u kʼasaʼanil tiʼ le máax óotsiloʼ bey xan tiʼ le máax mix baʼal yaantiʼoʼ,+ ku yookol, maʼatech u sutik le baʼax ku tsʼaʼabaltiʼ bey garantíaoʼ, ku orar tiʼ le x-lalaʼ imagenoʼoboʼ,+ ku beetik baʼaloʼob jach kʼaastak,+
13 ku cobrartik u interésil le taakʼin ku tsʼáaik majáantbiloʼ+ yéetel ku kaxtik chéen u yutsil. Tu yoʼolal lelaʼ le hijotsiloʼ maʼ kun seguer u kuxtal. Yaan u kíimil tu yoʼolal tuláakal le baʼaloʼob jach kʼaastak tu beetoʼ, yéetel tiʼ letiʼ kun antal u culpail.
14 Chéen baʼaleʼ koʼox aʼalikeʼ juntúul hijotsileʼ ku yilik tuláakal le baʼaloʼob kʼaastak ku beetik u taataoʼ, pero letiʼeʼ maʼatech u beetik beyoʼ.
15 Letiʼeʼ maʼatech u jaantik le baʼax ku kʼuʼubul tiʼ le imagenoʼob yaan teʼ montañaʼoboʼ, maʼatech u orar tiʼ le x-lalaʼ imagenoʼob yaan tu kaajil Israeloʼ, maʼatech u yantal baʼal u yil yéetel u yatan u yéet máakil,
16 maʼatech u beetik u kʼasaʼanil tiʼ mix máak, ku sutik le baʼax ku tsʼaʼabaltiʼ bey garantíaoʼ, maʼatech u yookol, le baʼax yaantiʼ utiaʼal u jaantoʼ ku tsʼáaik tiʼ le máax wiʼijoʼ, ku tsʼáaik nookʼ utiaʼal u búukint le máax minaʼan u nookʼoʼ,
17 maʼatech u pechʼ óoltik le máax óotsiloʼ, maʼatech u cobrartik u interésil le taakʼin ku tsʼáaik majáantbiloʼ, maʼatech u kaxtik chéen u yutsil, ku tsʼoʼokbesik in leyoʼob yéetel ku beetik baʼax kin waʼalik. Juntúul máak beyaʼ maʼ kun kíimil tu yoʼolal le baʼaxoʼob tu beetaj u taataoʼ, baʼaxeʼ yaan u seguer u kuxtal.
18 Chéen baʼaleʼ u taataeʼ yaan u kíimil tu yoʼolal le baʼaloʼob kʼaastak tu beetoʼ, tumen tu yoklaj u sukuʼun, tu tokaj baʼax yaan tiʼ u yéet máakil, yéetel tu beetaj baʼaloʼob kʼaastak tu kaajal.
19 Chéen baʼaleʼ teʼexeʼ yaan a waʼalikeʼex: «¿Baʼaxten le hijotsiloʼ maʼatech u kuchik u kʼebanil le baʼax tu beetaj u papáoʼ?». Le hijotsiloʼ tu beetaj baʼax maʼalob, tu beetaj baʼax toj yéetel tu tsʼoʼokbesaj in leyoʼob, tu yoʼolal leloʼ letiʼeʼ yaan u seguer u kuxtal.+
20 Le máax ku kʼebantaleʼ letiʼ kun kíimil.+ Le hijotsiloʼ maʼ ken u kuch u kʼebanil le baʼax ku beetik u papáoʼ, le taatatsiloʼ maʼ ken u kuch u kʼebanil le baʼax ku beetik u hijooʼ. Juntúul máax utseʼ yaan u kʼamik u yutsil le baʼax ku beetkoʼ, juntúul máax kʼasaʼaneʼ yaan u kʼamik u boʼolil le baʼax kʼaas ku beetkoʼ.+
21 Chéen baʼaleʼ wa juntúul kʼasaʼan máak ku xuʼulul u beetik tuláakal le baʼaloʼob kʼaastak ku beetik kaʼachoʼ yéetel ku joʼopʼol u beetik baʼax ku yaʼalik in leyoʼob, ku beetik baʼax toj yéetel baʼax maʼalobeʼ, letiʼeʼ yaan u seguer u kuxtal, maʼ kun kíimil.+
22 Maʼ kun kʼaʼajsbil mix junpʼéel tiʼ le baʼaloʼob kʼaastak u beetmoʼ,+ baʼaxeʼ yaan u seguer u kuxtal ikil u beetik baʼax maʼalob›.+
23 Jéeoba, le máax yaan tuláakal autoridad tiʼoʼ, ku yaʼalik: ‹Teneʼ jach junpuliʼ maʼatech u kiʼimaktal in wóol le kéen kíimik juntúul kʼasaʼan máak,+ baʼax kiʼimakkúuntik in wóoleʼ ka xuʼuluk u beetik baʼaloʼob kʼaastak utiaʼal ka seguernak u kuxtal›.+
24 ‹Chéen baʼaleʼ wa juntúul utsul máak ku xuʼulul u beetik baʼaloʼob maʼalobtak yéetel ku joʼopʼol u beetik baʼaloʼob kʼaastak* jeʼex le ku beetik le kʼasaʼan máakoʼ junpuliʼ maʼ kun seguer u kuxtal yéetel maʼ kun kʼaʼajsbil mix junpʼéel tiʼ le baʼaloʼob maʼalobtak tu beetoʼ.+ Yaan u kíimil tumen kʼebanchaji yéetel tumen maʼ tu yuʼubaj tʼaaniʼ.+
25 Chéen baʼaleʼ teʼexeʼ yaan a waʼalikeʼex: «Maʼ maʼalob le baʼax ku chʼaʼtuklik u beetik Jéeobaoʼ».+ U kaajil Israel, beet uts a wuʼuyik lelaʼ: ¿Teen wa maʼ maʼalob baʼax kin beetkiʼ?+ ¿Maʼ wa teʼex maʼ maʼalob baʼax ka beetkeʼexiʼ?+
26 Chéen baʼaleʼ wa juntúul utsul máak ku xuʼulul u beetik baʼax maʼalob yéetel ku joʼopʼol u beetik baʼax kʼaaseʼ yaan u kíimil, yaan u kíimil tu yoʼolal le baʼaloʼob kʼaastak ku beetkoʼ.
27 Chéen baʼaleʼ wa juntúul kʼasaʼan máak ku xuʼulul u beetik baʼaloʼob kʼaastak, yéetel ku joʼopʼol u beetik baʼax toj yéetel baʼax maʼalobeʼ yaan u seguer u kuxtal.+
28 Le kéen u tsʼáa cuenta máakalmáak le baʼaxoʼob maʼ maʼalobtak ku beetik yéetel ku xuʼulul u beetkeʼ yaan u seguer u kuxtal, maʼ kun kíimil.
29 Chéen baʼaleʼ u kaajil Israeleʼ yaan u yaʼalik: «Maʼ maʼalob le baʼax ku chʼaʼtuklik u beetik Jéeobaoʼ». U kaajil Israel, uʼuy lelaʼ: ¿Teen wa maʼ maʼalob baʼax kin beetkiʼ?+ ¿Maʼ wa teʼex maʼ maʼalob baʼax ka beetkeʼexiʼ?›.
30 Jéeoba, le máax yaan tuláakal autoridad tiʼoʼ, ku yaʼalik: ‹U kaajil Israel, yaan in juzgartik cada máak tu yoʼolal baʼax u beetmaj.+ Xúumpʼatteʼex, xúumpʼatteʼex tuláakal le baʼaloʼob kʼaastak ka beetkeʼexoʼ, beyoʼ maʼ ken a tsʼáaʼex tuʼux u kʼebantal máak.
31 Xúumpʼatteʼex tuláakal le baʼaloʼob kʼaastak ka beetkeʼexoʼ,+ kʼex a tuukuleʼex bey xan le baʼax yaan ta puksiʼikʼaleʼexoʼ.+ U kaajil Israel, teʼexeʼ minaʼan baʼax oʼolal ka kíimkeʼex›.+
32 Jéeoba, le máax yaan tuláakal autoridad tiʼoʼ, ku yaʼalik: ‹Teneʼ jach junpuliʼ maʼatech u kiʼimaktal in wóol le kéen kíimik wa máax,+ le oʼolaleʼ suuneneʼex tin wiknal utiaʼal u seguer a kuxtaleʼex›».+
Notas
^ Ich hebreoeʼ le tʼaanaʼ yaan yil yéetel u «taʼ baʼalcheʼ», yéetel ku meyaj utiaʼal u yúuchul tʼaan tiʼ baʼaloʼob pʼektaʼanoʼob.
^ Wa «injusticia».
