Ezequiel 34:1-31
34 Jéeobaeʼ tu kaʼa tʼaneneʼ ka tu yaʼalajten:
2 «U paal máak, aʼal baʼax ku taal u kʼiin u yúuchul tiʼ le j-kanan tamanoʼob yanoʼob Israeloʼ. Aʼal tiʼ le j-kanan tamanoʼob lelaʼ: ‹Jéeoba, le máax yaan tuláakal autoridad tiʼoʼ, ku yaʼalik: «¡Yaj bix kun tsʼoʼokol tiʼ le j-kanan tamanoʼob yanoʼob Israel+ chéen ku yilik u tséentkubaʼoboʼ! ¿Maʼ wa letiʼe tamanoʼob unaj u tséentaʼal tumen le j-kanan tamanoʼoboʼ?+
3 Teʼexeʼ maʼatech a tséentkeʼex le tamanoʼoboʼ,+ baʼaxeʼ ka jaantikeʼex u tsaatseloʼob, ka búukintikeʼex nookʼoʼob beetaʼan yéetel u tsoʼotsel taman yéetel ka kíimskeʼex le maas poloktakoʼoboʼ.+
4 Teʼexeʼ maʼ a wáanteʼex le tamanoʼob minaʼan u muukʼoʼoboʼ, maʼ a tsʼakeʼex le tamanoʼob kʼojaʼanoʼoboʼ, maʼ a vendarteʼex le uchaʼan loob tiʼoboʼ, maʼ a wáanteʼex suut le ku náachtaloʼoboʼ yéetel maʼ xiʼikeʼex a kaxteʼex le saatloʼoboʼ,+ baʼaxeʼ ka maltratarkeʼexoʼob yéetel ka beetkeʼex a kʼasaʼanileʼex tiʼob.+
5 Letiʼob túuneʼ kʼiʼitbesaʼaboʼob tumen minaʼan mix máak kanáantkoʼob.+ Kʼiʼitbesaʼaboʼobeʼ ka jaantaʼaboʼob tumen le tsʼíitsʼik baʼalcheʼob yanoʼob teʼ kʼáaxoʼ.
6 In walakʼ tamanoʼobeʼ saatloʼob kaʼach teʼ montañaʼoboʼ bey xan teʼ kaʼanal lugaroʼoboʼ. In walakʼ tamanoʼobeʼ kʼiʼitbesaʼaboʼob tiʼ tuláakal le luʼumoʼ. Mix máak bin kaxtikoʼob, mix máak bin u yil tuʼux tsʼoʼokoʼob.
7 Tu yoʼolal leloʼ, j-kanan tamaneʼex, uʼuyeʼex baʼax ku yaʼalik Jéeoba:
8 ‹«Jeʼex jach tu jaajil kuxaʼaneneʼ —ku yaʼalik Jéeoba, le máax yaan tuláakal autoridad tiʼoʼ—, tumen minaʼan mix máak kanáantik in walakʼ tamanoʼobeʼ jaantaʼaboʼob tumen le tsʼíitsʼik baʼalcheʼob yanoʼob teʼ kʼáaxoʼ. Le máaxoʼob kanáantik in walakʼ tamanoʼoboʼ maʼ bin u kaxtoʼobiʼ, baʼaxeʼ chéen letiʼob tu yilaj u tséentkubaʼob, maʼ tu tséentoʼob in walakʼ tamanoʼobiʼ»›.
9 Tu yoʼolal tuláakal le baʼaloʼobaʼ, j-kanan tamaneʼex, uʼuyeʼex baʼax ku yaʼalik Jéeoba.
10 Jéeoba, le máax yaan tuláakal autoridad tiʼoʼ, ku yaʼalik: ‹Teneʼ tiaʼanen tu contra le j-kanan tamanoʼoboʼ, yaan in kʼáatik cuenta tiʼob tu yoʼolal le baʼaxoʼob tu beetoʼob tiʼ in walakʼ tamanoʼoboʼ.* Teneʼ yaan in luʼsiktiʼob u páajtalil u tséentkoʼob* in walakʼ tamanoʼob,+ yéetel le j-kanan tamanoʼoboʼ yaan u xuʼulul u tséentkubaʼob. Yaan in tokik in walakʼ tamanoʼob tu chiʼob, yéetel maʼ kun suut u jaantoʼob›».
11 Tumen Jéeoba, le máax yaan tuláakal autoridad tiʼoʼ, ku yaʼalik: «Teneʼ way yaneneʼ, teen kin kaxtik in walakʼ tamanoʼob yéetel teen kin kanáantkoʼob.+
12 Jeʼex juntúul j-kanan taman ku kaxtik u yalakʼ tamanoʼob saatloʼob yéetel ku tséentkoʼobeʼ, teen xaneʼ bey ken in kanáantil in walakʼ tamanoʼoboʼ.+ Yaan in bin in chʼaʼob teʼ tuʼuxoʼob kʼiʼitbesaʼaboʼob teʼ kʼiinoʼob ka nookoychaj yéetel ka yanchaj box múuyaloʼoboʼ.+
13 Teneʼ yaan in jóoʼskoʼob tiʼ le kaajoʼob yéetel tiʼ le luʼumoʼoboʼ yéetel yaan in muchʼkoʼob. Yaan in sutkoʼob tu luʼumoʼob yéetel yaan in tséentkoʼob tu montañailoʼob Israel,+ tu tséel le ríoʼoboʼ yéetel tu tséel le lugaroʼob yaan u kajnáaliloʼoboʼ.
14 Yaan in biskoʼob janal tiʼ lugaroʼob tuʼux yaan maʼalob suʼukoʼob, le lugaroʼob tuʼux ken in bisoʼob janaloʼ tiaʼanoʼob tu kaʼanal montañailoʼob Israeleʼ.+ Yaan in beetik u jeʼelskubaʼob tuʼux yaan maʼalob suʼukoʼob,+ yaan u jaantikoʼob le maʼalob suʼukoʼob yanoʼob teʼ tu montañailoʼob Israeloʼ».
15 Jéeoba, le máax yaan tuláakal autoridad tiʼoʼ, ku yaʼalik: «Teneʼ yaan in tséentik in walakʼ tamanoʼob+ yéetel yaan in beetik u chital u jeʼelsubaʼob.+
16 Le saatloʼoboʼ yaan in bin in kaxtoʼob,+ le náachchajaʼanoʼoboʼ yaan in sutkoʼob, le uchaʼan loob tiʼoboʼ yaan in vendarkoʼob yéetel le minaʼan u muukʼoʼoboʼ yaan in wáantkoʼob. Chéen baʼaleʼ le poloktakoʼob yéetel le muʼukʼaʼanoʼoboʼ yaan in xuʼulsiktiʼob, teneʼ yaan in juzgarkoʼob yéetel yaan in castigarkoʼob jeʼex u náajaltikoʼobeʼ».
17 In walakʼ tamaneʼex, teen Jéeoba le máax yaan tuláakal autoridad tiʼoʼ, kin waʼalikteʼex: «Teneʼ yaan in juzgartik in walakʼ tamanoʼob, yaan in juzgartik le xibil tamanoʼoboʼ bey xan le chivoʼoboʼ.+
18 ¿Maʼ wa conformeʼex ikil a jaantikeʼex le maas maʼalob suʼukoʼoboʼ? ¿Baʼaxten ka pepeʼchaʼatikeʼex u yalab le suʼuk ku pʼáatloʼ? ¿Baʼaxten le kéen tsʼoʼokok a wukʼikeʼex le jaʼ limpiooʼ ka puʼukʼtikeʼex?
19 Beora túunaʼ, ¿unaj wa u jaantik in walakʼ tamanoʼob le suʼuk tsʼoʼok a pepeʼchaʼatikeʼexoʼ? ¿Unaj wa u yukʼikoʼob le jaʼ tsʼoʼok a puʼukʼtikeʼexoʼ?».
20 Le oʼolaleʼ Jéeoba, le máax yaan tuláakal autoridad tiʼoʼ, ku yaʼalik tiʼ letiʼob: «Teneʼ way yaneneʼ, teneʼ yaan in juzgar chúumuk tiʼ le tamanoʼob poloktakoʼob yéetel le tsʼoyaʼantakoʼoboʼ,
21 tumen teʼexeʼ ta túulchʼinteʼexoʼob yéetel a wíinklileʼex, yéetel le tamanoʼob kʼojaʼanoʼoboʼ ta kʼóokʼocheʼexoʼob tak ka ta beeteʼex u láaj náachtaloʼob.
22 Chéen baʼaleʼ teneʼ yaan in salvartik in walakʼ tamanoʼob, maʼ ken in chaʼa u kaʼa jaantaʼaloʼob.+ Teneʼ yaan in beetik justicia ichil le tamanoʼoboʼ.
23 Teneʼ yaan in tsʼáaik juntúul j-kanan taman nuʼuktikoʼob+ yéetel tséentkoʼob, yaan in tsʼáaik David le máax meyajtikenoʼ.+ Letiʼ kun tséentkoʼob yéetel letiʼ kun kanáantkoʼob.+
24 Teen Jéeobaeʼ yaan in beetkinba u Diosoʼob,+ yéetel David le máax meyajtikenoʼ letiʼ ken u beet u nojchil ichiloʼob.+ Teen Jéeoba, teen aʼalik leloʼ.
25 Teneʼ yaan in beetik junpʼéel pacto tu yéeteloʼob utiaʼal u yantal jeetsʼelil,+ yéetel yaan in xuʼulsik tiʼ le tsʼíitsʼik baʼalcheʼob yanoʼob teʼ luʼumoʼ,+ bey túunoʼ in walakʼ tamanoʼobeʼ yaan u kajtaloʼob teʼ desierto yéetel x-maʼ saajkiloʼ yéetel yaan u weenloʼob tak ich kʼáax.+
26 Letiʼob yéetel u baʼpachil in puʼukeʼ yaan in beetik u pʼáatloʼob junpʼéel bendición,+ yéetel yaan in beetik ka taalak cháak jach tu kʼiinil. Le bendiciónoʼoboʼ bey cháak kun kʼáaxaloʼobeʼ.+
27 In kaajaleʼ yaan u kuxtal ich jeetsʼelil. Le cheʼob yanoʼob teʼeloʼ yaan u yichankiloʼob, yéetel le luʼumoʼ yaan xan u tsʼáaik u yich.+ Teneʼ yaan in kachik le u cheʼil kuuch tsʼaʼan tu yóokʼoloʼoboʼ+ yéetel yaan in tokikoʼob tu kʼab le máakoʼob esclavizarmiloʼoboʼ, le kéen in beet leloʼ letiʼobeʼ yaan u yojéeltikoʼobeʼ teneʼ Jéeobaen.
28 Letiʼobeʼ maʼ kun kaʼa pʼáatloʼob tu kʼab le kaajoʼoboʼ yéetel maʼ kun kaʼa jaantbiloʼob tumen le tsʼíitsʼik baʼalcheʼob yanoʼob teʼ luʼumoʼ. Yaan u kuxtaloʼob ich jeetsʼelil, mix máak kun beetik u chʼaʼikoʼob saajkil.+
29 Teneʼ yaan in beetik u yantal junpʼéel u paakʼaloʼob utiaʼal u jach kʼaj óoltaʼaloʼob. Bey túunoʼ maʼ kun kaʼa kíimloʼob yéetel wiʼij teʼ luʼumoʼ+ yéetel yaan u xuʼulul u taasaʼaloʼob mix baʼalil tumen le kaajoʼoboʼ.+
30 ‹Letiʼob túuneʼ yaan u yojéeltikoʼobeʼ teen Jéeoba u Diosoʼobeʼ tiaʼanen tu yéeteloʼobeʼ, yéetel letiʼob u kaajil Israeleʼ, in kaajaloʼob›,+ leloʼ bey u yaʼalik Jéeoba, le máax yaan tuláakal autoridad tiʼoʼ»›.
31 ‹In walakʼ tamaneʼex,+ teʼex le tamanoʼob kin kanáantikoʼ, teʼexeʼ chéen máakeʼex, teen a Dioseʼex›, leloʼ bey u yaʼalik Jéeoba, le máax yaan tuláakal autoridad tiʼoʼ».
