Juan 8:12-59
8 12 Jesús túuneʼ tʼaanaj tu kaʼatéeneʼ ka tu yaʼalajtiʼob: «Teen u sáasilil yóokʼol kaab.+ Le máax ku taal tin paacheʼ mix bikʼin kun máan ich éeʼjochʼeʼenil, baʼaxeʼ yaan u tiaʼalintik le sáasil+ ku tsʼáaik kuxtaloʼ».
13 Le fariseoʼob túunoʼ tu yaʼaloʼobtiʼ: «Techeʼ ta juunal ka probartik máaxech, le beetkeʼ le baʼax ka waʼalik ta woʼolaloʼ maʼ jaajiʼ».
14 Jesúseʼ tu núukajtiʼob: «Kex tin juunal kin probartik máaxeneʼ le baʼax kin waʼalik tin woʼolaloʼ jach jaaj, tumen in wojel tuʼux taalen bey xan tuʼux kin bin.+ Chéen baʼaleʼ teʼexeʼ maʼ a wojleʼex tuʼux taaleniʼ mix tuʼux kin biniʼ.
15 Teʼexeʼ ka juzgareʼex jeʼex u beetik chéen wíinikeʼ,+ teneʼ mix máak kin juzgartik.
16 Chéen baʼaleʼ wa kin juzgareʼ teneʼ kin beetik jeʼex unajeʼ, tumen maʼ tin juunal yaneniʼ, baʼaxeʼ le Taata túuxtenoʼ tiʼ yaan tin wéeteleʼ.+
17 Tsʼoʼoleʼ tak teʼ Ley tsʼaʼanteʼexoʼ ku yaʼalik: ‹Wa kaʼatúul máakoʼob probartik junpʼéel wa baʼaxeʼ le baʼax ku yaʼalikoʼoboʼ jach jaaj›.+
18 Teneʼ kin probartik máaxen, le Taata túuxtenoʼ ku probartik xan máaxen».+
19 Ka túun tu kʼáatoʼobtiʼ: «¿Tuʼux yaan a Taata?». Jesúseʼ tu núukaj: «Teʼexeʼ maʼ a kʼaj óoleneʼexiʼ yéetel maʼ a kʼaj óoleʼex xan in Taataiʼ,+ tumen wa a kʼaj óoleneʼexeʼ bejlaʼa kaʼach a kʼaj óoleʼex xan in Taataeʼ».+
20 Tuláakal le baʼaloʼobaʼ tu yaʼalaj le waʼalakbal kaʼansaj teʼ templooʼ, teʼ tuʼux yaan u nuʼukulil tuʼux ku jalkʼesaʼal taakʼinoʼ.+ Chéen baʼaleʼ mix máak mache, tumen maʼ kʼuchuk u yorailiʼ.+
21 Ka túun tu yaʼalajtiʼob tu kaʼatéen: «Teneʼ táan in bin, teʼexeʼ yaan a máan a kaxteneʼex, chéen baʼaleʼ yaan a kíimleʼex ichil a kʼebaneʼex.+ Teʼ tuʼux kin binoʼ teʼexeʼ maʼ tu páajtal a taaleʼexiʼ».+
22 Le oʼolaleʼ le judíoʼoboʼ káaj u yaʼalikoʼob: «¿Máasaʼ maʼ táan u tuklik u kíimskubaiʼ? Tumen ku yaʼalik: ‹Teʼ tuʼux kin binoʼ teʼexeʼ maʼ tu páajtal a taaleʼexiʼ›».
23 Letiʼ túuneʼ tu yaʼalajtiʼob: «Teʼexeʼ teʼ lugaroʼob yaan kabal a taaleʼexoʼ, teneʼ teʼ lugaroʼob yanoʼob kaʼanal in taaloʼ.+ Teʼexeʼ yóokʼol kaabileʼex, teneʼ maʼ yóokʼol kaabileniʼ.
24 Le oʼolal tin waʼalajteʼex: yaan a kíimleʼex ichil a kʼebaneʼex. Tumen wa maʼ ta creerkeʼex teen le máax aʼalaʼan kun taaloʼ yaan a kíimleʼex ichil a kʼebaneʼex».
25 Le oʼolaleʼ letiʼobeʼ tu kʼáatoʼobtiʼ: «¿Máaxechiʼ?». Jesúseʼ tu yaʼalajtiʼob: «Baʼax tiaʼal ku seguer in tʼaan ta wéeteleʼex.
26 Yaʼab baʼax yaan in waʼal ta woʼolaleʼex utiaʼal in juzgarkeʼex. Le Máax túuxtenoʼ mantatsʼ ku yaʼalik u jaajil. Le baʼaxoʼob xan tin wuʼuyaj u yaʼalikoʼ letiʼe baʼaxoʼob kin waʼalik way yóokʼol kaabeʼ».+
27 Letiʼobeʼ maʼ tu naʼatoʼob wa táan kaʼach u tʼaan tiʼ le Taataoʼ.
28 Le oʼolaleʼ Jesúseʼ tu yaʼalaj: «Kéen a chʼuykíinteʼex u Paal máak+ tiʼ junpʼéel cheʼeʼ tiʼ ken a wojéelteʼex teen le máak jeʼeloʼ+ yéetel maʼ tin beetik mix baʼal chéen tu juunal in wóol,+ baʼaxeʼ le baʼaloʼobaʼ kin waʼalik jeʼex u kaʼansmilten le Taataoʼ.
29 Tsʼoʼoleʼ le Máax túuxtenoʼ tiʼ yaan tin wéeteleʼ. Letiʼeʼ maʼ u pʼaten chéen tin juunaliʼ, tumen mantatsʼ kin beetik baʼax uts tu tʼaan».+
30 Úuchik u yaʼalik le baʼaloʼobaʼ yaʼab máakoʼob tu tsʼáaj u fejoʼob tiʼ letiʼ.
31 Jesús túuneʼ seguernaj u yaʼalik tiʼ le judíoʼob tu tsʼáaj u fejoʼob tiʼ letiʼoʼ: «Wa ku pʼáatal ta puksiʼikʼaleʼex baʼax kin waʼalikeʼ jach tu jaajil in discípuloʼex.
32 Teʼexeʼ yaan a kʼaj óoltikeʼex le jaajoʼ,+ le jaaj túunoʼ yaan u jáalkʼabtikeʼex».+
33 Letiʼobeʼ tu yaʼaloʼobtiʼ: «Toʼoneʼ u paalaloʼon Abrahán, tsʼoʼoleʼ mix juntéen beetaʼakoʼon esclavoil tumen mix máak. ¿Baʼaxten túun ka waʼalik: ‹Yaan a jáalkʼabtaʼaleʼex›?».
34 Jesúseʼ tu núukajtiʼob: «Jach tu jaajil kin waʼalikteʼex: tuláakal máax ku kʼebantaleʼ beetaʼan esclavoil tumen le kʼebanoʼ.+
35 Tsʼoʼoleʼ le esclavooʼ maʼ mantatsʼ kun pʼáatal teʼ najoʼ, chéen baʼaleʼ le paaloʼ mantatsʼ kun pʼáatliʼ.
36 Le oʼolaleʼ wa ka jáalkʼabtaʼaleʼex tumen le Paaloʼ jach tu jaajil yaan a pʼáatleʼex jáalkʼabil.
37 Teneʼ in wojel u paalaleʼex Abrahán, chéen baʼaleʼ a kʼáat a kíimseneʼex tumen maʼ tu pʼáatal ta puksiʼikʼaleʼex le baʼaxoʼob kin waʼalikoʼ.
38 Tuláakal le baʼaxoʼob tin wilaj le tiaʼanen kaʼach tu yiknal in Taataoʼ+ letiʼe baʼaxoʼob xan kin kaʼansikoʼ. Teʼex xaneʼ ka beetkeʼex le baʼaxoʼob tsʼoʼok u yaʼalaʼalteʼex tumen a taataʼexoʼ».
39 Letiʼobeʼ tu yaʼaloʼobtiʼ: «K-taataeʼ Abrahán». Jesúseʼ tu yaʼalajtiʼob: «Wa u paalaleʼex Abraháneʼ+ beeteʼex le baʼaxoʼob tu beetaj Abrahánoʼ.
40 Kex tsʼoʼok in waʼalikteʼex le u jaajil tin kanaj tiʼ Diosoʼ+ teʼexeʼ taak a kíimskeneʼex. Abraháneʼ maʼ tu beetaj le baʼax ka beetkeʼexoʼ.
41 Teʼexeʼ táan a beetkeʼex le baʼax ku beetik a taataʼexoʼ». Letiʼobeʼ tu yaʼaloʼobtiʼ: «Toʼoneʼ maʼ síijoʼon tiʼ núupkʼebaniʼ,* chéen juntúuliliʼ k-Taata yaan, Dios».
42 Jesúseʼ tu yaʼalajtiʼob: «Wa tu jaajil Dios a Taataʼexeʼ bejlaʼa kaʼach a yaabiltmeneʼexeʼ,+ tumen Dios túuxten, yéetel tu yoʼolaleʼ way yaneneʼ. Jach tu jaajil maʼ chéen tu juunal in wóol taaleniʼ, baʼaxeʼ letiʼ túuxten.+
43 ¿Baʼaxten teʼexeʼ maʼ a wojleʼex le baʼax kin waʼalikoʼ? Tumen maʼ a kʼáat a wuʼuyeʼex in tʼaaniʼ.
44 Teʼexeʼ tiʼ a taataʼex le Kʼaasilbaʼal* a taaleʼexoʼ, yéetel a kʼáat a beeteʼex le baʼaxoʼob uts tu tʼaan a taataʼexoʼ.+ Letiʼeʼ desde tu káajbaleʼ tu beetuba j-kiimsaj wíinik,+ maʼ pʼáat ichil le jaajoʼ, tumen le jaajoʼ minaʼan tu puksiʼikʼal. Le kéen tuusnakeʼ ku beetik jeʼex suuk u beetkeʼ, tumen letiʼeʼ chéen tuus ku jóokʼol tu chiʼ, letiʼ u taatail le tuusoʼ.+
45 Teneʼ táan in waʼalikteʼex u jaajil, chéen baʼaleʼ teʼexeʼ maʼ ta creerkeneʼex.
46 ¿Máax tiʼ teʼex jeʼel u yeʼesik wa yaan tiʼ baʼax kʼebanchajaʼaneneʼ? Wa táan in waʼalik u jaajileʼ, ¿baʼaxten maʼ ta creerkeneʼex?
47 Le máax tiʼ Dios u taaleʼ ku yuʼubik le baʼaxoʼob ku yaʼalik Diosoʼ.+ Le oʼolal maʼ ta wuʼuyikeʼex baʼax kin waʼalik, tumen maʼ tiʼ Dios a taaleʼexiʼ».+
48 Le judíoʼob túunoʼ ka tu yuʼuboʼob lelaʼ tu yaʼaloʼobtiʼ: «¿Maʼ wa le oʼolal k-aʼalikeʼ techeʼ samaritanoech+ yéetel okaʼantech demonio?».+
49 Jesúseʼ tu núukajtiʼob: «Teneʼ maʼ okaʼanten demonioiʼ, baʼaxeʼ teneʼ kin respetartik in Taata, chéen baʼaleʼ teʼexeʼ maʼ ta respetarkeneʼex.
50 Teneʼ maʼ táan in kaxtik ka alabartaʼakeniʼ,+ chéen baʼaleʼ yaan juntúul Máax u kʼáat u beet lelaʼ, letiʼ aʼalik máax unaj u alabartaʼal.
51 Jach tu jaajil kin waʼalikteʼex: wa yaan máax ku beetik baʼax kin waʼalikeʼ mix bikʼin kun kíimil».+
52 Le judíoʼoboʼ tu yaʼaloʼobtiʼ: «Beora túunaʼ tsʼoʼok k-ilik jach tu jaajil okaʼantech demonio, tumen Abraháneʼ kíimi bey xan le profetaʼoboʼ, chéen baʼaleʼ techeʼ ka waʼalik: ‹Wa yaan máax ku beetik baʼax kin waʼalikeʼ mix bikʼin kun kíimil›.
53 ¿Ka tuklik wa maas nojchech tiʼ k-taata Abrahán kíimoʼ? Si tak le profetaʼoboʼ kíimoʼob, ¿máax túun a taaskaba beyaʼ?».
54 Jesúseʼ tu núukaj: «Wa chéen tin juunal kin alabarkinbaeʼ leloʼ mix baʼal u biilal. Chéen baʼaleʼ in Taataeʼ letiʼe máax alabarkenoʼ,+ le máax ka waʼalikeʼex a Dioseʼexoʼ.
55 Teʼexeʼ maʼ a kʼaj óoleʼexiʼ,+ chéen baʼaleʼ teneʼ in kʼaj óol.+ Wa ka in waʼal maʼ in kʼaj óoleʼ yaan u pʼáatal chéen táan in tuus jeʼex teʼexeʼ. Baʼaxeʼ teneʼ jach tu jaajil in kʼaj óol yéetel kin beetik baʼax ku yaʼalik.
56 Abrahán a taataʼexeʼ jach yéetel kiʼimak óolal tu páaʼtaj u kʼuchul u kʼiinil in beetik le baʼaloʼobaʼ, ka tsʼoʼok u yilkeʼ jach kiʼimakchaj u yóol».+
57 Ka túun aʼalaʼabtiʼ tumen le judíoʼoboʼ: «Mix 50 años yaantech, chéen baʼaleʼ ¿ka waʼalik tsʼoʼok a wilik Abrahán?».
58 Jesúseʼ tu núukajtiʼob: «Jach tu jaajil kin waʼalikteʼex: táanil tiʼ u síijil Abraháneʼ teneʼ tsʼokaʼaniliʼ in wantaleʼ».+
59 Letiʼob túuneʼ tu chʼaʼajoʼob tuunich utiaʼal u chʼiʼinchʼinkoʼob Jesús, chéen baʼaleʼ letiʼeʼ tu balubaeʼ ka jóokʼ teʼ templooʼ.
