Jueces 15:1-20
-
Ku vengarkuba Sansón tiʼ le filisteoʼoboʼ (1-20)
15 Ka máan tiempo, tu kʼiinil táan u cosechartaʼal trigoeʼ Sansóneʼ bin u xíimbalt u yatan, ka bineʼ tu bisaj juntúul chan chivo. Letiʼeʼ tu yaʼalaj: «Yaan in wokol in wil in watan tu cuarto». Chéen baʼaleʼ maʼ chaʼab u yokol tumen u papá le koʼoleloʼ.
2 U papá le koʼoleloʼ tu yaʼalaj: «Teneʼ tin tuklaj a pʼekmeʼ,+ le oʼolal tin tsʼáaj tiʼ juntúul tiʼ le táankelmoʼob taal u láakʼintechoʼ.+ ¿Maʼ wa maas kiʼichpan u yíitsʼin tiʼ letiʼiʼ? Beet uts a chʼaʼik u yíitsʼin tu lugar letiʼ».
3 Chéen baʼaleʼ Sansóneʼ tu yaʼalaj: «Teʼ vezaʼ le filisteoʼoboʼ maʼ tu páajtal u yaʼalikoʼob wa minaʼanten razón tu yoʼolal baʼax ken in beettiʼob».
4 Sansón túuneʼ bineʼ ka tu chukaj 300 u túulal chʼomakoʼob. Ka tsʼoʼokeʼ tu chʼaʼaj xan antorchaʼob. Letiʼeʼ tu tsʼáaj a kaʼakaʼatúulil le chʼomakoʼoboʼ tsʼoʼoleʼ ka tu nupaj u nejoʼobeʼ ka tu jéepʼkʼaxtaj, tu tsʼáaj xan junpʼéel antorcha teʼ tuʼux u nupmaj u nejoʼoboʼ.
5 Ka tsʼoʼokeʼ tu tʼabaj le antorchaʼoboʼ yéetel tu beetaj u bin le chʼomakoʼob teʼ tuʼux yaan u paakʼal le filisteoʼoboʼ. Tu tóokaj tuláakal, le baʼax tsʼoʼok u xoʼotʼoloʼ bey xan le maʼ cosechartaʼakoʼ, tu tóokaj xan u pakʼal uvaʼob yéetel u pakʼal olivoʼob.
6 Le filisteoʼob túunoʼ tu kʼáatoʼob: «¿Máax beet le baʼal beyaʼ?». Ka aʼalaʼabtiʼob: «Sansón, u jaʼan le timnitaoʼ, tumen le timnitaoʼ tu chʼaʼaj u yatan Sansóneʼ ka tu tsʼáaj tiʼ juntúul tiʼ le táankelmoʼob láakʼintik kaʼachoʼ».+ Le oʼolal le filisteoʼoboʼ binoʼobeʼ ka tu tóokoʼob le koʼolel paʼteʼ yéetel u papáoʼ.+
7 Sansón túuneʼ tu yaʼalajtiʼob: «Yoʼolal le baʼax tsʼoʼok a beetkeʼexoʼ hasta in vengarkinba tiʼ teʼexeʼ kin jetsʼtal».+
8 Ka tsʼoʼokeʼ joʼopʼ u bin u kíimsik le filisteoʼoboʼ, yaʼab tu kíimsiʼ. Tsʼoʼoleʼ bin tiʼ junpʼéel sajkab yaan teʼ kaʼanal lugar ku kʼaabaʼtik Etamoʼ, tiʼ pʼáatiʼ.
9 Junpʼéel kʼiineʼ le filisteoʼoboʼ tu muchʼubaʼobeʼ ka taaloʼob tu luʼumil Judá ka joʼopʼ u máanoʼob teʼ lugar ku kʼaabaʼtik Lejíoʼ.+
10 U kajnáaliloʼob Judá túuneʼ tu yaʼaloʼob: «¿Baʼaxten tsʼoʼok a líikʼleʼex t-contra?». Letiʼob túuneʼ tu yaʼaloʼob: «Taaloʼon k-mach* Sansón utiaʼal k-sutiktiʼ u jeel le baʼax tsʼoʼok u beetiktoʼonoʼ».
11 Le oʼolal 3,000 u túulal u kajnáaliloʼob Judáeʼ binoʼob teʼ sajkab yaan teʼ kaʼanal lugar ku kʼaabaʼtik Etamoʼ ka tu yaʼaloʼob tiʼ Sansón: «¿Maʼ wa a wojel letiʼe filisteoʼob ku gobernaroʼob t-óokʼoloʼ?+ ¿Baʼaxten túun tsʼoʼok a beetiktoʼon junpʼéel baʼal beyoʼ?». Sansóneʼ tu yaʼalajtiʼob: «Teneʼ chéen tin sutajtiʼob u jeel le baʼax tu beetoʼobtenoʼ».
12 Pero letiʼobeʼ tu yaʼaloʼob: «Taaloʼon k-machech* utiaʼal k-kʼubkech tiʼ le filisteoʼoboʼ». Ka tsʼoʼokeʼ Sansóneʼ tu yaʼalaj: «Chéen baʼaleʼ jurarteʼex de ke teʼexeʼ maʼ ken a beeteʼexten loob».
13 Letiʼob túuneʼ tu yaʼaloʼob: «Maʼ, toʼoneʼ maʼ ken k-kíimsech, chéen yaan k-kʼaxkech utiaʼal k-kʼubkech tiʼ letiʼob».
Letiʼob túuneʼ tu kʼaxoʼob yéetel kaʼapʼéel túumben suumeʼ ka tu beetoʼob u yéemel teʼ tuʼux yanoʼ.
14 Sansóneʼ kʼuch Lejí, le filisteoʼob túunoʼ joʼopʼ u yawatoʼob yéetel kiʼimak óolal le ka tu yiloʼob Sansón. U poder Jéeoba túuneʼ tu beetaj u yantal u muukʼ Sansón,+ le oʼolal le suumoʼob ikil kʼaxaʼanil u kʼaboʼ pʼáat chéen bey hiloʼob de lino tóokaʼan tumen kʼáakʼeʼ, tsʼoʼoleʼ bey yíibil tu beetaj le suumoʼob tu kʼaboʼ.+
15 Ka tu yilaj Sansón u baakel u kamaʼach juntúul burroeʼ chíin u chʼaʼeʼ. Tu yéeteleʼ tu kíimsaj 1,000 máakoʼob.+
16 Sansón túuneʼ tu yaʼalaj:
«¡Yéetel u baakel u kamaʼach juntúul burroeʼ... tsʼoʼok in beetik junpʼéel montón, kaʼapʼéel montón!
Yéetel u baakel u kamaʼach juntúul burroeʼ tsʼoʼok in kíimsik 1,000 máakoʼob».+
17 Ka tsʼoʼok u yaʼalik lelaʼ, tu píikchʼintaj u kamaʼach le burrooʼ ku tsʼoʼokoleʼ tu yaʼaleʼ le lugaroʼ yaan u kʼaabaʼtik Ramat-lejí.*+
18 Chéen baʼaleʼ ka tsʼoʼokeʼ sen ukʼajchaji, le oʼolal tu yaʼalaj tiʼ Jéeoba: «Teech beet in ganartik le baʼatelaʼ, teech áant le máax meyajtikechaʼ. Chéen baʼaleʼ beoraaʼ, ¿yaan wa a chaʼik in kíimil yéetel ukʼaj utiaʼal ka lúubken tu kʼab le máaxoʼob maʼatech u meyajtikechoʼoboʼ?».*
19 Le oʼolal Dioseʼ tu jeʼekʼabtaj junpʼéel jool yaan kaʼach teʼ Lejíoʼ ka tuulnaj jaʼiʼ.+ Ka tu yukʼaj le jaʼoʼ yanchaj u muukʼ yéetel tu yuʼubaj kaʼa kuxlaji. Le oʼolal Sansóneʼ tu yaʼaleʼ le lugaroʼ yaan u kʼaabaʼtik En-akore,* lelaʼ tiaʼan Lejí tak bejlaʼeʼ.
20 Sansóneʼ 20 años tu juzgartaj Israel tu kʼiinil le filisteoʼoboʼ.+
Notas
^ Wa «k-kʼax».
^ Wa «k-kʼaxech».
^ U kʼáat u yaʼal «u Kaʼanal Lugaril Kamaʼach».
^ Ich hebreoeʼ ku yaʼalaʼal kaʼach «maʼ circuncidartaʼanoʼoboʼ».
^ U kʼáat u yaʼal «U Sayab le Máax ku Kʼáat óolaloʼ».
