Hebreos 12:1-29
12 Le yaʼabkach máakoʼobaʼ beyoʼob junpʼéel múuyal yaan t-baʼpacheʼ. Letiʼobeʼ ku yeʼeskoʼob jach jaaj le baʼaxoʼob tsʼoʼok u yuʼubikoʼob yéetel tsʼoʼok u yilkoʼoboʼ. Le oʼolaleʼ koʼoneʼex luʼsik tiʼ toʼon tuláakal le baʼaloʼob jeʼel u aalkúuntik k-kuuchoʼ bey xan le kʼeban séeb jeʼel u beetik k-lúubuloʼ,+ utiaʼal beyoʼ ka chúukpajak k-óol áalkab teʼ bej yaan táanil tiʼ toʼonoʼ.+
2 Le táan k-beetik lelaʼ unaj k-chʼikik k-paakat tiʼ Jesús, le Máax nuʼuktik k-fe yéetel beetik u chúukaʼantal le fe yaantoʼonoʼ.+ Jesúseʼ u yojel yaan baʼax kun beetik u kiʼimaktal u yóol, le oʼolal chúukpaj u yóol muʼyaj le ka tsʼaʼab tu cheʼil le muʼyajoʼ.* Letiʼeʼ maʼ tu beetaj u cuentail wa suʼtsil le baʼax beetaʼabtiʼoʼ le oʼolal bejlaʼeʼ tsʼoʼok u kutal tu x-noʼoj u trono Dios.+
3 Utiaʼal túun maʼ a kaʼanaleʼex yéetel maʼ u lúubul a wóoleʼexeʼ tuukulneneʼex tiʼ le máax tsʼoʼok u chúukpajal u yóol u muʼyajt le baʼax ku yaʼalik le j-kʼeban máakoʼoboʼ,+ le máaxoʼob ku bin kʼaasil tiʼob yoʼolal le baʼax ku yaʼalikoʼoboʼ.+
4 Teʼexeʼ táan a baʼateleʼex tu contra le kʼeban jeʼeloʼ chéen baʼaleʼ maʼ kʼuchkeʼex tak kíimil tu yoʼolaliʼ.
5 Teʼex xaneʼ tsʼoʼok a tuʼubsikeʼex le baʼax ku sen aʼalikteʼex Dios jeʼex u beetik juntúul taatatsileʼ, letiʼeʼ tsʼoʼok u yaʼalik: «In paal, kʼam baʼax ku yaʼaliktech Jéeoba, yéetel maʼ u lúubul a wóol le kéen u tojkíint a beel.
6 Tumen Jéeobaeʼ ku tsolik u nuʼuk tiʼ máax u yaabiltmaj, yéetel ku castigartik tuláakal le máaxoʼob ku kʼamik bey u paalaloʼ».+
7 Teʼexeʼ kʼaʼabéet u chúukpajal a wóoleʼex muʼyaj, tumen leloʼ táakaʼan ichil le kaʼansaj ku tsʼaʼabalteʼexoʼ. Dioseʼ ku yilkeʼex bey u paalaleʼexeʼ.+ Tumen tuláakal taatatsileʼ ku tsolik u nuʼuk tiʼ u paalal yéetel ku castigarkoʼob.+
8 Chéen baʼaleʼ wa maʼ tu tsʼáajteʼex Dios junpʼéel kaʼansaj beyoʼ u kʼáat u yaʼaleʼ maʼ jach u paalaleʼex túuniʼ, baʼaxeʼ chéen u máatan paalaleʼex.
9 Le k-taataʼob yanoʼob way luʼumeʼ suuk kaʼach u tsolkoʼob k-xikin yéetel u castigarkoʼonoʼob, toʼon xaneʼ suuk k-respetarkoʼob. Le oʼolaleʼ maas yéetel kiʼimak óolal kʼaʼabéet k-tsʼáaikba yáanal u páajtalil le k-Taata yéeyoʼon yéetel u espíritu santooʼ, utiaʼal beyoʼ ka páajchajak k-kuxtal.+
10 K-taataʼobeʼ tu tsoloʼob k-xikin yéetel tu castigartoʼonoʼob jeʼex tu tukloʼob maʼalobeʼ, lelaʼ tu beetoʼob chéen ichil junpʼíit kʼiinoʼob, chéen baʼaleʼ Dioseʼ ku beetik utiaʼal k-utsil, utiaʼal beyoʼ ka pʼáatkoʼon santoil jeʼex letiʼeʼ.+
11 U jaajileʼ mix junpʼéel castigo ku kiʼimakkúuntik u yóol máak, baʼaxeʼ ku beetik u yaatal u yóol máak.* Chéen baʼaleʼ le máaxoʼob ku kaanbaloʼob tiʼ le castigooʼ kéen tsʼoʼokkeʼ ku yantal jeetsʼelil tiʼob tu yoʼolal le toj kuxtal ku biskoʼoboʼ.
12 Le oʼolaleʼ tsʼáaʼex u muukʼ le kʼaboʼob minaʼan u muukʼoʼoboʼ bey xan le píixoʼob luubul u muukʼoʼoboʼ,+
13 yéetel seguernak a táaxkuntikeʼex le bejoʼob tuʼux ka xíimbaleʼexoʼ,+ utiaʼal maʼ u maas yúuchul loob tiʼ le máax yaachajaʼan u yookoʼ, baʼaxeʼ ka utsak.
14 Ilawileʼex ka yanakteʼex jeetsʼelil yéetel tuláakal máak,+ yéetel ilawil a biskeʼex junpʼéel kuxtal limpio.+ Tumen máax maʼ tu yantaltiʼ junpʼéel kuxtal beyaʼ maʼ tu páajtal u yilik Yuumtsil.
15 Jach ilawileʼex ka kʼaʼamak u nojoch utsil Dios tumen tuláakal máak, mix máak unaj u pʼáatal maʼ u kʼamik. Jach kanáanteʼex maʼ u yantal mix junpʼéel moots yaan u veneno jeʼel u taasik problemas yéetel jeʼel u kʼaskúuntik wa máax ichileʼexeʼ.+
16 Ilawileʼex xan maʼ u yantal mix máak ichileʼex ku núupkʼebantal,* yéetel maʼ u yantal mix máak maʼ u yaabiltmaj le baʼaloʼob santoʼoboʼ jeʼex úuchik u beetik Esaúeʼ. Letiʼeʼ chéen tu yoʼolal junpʼéel janaleʼ tu síiaj le derecho yaantiʼ bey yáax hijooʼ.+
17 Jeʼex a wojlileʼexoʼ le ka tu kʼáataj ka bendecirtaʼakeʼ maʼ óotaʼab bendecirbiliʼ, yéetel kex sen okʼolnaj+ utiaʼal u yilik u kʼeʼexel le baʼax tsʼoʼok u yáax aʼalaʼaloʼ* maʼ páajchaj u kʼexikiʼ.
18 Teʼexeʼ mix juntéen a natsʼabaʼex tiʼ junpʼéel montaña jeʼel u páajtal u maʼachleʼ,+ junpʼéel montaña táan u tóochʼbal u kʼáakʼil,+ yaan junpʼéel box múuyal tu yóokʼol, yaan éeʼjochʼeʼeniliʼ bey xan junpʼéel kʼaʼamkach iikʼ.+
19 Maʼ ta wuʼuyeʼex xan u kʼaʼamkach juum trompeta+ teʼ montañaoʼ, mix ta wuʼuyeʼex baʼax aʼalaʼab+ le ka úuch tʼaan desde teʼ kaʼanoʼ. Le máaxoʼob uʼuy le baʼax aʼalaʼaboʼ tu kʼáat óoltoʼob ka xuʼuluk u tʼaʼanloʼob.+
20 Letiʼobeʼ jach sajakchajoʼob yoʼolal le baʼax aʼalaʼabaʼ: «Tak juntúul baʼalcheʼ ka kóojok tiʼ le montañaoʼ, kʼaʼabéet u muruxtuntaʼal».+
21 Le baʼax úuchoʼ jach tu beetaj u sajaktal le máakoʼob yanoʼoboʼ, tak Moiséseʼ tu yaʼalaj: «Jach táaj saajken yéetel táan in kikilankil».+
22 Chéen baʼaleʼ teʼexeʼ tsʼoʼok a náatsʼleʼex teʼ Montaña Sión+ yéetel tiʼ le kaʼanilbeʼen Jerusalénoʼ,+ junpʼéel kaaj tiaʼalintaʼan tumen le kuxaʼan Diosoʼ. Tsʼoʼok xan a náatsʼleʼex tiʼ le u milesil ángeloʼob
23 u láaj muchʼmubaʼoboʼ,+ tiʼ le u yáax paalaloʼob Dios tsʼíibtaʼan u kʼaabaʼob teʼ kaʼanoʼ, tiʼ Dios u Juezil tuláakal máak+ bey xan tiʼ le kuxtal kun antal tiʼ le máaxoʼob toj u kuxtaloʼob+ yéeyaʼanoʼob yéetel u espíritu santooʼ.+
24 Tsʼoʼok xan a náatsʼleʼex tiʼ Jesús u mediadoril*+ le túumben pactooʼ+ bey xan tiʼ le kʼiʼikʼ wiʼiwitsʼaʼan ku tʼaan tiʼ baʼaloʼob maas maʼalobtak ke u kʼiʼikʼel Abeloʼ.+
25 Ilawileʼex maʼ u xuʼulul a wuʼuyikeʼex u tʼaan le máax ku tʼaan desde teʼ kaʼanoʼ. Tumen wa maʼ púutsʼ le máaxoʼob xuʼul u yuʼubikoʼob u tʼaan le máax aʼalik baʼax ken u beet Dios tiʼ le yóokʼol kaaboʼ, toʼoneʼ maas maʼ ken k-púutsʼul wa k-náachtal tiʼ le máax ku tʼaan desde teʼ kaʼanoʼ.+
26 Teʼ kʼiin jeʼeloʼ le ka tʼaanaj Dioseʼ tu tíituba le luʼumoʼ,+ chéen baʼaleʼ beoraaʼ letiʼeʼ tsʼoʼok u yaʼalik: «Yaan in beetik u tíitkuba tu kaʼatéen, chéen baʼaleʼ maʼ chéen le luʼumoʼ tak le kaʼanoʼ».+
27 Bey túunoʼ le kéen u yaʼal «tu kaʼatéenoʼ» u kʼáat u yaʼaleʼ Dioseʼ yaan u luʼsik le baʼaloʼob tu tíitubaʼoboʼ, baʼaloʼob maʼ letiʼ beetmiliʼ, utiaʼal beyoʼ ka pʼáatak le baʼaloʼob mix juntéen tíitaʼakoʼoboʼ.
28 Toʼoneʼ yaan k-kʼamik junpʼéel Reino maʼ tu páajtal u péeksaʼal, le oʼolaleʼ unaj k-ilik maʼ u xuʼulul k-kʼamik u nojoch utsil Dios, utiaʼal beyoʼ ka páajchajak k-meyajtik jeʼex uts tu tʼaaneʼ, yéetel saajkilil bey xan yéetel respeto.
29 Tumen k-Dioseʼ bey junpʼéel kʼáakʼ ku tóokik tuláakal baʼaleʼ.+
Notas
^ Ilawil «U cheʼil muʼyaj», página 2584.
^ Wa «ku beetik u suʼlaktal máak».
^ Ilawil página 2573.
^ Lelaʼ u kʼáat u yaʼaleʼ u kʼexik le baʼax tu yaʼalaj u papáoʼ.
^ Ilawil página 2571.
