Jueces 19:1-30
-
Le benjaminitaʼob yaan Guibeaoʼ tu violartoʼob juntúul koʼolel (1-30)
19 Teʼ kʼiinoʼob minaʼan kaʼach juntúul rey tu luʼumil Israeloʼ,+ juntúul levita kajaʼan teʼ montañaʼob yaan Efraín+ tiʼ junpʼéel lugar náach yanileʼ tu chʼaʼaj juntúul koʼolel* tu kaajil Belén+ tu luʼumil Judá utiaʼal u yatante.
2 Chéen baʼaleʼ traicionartaʼab tumen le koʼolelaʼ, tsʼoʼoleʼ ka bin le koʼolel tu yotoch u papá yaan tu kaajil Belén tu luʼumil Judáoʼ. Cuatro meses xiʼikeʼ
3 ka bin u yíicham tu paach utiaʼal u convencertik utiaʼal u kaʼa suut, le ka bineʼ tu bisaj juntúul máax meyajtik bey xan kaʼatúul burroʼob. Le ka tu yilaj le koʼolel u kʼuchul u yíichamoʼ tu yoksaj tu yotoch u papá. Le ka ilaʼab le máak tumen u papá le koʼoleloʼ kʼaʼam xan yéetel kiʼimak óolal.
4 Le oʼolal convencertaʼab tumen u suegro wa u papá le koʼolel utiaʼal ka pʼáatak tres días tu yéeteloʼ. Táan kaʼach u janaloʼob yéetel u yukʼikoʼob vino, tsʼoʼoleʼ tiʼ ku máansik kaʼach áakʼabiʼ.
5 Tu cuatro días, le ka líikʼoʼob jach temprano utiaʼal u binoʼobeʼ u papá le koʼoleloʼ tu yaʼalaj tiʼ u jaʼan: «Jaanteʼex wa baʼax utiaʼal u yantal a muukʼeʼex, kéen tsʼoʼokkeʼ jeʼel u páajtal a bineʼexeʼ».
6 Le oʼolal kulajoʼobeʼ ka joʼopʼ u janaloʼob yéetel u yukʼikoʼob vino. Ka tsʼoʼokeʼ u papá le koʼoleloʼ tu yaʼalaj tiʼ le máakoʼ: «Beet uts a máansik áakʼab wayeʼ, kiʼimakkúunt u yóol a puksiʼikʼal».
7 Le ka líikʼ le máak utiaʼal u binoʼ seguernaj u sen aʼalaʼaltiʼ tumen u suegro ka pʼáatak, le oʼolal tu kaʼa máansaj le áakʼab teʼeloʼ.
8 Tu cinco días, le ka líikʼ jach temprano utiaʼal u bineʼ aʼalaʼabtiʼ tumen u papá le koʼoleloʼ: «Beet uts a jaantik wa baʼax utiaʼal u yantal a muukʼ». Le oʼolal tardechaj tiʼob teʼ kʼiin jeʼeloʼ, tu kaʼatúulaloʼob seguernaj u janaloʼob.
9 Le ka líikʼ le máak utiaʼal u bin yéetel le koʼolel bey xan yéetel le máax meyajtikoʼ aʼalaʼabtiʼ tumen u suegro, le u papá le koʼoleloʼ: «¡Ilawile! Taʼaytak u yáakʼabtal. Beet uts a máanskeʼex áakʼab wayeʼ. Wayeʼ taʼaytak u tʼúubul le kʼiinoʼ. Máans áakʼab wayeʼ, kiʼimakkúunt u yóol a puksiʼikʼal. Sáamaleʼ jeʼel u páajtal a líikʼleʼex jach temprano utiaʼal a bineʼex ta wotocheʼ».
10 Chéen baʼaleʼ le máakoʼ maʼ tu yóotaj pʼáatal uláakʼ áakʼabiʼ, le oʼolal líikʼeʼ ka bin tak Jebús, uláakʼ bix kʼaj óolaʼanileʼ Jerusalén.+ Tu yéeteleʼ tiaʼan le koʼoleloʼ, tiaʼan kaʼach xan le máax meyajtikoʼ bey xan le kaʼatúul burroʼoboʼ.
11 Le tiaʼanoʼob naatsʼ tiʼ Jebúsoʼ jach nukaʼaj káajal kaʼach u tʼúubul le kʼiinoʼ. Le oʼolal le j-meyajoʼ tu yaʼalaj tiʼ u tsʼuulil: «¿Maʼ wa maʼalob ka jeʼelkoʼon way tu kaajal le jebuseoʼob utiaʼal k-máansik le áakʼaboʼ?».
12 Chéen baʼaleʼ aʼalaʼabtiʼ tumen u tsʼuulil: «Maʼ unaj k-jeʼelel tu kaajal máakoʼob maʼ israelitaʼobiʼ. Yaan u seguer k-bin tak Guibea».+
13 Ka tsʼoʼokeʼ le tsʼuuloʼ tu yaʼalaj tiʼ le máax meyajtikoʼ: «Koʼoten utiaʼal k-ilik wa jeʼel u páajtal k-kʼuchul tu kaajil Guibea wa tu kaajil Ramáeʼ,+ tiʼ ken k-máans áakʼab tiʼ junpʼéel tiʼ le lugaroʼobaʼ».
14 Le oʼolal seguernaj u binoʼob, le ka kʼuchoʼob naatsʼ tiʼ Guibea, le ku pertenecer tiʼ Benjamínoʼ, tsʼoʼok u káajal kaʼach u yéeʼsameʼental.
15 Le oʼolal jeʼeloʼobeʼ ka ook u máansoʼob áakʼab tu kaajil Guibea. Le ka ookoʼobeʼ kulajoʼob tu kʼíiwikil le kaajoʼ, chéen baʼaleʼ mix máak bisoʼob utiaʼal u máanskoʼob áakʼab tu yotoch.+
16 Ka tsʼoʼok u yáakʼabtaleʼ yaan juntúul nojoch máak suunaj tu joʼol u meyaj. Letiʼeʼ tiʼ u taal teʼ montañaʼob yaan Efraínoʼ,+ chéen baʼaleʼ tiʼ kajaʼan kaʼach Guibeaeʼ. U kajnáaliloʼob le kaajoʼ benjaminitaʼob.+
17 Le nojoch máakoʼ le ka tu yilaj le máak kulukbal tu kʼíiwikil le kaajoʼ tu kʼáatajtiʼ: «¿Tuʼux a taal? ¿Tuʼux ka bin?».
18 Le máak túunoʼ tu yaʼalaj: «Tiʼ lukʼoʼon tu kaajil Belén tu luʼumil Judáeʼ, táan k-bin teʼ montañaʼob yaan Efraínoʼ tiʼ junpʼéel lugar náach yanil, tumen tiʼ in taaliʼ. Binen tu kaajil Belén tu luʼumil Judá,+ beoraaʼ táan in bin tu yotoch Jéeoba.* Pero mix máak taalak u yaʼalten ka xiʼiken tu yotoch.
19 Yaantoʼon yaʼab xíiw yéetel suʼuk utiaʼal k-alakʼ burroʼob,+ yaan xan yaʼab waaj+ yéetel vino in tiaʼal, utiaʼal le koʼoleloʼ bey xan utiaʼal le máax meyajtikenoʼ, mix baʼal ku bineltiktoʼon».
20 Chéen baʼaleʼ aʼalaʼabtiʼ tumen le nojoch máakoʼ: «¡Maʼ a tuklik! Teen kin tsʼáaiktech jeʼel baʼaxak kʼaʼabéettecheʼ. Pero maʼ a máansik áakʼab way kʼíiwikeʼ».
21 Ka tsʼoʼokeʼ tu bisaj tu yotoch, yéetel tu tsʼáaj baʼal u jaant u yalakʼ burroʼob. Letiʼob xaneʼ ka tsʼoʼok u pʼoʼik u yookoʼobeʼ joʼopʼ u janaloʼob yéetel u yukʼikoʼob vino.
22 Mientras táan kaʼach u kiʼimakkúuntik u yóoloʼobeʼ, baʼpachtaʼab le naj tumen jujuntúul kʼasaʼan máakoʼob yaan teʼ kaajoʼ ka joʼopʼ u loʼoloxkoʼob le joonajoʼ, yéetel táan kaʼach u yaʼalikoʼob tiʼ le nojoch máak u yuumil le najoʼ: «Jóoʼs le máak ook ta wotochoʼ utiaʼal u yantal baʼal k-il tu yéetel».+
23 Le oʼolal jóokʼ u yuumil le najoʼ ka tu yaʼalajtiʼob: «In sukuʼuneʼex, maʼ a beetik a kʼasaʼanileʼex. Kin kʼáat óoltikteʼex maʼ a beetkeʼex junpʼéel baʼal kʼaas beyoʼ, tumen teen aʼal tiʼ le máak ka taalak tin wotochoʼ.
24 Way yaan in hija mix juntéen yanak baʼal u yil yéetel juntúul xiibeʼ yéetel way yaan xan le koʼolel tu taasaj le máakaʼ. Jeʼel in jóoʼskoʼobteʼex utiaʼal ka yanak baʼal a wileʼex tu yéeteloʼobeʼ, yéetel ka a beeteʼex le baʼax a kʼáateʼex tu yéeteloʼoboʼ.+ Chéen baʼaleʼ maʼ unaj a beetkeʼex mix baʼal kʼaas tiʼ le máakaʼ».
25 Pero le máakoʼoboʼ maʼ tu yóotoʼob u yuʼuboʼobiʼ, le oʼolal le máakoʼ tu chʼaʼaj le koʼolel u yéet taaloʼ+ ka tu jóoʼsaj tiʼ le máakoʼoboʼ. Letiʼobeʼ bul áakʼab táan kaʼach u violarkoʼob yéetel táan u beetkoʼob loob tiʼ le koʼoleloʼ, bey tu beetiloʼob tak táan u taal u sáastaloʼ. Ka tu yiloʼob táan u taal u sáastaleʼ ka túun tu chaʼajoʼob u bin.
26 Le koʼolel túunoʼ suunaj le jach táan u taal u píikʼiloʼ, lúub tu jool u yotoch le nojoch máak tuʼux yaan u yíichamoʼ, tiʼ pʼáat pektal tak ka sáaschajiʼ.
27 Le ka líikʼ u yíicham temprano, yéetel le ka tu jeʼekʼabtaj u joonajil le naj utiaʼal u seguertik u binoʼ, tu yilaj tiʼ pekekbal le koʼolel tu entradail le najoʼ yéetel u pejkúuntmaj u kʼaboʼob tu jool le najoʼ.
28 Le máak túunoʼ tu yaʼalaj tiʼ le koʼoleloʼ: «Líiʼkech, koʼox». Chéen baʼaleʼ maʼ tu núukaj mix baʼaliʼ. Le máak túunoʼ tu naʼaksaj tu yóokʼol u burroeʼ ka bin tu yotoch.
29 Le ka kʼuch tu yotocheʼ tu chʼaʼaj junpʼéel cuchilloeʼ ka tu xoʼoxotʼaj le koʼoleloʼ ka tu jóoʼsaj 12 partes tiʼ, tsʼoʼoleʼ ka tu túuxtaj junxóotʼ tiʼ cada junpʼéel tribu yaan Israel.
30 Tuláakal le máaxoʼob iloʼ tu yaʼaloʼob: «Desde le kʼiin ka jóokʼ le israelitaʼob Egipto tak bejlaʼoʼ, mix juntéen úuchuk baʼal beyaʼ yéetel mix juntéen xan ilaʼak. Tuukulneneʼex tiʼ le baʼax tsʼoʼok u yúuchloʼ, chʼaʼtukleʼex baʼax unaj u beetaʼal+ yéetel aʼaleʼextoʼon baʼax unaj k-beetik».
Notas
^ Ich hebreoeʼ ku yaʼalaʼal kaʼach «concubina».
^ Uláakʼ bix u traducirtaʼaleʼ «yéetel tiʼ kin meyaj tu yotoch Jéeobaeʼ».
