Job 21:1-34
21 Job túuneʼ tu yaʼalaj:
2 «Jach uʼuyeʼex baʼax ken in waʼale,tumen beyoʼ jeʼel a líiʼskeʼex in wóoleʼ.
3 Páaʼteʼex u tsʼoʼokol in tʼaan,le kéen tsʼoʼokkeʼ jeʼel u béeytal a burlarkabaʼex tiʼ teneʼ.+
4 Maʼ tu táan juntúul máak kin quejarkinbaiʼ,wa tu táaneʼ bejlaʼa tsʼoʼok u náakal in wóoleʼ.
5 Wa ka a pakteneʼexeʼ yaan u jaʼakʼal a wóoleʼex,hasta yaan a pixkeʼex a chiʼex yéetel a kʼabeʼex.
6 Teneʼ kin sajaktal le kéen tuukulnaken tiʼ baʼaxoʼob ku yúuchul,tuláakal in wíinklileʼ ku xiʼixmukuytal.
7 ¿Baʼaxten le kʼasaʼan máakoʼoboʼ maʼ tu jáan kíimloʼob,+ku yúuchbentaloʼob yéetel ku ayikʼaltaloʼob?+
8 U paalaloʼobeʼ mantatsʼ tiaʼanoʼob tu yiknaloʼobeʼ,tak u yáabiloʼob ku yilkoʼob.
9 Yaan jeetsʼelil ichil u yotochoʼob, mix baʼal sajakkúuntkoʼob,+tsʼoʼoleʼ maʼ tu castigartaʼaloʼob tumen Dios.
10 Le toroʼob yaantiʼoboʼ jach maʼalob sementaloʼob,le vacaʼob xanoʼ maʼatech u fallar u yantal u mejniloʼob.
11 U mejen paalaloʼobeʼ ku máan u yáalkaboʼob táankab jeʼex le tamanoʼoboʼ,u paalaloʼobeʼ ku máan u síitʼoʼob.
12 Ku kʼaayoʼob le kéen paʼaxak le pandereta yéetel le arpaoʼ,ku kiʼimaktal xan u yóoloʼob le kéen u yuʼuboʼob u paʼaxal le flautaoʼ.+
13 Le kʼasaʼan máakoʼoboʼ kiʼimak u yóoloʼob tuláakal u kʼiinil u kuxtaloʼob,tak le jach táan u binoʼob teʼ Muknaloʼ* maʼatech u muʼyajoʼob.
14 Kex beyoʼ ku yaʼalikoʼob tiʼ u jaajil Dios: ‹¡Náachkuntaba tiʼ toʼon!
Toʼoneʼ maʼ taak k-kʼaj óoltik a beeloʼobiʼ.+
15 ¿Baʼaxten unaj k-meyajtik Dios?*+
¿Yaan wa utsil jeʼel u taasiktoʼon k-kʼaj óoltikeʼ?›.+
16 Teneʼ in wojleʼ le kʼasaʼan máakoʼoboʼ maʼ tu kʼaboʼob yaan u jóokʼol maʼalobil tuláakal baʼax ku beetkoʼobiʼ.+
Teneʼ junpuliʼ maʼ tin tuukul jeʼex letiʼoboʼ.+
17 ¿Jaytéen a wileʼex u tuʼupul le sáasil yaan tiʼ le kʼasaʼan máakoʼoboʼ?+
¿Jaytéen a wileʼex u yúuchul loob tiʼob?
¿Jaytéen a wileʼex u xuʼulsaʼaltiʼob le kéen pʼuʼujuk Dios?
18 ¿Jaytéen a wileʼex u pʼáatloʼob bey sojol ku bisaʼal tumen iikʼeʼ?
¿Jaytéen a wileʼex u pʼáatloʼob bey tikin suʼuk ku bisaʼal tumen kʼaʼamkach iikʼeʼ?
19 Le castigo unaj u tsʼaʼabal tiʼ le kʼasaʼan máakoʼ tiʼ u paalal kun tsʼaabil.
Pero maʼalob ka castigartaʼak le kʼasaʼan máak tumen Diosoʼ, beyoʼ yaan yuʼubik xan.+
20 Ka u yil bix u perdertik tuláakal baʼax yaantiʼ,ka u yuʼub bix u pʼuʼujul le Máax jach táaj yaan u poderoʼ.+
21 ¿Jeʼel wa u páajtal u chiʼichnaktal yoʼolal baʼax kun úuchultiʼ u paalal wa ku téek kíimileʼ?+
22 ¿Yaan wa máax jeʼel u kaʼansik wa baʼax tiʼ Dios,+wa letiʼ juzgartik tak le nukuch tsʼuuloʼoboʼ?+
23 Yaan máakeʼ láayliʼ jach yaan u muukʼ le kéen horachajak u kíimileʼ,+teʼ kʼiin jeʼeloʼ láayliʼ maʼalob yanileʼ yéetel mix baʼal chiʼichnakkúuntik,+
24 poloktak u muukʼ u yookoʼobyéetel muʼukʼaʼantak u baakeloʼob.
25 Yaan máak xaneʼ ku sen muʼyaj antes tiʼ u kíimil,jach mix juntéen tu disfrutartaj baʼaloʼob maʼalobtak.
26 Kex beyoʼ tu kaʼatúulaloʼob kun binoʼob tu tsʼuʼ luʼum,+tu kaʼatúulal kun jaantbil tumen x-nookʼol.+
27 ¡Ilawileʼex! Teneʼ jach in wojel baʼax ka tuklikeʼex,in wojel le baʼaloʼob kʼaastak ka tuklikeʼex tin woʼolaloʼ.+
28 Teʼexeʼ ka waʼalikeʼex: ‹¿Tuʼux tsʼoʼok u yotoch le máak jach ayikʼaleʼ?
¿Tuʼux tsʼoʼok u yotoch le máak jach kʼasaʼaneʼ?›.+
29 Kʼáateʼex tiʼ le máakoʼob tsʼoʼok u máanoʼob tiʼ yaʼabkach kaajoʼoboʼ,yéetel jach uʼuyeʼex baʼax ku tsikbaltikoʼob, letiʼobeʼ ku yaʼalikoʼobeʼ
30 le kéen taalak junpʼéel nojoch loobileʼ mix baʼal ku yúuchul tiʼ le kʼasaʼan máakoʼ,yéetel ku salvarkuba tu kʼiinil u pʼuʼujul Dios.
31 ¿Máax kun waʼatal tu táan le kʼasaʼan máak utiaʼal u yeʼesiktiʼ le baʼax maʼ maʼalob u beetmoʼ?
¿Máax kun boʼotiktiʼ le baʼax u beetmoʼ?
32 Le kéen bisaʼak cementerioeʼ,yaan máax kun pʼáatal kanáantik le tuʼux kun mukbiloʼ.
33 Chʼujuk ken u yuʼubil le luʼum pixmiloʼ.+
Tuláakal wíinikeʼ yaan xan u bin tu paach teʼ muknaloʼ,+jeʼex le yaʼabkach máakoʼob tsʼoʼok u kíimloʼob antes tiʼ letiʼoʼ.
34 Le oʼolaleʼ mix baʼal u biilal le baʼaxoʼob ka waʼalikeʼex utiaʼal a líiʼskeʼex in wóoloʼ.+
¡Chéen tuus ka beetkeʼex!».
