Juan 10:1-42
10 «Jach tu jaajil kin waʼalikteʼex: le máax maʼ tu yokol tu jool u corral le tamanoʼob, baʼaxeʼ ku naʼakal yaanal tuʼux utiaʼal u yookleʼ juntúul j-ookol.+
2 Chéen baʼaleʼ le máax ku yokol tu jool le corraloʼ letiʼe j-kanan tamanoʼ.+
3 Tiʼ letiʼeʼ ku jeʼekʼabtaʼal le jool tumen le máax kanáantik le jooloʼ.+ Le tamanoʼob túunoʼ ku yuʼubikoʼob u juum u tʼaan.+ Le j-kanan tamanoʼ ku tʼankoʼob tu kʼaabaʼob yéetel ku jóoʼskoʼob teʼ corraloʼ.
4 Le kéen tsʼoʼokok u jóoʼsik u yalakʼ tamanoʼobeʼ ku bin táanil, le tamanoʼob túunoʼ ku binoʼob tu paach tumen u kʼaj óoloʼob bix u juum u tʼaan.
5 Letiʼobeʼ maʼ kun binoʼob tu paach juntúul máax maʼ u kʼaj óoloʼobiʼ, baʼaxeʼ yaan u púutsʼloʼobtiʼ tumen maʼ u kʼaj óoloʼob bix u juum u tʼaan yaanal máakoʼobiʼ».
6 Jesúseʼ tu tsikbaltajtiʼob lelaʼ, chéen baʼaleʼ letiʼobeʼ maʼ tu naʼatoʼob le baʼaxoʼob táan kaʼach u yaʼalaʼaltiʼoboʼ.
7 Le oʼolaleʼ Jesúseʼ tu yaʼalaj tu kaʼatéen: «Jach tu jaajil kin waʼalikteʼex: teen le joonaj tuʼux ku yokol le tamanoʼoboʼ.+
8 Teen le u jaajil j-kanan tamanoʼ, tuláakal le máaxoʼob tsʼoʼok u taaloʼob táan u yaʼalikoʼob letiʼob le u jaajil j-kanan tamanoʼ chéen j-ookoloʼob, chéen baʼaleʼ maʼ uʼuyaʼab u tʼaanoʼob tumen le tamanoʼoboʼ.
9 Teen le joonajoʼ, jeʼel máaxak ka okok teʼ joonajaʼ yaan u salvarkuba. Letiʼeʼ yaan u yokol, yaan u jóokʼol yéetel yaan u kaxtik suʼuk utiaʼal u jaante.+
10 Le j-ookoloʼ chéen ku taal utiaʼal ookol, utiaʼal kíimsaj yéetel utiaʼal xuʼulsaj.+ Teneʼ taalen utiaʼal ka yanakteʼex kuxtal yéetel utiaʼal ka yaʼabchajak u kʼiinil a kuxtaleʼex.
11 Teen le jach maʼalob j-kanan tamanoʼ.+ Le jach maʼalob j-kanan tamanoʼ ku kʼubik u kuxtal yoʼolal le tamanoʼoboʼ.+
12 Chéen baʼaleʼ le máax chéen ku boʼotaʼal utiaʼal ka u kanáant le tamanoʼoboʼ, tumen maʼ letiʼ u yuumiloʼob yéetel tumen maʼ u meyaj u kanáantik tamaneʼ, kéen u yil u taal le lobooʼ ku xúumpʼattik le tamanoʼoboʼ, ku púutsʼul. Le lobo túunoʼ ku kíimsik yaʼabiʼ yéetel ku kʼiʼitbesik u maasiloʼoboʼ.
13 Le máakoʼ ku púutsʼul tumen chéen boʼotbil u beetaʼal. Letiʼeʼ baʼax u kʼáajtiʼ ka úuchuk wa baʼax tiʼ le tamanoʼoboʼ.
14 Teen le jach maʼalob j-kanan tamanoʼ. Teneʼ in kʼaj óol in walakʼ tamanoʼob, letiʼobeʼ u kʼaj óolenoʼob xan.+
15 Bey xan u yúuchul yéetel le Taataoʼ, letiʼeʼ u kʼaj óolen yéetel teneʼ in kʼaj óol xan.+ Teen túuneʼ kin kʼubik in kuxtal tu yoʼolal le tamanoʼoboʼ.+
16 Yaan xan ten uláakʼ tamanoʼob minaʼanoʼob teʼ corralaʼ,+ yaan xan in taaskoʼob yéetel yaan u yuʼubikoʼob in tʼaan; yaan u pʼáatloʼob junmúuchʼ yéetel le jeʼeloʼobaʼ, yaan u pʼáatloʼob yáanal u kʼab juntúuliliʼ j-kanan taman.+
17 Le oʼolal u yaabiltmen le Taataoʼ,+ tumen kin kʼubik in kuxtal+ utiaʼal ka tsʼaʼabakten tu kaʼatéen.
18 Mix máak u luʼsten, baʼaxeʼ tu juunal in wóol kin kʼubik. Tsʼaʼanten u páajtalil in kʼubik yéetel tsʼaʼanten u páajtalil in kaʼa kʼamik.+ Lelaʼ letiʼe baʼax u kʼáat in Taata ka in beetoʼ».
19 Le judíoʼoboʼ pʼáat tu kaʼatéen maʼ junpʼéeliliʼ bix u tuukuloʼob+ yoʼolal le baʼaxoʼob tu yaʼalaj Jesúsoʼ.
20 Yaʼab tiʼ letiʼobeʼ káaj u yaʼalikoʼob: «Le máakaʼ okaʼan demonio tiʼ yéetel tsʼoʼok u chokotal u pool. ¿Baʼaxten ka wuʼuyikeʼex baʼax ku yaʼalik?».
21 Uláakʼ máakoʼobeʼ tu yaʼaloʼob: «Juntúul máak okaʼan demonio tiʼeʼ maʼatech u tʼaan beyaʼ. Tsʼoʼoleʼ juntúul demonioeʼ maʼ tu páajtal u tsʼáaik u sáasilil u yich le chʼóopoʼoboʼ, ¿máasaʼ?».
22 Teʼ kʼiinoʼob jeʼeloʼ tu kaajil Jerusaléneʼ táan kaʼach u kʼiinbesaʼal u kʼiinil úuchik u Kʼuʼubul le Templooʼ.* Teʼ kʼiinoʼob jeʼeloʼ u kʼiiniloʼob keʼel,
23 yéetel Jesúseʼ táan kaʼach u máan teʼ templo ichil u columnaʼob Salomónoʼ.+
24 Le judíoʼob túunoʼ tu baʼpachtoʼobeʼ ka joʼopʼ u kʼáatkoʼobtiʼ: «¿Tak baʼax kʼiin ken a waʼaltoʼon jach máaxech? Wa teech le Cristooʼ juntaatsʼ ka a waʼaltoʼon».
25 Jesúseʼ tu yaʼalajtiʼob: «Tsʼoʼok in waʼalikteʼex, chéen baʼaleʼ teʼexeʼ maʼ ta creerkeneʼex. Le baʼaxoʼob kin beetik tu kʼaabaʼ in Taataoʼ ku probartik jach máaxen.+
26 Chéen baʼaleʼ teʼexeʼ maʼ ta creerkeʼex tumen maʼ in walakʼ tamaneʼexiʼ.+
27 In walakʼ tamanoʼobeʼ ku yuʼubikoʼob in tʼaan, teneʼ in kʼaj óoloʼob yéetel ku taaloʼob tin paach.+
28 Teen túuneʼ yaan in tsʼáaik kuxtal minaʼan u xuul tiʼob,+ yéetel mix bikʼin kun xuʼulsbiltiʼob, tsʼoʼoleʼ mix máak kun tokikoʼob tin kʼab.+
29 Le baʼax tsʼoʼok u tsʼáaikten in Taataoʼ maas nojoch tiʼ u maasil baʼaloʼoboʼ, yéetel mix máak ku páajtal u tokikoʼob tu kʼab le Taataoʼ.+
30 Teen yéetel le Taataoʼ juntúuliliʼon».*+
31 Le judíoʼoboʼ tu kaʼa chʼaʼajoʼob tuunich utiaʼal u muruxtuntikoʼob.
32 Jesús túuneʼ tu yaʼalajtiʼob: «Yaʼab baʼaloʼob maʼalobtak ku taal tiʼ le Taata tin weʼesajteʼexoʼ. ¿Yoʼolal máakalmáak tiʼ le baʼaloʼob ken a muruxtunteneʼexaʼ?».
33 Ka núukaʼabtiʼ tumen le judíoʼoboʼ: «Maʼ tu yoʼolal junpʼéel baʼal maʼalob ken k-muruxtuntechiʼ, baʼaxeʼ tumen táan a pochʼik Dios,+ tumen techeʼ kex chéen wíinikecheʼ táan a taaskaba juntúul dios».
34 Jesúseʼ tu yaʼalajtiʼob: «¿Maʼ wa tsʼíibtaʼan teʼ Ley yaanteʼexoʼ: ‹Teneʼ tin waʼalaj: «Teʼexeʼ dioseʼex»›?+
35 Dioseʼ tu yaʼalaj ‹diosoʼob›+ tak tiʼ le máaxoʼob tʼaanaj tu contraʼoboʼ, tsʼoʼoleʼ le baʼax ku yaʼalik Diosoʼ maʼ tu páajtal u mixbaʼalkúuntaʼal.
36 Wa teen yéeyaʼanen yéetel túuxtaʼanen way yóokʼol kaab tumen le Taataoʼ, ¿baʼaxten túun ka waʼalikeʼex ‹táan a pochʼik Dios›, tumen tin waʼalaj u Paalen Dios?+
37 Wa maʼ tin beetik le baʼaxoʼob uts tu tʼaan in Taataoʼ maʼ a creerkeneʼex.
38 Chéen baʼaleʼ wa kin beetkeʼ, kex maʼ a creerkeneʼexeʼ, creerteʼex le baʼaxoʼob kin beetkoʼ.+ Bey túunoʼ yaan a wojéeltikeʼex yéetel yaan u pʼáatal ta tuukuleʼexeʼ le Taataoʼ junmúuchʼ yanil tin wéetel, teen xaneʼ junmúuchʼ yanilen yéetel le Taataoʼ».+
39 Le oʼolaleʼ le judíoʼoboʼ taakchaj u machkoʼob tu kaʼatéen, chéen baʼaleʼ púutsʼtiʼob.
40 Jesúseʼ bin tuláakʼ u tséel le Jordánoʼ, le tuʼux káaj u tsʼáaik okjaʼ Juanoʼ,+ ka túun pʼáat teʼeloʼ.
41 Ka taal yaʼabkach máakoʼob tu yiknaleʼ ka joʼopʼ u yaʼalikoʼob: «U jaajileʼ, Juaneʼ maʼ tu beetaj mix junpʼéel milagroiʼ, chéen baʼaleʼ jach jaaj tuláakal le baʼaxoʼob tu yaʼalaj yoʼolal le máakaʼ».+
42 Teʼ túunoʼ yaʼabkach máakoʼob tu tsʼáaj u fejoʼob tiʼ Jesús.
