Hebreos 6:1-20
6 Toʼoneʼ tsʼoʼok k-kanik le yáax baʼaloʼob unaj u kaʼanal+ tiʼ Cristooʼ, chéen baʼaleʼ maʼ tiʼ unaj k-náakliʼ, unaj u seguer k-kaanbal utiaʼal ka yiijchajak k-tuukul.+ Maʼ unaj k-tsʼáaik junpʼéel chuunpakʼ tu kaʼatéen ikil u kaʼa káajal k-kanik baʼaloʼob jeʼex leloʼobaʼ: u kʼexik u tuukul máak utiaʼal u xuʼulul u beetik baʼaloʼob chéen kuneltak, u tsʼáaik u fe máak tiʼ Dios,
2 u kaʼansajil le okjaʼoʼ, u tsʼáaik u kʼab máak yóokʼol wa máax,+ u kaʼansajil u kaʼa kuxkíintaʼal le kimenoʼoboʼ+ bey xan u kaʼansajil le u tsʼook juiciooʼ.
3 Yéetel u yáantaj Dioseʼ yaan u yiijtal k-tuukul.
4 Tumen le máaxoʼob maʼ tu yóotaj u kʼamoʼob le maʼalob kaʼansajoʼ+ maʼ tu páajtal u kʼeʼexel u tuukuloʼob. Tiʼ letiʼobeʼ tsʼaʼab le sáasiloʼ, tsʼaʼabtiʼob le siibal ku taal teʼ kaʼanoʼ yéetel tsʼaʼabtiʼob espíritu santo.
5 Tiʼ letiʼobeʼ tsʼaʼab u yojéeltoʼob le jach maʼalob kaʼansaj ku taal tiʼ Diosoʼ yéetel tu yiloʼob le baʼaloʼob maʼalobtak* ku taal u kʼiinoʼ.*
6 Chéen baʼaleʼ junpuliʼ maʼ tu páajtal u yáantaʼaloʼob,+ tumen letiʼobeʼ ku kaʼa bajkoʼob u Paal Dios tu cheʼil le muʼyajoʼ yéetel ku pʼatkoʼob ich suʼtsilil tu táan le máakoʼoboʼ.+
7 Le baʼax ku yúuchloʼ bey jeʼex le baʼax ku yúuchul tiʼ le luʼum ku tsʼuʼutsʼik le jaʼ ku sen kʼáaxal tu yóokʼoloʼ. Le luʼumoʼ unaj u beetik u yantal u yich le paakʼaloʼob utiaʼal le máaxoʼob meyajtikoʼ. Le luʼum beyoʼ bendecirtaʼan tumen Dios.
8 Chéen baʼaleʼ wa le luʼum ku beetik u jóokʼol kʼiʼixoʼob yéetel kʼaakʼas xíiwoʼobeʼ yaan u xúumpʼattaʼal yéetel yaan u kʼuchul u kʼiinil u maldecirtaʼal, tu tsʼookeʼ ku tóokaʼal.
9 Chéen baʼaleʼ, sukuʼuneʼex, kex táan k-tʼaan tiʼ le baʼaloʼobaʼ toʼoneʼ k-ojel de ke teʼexeʼ jach maʼalob yanileʼex tu táan Dios, le oʼolal yaan a salvartaʼaleʼex.
10 Tumen Dioseʼ maʼ kʼasaʼan utiaʼal ka u tuʼubs le meyaj ta beeteʼexoʼ mix le yaabilaj ta weʼeseʼex tu yoʼolal u kʼaabaʼoʼ,+ tumen teʼexeʼ ta wáanteʼex le máaxoʼob santoʼoboʼ yéetel láayliʼ táan a wáantkeʼexoʼobeʼ.
11 Chéen baʼaleʼ k-tsʼíiboltikeʼ bey ka seguernak a beetkeʼex tak tu xuuloʼ,+ utiaʼal beyoʼ ka a wileʼex jach tu jaajil yaan u tsʼaʼabalteʼex le baʼax ka páaʼtkeʼexoʼ.+
12 Wa ka beetkeʼex beyoʼ maʼ kan maʼakʼóoltaleʼex,+ baʼaxeʼ yaan a pʼáatleʼex jeʼex le máaxoʼob tu yeʼesoʼob yaan u fejoʼob yéetel tu páaʼtoʼob u béeytal le baʼax aʼalaʼabtiʼob tumen Diosoʼ.
13 Dioseʼ le ka tu beetaj junpʼéel promesa tiʼ Abraháneʼ jurarnaj tu yoʼolal letiʼ mismo tumen minaʼan mix máak maas nojoch ke letiʼ.+
14 Letiʼeʼ tu yaʼalaj: «Jach tu jaajil yaan in bendecirkech yéetel jach tu jaajil yaan in beetik u yaʼabtal a paalal».+
15 Ka tsʼoʼok túun u yeʼesik Abrahán jach chúukaʼan u yóol u páaʼt le baʼax aʼalaʼabtiʼoʼ, tsʼaʼab le promesa tiʼoʼ.
16 Le wíinikoʼoboʼ kéen jurarnakoʼobeʼ ku chʼaʼchiʼitkoʼob u kʼaabaʼ juntúul máax maas nojoch ke letiʼob. Le kéen u beetoʼob beyaʼ ku xuʼulul u baʼateloʼob, tumen utiaʼaloʼobeʼ jach tu jaajil junpʼéel garantía leloʼ.+
17 Bey túun xanoʼ Dioseʼ tu beetaj junpʼéel juramento utiaʼal u yeʼesik tiʼ le máaxoʼob kun tiaʼalintik le promesa+ de ke maʼ tu kʼexpajal le baʼax u chʼaʼtukultmaj u beetkoʼ.
18 Le juramento yéetel le promesaoʼ yaan u yáantkoʼon utiaʼal maʼ u xuʼulul k-machikba tubeel tiʼ le baʼax k-páaʼtikoʼ, tumen toʼoneʼ tsʼoʼok k-púutsʼul utiaʼal k-bin teʼ lugar tuʼux ku kanáantaʼal máakoʼ. Dioseʼ junpuliʼ maʼ tu páajtal u tuus,+ tumen le baʼax ku jurartik yéetel ku prometerkoʼ junpuliʼ maʼ tu kʼexpajal.
19 Le baʼax k-páaʼtikoʼ+ bey junpʼéel ancla* utiaʼal k-kuxtaleʼ, tumen jach jeetsʼel yanil yéetel maʼ tu kʼexpajal. Tsʼoʼoleʼ le esperanzaaʼ ku beetik k-okol paachil tiʼ le cortina yaan ichil le templooʼ.+
20 Teʼeloʼ Jesús yáax ookiʼ, letiʼeʼ ook utiaʼal u jeʼekʼabtiktoʼon u bejil utiaʼal ka ookkoʼon xaniʼ.+ Jesúseʼ letiʼe máax tsʼoʼok u tsʼaʼabal u beet u maas nojoch sacerdoteil utiaʼal mantatsʼ jeʼel bix Melquisedekeʼ.+
Notas
^ Ich griegoeʼ ku yaʼalaʼal kaʼach «páajtaliloʼob».
^ Wa «tu yiloʼob le túumben yóokʼol kaab kun antaloʼ».
^ Junpʼéel nuʼukul ku meyaj tiʼ le marineroʼoboʼ. Lelaʼ ku kʼaʼaxal tiʼ junpʼéel cadena wa tiʼ junpʼéel suum, yéetel ku jalkʼesaʼal ichil le jaʼ utiaʼal maʼ u bisaʼal le barco tumen le iikʼoʼ.
