Jueces 12:1-15
12 Ka tsʼoʼokeʼ u kajnáaliloʼob Efraíneʼ muʼuchʼoʼobeʼ ka tu kʼáatmáansoʼob le ríooʼ ka binoʼob tu tojil Zafón,* letiʼobeʼ tu yaʼaloʼob tiʼ Jefté: «¿Baʼaxten maʼ ta tʼanoʼon ka xiʼikoʼon ta wéetel le ka binech baʼateʼel tu contra le ammonitaʼoboʼ?+ Yoʼolal lelaʼ beoraaʼ yaan k-tóokikech paʼteʼ yéetel a wotoch».
2 Chéen baʼaleʼ Jeftéeʼ tu yaʼalajtiʼob: «Teen yéetel in kaajaleʼ tiaʼanoʼon kaʼach tiʼ junpʼéel nojoch baʼateʼel yéetel le ammonitaʼoboʼ. U jaajileʼ teneʼ tin kʼáatajteʼex áantaj, pero teʼexeʼ maʼ taaleʼex a salvarteneʼex tu kʼaboʼobiʼ.
3 Le ka tin wilaj maʼ taaleʼex a salvarteneʼexeʼ teen túuneʼ binen baʼateʼel tu contra le ammonitaʼoboʼ,+ teneʼ tin tsʼáaj in kuxtal tu chiʼ kíimil, pero Jéeobaeʼ tu kʼuboʼob tin kʼab. ¿Baʼaxten túun beoraaʼ tsʼoʼok a taaleʼex baʼateʼel tin wéetel?».
4 Le oʼolal Jeftéeʼ tu muchʼaj tuláakal le xiiboʼob yaan Galaadoʼ+ ka baʼatelnajoʼob tu contra Efraín. Letiʼobeʼ tu ganartoʼob Efraín. U kajnáaliloʼob Efraíneʼ ku yaʼalikoʼob kaʼach tiʼ le galaaditaʼoboʼ: «Kex kajaʼaneʼex ichil u tribu Efraín yéetel Manaséseʼ utiaʼal u kajnáaliloʼob Efraíneʼ teʼexeʼ mix baʼaleʼex».*
5 Le galaaditaʼoboʼ tu adelantartubaʼob tiʼ le efraimitaʼob utiaʼal u binoʼob teʼ Jordánoʼ,+ teʼ tuʼux maʼ jach taam u jaʼiloʼ. Le kéen kʼuchuk juntúul efraimita táan u púutsʼuleʼ ku yaʼalik: «Chaʼa in máan». Le galaaditaʼob túunoʼ ku kʼáatkoʼob: «¿Techeʼ efraimitaech wa?». Le kéen u yaʼal kaʼach: «¡Maʼatech!»,
6 letiʼobeʼ ku yaʼalikoʼobtiʼ: «Jáan aʼal xibolet». Pero le efraimitaoʼ ku yaʼalik: «Sibolet», tumen le efraimita’oboʼ maʼ tu páajtal kaʼach u yaʼaliko’ob tubeel. Le kéen úuchuk beyoʼ le galaaditaʼoboʼ ku machkoʼob kaʼach le efraimitaoʼ yéetel ku kíimskoʼob teʼ tuʼux maʼ taam u jaʼil le Jordánoʼ. Teʼ kʼiin jeʼeloʼ kíimsaʼab 42,000 efraimitaʼob.
7 Jeftéeʼ seis años tu juzgartaj u kaajil Israel. Ka tsʼoʼokeʼ kíim Jefté le galaaditaoʼ, ka muʼuk tu kaajal, tu luʼumil Galaad.
8 Ka tsʼoʼokeʼ Ibzán, juntúul máax ku taal Beléneʼ, káaj u juzgar tu kaajil Israel.+
9 Letiʼeʼ yanchaj 30 u hijoʼob yéetel 30 u hijaʼob. Ibzáneʼ tu tsʼoʼoksaj u beel u hijaʼob yéetel máakoʼob tiʼ yaanal tribu, tu taasaj xan 30 x-chʼúupalaloʼob tiʼ yaanal tribu utiaʼal ka tsʼoʼokok u beeloʼob yéetel u hijoʼob. Letiʼeʼ siete años tu juzgartaj u kaajil Israel.
10 Ka kíim Ibzáneʼ muʼuk tu kaajil Belén.
11 Ka tsʼoʼokeʼ Elón, le zabulonitaoʼ, káaj u juzgar tu kaajil Israel. Letiʼeʼ diez años tu juzgartaj u kaajil Israel.
12 Ka kíim Elón, le zabulonitaoʼ, muʼuk teʼ lugar ku kʼaabaʼtik Ayalón, le yaan tu luʼumil Zabulónoʼ.
13 Ka tsʼoʼokeʼ Abdón u hijo Ilel, le piratonitaoʼ, káaj u juzgar tu kaajil Israel.
14 Letiʼeʼ yanchaj 40 u hijoʼob yéetel 30 u yáabiloʼob ku máanoʼob kaʼach yóokʼol 70 u túulul burroʼob. Abdóneʼ ocho años tu juzgartaj u kaajil Israel.
15 Ka kíim Abdón u hijo Ilel, le piratonitaoʼ, muʼuk tu kaajil Piratón, le yaan tu luʼumil Efraínoʼ, tu montaña le amalekitaʼoboʼ.+
Notas
^ Uláakʼ bix u traducirtaʼaleʼ «kʼáatmáanoʼob utiaʼal u binoʼob tu tojil xaman».
^ Ich hebreoeʼ ku yaʼalaʼal kaʼach «teʼexeʼ tiʼ Efraín púutsʼeʼex».
