Ezequiel 6:1-14
6 Jéeobaeʼ tu kaʼa tʼaneneʼ ka tu yaʼalajten:
2 «U paal máak, sut a wich tu tojil u montañailoʼob Israeleʼ ka a waʼal baʼax kun taal tu yóokʼoloʼob.
3 Techeʼ unaj a waʼalik: ‹U montañaileʼex Israel, uʼuyeʼex baʼax ku yaʼalik Jéeoba, le máax yaan tuláakal autoridad tiʼoʼ. Jéeoba, le máax yaan tuláakal autoridad tiʼoʼ, ku yaʼalik tiʼ le montañaʼoboʼ, tiʼ le puʼukoʼoboʼ,* tiʼ le ríoʼoboʼ bey xan tiʼ le táax luʼumoʼoboʼ: «¡Uʼuy a wuʼuyeʼex! Yaan in beetik u taal junpʼéel espada ta wóokʼoleʼex utiaʼal in xuʼulsik tiʼ le kaʼanal lugaroʼob* yaanteʼexoʼ.
4 Yaan in juʼujutik le altaroʼoboʼ,* yaan in pʼuʼupʼuyik le altaroʼob tuʼux ku tóokaʼal inciensooʼ,+ tsʼoʼoleʼ u wíinklil le máaxoʼob kimenoʼoboʼ yaan in píikchʼintik tu táan le x-lalaʼ* imagenoʼoboʼ.+
5 Le u wíinklil le israelitaʼob tsʼoʼok u kíimloʼoboʼ yaan in píikchʼintik tu táan u x-lalaʼ imagenoʼob yéetel yaan in beetik u jaytal u baakeloʼob tu baʼpach u altaroʼob.+
6 Tiʼ jeʼel baʼalak luʼumil kajaʼaneʼexeʼ yaan u xuʼulsaʼal tiʼ le kaajoʼoboʼ,+ yéetel le kaʼanal lugaroʼoboʼ yaan u juʼujutaʼaloʼob utiaʼal u xuʼulsaʼaltiʼob.+ Le altaroʼob a beetmeʼexoʼ yaan u juʼujutaʼaloʼob yéetel yaan u pʼuʼupʼuyaʼaloʼob. A x-lalaʼ imageneʼexeʼ yaan u xuʼulsaʼaltiʼob, le altaroʼob tuʼux ka tóokikeʼex inciensooʼ yaan u juʼujutaʼaloʼob, yaan u saʼatal tuláakal le baʼaxoʼob a beetmeʼexoʼ.
7 Le kéen kíimik yaʼab máakoʼob ichileʼexeʼ,+ tiʼ ken a wojéelteʼex máax Jéeobaiʼ.+
8 Chéen baʼaleʼ yaan in chaʼik u pʼáatal kuxaʼanil jujuntúuliʼ, yaan tiʼ teʼexeʼ yaan u púutsʼul tiʼ le espadaoʼ tumen yaan u bin táanxel luʼumil, bey túunoʼ yaan a kʼiʼitpajleʼex tiʼ jejeláas luʼumiloʼob.+
9 Le máaxoʼob kun púutsʼloʼoboʼ yaan u kʼaʼajsikenoʼob teʼ jejeláas luʼumoʼob tuʼux kun bisbiloʼoboʼ.+ Yaan u tsʼáaikoʼob cuenta jach yaachaj u yóol in puksiʼikʼal úuchik u traicionarkenoʼob* yéetel úuchik u sutik u paachoʼob tiʼ teen,+ bey xan úuchik u adorarkoʼob* le x-lalaʼ imagenoʼoboʼ.+ Letiʼobeʼ yaan u suʼlaktaloʼob yéetel yaan u sen pʼektikoʼob tuláakal le baʼaloʼob maʼ maʼalobtak yéetel jach kʼaastak tsʼoʼok u beetkoʼoboʼ.+
10 Letiʼob túuneʼ yaan u yojéeltikoʼob máax Jéeoba, yéetel yaan u yilkoʼob maʼ chéen táan in báaxal le ka tin waʼalaj yaan in taasik junpʼéel nojoch loob tu yóokʼoloʼobiʼ»›.+
11 Jéeoba, le máax yaan tuláakal autoridad tiʼoʼ, ku yaʼalik: ‹Péetsʼkʼabt a pool* yéetel péepeks a wook utiaʼal a weʼesik yaachajaʼan a wóol tu yoʼolal tuláakal le baʼaloʼob maʼ maʼalobtak yéetel jach kʼaastak tsʼoʼok u beetik u kaajil Israeloʼ, letiʼobeʼ yaan u kíimsaʼaloʼob tumen espada, tumen wiʼijil yéetel tumen kʼaakʼas kʼojaʼanil.+
12 Le máax náach yaniloʼ yaan u kíimsaʼal tumen kʼaakʼas kʼojaʼanil. Le máax naatsʼ yaniloʼ yaan u kíimsaʼal yéetel espada, tuláakal máax kun púutsʼul tiʼ le baʼaloʼobaʼ yaan u kíimsaʼal tumen wiʼijil. Teneʼ yaan in láalik tuláakal in pʼujaʼanil tu yóokʼoloʼob.+
13 Teʼexeʼ yaan a wojéeltikeʼex máax Jéeoba,+ yaan a wojéeltikeʼex le kéen a wileʼex jayakbal kimenoʼob tuláakal tuʼux: tu táan a x-lalaʼ imageneʼex, tu baʼpach a altareʼex,+ teʼ kaʼanal puʼukoʼoboʼ, tu kaʼanlil le montañaʼoboʼ, tu yáanal le cheʼob piim u leʼoboʼ yéetel yáanal le nukuch cheʼob tuʼux ta kʼubeʼex kiʼibok ofrendaʼob* utiaʼal a kiʼimakkúuntkeʼex u yóol a x-lalaʼ imageneʼexoʼ.+
14 Teneʼ yaan in líiʼsik in kʼab tu contraʼob, le luʼum túunoʼ yaan u pʼáatal bey junpʼéel desiertoeʼ. Tuláakal le tuʼuxoʼob kajaʼanoʼoboʼ yaan u pʼáatal maas kʼaas yanil ke le desierto yaan naatsʼ Dibláoʼ. Bey ken u yojéeltiloʼob máax Jéeobaoʼ›».
Notas
^ Wa «cerroʼoboʼ».
^ Ilawil «Kaʼanal lugar», página 2567.
^ Ilawil página 2554.
^ Ich hebreoeʼ le tʼaanaʼ yaan yil yéetel u «taʼ baʼalcheʼ», yéetel ku meyaj utiaʼal u yúuchul tʼaan tiʼ baʼaloʼob pʼektaʼanoʼob.
^ Wa «u yantal baʼal u yiloʼob yéetel».
^ Wa «úuchik u kʼastaloʼob».
^ Ich hebreoeʼ ku yaʼalaʼal kaʼach «papaxkʼabnen». Úuchjeakileʼ le máakoʼoboʼ yaan kʼiineʼ ku papaxkʼaboʼob utiaʼal u yeʼeskoʼob yaachajaʼan u yóoloʼob.
^ Wa «kiʼibok baʼaloʼob».
