Ezequiel 22:1-31
22 Jéeobaeʼ tu kaʼa tʼaneneʼ ka tu yaʼalajten:
2 «U paal máak, ¿listoech wa utiaʼal a waʼalik baʼax tsʼoʼok u chʼaʼtuklaʼal tu contra* le kaaj ku kíimsik máakoʼoboʼ+ bey xan utiaʼal a beetik u yilik tuláakal le baʼaloʼob kʼaastak ku beetkoʼ?+
3 Techeʼ unaj a waʼalik: ‹Jéeoba, le máax yaan tuláakal autoridad tiʼoʼ, ku yaʼalik: «Teech le kaaj ka kíimsik a kajnáaliloʼoboʼ,+ le kaaj taʼaytak u kʼuchul u kʼiinil u castigartaʼaloʼ+ yéetel ku beetik x-lalaʼ* imagenoʼob utiaʼal u kʼaskúuntkubaoʼ.+
4 Tu yoʼolal le máakoʼob ta kíimsoʼ tsʼoʼok a kʼebantal,+ le x-lalaʼ imagenoʼob ta beetoʼ tsʼoʼok u beetik a kʼaskúuntkaba.+ Tsʼoʼok a beetik u séeb kʼuchul u kʼiinil u xuʼulsaʼaltech, yéetel tsʼoʼok u kʼuchul u kʼiiniloʼob a castigartaʼal. Le oʼolaleʼ yaan in beetik u yaʼalaʼaltech baʼal tumen le kaajoʼoboʼ yéetel yaan in beetik a burlartaʼal tumen tuláakal le luʼumoʼoboʼ.+
5 Le luʼumoʼob yanoʼob naatsʼ bey xan le yanoʼob náach tiʼ techoʼ yaan u burlarkubaʼob tiʼ teech,+ le kaaj tsʼoʼok u kʼaskúuntik u kʼaabaʼ yéetel chuup yéetel baʼaloʼob kʼaastakoʼ.
6 ¡Jach ilawile! Cada juntúul tiʼ u nuuktakil u kaajil Israel yaan chúumuk tiʼ techeʼ ku meyajtiʼ u autoridad utiaʼal u kíimsik máakoʼob.+
7 Le taatatsil yéetel le maamatsil kajaʼanoʼob chúumuk tiʼ techoʼ ku mixbaʼalkúuntaʼaloʼob.+ Ku tuʼusul xan le j-táanxel luʼumiloʼob utiaʼal u yoklaʼaloʼoboʼ, tsʼoʼoleʼ ku maltratartaʼal le paalaloʼob minaʼan u papáʼoboʼ* bey xan le viudaʼoboʼ»›».+
8 «‹Techeʼ ka mixbaʼalkúuntik in lugaroʼob santoʼob yéetel ka taasik mix baʼalil in sábadoʼob.+
9 Chúumuk tiʼ techeʼ yaan máakoʼob ku líiʼsaj tʼaanoʼob utiaʼal u kaxtikoʼob bix jeʼel u kíimskoʼob máakeʼ.+ Letiʼobeʼ ku jaantikoʼob teʼ montañaʼob le baʼaloʼob ku kʼubkoʼoboʼ, tsʼoʼoleʼ chúumuk tiʼ techeʼ ku beetkoʼob baʼaloʼob kʼaastak yéetel suʼtsiltak.+
10 Yaan máakoʼob ku múul chitaloʼob yéetel u yatan u papáʼob,+ tsʼoʼoleʼ ku obligarkoʼob juntúul koʼolel utiaʼal ka múul chilakoʼob tu yéeteloʼob kex maʼ limpio yanil tumen tiaʼan tu kʼiiniloʼob u menstruacióneʼ.+
11 Chúumuk tiʼ techeʼ juntúul xiibeʼ ku beetik baʼaloʼob jach kʼaastak yéetel u yatan u yéet xiibil,+ yaneʼ ku taasik suʼtsilil tiʼ u yilib ikil u beetik baʼaloʼob kʼaastak tu yéetel,+ yéetel uláakʼ xaneʼ ku obligartik u kiik, u hija u taata utiaʼal ka múul chilak tu yéetel.+
12 Yaan máakoʼob ku chaʼik u maʼanloʼob utiaʼal u kíimskoʼob máak.+ Le kéen a tsʼáa majáantbil wa baʼaxeʼ ka cobrartik u interésil+ wa ka wilik a jóoʼsik u yutsil. Tsʼoʼoleʼ ka tusik a wéet máakil utiaʼal a woklik u taakʼin.+ Techeʼ jach junpuliʼ tsʼoʼok a tuʼubsiken›, leloʼ bey u yaʼalik Jéeoba, le máax yaan tuláakal autoridad tiʼoʼ.
13 ‹¡Ilawile!, táan in papaxkʼab utiaʼal in weʼesiktech jach in pʼeek le baʼaloʼob tsʼoʼok u yantaltech ikil a wookoloʼ yéetel utiaʼal in weʼesiktech jach in pʼeek u kíimsaʼal máak chúumuk tiʼ teech.
14 ¿Láayliʼ wa yaan u chúukpajal a wóol yéetel yaan a wuʼuyik bey jach yaan u muukʼ a kʼab le kéen in tsʼáainba ta contraeʼ?+ Teen Jéeobaeʼ tsʼoʼok in waʼalik yéetel yaan in beetik.
15 Teneʼ yaan in kʼiʼitbeskech ichil le kaajoʼoboʼ yéetel ichil le luʼumoʼoboʼ,+ tsʼoʼoleʼ yaan in pʼatkech limpioil tin táan.+
16 Yaan a pʼaʼatal ich suʼtsilil tu táan le kaajoʼoboʼ, yéetel yaan a wojéeltik máax Jéeoba›».+
17 Jéeobaeʼ tu kaʼa tʼaneneʼ ka tu yaʼalajten:
18 «U paal máak, u kaajil Israeleʼ tsʼoʼok u kʼuchul u beetuba jeʼex le baʼaloʼob maʼ patal ku luʼsaʼal tiʼ le metaloʼ. Tuláakloʼobeʼ beyoʼob cobre, estaño, fierro yéetel plomo tsʼaʼanoʼob tiʼ junpʼéel hornoeʼ. Letiʼobeʼ beyoʼob jeʼex le baʼaloʼob maʼ patal ku luʼsaʼal tiʼ le plataoʼ.+
19 Le oʼolaleʼ Jéeoba, le máax yaan tuláakal autoridad tiʼoʼ, ku yaʼalik: ‹Nikaʼaj in muchʼeʼex tu kaajil Jerusalén, tumen tuláakleʼexeʼ beyeʼex le baʼaloʼob maʼ maʼalobtak ku luʼsaʼal tiʼ le metaloʼ.+
20 Le plata, le cobre, le fierro, le plomo yéetel le estañooʼ ku tsʼaʼabaloʼob ichil junpʼéel horno, tsʼoʼoleʼ ku beetaʼal u tóochʼbal le kʼáakʼ utiaʼal u yiʼibiloʼoboʼ. Teen túun xaneʼ tumen jach pʼujaʼanen yéetel jach tsʼíikilnajaʼaneneʼ yaan in muchʼkíintikeʼex yéetel yaan in beetik u tóochʼbal kʼáakʼ ta wóokʼoleʼex utiaʼal in yibikeʼex.+
21 Yaan in muchʼkíintikeʼex yéetel yaan in wustikeʼex yéetel u kʼáakʼil in pʼujaʼanil,+ teʼex túuneʼ yaan a yíibileʼex ichil le kaajoʼ.+
22 Jeʼex u yiʼibil le plata ichil junpʼéel hornooʼ bey bíin yiʼibikeʼex ichil le kaajoʼ. Teʼex túuneʼ yaan a wojéeltikeʼex de ke teen Jéeobaeʼ tsʼoʼok in wekik in pʼujaʼanil ta wóokʼoleʼex›».
23 Jéeobaeʼ tu kaʼa tʼaneneʼ ka tu yaʼalajten:
24 «U paal máak, aʼal tiʼ le luʼum lelaʼ: ‹Luʼum, techeʼ maʼ kan pʼáatal limpioil tin táan, ta wóokʼoleʼ maʼ kun lúubul cháak tu kʼiinil in pʼujaʼanil.
25 Le profetaʼoboʼ tsʼoʼok u tsʼáaikubaʼob de acuerdoil,+ beyoʼob juntúul león ku jéenkal yéetel ku xeʼexetʼik le baʼalcheʼ ku chukikoʼ.+ Letiʼobeʼ ku jaantikoʼob máakoʼob, ku chʼaʼikoʼob koʼokoj baʼaloʼob bey xan baʼaloʼob jatsʼutstak. Tsʼoʼoleʼ tsʼoʼok xan u pʼatkoʼob viudail yaʼab koʼoleloʼob.
26 U sacerdoteʼobeʼ maʼ tu beetkoʼob baʼax ku yaʼalik in ley,+ yéetel ku taaskoʼob mix baʼalil le in lugaroʼob santoʼoboʼ.+ Letiʼobeʼ maʼ tu yilkoʼob u jelaʼanil ichil le baʼax santo tiʼ le baʼax maʼ santooʼ+ mix tu kaʼanskoʼob u jelaʼanil baʼax limpio tiʼ baʼax maʼ limpio yaniliʼ,+ tsʼoʼoleʼ maʼatech u yóotkoʼob u kʼiinbesoʼob in sábadoʼob yéetel ku taaskenoʼob mix baʼalil.
27 U príncipeʼobeʼ beyoʼob loboʼob ku xeʼexetʼikoʼob le baʼalcheʼob ku chukikoʼoboʼ. Letiʼobeʼ ku wekikoʼob kʼiʼikʼ yéetel ku kíimskoʼob máak utiaʼal u yantaltiʼob taakʼin.+
28 Chéen baʼaleʼ u profetaʼobeʼ tsʼoʼok u lechartikoʼob yéetel taʼan le baʼaloʼob maʼ maʼalobtak ku beetkoʼoboʼ. Letiʼobeʼ maʼ jaajtak le baʼaxoʼob ku yilkoʼoboʼ yéetel chéen tuus le baʼaxoʼob ku yaʼalikoʼob ku taal u kʼiinoʼ.+ Kex Jéeoba maʼ u yaʼal mix baʼaleʼ, letiʼobeʼ ku yaʼalikoʼob: «Jéeoba, le máax yaan tuláakal autoridad tiʼoʼ, ku yaʼalik».
29 U kajnáaliloʼob le kaajoʼ tsʼoʼok u tuskoʼob yéetel tsʼoʼok u yoklikoʼob máak, tsʼoʼok u maltratarkoʼob le óotsiloʼ+ bey xan le máax kʼaʼabéet áantaj tiʼoʼ, tsʼoʼoleʼ tsʼoʼok u tuskoʼob le j-táanxel luʼumiloʼ yéetel maʼ u yóotoʼob u beetoʼob justicia tiʼ letiʼiʼ›.
30 ‹Ichiloʼobeʼ táan kaʼach in kaxtik juntúul xiib ka páajchajak u yutskíintik le kaʼanal pakʼoʼ wa utiaʼal ka pʼáatak waʼatalil tin táan teʼ jool yaan teʼ pakʼoʼ, utiaʼal ka páajchajak u kanáantik u kajnáaliloʼob le luʼumoʼ yéetel utiaʼal maʼ u xuʼulsaʼal,+ chéen baʼaleʼ maʼ tin kaxtaj mix máakiʼ.
31 Le oʼolaleʼ yaan in láalik in pʼujaʼanil tu yóokʼoloʼob yéetel yaan in xuʼulsiktiʼob yéetel u kʼáakʼil in pʼujaʼanil. Yaan in beetik u taal tu yóokʼoloʼob le baʼax ku náajaltikoʼob tu yoʼolal le baʼaxoʼob ku beetkoʼoboʼ›, leloʼ bey u yaʼalik Jéeoba, le máax yaan tuláakal autoridad tiʼoʼ».
Notas
^ Ich hebreoeʼ ku yaʼalaʼal kaʼach «yaan wa a juzgartik, yaan wa a juzgartik».
^ Ich hebreoeʼ le tʼaanaʼ yaan yil yéetel u «taʼ baʼalcheʼ», yéetel ku meyaj utiaʼal u yúuchul tʼaan tiʼ baʼaloʼob pʼektaʼanoʼob.
^ Wa «kimen u papáʼoboʼ».
