Job 2:1-13
2 Ka kʼuch u kʼiinil u kaʼa muchʼkuba le ángeloʼob* tu táan Jéeoba,+ u jaajil Diosoʼ,+ tak Satanás ook ichiloʼob utiaʼal u yantal xan tu táan Jéeoba.+
2 Jéeoba túuneʼ tu yaʼalaj tiʼ Satanás: «¿Tuʼux a taal?». Satanáseʼ tu núukaj tiʼ Jéeoba: «Taalen in láaj xíimbalt le yóokʼol kaab utiaʼal in wilik baʼaxoʼob ku yúuchliʼ».+
3 Jéeoba túuneʼ tu yaʼalaj tiʼ Satanás: «¿Máasaʼ tsʼoʼok a wilik bix u kuxtal Job? Minaʼan uláakʼ máak jeʼex letiʼ teʼ luʼumoʼ. Letiʼeʼ yaantiʼ junpʼéel toj kuxtal yéetel chúuka’an u yóol u beet baʼax maʼalob,+ ku meyajtiken yéetel ku náachkuntkuba tiʼ baʼax kʼaas. Letiʼeʼ láayliʼ chúukaʼan u yóol u meyajteneʼ.+ Techeʼ taak a woksik tin pool ka in xuʼulstiʼ+ kex minaʼan baʼax oʼolal in beetik».
4 Satanás túuneʼ tu núukaj tiʼ Jéeoba: «Wa ka u yil máak jach nukaʼaj kíimileʼ jeʼel u tsʼáaik tuláakal baʼax yaantiʼ utiaʼal u salvartik u kuxtaleʼ.
5 Líiʼs a kʼab utiaʼal a loobiltik u wíinklil ka a wil wa maʼ tu yaʼaliktech baʼal tu táan a wich».+
6 Jéeoba túuneʼ tu yaʼalaj tiʼ Satanás: «Maʼalob, kin pʼatik ta kʼab. Pero ¡bik xiʼikech a kíimse!».
7 Ka tu yuʼubaj Satanás leloʼ lukʼ tu táan Jéeobaeʼ ka tu beetaj u jóokʼol nukuch llagaʼob+ tu wíinklil Job, desde tu pool tak tu táan u yook.
8 Job túuneʼ bin kutal yóokʼol taʼaneʼ ka tu chʼaʼaj junxéetʼ jarro* de kʼat utiaʼal u laʼachtik u wíinklil.+
9 Ka tsʼoʼokeʼ aʼalaʼabtiʼ tumen u yatan: «¿Baʼaxten láayliʼ chúukaʼan a wóoleʼ? ¡Maldecirt Dioseʼ ka kíimkech!».
10 Chéen baʼaleʼ letiʼeʼ tu yaʼalajtiʼ: «Táan a tʼaan jeʼex le koʼoleloʼob minaʼan u naʼatoʼoboʼ. ¿Yaan wa k-kʼamik chéen le baʼaloʼob maʼalobtak ku taal tiʼ u jaajil Diosoʼ, pero maʼ ken k-kʼam le baʼaloʼob maʼ maʼalobtakoʼ?».+ Kex úuch tiʼ Job tuláakal le baʼaloʼobaʼ maʼ kʼebanchaj mix yéetel u chiʼiʼ.+
11 Óoxtúul máakoʼob u kʼaj óoloʼob Jobeʼ, le ka tu yojéeltoʼob le baʼaxoʼob tsʼoʼok u sen úuchultiʼoʼ, tu chʼaʼtuklaj u lukʼloʼob tuʼux kajaʼanoʼob utiaʼal u bin u láakʼintoʼob bey xan utiaʼal u líiʼskoʼob u yóol. Juntúuleʼ Elifaz,+ letiʼeʼ Temán u taal, uláakʼ juntúuleʼ Bildad,+ letiʼeʼ tiʼ u paalal Suaj+ u taal, u tsʼook juntúuleʼ Zofar,+ letiʼeʼ naamatita.
12 Ka tu yiloʼob Job desde náacheʼ maʼ tu kʼaj óoltoʼobiʼ. Pero ka kʼuchoʼob tu yiknaleʼ joʼopʼ u yawat okʼoloʼob, tu jataj u nookʼoʼob yéetel tu puloʼob luʼum kaʼanal utiaʼal ka kʼíitik tu pooloʼob.+
13 Tsʼoʼoleʼ ka kulajoʼob tu yiknal Job siete kʼiinoʼob yéetel siete áakʼaboʼob. Chéen baʼaleʼ mix juntúul tiʼ letiʼob tʼaanajiʼ tumen tu yiloʼob jach yaj baʼax ku muʼyajtik.*+
