Job 5:1-27
5 Tʼaanen ka a wil wa yaan máax kun núukiktech.
¿Máakalmáak tiʼ le ángeloʼob ken a tʼanoʼ?
2 Le máax minaʼan u naʼatoʼ u pʼujaʼanil kun kíimsik.
Le máax ku tsʼíiboltik baʼax yaan tiʼ u maasileʼ u tsʼíibolal kun kíimsik.
3 Tsʼoʼok in wilik ku bin utsil tiʼ le máax minaʼan u naʼatoʼ,pero chéen de repente ken maldecirtaʼak u yotoch.
4 U paalaleʼ mix máak áantkoʼob,ku pechʼ óoltaʼaloʼob tu joonajil le kaajoʼ,+ mix máak salvarkoʼob.
5 Le baʼax u pakʼmoʼ ku jaantaʼal tumen le máax wiʼijoʼ,tak le yaan ich kʼiʼix ku chʼaʼabaltiʼoʼ.
Tuláakal baʼax yaantiʼeʼ ku chʼaʼabal tumen yaanal máak.
6 Le baʼaloʼob kʼaastakoʼ maʼ teʼ luʼum ku jóokʼloʼoboʼ.
Le baʼaxoʼob xan ku beetik u muʼyaj máakoʼ maʼ teʼ luʼum u taaloʼoboʼ.
7 U chispasil kʼáakʼeʼ mantatsʼ kaʼanal ku bin,le kéen síijik máak xaneʼ mantatsʼ utiaʼal muʼyaj.
8 Wa teneʼ jeʼel in kʼáatik u yáantaj Dioseʼ,yéetel jeʼel in pʼatik tu kʼab baʼax ku yúuchulteneʼ.
9 Jeʼel in kʼáatik áantaj tiʼ le Máax beetik nukuch baʼaloʼob maʼ tu páajtal u naʼatik máakoʼ,kiʼichkelem baʼaloʼob maʼ tu páajtal u xoʼokloʼob.
10 Letiʼ beetik u kʼáaxal jaʼ yóokʼol kaab,yéetel letiʼ túuxtik jaʼ yóokʼol le luʼumoʼ.
11 Letiʼeʼ ku líiʼsik le máax óotsiloʼ,yéetel ku salvartik le máax yaachajaʼan u yóoloʼ.
12 Letiʼeʼ maʼ tu chaʼik u jóokʼol le kʼasaʼan máak yéetel le baʼax ku tuklikoʼ,maʼ tu chaʼik u béeytal le baʼax ku tuklik u beetkoʼ.
13 Le baʼax ku tuklik u beetik le kʼasaʼan máakoʼ, ku beetaʼal u suut tu yóokʼol tumen Dios,+maʼ tu chaʼabal u béeykuntik le baʼax u tukultmoʼ.
14 Kex de kʼiineʼ, éeʼjochʼeʼen utiaʼal le kʼasaʼan máakoʼoboʼ.
Kex chúumuk kʼiineʼ ku máan u tatalkʼaboʼob bey de áakʼabeʼ.
15 Dioseʼ ku salvartik máak tiʼ le kʼasaʼan máakoʼob ku meyaj u yaakʼoʼob bey junpʼéel espadaoʼ.
Ku salvartik le máax óotsil tiʼ u kʼab le máax yaan u páajtaliloʼ.
16 Le oʼolal yaan esperanza tiʼ le máax óotsiloʼ,pero le kʼasaʼan máakoʼoboʼ yaan u maʼakal u chiʼob.
17 ¡Kiʼimak u yóol le máax ku tsoʼolol u nuʼuk tiʼ tumen Diosoʼ!
Le oʼolaleʼ kʼam baʼax ku yaʼaliktech le Máax jach táaj yaan u poderoʼ.
18 Tumen letiʼ beetik u yúuchul loob tiʼ máak, pero letiʼ xan toʼik tuʼux yaj.
Letiʼ beetik u yúuchul wa baʼax tiʼ máak, pero letiʼ xan tsʼakik.
19 Letiʼeʼ yaan u salvarkech tiʼ jeʼel baʼaxak jeʼel u beetiktech loobeʼ,kex seis wa siete u pʼéelal ka taalak ta wóokʼoliʼ.
20 Tu kʼiinil wiʼijileʼ maʼ ken u chaʼa a kíimil.
Tu kʼiinil baʼateleʼ yaan u salvarkech tiʼ u páajtalil le espadaoʼ.
21 Yaan u salvarkech tiʼ le chiʼ ku yaʼalik baʼaloʼ,+yéetel maʼ kan sajaktal kéen taalak le baʼax jeʼel u beetik looboʼ.
22 Yaan a cheʼej kéen taalak wiʼijil yéetel xuʼulsajil,yéetel maʼ kan sajaktal tiʼ le tsʼíitsʼik baʼalcheʼoboʼ.
23 Mix junpʼéel tuunich ken u beettech loob,mix tak u tsʼíitsʼik baʼalcheʼiloʼob kʼáax ken u beetoʼobtech loob.
24 Mix baʼal ken u beettech loob* ta wotoch,yéetel mix juntúul tiʼ a waalakʼoʼob ken u binelte.
25 Yaan u yantal yaʼab a paalal,yaan xan u yaʼabtal a wáabiloʼob jeʼex le xíiwoʼoboʼ.
26 Le kéen kʼuchuk u kʼiinil a kíimileʼ, láayliʼ yaan a muukʼeʼ,jeʼex le trigo maʼalob waʼalik kéen kʼuchuk u kʼiinil u cosechartaʼaloʼ.
27 Tuláakal lelaʼ tsʼoʼok k-ilik jach jaaj,le oʼolaleʼ uʼuye yéetel kʼame».
Notas
^ Ich hebreoeʼ ku yaʼalaʼal kaʼach «u luʼs jeetsʼelil».
