Ezequiel 29:1-21
29 Teʼ año diez* tiʼ le día 12 tiʼ le mes diezoʼ* Jéeobaeʼ tu kaʼa tʼaneneʼ ka tu yaʼalajten:
2 «U paal máak, paakatnen tu tojil Faraón u reyil Egiptoeʼ ka a waʼal baʼax ku taal u kʼiin u yúuchul tiʼ letiʼ bey xan tiʼ tuláakal Egipto.+
3 Techeʼ unaj a waʼalik lelaʼ: ‹Jéeoba, le máax yaan tuláakal autoridad tiʼoʼ, ku yaʼalik:
«Faraón u reyil Egipto,+ teneʼ tiaʼanen ta contraeʼ,teech le nuxiʼ baʼalcheʼ chilikbal teʼ Río Nilooʼ.*+
Techeʼ tsʼoʼok a waʼalik: ‹Le Río Nilooʼ in tiaʼal,teen beetmil›.+
4 Chéen baʼaleʼ teneʼ yaan in lechik ganchoʼob ta kamaʼach yéetel yaan in beetik u táakʼal ta wootʼel le kayoʼob yanoʼob teʼ Río Nilooʼ.
Teneʼ yaan in jóoʼsikech teʼ Río Nilo paʼteʼ yéetel tuláakal le kayoʼob kun táakʼal ta wootʼeloʼ.
5 Teneʼ yaan in xúumpʼatkech teʼ desierto paʼteʼ yéetel tuláakal le kayoʼob yanoʼob teʼ Río Nilooʼ.
Yaan a lúubul yóoʼ luʼum yéetel u xéexetʼal a wíinklileʼ maʼ kun máan molbil.+
Yaan in kʼubkech utiaʼal a jaantaʼal tumen u tsʼíitsʼik baʼalcheʼiloʼob le luʼumoʼ bey xan tumen le chʼíichʼoʼob ku máanoʼob teʼ kaʼanoʼ.+
6 Le kéen tsʼoʼokkeʼ tuláakal u kajnáaliloʼob Egiptoeʼ yaan u yojéeltikoʼob máax Jéeoba,tumen tu kʼiinil u yáantkoʼob Israeleʼ letiʼobeʼ pʼáatoʼob chéen bey junpʼéel tikin sakʼabeʼ.*+
7 Le ka tu yóotoʼob u chʼaʼob u muukʼoʼob tiʼ techeʼ óopʼol ta beetaj,yéetel ta beetaj loob tiʼ u hombroʼob.
Le ka tu yóotoʼob u chʼaʼob u muukʼoʼob tiʼ techeʼ káachal ta beetajka joʼopʼ u takchalankiloʼob».+
8 Le oʼolaleʼ Jéeoba, le máax yaan tuláakal autoridad tiʼoʼ, ku yaʼalik: «¡Ilawile! Teneʼ nikaʼaj in taas junpʼéel espada ta contra,+ yéetel yaan in xuʼulsik tiʼ wíinik yéetel tiʼ baʼalcheʼ.
9 U luʼumil Egiptoeʼ yaan u pʼáatal bey junpʼéel desiertoeʼ yéetel yaan u pʼáatal mix baʼal yaniʼ.+ Letiʼob túuneʼ yaan u yojéeltikoʼob máax Jéeoba, tumen techeʼ ta waʼalaj: ‹Le Río Nilooʼ in tiaʼal, teen beetmil›.+
10 Le beetkeʼ teneʼ tiaʼanen ta contra yéetel tu contra a Río Nilooʼ. Yaan in beetik u tijil u luʼumil Egipto yéetel yaan in beetik ka pʼáatak mix baʼal yaniʼ, bey desierto kun pʼáatleʼ.+ Bey kun úuchul desde Migdol+ tak Siene,+ tak tu fronterail Etiopía.
11 Mix juntúul wíinik yéetel mix juntúul baʼalcheʼ kun máaniʼ,+ mix máak kun kajtal tu yáamil 40 añosiʼ.
12 Teneʼ yaan in beetik ka pʼáatak maas kʼaas yanil u luʼumil Egipto tiʼ u maasil luʼumoʼoboʼ. Yéetel u kaajiloʼob Egiptoeʼ yaan in beetik ka pʼáatkoʼob maas kʼaas yaniloʼob tiʼ u maasil kaajoʼob, bey kun pʼáatloʼob tu yáamil 40 añosoʼ.+ Yaan in kʼiʼitbesik le egipcioʼob ichil le luʼumoʼoboʼ, yaan in kʼiʼitbeskoʼob teʼ kaajoʼoboʼ».+
13 Tumen Jéeoba, le máax yaan tuláakal autoridad tiʼoʼ, ku yaʼalik: «Le kéen máanak 40 añoseʼ yaan in kaʼa muchʼik le egipcioʼoboʼ. Yaan in beetik u suutoʼob desde teʼ kaajoʼob tuʼux kʼiʼitbesaʼaboʼoboʼ.+
14 Teneʼ yaan in beetik u suut tu luʼumil Patrós+ le egipcioʼob bisaʼaboʼob táanxel luʼumiloʼ, yaan in beetik u suutoʼob tu luʼumoʼob yéetel yaan u kʼuchul u beetubaʼob junpʼéel reino maʼ nojoch u páajtaliliʼ.
15 Egiptoeʼ yaan u pʼáatal maas minaʼan u muukʼ tiʼ le uláakʼ luʼumoʼoboʼ, yéetel maʼ ken u kaʼa dominart u maasil kaajoʼob.+ Yaan in beetik u pʼáatal jach minaʼan u muukʼoʼob, le oʼolal maʼ kun páajtal u tsʼáaikoʼob uláakʼ kaajoʼob yáanal u páajtaliloʼob.+
16 Israeleʼ maʼ kun kaʼa confiar tiʼ le áantaj ku tsʼaʼabaltiʼob kaʼach tumen Egiptooʼ.+ Baʼaxeʼ chéen yaan u kʼaʼajsiktiʼob maʼ maʼalob úuchik u kʼáatkoʼob áantaj tiʼ le egipcioʼoboʼ. Letiʼob túuneʼ yaan u yojéeltikoʼobeʼ teneʼ Jéeobaen, teen le máax yaan tuláakal autoridad tiʼoʼ»›».
17 Teʼ año 27* tiʼ le yáax día tiʼ le yáax mesoʼ* Jéeobaeʼ tu kaʼa tʼaneneʼ ka tu yaʼalajten:
18 «U paal máak, Nabucodonosor+ u reyil Babiloniaeʼ jach yaʼab meyaj yanchaj u beetik yéetel u ejército utiaʼal u atacartik Tiro.+ Tuláakloʼobeʼ láaj kʼolischajoʼob, yéetel u hombroʼobeʼ láaj tsʼóolpajoʼob. Chéen baʼaleʼ letiʼ yéetel u ejércitoeʼ maʼ tu kʼamoʼob mix junpʼéel boʼol úuchik u binoʼob baʼateʼel tu contra Tiroiʼ.
19 Le oʼolal Jéeoba, le máax yaan tuláakal autoridad tiʼoʼ, ku yaʼalik: ‹Teneʼ yaan in tsʼáaik u luʼumil Egipto tiʼ Nabucodonosor u reyil Babilonia.+ Letiʼeʼ yaan u chʼaʼik u ayikʼalil, yaan u tokik baʼax yaantiʼ, yéetel yaan u chʼaʼik yaʼab baʼaloʼob. Leloʼ letiʼe boʼol ken u kʼam u ejércitooʼ›.
20 Jéeoba, le máax yaan tuláakal autoridad tiʼoʼ, ku yaʼalik: ‹Teneʼ yaan in tsʼáaik u luʼumil Egipto tiʼ Nabucodonosor tumen bin baʼateʼel tu contra Tiro, letiʼ yéetel u ejércitoeʼ tu beetoʼobten junpʼéel meyaj›.+
21 Teʼ kʼiin jeʼeloʼ teneʼ yaan in beetik u jóokʼol junpʼéel baak* utiaʼal u kaajil Israel.+ Yéetel tiʼ techeʼ, Ezequiel, yaan in tsʼáaik u páajtalil a tʼaan chúumuk tiʼ letiʼob. Bey túunoʼ letiʼobeʼ yaan u yojéeltikoʼobeʼ teneʼ Jéeobaen».
Notas
^ Lelaʼ úuch tu diez años bisaʼak táanxel luʼumil rey Joaquín, Ezequiel yéetel uláakʼ judíoʼob.
^ U kʼaabaʼ le mesaʼ Tebet.
^ Le tʼaan Río Nilo ku chíikpajal teʼ capítuloaʼ ku tʼaan xan tiʼ le jejeláas tuʼuxoʼob ku xaʼaypajal le ríooʼ.
^ Ich hebreoeʼ ku yaʼalaʼal kaʼach «junpʼéel caña».
^ Lelaʼ úuch tu 27 años bisaʼak táanxel luʼumil rey Joaquín, Ezequiel yéetel uláakʼ judíoʼob.
^ U kʼaabaʼ le mesaʼ Abib. Ilawil «Abib», página 2554.
^ Wa «yaan in tsʼáaik muukʼ tiʼ u kaajil Israel».
