Ezequiel 39:1-29
39 U paal máak, profetizarneneʼ ka a waʼal tu contra Gog:+ ‹Jéeoba, le máax yaan tuláakal autoridad tiʼoʼ, ku yaʼalik: «Gog, u nojchil* Mesek yéetel Tubal, teneʼ tiaʼanen ta contraeʼ.+
2 Teneʼ yaan in beetik a tsʼáaik vuelta, yaan in nuʼuktikech, yaan in beetik a taal desde teʼ lugaroʼob maas náachtak yanoʼob xamanoʼ+ yéetel yaan in biskech tu yóokʼol u montañailoʼob Israel.
3 Teneʼ yaan in xíikjatsʼtik le arco yaan ta x-tsʼíik kʼaboʼ yéetel yaan in beetik u lúubul le flechaʼob yaan ta x-noʼoj kʼaboʼ.
4 Teech, tuláakal a soldadoʼob yéetel le kaajoʼob yanoʼob ta wéeteloʼ yaan a pʼáatleʼex jaytal tu yóokʼol u montañailoʼob Israel.+ Yaan in kʼubkech utiaʼal a jaantaʼal tumen u jejeláasil chʼíichʼoʼob ku jaantikoʼob bakʼ bey xan tumen u tsʼíitsʼik baʼalcheʼiloʼob kʼáax»›.+
5 ‹Yaan a pʼáatal pektal teʼ kʼáaxoʼ+ tumen bey tsʼoʼok in waʼalikoʼ›, leloʼ bey u yaʼalik Jéeoba, le máax yaan tuláakal autoridad tiʼoʼ.
6 ‹Yaan in túuxtik junpʼéel kʼáakʼ tu contra Magog bey xan tu contra le máaxoʼob seguro u yuʼubikubaʼob teʼ islaʼoboʼ.+ Le máakoʼob túunoʼ yaan u yojéeltikoʼob máax Jéeoba.
7 Yaan in beetik u kʼaj óoltaʼal in santo kʼaabaʼ tumen in kaajal Israel. Teneʼ maʼ ken in kaʼa chaʼa u taasaʼal mix baʼalil in santo kʼaabaʼ. Le kaajoʼob túunoʼ yaan u yojéeltikoʼobeʼ teneʼ Jéeobaen,+ le Máax Santo yaan Israeloʼ›.+
8 Jéeoba, le máax yaan tuláakal autoridad tiʼoʼ, ku yaʼalik: ‹Jach beyoʼ, lelaʼ táan u taal u kʼiinil yéetel yaan u béeytal, letiʼe kʼiin in waʼalmaj yaan u taaleʼ.
9 U kajnáaliloʼob le kaajoʼob yanoʼob Israeloʼ yaan u jóokʼloʼob yéetel yaan u tʼabkoʼob kʼáakʼ yéetel le u nuʼukuliloʼob baʼatelaʼ: nukuch escudoʼob yéetel mejen escudoʼob,* arcoʼob yéetel flechaʼob, mazoʼob* yéetel lanzaʼob. Le u nuʼukuliloʼob baʼatelaʼ yaan u meyajtiʼob utiaʼal u tʼabkoʼob kʼáakʼ+ tu yáamil siete años.
10 Maʼ kun kʼaʼabéettal u bin u kaxtoʼob cheʼ ich kʼáax mix kun kʼaʼabéettal u kaxtikoʼob siʼ, tumen letiʼe u nuʼukuliloʼob baʼateʼel kun meyajtiʼob utiaʼal u tʼabkoʼob kʼáakʼoʼ›.
‹Letiʼobeʼ yaan u tokikoʼob le baʼaloʼob toʼoktiʼoboʼ yéetel yaan u chʼaʼikoʼob le baʼaloʼob chʼaʼabtiʼoboʼ›, leloʼ bey u yaʼalik Jéeoba, le máax yaan tuláakal autoridad tiʼoʼ.
11 ‹Teʼ kʼiin jeʼeloʼ yaan in tsʼáaik junpʼéel lugar utiaʼal u muʼukul Gog+ tu luʼumil Israel, yaan u muʼukul teʼ táax luʼum tuʼux ku máan le máaxoʼob ku binoʼob tu lakʼinil le kʼáaʼnáaboʼ. Le kéen tsʼoʼokkeʼ yaan u kʼatik u beel le máaxoʼob ku máanoʼoboʼ. Teʼeloʼ tiʼ kun mukbil Gog yéetel tuláakal u ejércitoiʼ, le kéen tsʼoʼokkeʼ le lugaroʼ yaan u tsʼaʼabal u kʼaabaʼt u Táax Luʼumil Hamon-Gog.*+
12 U kaajil Israeleʼ yaan u máan siete meses táan u mukikoʼob le kimenoʼob utiaʼal u limpiokíinkoʼob le luʼumoʼ.+
13 Tuláakal u kajnáaliloʼob le luʼumoʼ yaan u táakpajloʼob utiaʼal u muʼukul le kimenoʼoboʼ. Tu yoʼolal leloʼ yaan u jach kʼaj óoltaʼaloʼob teʼ kʼiin ken in weʼes le nojoch poder yaantenoʼ›,+ leloʼ bey u yaʼalik Jéeoba, le máax yaan tuláakal autoridad tiʼoʼ.
14 ‹Utiaʼal u limpiokíintaʼal le luʼumoʼ yaan u yéeyaʼal máakoʼob utiaʼal u máanoʼob mantatsʼ teʼ luʼumoʼ, letiʼob túuneʼ yaan u mukikoʼob le kimenoʼob pʼaatloʼob jaytal yóoʼ luʼumoʼ. Siete meses kun máanoʼob kaaxan.
15 Wa le máaxoʼob ku máanoʼob teʼ luʼum ku yilkoʼob junpʼéel u baakel máakoʼ yaan u tsʼáaikoʼob junpʼéel marca tu tséel. Le máaxoʼob túun tsʼaʼanoʼob utiaʼal u mukikoʼob le kimenoʼoboʼ yaan u mukikoʼob teʼ lugar ku kʼaabaʼtik u Táax Luʼumil Hamon-Gogoʼ.+
16 Teʼeloʼ yaan xan u yantal junpʼéel kaaj ku kʼaabaʼtik Hamoná.* Letiʼobeʼ yaan u limpiokíinkoʼob le luʼumoʼ›.+
17 U paal máak, tiʼ techeʼ ku yaʼalaʼal tumen Jéeoba, le máax yaan tuláakal autoridad tiʼoʼ: ‹Aʼal tiʼ tuláakal u jejeláasil chʼíichʼoʼob bey xan tiʼ tuláakal u tsʼíitsʼik baʼalcheʼiloʼob le kʼáaxoʼ: «Muchʼabaʼexeʼ ka taalakeʼex. Muchʼabaʼex tu baʼpach le sacrificio táan in preparartikteʼexoʼ, junpʼéel nojoch sacrificio tu montañailoʼob Israel.+ Yaan a jaantikeʼex bakʼ yéetel yaan a wukʼikeʼex kʼiʼikʼ.+
18 Yaan a jaantikeʼex u bakʼel muʼukʼaʼan máakoʼob yéetel yaan a wukʼikeʼex u kʼiʼikʼel le máaxoʼob ku nuʼuktajoʼob teʼ luʼumoʼ —le xibil tamanoʼoboʼ, le tamanoʼoboʼ, le chivoʼoboʼ yéetel le toroʼoboʼ— tuláakal u polok baʼalcheʼiloʼob Basán.
19 Tiʼ le sacrificio táan in preparartikteʼexoʼ, teʼexeʼ yaan a jaantikeʼex tsaats tak ken naʼajchajkeʼex yéetel yaan a wukʼikeʼex kʼiʼikʼ tak ken káalchajkeʼex»›.
20 ‹Teʼexeʼ yaan a naʼajkúuntkabaʼex yéetel le baʼaloʼob yaan tin mesaoʼ, yaan a jaantikeʼex tsíiminoʼob bey xan le máaxoʼob nuʼuktik u carroiloʼob baʼateloʼ, yaan a jaantikeʼex muʼukʼaʼan máakoʼob bey xan u jejeláasil soldadoʼob›,+ leloʼ bey u yaʼalik Jéeoba, le máax yaan tuláakal autoridad tiʼoʼ.
21 ‹Teneʼ yaan in weʼesik in páajtalil ichil le kaajoʼoboʼ, tuláakal le kaajoʼob túunoʼ yaan u yilkoʼob bix úuchik in beetik le baʼax in waʼalmoʼ yéetel bix úuchik in weʼesik in poder* ichiloʼob.+
22 Desde teʼ kʼiin jeʼeloʼ u kaajil Israeleʼ yaan u yojéeltikeʼ teneʼ Jéeobaen, teen u Diosoʼob.
23 Le kaajoʼob túunoʼ yaan u yojéeltikoʼobeʼ u kaajil Israeleʼ bisaʼaboʼob táanxel luʼumil tumen tu beetoʼob baʼax kʼaas, tu traicionartenoʼob.+ Le oʼolal xuʼul in beetik u cuentailoʼobeʼ+ ka tin kʼuboʼob tu kʼab u enemigoʼob,+ tuláakloʼob kíimsaʼaboʼob yéetel espada.
24 Tin tsʼáaj baʼaxoʼob ku náajaltikoʼob tumen tu kʼaskúuntaj u kuxtaloʼob yéetel tumen tu beetoʼob baʼaloʼob kʼaastak tin táan. Teneʼ xuʼul in beetik u cuentailoʼob›.
25 Tu yoʼolal leloʼ Jéeoba, le máax yaan tuláakal autoridad tiʼoʼ, ku yaʼalik: ‹Teneʼ yaan in beetik u suut le u paalal Jacob bisaʼaboʼob táanxel luʼumiloʼ+ yéetel yaan in chʼaʼik óotsilil tiʼ tuláakal u kaajil Israel.+ Teneʼ yaan in defendertik in santo kʼaabaʼ yéetel tuláakal in muukʼ.+
26 Le kéen tsʼoʼokok a mixbaʼalkúuntaʼaleʼex yoʼolal tuláakal le baʼaxoʼob ta beeteʼex utiaʼal a traicionarkeneʼexoʼ+ yaan a kuxtaleʼex ich jeetsʼelil ta luʼumeʼex, mix máak kun beetik a sajaktaleʼex.+
27 Teneʼ yaan in jóoʼskoʼob teʼ kaajoʼob yéetel teʼ luʼumoʼob tuʼux yaan u enemigoʼoboʼ yéetel yaan in muchʼkíintikoʼob,+ le kéen in beet leloʼ yaan in santificarkinba ichiloʼob yéetel yaan u yilaʼal tumen yaʼabkach kaajoʼob›.+
28 ‹Le kéen in túuxtoʼob táanxel luʼumil yéetel le kéen in kaʼa muchʼoʼob tu luʼumoʼob sin ke u pʼáatal mix juntúul tiʼ letiʼobeʼ,+ teʼ kʼiin jeʼeloʼ yaan u yojéeltikoʼobeʼ teneʼ Jéeobaen, teen u Diosoʼob.
29 Teneʼ yaan in kaʼa beetik u cuentailoʼob,+ yaan in láalik in poder tu yóokʼol u kaajil Israel›,+ leloʼ bey u yaʼalik Jéeoba, le máax yaan tuláakal autoridad tiʼoʼ».
Notas
^ Wa «u nojoch príncipeil».
^ Le mejen escudoʼobaʼ letiʼe suuk u meyaj kaʼach tiʼ le arqueroʼoboʼ.
^ Uláakʼ bix u traducirtaʼaleʼ «cheʼob», leloʼobaʼ jach yaan u puntaʼob yéetel ku meyajoʼob utiaʼal u yúuchul baʼateʼel.
^ Wa «u táax luʼum le yaʼabkach máakoʼob yanoʼob yéetel Gogoʼ».
^ U kʼáat u yaʼal «Yaʼabkach Máakoʼob».
^ Ich hebreoeʼ ku yaʼalaʼal kaʼach «in kʼab».
