Juan 9:1-41
9 Jesúseʼ le táan kaʼach u máan teʼeloʼ tu yilaj juntúul máak chʼóop desde ka síiji.
2 U discípuloʼob túuneʼ tu kʼáatoʼobtiʼ: «J-Kaʼansaj,+ ¿máax kʼebanchaj utiaʼal ka síijik chʼóopil le máakaʼ: u taataʼob wa letiʼ?».
3 Jesúseʼ tu núukaj: «Mix u taataʼob kʼebanchajoʼob, mix le máakaʼ, chéen baʼaleʼ le baʼax uchaʼan tiʼ le máakaʼ yaan u tsʼáaik tuʼux u yeʼesik bukaʼaj u poder Dios.+
4 Táanil tiʼ u bin kʼiineʼ unaj k-beetik le meyajoʼob u tsʼaamaj le Máax túuxtenoʼ,+ tumen táan u yáakʼabtal, tsʼoʼoleʼ kéen áakʼabchajkeʼ mix máak ku páajtal u meyaj.
5 Le tiaʼanen way yóokʼol kaabeʼ u sáasilen yóokʼol kaab».+
6 Ka tsʼoʼok u yaʼalik le baʼaloʼobaʼ túubnaj teʼ luʼumoʼ ka tu xaʼakʼtaj le luʼum yéetel u túuboʼ, tsʼoʼoleʼ ka tu choʼaj le luukʼ tu yich le máakoʼ,+
7 ka tu yaʼalajtiʼ: «Xeen a pʼoʼ a wich tu pilail Siloam» (Siloameʼ u kʼáat u yaʼal «Túuxtaʼan»). Le máak túunoʼ bineʼ ka tu pʼoʼaj u yich, ka suunajeʼ ku páajtal u paakat.+
8 Le oʼolaleʼ le máaxoʼob kajaʼanoʼob naatsʼ tiʼoʼ yéetel le máaxoʼob suuk u yilkoʼob kaʼach táan u kʼáat caridadoʼ káaj u yaʼalikoʼob: «¿Maʼ wa letiʼe máak kulukbal kaʼach u kʼáat caridadaʼ?».
9 Yaan tiʼ letiʼobeʼ táan kaʼach u yaʼalikoʼob: «Letiʼ». Uláakʼoʼobeʼ ku yaʼalikoʼob: «Maʼ, maʼ letiʼiʼ, chéen baʼaleʼ chíikaʼan tiʼ letiʼ». Le máak túunoʼ táan kaʼach u yaʼalik: «Teen le máak ka waʼalikeʼexoʼ».
10 Le oʼolaleʼ káaj u kʼáatkoʼobtiʼ: «¿Bix túun úuchik u yantal u sáasilil a wich?».
11 Letiʼeʼ tu núukaj: «Le máak ku kʼaabaʼtik Jesúsoʼ tu beetaj luukʼeʼ ka tu choʼaj tin wich, tsʼoʼoleʼ ka tu yaʼalajten: ‹Xeen Siloameʼ ka a pʼoʼ a wich›.+ Teen túuneʼ bineneʼ ka tin pʼoʼaj in wich, ka yanchaj u sáasilil in wich».
12 Le máakoʼob túunoʼ tu kʼáatoʼobtiʼ: «¿Tuʼux yaan le máak ka waʼalikoʼ?». Letiʼeʼ tu núukaj: «Maʼ in wojliʼ».
13 Letiʼob túuneʼ tu bisoʼob tu yiknal le fariseoʼob le máak chʼóop kaʼachoʼ.
14 Le ka tu beetaj Jesús le luukʼ yéetel le ka tu tsʼáaj u sáasilil u yich+ le máakoʼ tu kʼiinil sábado.+
15 Le fariseoʼob túunoʼ káaj u kʼáatkoʼobtiʼ bix úuchik u yantal u sáasilil u yich. Letiʼeʼ tu yaʼalajtiʼob: «Letiʼeʼ tu choʼaj luukʼ tin wichoʼob, tsʼoʼoleʼ ka tin pʼoʼaj, le oʼolal ku páajtal in paakat».
16 Jujuntúul tiʼ le fariseoʼob túunoʼ káaj u yaʼalikoʼob: «Le máakoʼ maʼ tiʼ Dios u taaliʼ, tumen maʼatech u tsʼoʼokbesik u leyil le Sábadooʼ».+ Uláakʼoʼobeʼ ku yaʼalikoʼob xan: «¿Bix jeʼel u páajtal u beetaʼal tumen juntúul kʼeban máak le milagroʼob beyaʼ?».+ Ka túun pʼáat maʼ junpʼéeliliʼ bix u tuukuloʼobiʼ.+
17 Le oʼolal tu kaʼa kʼáatoʼob tiʼ le máak chʼóop kaʼachoʼ: «Tumen tu tsʼáaj u sáasilil a wicheʼ, ¿baʼax túun ken a waʼal tu yoʼolal?». Le máakoʼ tu núukaj: «Letiʼeʼ juntúul profeta».
18 Chéen baʼaleʼ le judíoʼoboʼ maʼ tu creertoʼob wa chʼóop kaʼach le máakaʼ yéetel wa tsʼaʼab u sáasilil u yich. Ka tu tʼanoʼob u taataʼob le máak tsʼoʼok u tsʼaʼabal u sáasiloʼ,
19 ka túun tu kʼáatoʼobtiʼob: «Lelaʼ ¿letiʼe wa a paaleʼex ka waʼalikeʼex chʼóop desde ka síijoʼ? ¿Bix túun yanil ku páajtal u paakat beoraaʼ?».
20 U taataʼobeʼ tu núukoʼob: «Toʼoneʼ k-ojel le máakaʼ letiʼe k-paal chʼóop desde ka síijoʼ.
21 Chéen baʼaleʼ maʼ k-ojel bix u páajtal u paakat beoraaʼ, maʼ k-ojel xan máax tsʼáa u sáasilil u yichiʼ. Kʼáateʼextiʼ, letiʼeʼ tsʼoʼok u nojochtal, letiʼ unaj u yaʼalikteʼex».
22 U taataʼob le máakaʼ tu yaʼaloʼob lelaʼ tumen saajkoʼob tiʼ le judíoʼoboʼ.+ Tumen le judíoʼoboʼ tsʼokaʼaniliʼ u chʼaʼtuklikoʼobeʼ le máax kun aʼalik de ke Jesús letiʼ le Cristooʼ yaan u tojolchʼintaʼal tiʼ le sinagogaoʼ.*+
23 Le oʼolal u taataʼob le máakoʼ tu yaʼaloʼob: «Letiʼeʼ tsʼoʼok u nojochtal, kʼáateʼextiʼ».
24 Le oʼolaleʼ le judíoʼoboʼ tu kaʼa tʼanoʼob le máak chʼóop kaʼachoʼ ka tu yaʼaloʼobtiʼ: «Aʼal u jaajil tu táan Dios. Toʼoneʼ k-ojel le máak ka waʼalikoʼ juntúul kʼeban máak».
25 Le máak túunoʼ tu núukaj: «Teneʼ maʼ in wojel wa juntúul kʼeban máakiʼ, chéen baʼax in wojleʼ kex chʼóopen kaʼacheʼ beoraaʼ ku páajtal in paakat».
26 Ka túun tu kʼáatoʼobtiʼ: «¿Baʼax tu beetajtech? ¿Bix úuchik u tsʼáaik u sáasilil a wich?».
27 Letiʼeʼ tu núukajtiʼob: «Tsʼoʼok in waʼalikteʼex, chéen baʼaleʼ teʼexeʼ maʼ ta chʼenxikinteʼexiʼ, ¿baʼaxten a kʼáateʼex ka in kaʼa aʼalteʼex? ¿A kʼáateʼex wa xan a beetabaʼex u discípuloʼob?».
28 Yoʼolal lelaʼ káaj u yaʼalikoʼob baʼal tiʼ, tu yaʼaloʼobtiʼ: «Techeʼ u discípuloech le máakoʼ, chéen baʼaleʼ toʼoneʼ u discípuloʼon Moisés.
29 Toʼoneʼ k-ojleʼ Dioseʼ tʼaanaj yéetel Moisés, chéen baʼaleʼ le máakaʼ mix k-ojel tuʼux u taaliʼ».
30 Le máak túunoʼ tu yaʼalajtiʼob: «¡Lelaʼ jach túun maʼ tu páajtal in creertik! Le máakoʼ tu tsʼáaj u sáasilil in wich, chéen baʼaleʼ teʼexeʼ maʼ a wojleʼex tuʼux u taaliʼ.
31 Toʼoneʼ k-ojleʼ Dioseʼ maʼ tu yuʼubik u oración juntúul kʼeban máak,+ chéen baʼaleʼ wa ku chʼaʼik saajkilil tiʼ Dios yéetel ku beetik baʼax u kʼáateʼ ku yuʼubaʼal u oración tumen Dios.+
32 Desde úucheʼ mix juntéen uʼuyaʼak u yaʼalaʼal wa yaan máax tu tsʼáaj u sáasilil u yich juntúul máak chʼóop desde ka síiji.
33 Wa maʼ tiʼ Dios u taal le máakaʼ bejlaʼa maʼ tu páajtal u beetik mix baʼaleʼ».+
34 Le fariseoʼob túunoʼ tu yaʼaloʼobtiʼ: «Techeʼ ich kʼeban síijech, ¿bix u táabal a taal a kaʼansoʼon?». ¡Ka túun tu tojolchʼintoʼob!+
35 Jesúseʼ tu yojéeltaj tsʼoʼok u tojolchʼintaʼal le máakoʼ, ka túun tu yileʼ tu yaʼalajtiʼ: «¿Ka tsʼáaik wa a fe tiʼ u Paal máak?».
36 Letiʼeʼ tu núukaj: «Yuumtsil, ¿máax le ka waʼalikoʼ?, utiaʼal ka in tsʼáa in fe tiʼ letiʼ».
37 Jesúseʼ tu yaʼalajtiʼ: «Techeʼ tsʼoʼok a wilik. Tsʼoʼoleʼ letiʼe máax ku tʼaan ta wéetelaʼ».
38 Le máak túunoʼ tu yaʼalajtiʼ: «Kin tsʼáaik in fe tiʼ letiʼ, Yuumtsil», ka túun xolaj tu táan.
39 Jesúseʼ tu yaʼalaj: «Teneʼ taalen way yóokʼol kaab utiaʼal ka juzgartaʼak le yóokʼol kaaboʼ, utiaʼal beyoʼ ka paakatnak le máaxoʼob maʼ tu páajtal u paakatoʼoboʼ+ yéetel ka chʼóopchajak le máaxoʼob ku páajtal u paakatoʼoboʼ».+
40 Le fariseoʼob yanoʼob tu yéeteloʼ tu yuʼuboʼob lelaʼ ka tu yaʼaloʼob: «¿Máasaʼ toʼoneʼ maʼ chʼóopoʼon xaniʼ?».
41 Jesúseʼ tu yaʼalajtiʼob: «Wa chʼóopeʼexeʼ bejlaʼa kaʼach minaʼan a kʼebaneʼexeʼ, chéen baʼaleʼ beoraaʼ teʼexeʼ ka waʼalikeʼex: ‹Ku páajtal k-paakat›. Le oʼolaleʼ maʼ kun perdonarbil a kʼebaneʼex».+
Notas
^ Ilawil página 2580.
