Filipenses 4:1-23
4 Le oʼolaleʼ, in sukuʼuneʼex, jeetsʼel pʼáatkeʼex+ tu yiknal Yuumtsil jeʼel bix tsʼoʼok in waʼalikoʼ. Teneʼ in yaabiltmeʼex yéetel táan in tsʼíiboltik in wilkeʼex. Ta woʼolaleʼexeʼ ku kiʼimaktal in wóol yéetel kin wilkeʼex bey in coronaeʼ.+
2 Kin kʼáat óoltik tiʼ Evodia yéetel tiʼ Síntique ka yanak junpʼéeliliʼ tuukul tiʼob le táan u meyajtikoʼob Yuumtsiloʼ.+
3 Bey xan tiʼ teech, juntúul máax ku múul meyaj tin wéetel yéetel tuláakal u puksiʼikʼal, kin jach aʼaliktech ka seguernak a wáantik le koʼoleloʼobaʼ. Letiʼobeʼ tsʼoʼok u jach tsʼáaik u yóoloʼob múul meyaj tin wéetel utiaʼal k-bisik u tʼaan Dios junmúuchʼ yéetel Clemente bey xan yéetel le u maasil in wéet meyajoʼoboʼ, máaxoʼob tsʼíibtaʼan u kʼaabaʼob tu libroil le kuxtaloʼ.+
4 Mantatsʼ kiʼimakchajak a wóoleʼex le táan a meyajtikeʼex Yuumtsiloʼ. Kin kaʼa aʼalikteʼex: ¡Kiʼimakchajak a wóoleʼex!+
5 Tuláakal máak unaj u yojéeltik bukaʼaj utsil a puksiʼikʼaleʼex.*+ Maʼ u tuʼubulteʼex naatsʼ yanil Yuumtsil.
6 Maʼ a sen chiʼichnaktaleʼex tu yoʼolal mix baʼal,+ baʼaxeʼ aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex.+
7 Bey túunoʼ le jeetsʼelil+ maʼ tu páajtal u naʼataʼal tumen wíinik ku tsʼáaik Diosoʼ, yaan u kanáantik a puksiʼikʼaleʼex+ yéetel a tuukuleʼex tu yoʼolal Cristo Jesús.
8 Tu tsʼookeʼ, sukuʼuneʼex, seguernak a tuukuleʼex tiʼ jeʼel baʼalak jaajtakeʼ, tiʼ jeʼel baʼalak kʼaʼanaʼaneʼ, tiʼ jeʼel baʼalak toj tu táan Dioseʼ, tiʼ jeʼel baʼalak limpioeʼ, tiʼ jeʼel baʼalak ku lúubul utsileʼ, tiʼ jeʼel baʼalak ku yúuchul maʼalob tʼaan tu yoʼolaleʼ, tiʼ jeʼel baʼalak maʼalob yéetel tiʼ jeʼel baʼalak ku náajmatik u alabartaʼaleʼ.+
9 Beeteʼex le baʼaxoʼob ta kaneʼexoʼ bey xan le baʼaxoʼob ta kʼameʼex, ta wuʼuyeʼex yéetel ta wileʼex tiʼ tenoʼ,+ u Diosil túun le jeetsʼeliloʼ yaan u yantal ta wéeteleʼex.
10 Jach ku kiʼimaktal in wóol tu yoʼolal Yuumtsil tumen tsʼoʼok u kaʼa káajal a tuukuleʼex tin woʼolal.+ Kex ka tuukuleʼex tin woʼolaleʼ, maʼ yanak kaʼach u súutukil a weʼeskeʼexteniʼ.
11 Lelaʼ maʼ táan in waʼalik tumen kʼaʼabéetten wa baʼaxiʼ, tumen jeʼel bixak yanileneʼ, tsʼoʼok in kanik bix jeʼel u kiʼimaktal in wóol yéetel le baʼaxoʼob yaantenoʼ.+
12 In wojel bix u kuxtal máak ich óotsilil+ bey xan bix u kuxtal máak ich ayikʼalil. Teneʼ tsʼoʼok in kanik bix jeʼel u kiʼimaktal in wóol kex jeʼel bixak yanileneʼ; kex wa naʼajen wa kex wiʼijen, kex wa yaanten yaʼab baʼal wa kex chéen junpʼíit.
13 Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ.+
14 Chéen baʼaleʼ teʼexeʼ maʼalob baʼal ta beeteʼex úuchik a wáantkeneʼex teʼ kʼiinoʼob táan in muʼyajoʼ.
15 Tsʼoʼoleʼ, filiposileʼex, jeʼex a wojlileʼexeʼ le ka tsʼoʼok in yáax tsikbaltikteʼex u tʼaan Dios yéetel le ka lukʼen tu luʼumil Macedoniaeʼ, mix junpʼéel múuchʼulil áanten wa tu kʼamaj in wáantaj, chéen teʼex,+
16 tumen tak le tiaʼanen Tesalónicaoʼ, teʼexeʼ kaʼatéen ta túuxteʼex jujunpʼéel baʼaloʼob utiaʼal a wáantkeneʼex tiʼ baʼaxoʼob kʼaʼabéetten.
17 Lelaʼ maʼ táan in waʼalik tumen in kʼáat ka a síiʼexten baʼaloʼobiʼ, le baʼax in kʼáatoʼ ka maas yaʼabchajak le baʼaloʼob maʼalobtak ka beetkeʼex tu táan Diosoʼ.
18 U jaajileʼ yaanten tuláakal baʼax kʼaʼabéetten, yaanten tak u maasil. Mix baʼal ku bineltikten tumen tsʼoʼok in kʼamik tiʼ Epafrodito+ le baʼax ta túuxteʼextenoʼ, leloʼ junpʼéel kʼambeʼen sacrificio ku keʼetel yéetel junpʼéel baʼal kiʼibok+ yéetel jach uts tu tʼaan Dios.
19 In Dioseʼ, tu yoʼolal Cristo Jesúseʼ, yaan u tsʼáaikteʼex tuláakal baʼal kʼaʼabéetteʼex,+ tumen letiʼeʼ táaj yaʼab u ayikʼalil.
20 Beoraaʼ alabartaʼak k-Dios yéetel k-Taata utiaʼal mantatsʼ. Ka béeyak.*
21 Tsʼáaʼex in saludos tiʼ tuláakal le máaxoʼob santoʼob junmúuchʼ yaniloʼob yéetel Cristo Jesúsoʼ. Le sukuʼunoʼob yanoʼob tin wéeteloʼ ku túuxtikoʼobteʼex saludos.
22 Tuláakal le máaxoʼob santoʼoboʼ, maases le yanoʼob tu yotoch Césaroʼ,+ ku túuxtikoʼobteʼex saludos.
23 Ka yanak ta wéeteleʼex u nojoch utsil Yuumtsil Jesucristo tu yoʼolal le maʼalob tuukul yaanteʼexoʼ.
