Ezequiel 4:1-17
4 U paal máak, chʼaʼ junpʼéel ladrilloeʼ* ka a tsʼáa ta táan utiaʼal a dibujartik u kaajil Jerusaléniʼ.
2 Tsʼáa baʼaloʼob utiaʼal a kʼalik tuláakal u baʼpach le ladrillooʼ,+ beet junpʼéel rampa utiaʼal u atacartaʼal,+ tsʼáa wa baʼax utiaʼal a weʼesik yaan máaxoʼob taaljaʼan baʼateltik, tsʼoʼoleʼ baʼpacht yéetel nuʼukuloʼob ikil u juʼutul pakʼ.+
3 Chʼaʼ junxóotʼ fierro bey xamacheʼ ka a tsʼáa chúumuk tiʼ teech yéetel tiʼ le kaajoʼ utiaʼal ka pʼáatak bey junpʼéel pakʼeʼ. Le kéen tsʼoʼokkeʼ ka táaʼpaktik yéetel ka weʼesik bix kun baʼpachtbil. Lelaʼ yaan u yeʼesik tiʼ le israelitaʼob baʼax ku taal u kʼiinoʼ.+
4 Le kéen tsʼoʼokkeʼ unaj a tséel chital tu tojil a x-tsʼíik kʼab utiaʼal a kuchik u kʼeban Israel,+ letiʼe baʼax ken a kuch tuláakal le kʼiinoʼob kan chital ta x-tsʼíikoʼ.
5 Bey unaj a pʼáatal 390 días utiaʼal a kuchik u kʼeban Israeloʼ,+ tumen letiʼe bukaʼaj años tu beetoʼob baʼax maʼ maʼalob tin táanoʼ.
6 Bey unaj a pʼáatal tuláakal le kʼiinoʼob jeʼeloʼ.
Le kéen tsʼoʼokkeʼ unaj a tséel chital tu tojil a x-noʼoj kʼab. Bey unaj a beetik ich 40 días utiaʼal a kuchik u kʼeban u kaajil Judáoʼ.+ Junpʼéel kʼiin tu yoʼolal junpʼéel año, junpʼéel kʼiineʼ ku chíikbesik junpʼéel año.
7 Techeʼ unaj a jach paktik bix baʼpachtaʼanil Jerusalén,+ unaj a kotsʼik u kʼabil a nookʼ yéetel unaj a waʼalik baʼax ku taal u kʼiin u yúuchultiʼ.
8 Uʼuy a wuʼuye, teneʼ yaan in kʼaxkech yéetel suumoʼob utiaʼal maʼ u páajtal a sutkaba chital tuláakʼ tséel tak ken chúukpajak le kʼiinoʼob unaj a baʼpachtik le kaajoʼ.
9 Techeʼ unaj a chʼaʼik trigo, cebada, haba, lenteja, mijo* yéetel espelta.* Le kéen tsʼoʼokkeʼ ka tsʼáaikoʼob tiʼ junpʼéel nuʼukuleʼ ka beetik a woʼoch waaj tu yéeteloʼob. Letiʼe baʼax ken a jaant tuláakal le 390 días chilikbalech chéen tiʼ juntséeloʼ.+
10 Sáamsamal unaj a pʼisik kex 230 gramos* waaj utiaʼal a jaante. Sáamsamal unaj a jaantik teʼ hora unajoʼ.
11 Unaj xan a pʼisik junpʼíit maas tiʼ medio litro* jaʼ utiaʼal a wukʼe. Sáamsamal unaj a wukʼik teʼ hora unajoʼ.
12 Le waajoʼ unaj a takʼankúuntik jeʼex u takʼankúuntaʼal junpʼéel waaj de cebadaeʼ, chéen baʼaleʼ le kʼáakʼ kun meyajtech utiaʼal a takʼankúuntikoʼ unaj a tʼabik yéetel u tiknil u taʼ wíinik, leloʼ unaj a beetik tu táan le máakoʼoboʼ».
13 Ka tsʼoʼokeʼ Jéeobaeʼ tu yaʼalaj: «Bey xan kun úuchul tiʼ le israelitaʼob teʼ kaajoʼob tuʼux ken in kʼiʼitbesoʼoboʼ, yaan u jaantikoʼob waaj maʼ uts u jaantaʼaliʼ».*+
14 Teen túuneʼ tin waʼalaj: «¡Jéeoba, teech le máax yaan tuláakal autoridad tiʼoʼ! ¡Maʼ a waʼalikten ka in beet leloʼ! Desde tin táankelmileʼ maʼ in jaant baʼaloʼob maʼ uts u jaantaʼaliʼ, maʼ in jaant u bakʼel baʼalcheʼ kimen ka kaxtaʼabiʼ wa xeʼexetʼaʼan tumen juntúul tsʼíitsʼik baʼalcheʼ.+ Teneʼ mix juntéen in tsʼáa tin chiʼ bakʼ maʼ uts u jaantaʼaliʼ».+
15 Letiʼeʼ tu yaʼalajten: «Maʼalob túun, jeʼel u páajtal u meyajtech u taʼ wakax tu lugar u taʼ wíinik utiaʼal a takʼankúuntik a woʼoch waajeʼ».
16 Ka tsʼoʼokeʼ tu yaʼalajten: «U paal máak, yaan in beetik u xuʼupul le baʼaloʼob utiaʼal jaantbil líiʼsaʼan* tu kaajil Jerusalénoʼ.+ Le kaaj túunoʼ yaan u pʼiskoʼob le baʼax ken u jaantoʼoboʼ+ bey xan le jaʼ ken u yukʼoʼoboʼ, tumen jach saajkoʼob ka xuʼupuk tiʼob.+
17 Le kéen pʼáatak minaʼan baʼal u jaantoʼob yéetel minaʼan jaʼ u yukʼoʼobeʼ yaan u pʼáatal chéen táan u paktik u yichoʼob yéetel yaan u pʼáatloʼob chéen kʼakʼalbaakoʼob, lelaʼ yaan u yúuchultiʼob úuchik u kʼebantaloʼob.
Notas
^ Le ladrilloaʼ bey junpʼéel chan blokeʼ. Suuk kaʼach u beetaʼal yéetel suʼuk xaʼakʼtaʼan yéetel luukʼ wa yéetel kʼat.
^ Lelaʼ junpʼéel clase xíiw mejentak u semillail yéetel ku meyaj utiaʼal u beetaʼal u waajil harina.
^ Lelaʼ junpʼéel clase trigo maʼ jach finoiʼ yéetel suuk kaʼach u paʼakʼal tu luʼumil Egipto.
^ Ich hebreoeʼ ku yaʼalaʼal kaʼach «20 siclos». Ilawil «Siclo», página 2580.
^ Ich hebreoeʼ ku yaʼalaʼal kaʼach «u sexta parte junpʼéel hin». Ilawil «Hin», página 2565.
^ Tumen maʼ beetaʼan jeʼex u yaʼalik le leyoʼ.
^ Ich hebreoeʼ ku yaʼalaʼal kaʼach «u kaʼachal u cheʼiloʼob le waaj». Maʼ xaaneʼ táan u tʼaan tiʼ le cheʼob tuʼux ku tsʼaʼabal le waaj utiaʼal u líiʼsaʼaloʼ.
