Lamentaciones 1:1-22
א [Alef]*
1 ¡Jerusaléneʼ chuup kaʼach yéetel máakoʼob,+ chéen baʼaleʼ tsʼoʼok u pʼáatal mix máak yaniʼ!
¡Le kaaj nojoch tu táan u maasil kaajoʼoboʼ+ tsʼoʼok u pʼáatal bey juntúul koʼolel kimen u yíichameʼ!
¡Le kaaj xunáan kaʼach u yilaʼal tumen u maasil luʼumoʼoboʼ tsʼoʼok u pʼáatal juntúul esclava!+
ב [Bet]
2 Letiʼeʼ bul áakʼab táan u sen okʼol,+ u jaʼil u yicheʼ ku yáalal tak tu pʼuʼukoʼob.
Mix juntúul tiʼ le xiiboʼob yanchaj baʼal u yil tu yéetel* líiʼsik u yóoloʼ.+
Tsʼoʼok u traicionartaʼal tumen le máaxoʼob ku biskubaʼob kaʼach tu yéeteloʼ,+ tsʼoʼok u beetkubaʼob u enemigoʼob.
ג [Guimel]
3 Judáeʼ tsʼoʼok u bisaʼal táanxel luʼumil,+ táan u sen muʼyaj* yéetel tsʼoʼok u esclavizartaʼal.+
Letiʼeʼ yaan u kajtal ichil u maasil kaajoʼoboʼ.+ Letiʼeʼ minaʼan jeetsʼelil tiʼ.
Le máaxoʼob chʼaʼpachtikoʼ kʼuchoʼob tu yiknal jach teʼ kʼiin táan u muʼyajoʼ.
ד [Dalet]
4 U bejiloʼob Sióneʼ yaachajaʼan u yóoloʼob tumen mix máak ku taal tu kʼiiniloʼob kʼiinbesaj.+
Tsʼoʼok u kʼaskúuntaʼal tuláakal u joonajiloʼob le kaajoʼ.+ Le sacerdoteʼoboʼ ku yuʼubikoʼob yaj baʼax ku yúuchul.
Le x-chʼúupalaloʼoboʼ yaachajaʼan u yóoloʼob. Sióneʼ jach táan u muʼyaj.
ה [Je]
5 Beoraaʼ tiaʼan yáanal u páajtalil le máaxoʼob pʼekmiloʼ. Le máaxoʼob pʼekmiloʼ mix baʼal chiʼichnakkúuntikoʼob.+
Tu yoʼolal le bukaʼaj baʼaloʼob maʼ maʼalob u beetmoʼ+ tsʼoʼok u taasaʼal yaayaj baʼaloʼob tu yóokʼol tumen Jéeoba.*
U paalaloʼobeʼ tsʼoʼok u bisaʼaloʼob táanxel luʼumil tumen le máaxoʼob pʼekmiloʼoboʼ.+
ו [Waw]
6 U hija Sióneʼ tsʼoʼok u pʼáatal maʼ kiʼichpaniʼ.+
U príncipeʼobeʼ beyoʼob kéejoʼob táan u máan u kaxtoʼob baʼal u jaantoʼobeʼ,yéetel kex istikyaj u xíimbaloʼobeʼ táan u púutsʼloʼob tiʼ le máaxoʼob chʼaʼpachtikoʼoboʼ.
ז [Zayin]
7 Teʼ kʼiinoʼob táan u muʼyaj yéetel minaʼan u yotochoʼ, Jerusaléneʼ kʼaʼajtiʼtuláakal le jatsʼuts baʼaloʼob yaantiʼ úuchjeakiloʼ.+
Le ka lúub u kaajal tu kʼab u enemigoʼob yéetel ka pʼáat mix máak áanteʼ+le enemigoʼoboʼ joʼopʼ u cheʼejtikoʼob bix úuchik u lúubul.+
ח [Jet]
8 Jerusaléneʼ tsʼoʼok u sen kʼebantal.+
Tsʼoʼok u pʼáatal jach kʼaas yanil.
Tsʼoʼok u yilaʼal u chaknuulil tumen le máaxoʼob respetartik kaʼachoʼ, le oʼolal tsʼoʼok u pʼáatal jach kʼaas yanil tu táanoʼob.+
Letiʼeʼ táan u xuxuchniʼ+ yéetel ku náachkuntkuba tumen jach suʼlak.
ט [Tet]
9 U nookʼeʼ tuʼuchajaʼan.
Letiʼeʼ maʼ tu tukultaj bix kun tsʼoʼokoliʼ.+
Jach yaj bix úuchik u lúubul. Minaʼan mix máak líiʼsik u yóol.
Jéeoba Dios, ilawil bix in muʼyaj, le máax pʼekmilenoʼ maʼ tu xuʼulul u nojbaʼalkúuntkuba tin táan.+
י [Yod]
10 Le enemigooʼ tsʼoʼok u chʼaʼik tuláakal u ayikʼaliloʼob le kaajoʼ.+
Jerusaléneʼ tsʼoʼok u yilik bix u yokol j-táanxel luʼumiloʼob teʼ lugar santooʼ,+le máaxoʼob a waʼalmaj maʼ unaj u yookloʼob ichil a kaajaloʼ.
כ [Kaf]
11 Tuláakal u kajnáaliloʼobeʼ jach táan u muʼyajoʼob, táan u máan u kaxtoʼob baʼal u jaantoʼob.+
Le baʼaloʼob koʼojtak yaantiʼoboʼ tsʼoʼok u kʼexkoʼob yéetel janal utiaʼal maʼ u kíimloʼob yéetel wiʼij.
Jéeoba Dios, ilawile, tsʼoʼok in pʼáatal bey juntúul koʼolel mix baʼal u biilaleʼ.*
ל [Lamed]
12 Teʼex le ka máaneʼex teʼ bejoʼ, ¿mix baʼal wa ken a beeteʼex tin woʼolal?
¡Jach ilawileʼex bix tsʼoʼok in pʼáatal!
¿Yaan wa uláakʼ máax tsʼoʼok u beetaʼal u muʼyaj jeʼex in muʼyajaʼ?
Le baʼax kin muʼyajtikaʼ taal tin wóokʼol teʼ kʼiin ka tu yeʼesaj u pʼujaʼanil Jéeobaoʼ.+
מ [Mem]
13 Letiʼeʼ tsʼoʼok u beetik u yéemel kʼáakʼ utiaʼal u tóokik tuláakal in baakeloʼob.+
Tsʼoʼok u tsʼáaik junpʼéel trampa utiaʼal u tʼiʼilil in wookoʼob. Letiʼeʼ tu beetaj in suut paachil.
Tsʼoʼok u beetik in pʼáatal jeʼex juntúul koʼolel jach ku bin kʼaasil tiʼeʼ.
Máan kʼiin kʼojaʼanen.
נ [Nun]
14 Le baʼaloʼob kʼaastak in beetmoʼ bey kʼaxaʼanoʼob tin kaal jeʼex u kʼaʼaxal u cheʼil kuuch tu kaal máakeʼ, letiʼ jéepʼkʼaxtoʼob tin kaal.
Tsʼoʼok u tsʼaʼabal in kuch le baʼaloʼob kʼaastakoʼ, le oʼolal minaʼan in muukʼ.
Jéeobaeʼ tsʼoʼok u kʼubken tu kʼab le máaxoʼob maas yaan u muukʼoʼob tiʼ tenoʼ.+
ס [Samek]
15 Le muʼukʼaʼan máakoʼob defenderken kaʼachoʼ tsʼoʼok u bisaʼaloʼob+ tumen Jéeoba.
Letiʼeʼ tsʼoʼok u muchʼik soldadoʼob tin contra, tu beetaj utiaʼal u xuʼulsik tiʼ le táankelmoʼoboʼ.+
Jéeobaeʼ tsʼoʼok u yayaʼchaʼatik le kaaj teʼ pila tuʼux ku yayaʼchaʼataʼal uvaoʼ.+
ע [Ayin]
16 Teneʼ táan in wokʼol tu yoʼolal tuláakal le baʼaloʼobaʼ,+ táan u yáalal u jaʼil in wich.
Le máaxoʼob jeʼel u líiʼskoʼob in wóol yéetel jeʼel u kiʼimakkúuntkoʼob in wóoloʼ náach yaniloʼob tiʼ teen.
In paalaloʼobeʼ jach táan u muʼyajoʼob tumen tiaʼanoʼob yáanal u páajtalil le máax pʼekmiloʼoboʼ.
פ [Pe]
17 Sióneʼ tsʼoʼok u tichʼik u kʼab,+ chéen baʼaleʼ minaʼan máax áantik.
Jéeobaeʼ tsʼoʼok u yaʼalik ka líikʼik tu contra Jacob tuláakal le máaxoʼob kajaʼanoʼob tu baʼpachoʼ.+
Letiʼobeʼ jach táaj u pʼekmoʼob Jerusalén.+
צ [Tsade]
18 Jéeobaeʼ maʼalob baʼax ku beetik,+ tumen teneʼ maʼ tin wóotaj in beet baʼax ku yaʼalikiʼ.+
Kaajeʼex, chʼenxikinteneʼexiʼ yéetel ileʼex bix in muʼyaj.
Le x-chʼúupalaloʼob yéetel le táankelmoʼoboʼ tsʼoʼok u bisaʼaloʼob táanxel luʼumil.+
ק [Kof]
19 Tin tʼanaj le xiiboʼob yanchaj baʼal in wil tu yéeteloʼoboʼ, chéen baʼaleʼ letiʼobeʼ tu traicionartenoʼob.+
Le sacerdoteʼob yéetel le u nuuktakil le kaajoʼ kíimoʼob.
Letiʼobeʼ táan kaʼach u máan u kaxt baʼal u jaantoʼob utiaʼal maʼ u kíimloʼob.+
ר [Reix]
20 Jéeoba Dios, ilawil bix in sen muʼyaj.
Kin wuʼuyik bey táan u woʼoltikuba in nakʼeʼ.
Teneʼ yaachajaʼan in wóol tumen maʼ in wuʼuy a tʼaaniʼ,+ le oʼolal kin wuʼuyik táan u yeʼetsʼel in puksiʼikʼal.
Teʼ táankaboʼ tsʼoʼok u kíimsaʼal in paalal yéetel espada.+ Le máaxoʼob yaan ich najoʼ táan xan u kíimloʼob.
ש [Xin]
21 Le máakoʼoboʼ tsʼoʼok u yuʼubikoʼob bix in wáakam, chéen baʼaleʼ minaʼan mix máak líiʼsik in wóol.
Le baʼax úuchtenoʼ tsʼoʼok u yojéeltaʼal tumen tuláakal le máaxoʼob pʼekmilenoʼ.
Letiʼobeʼ jach kiʼimak u yóoloʼob tumen teech taas tin wóokʼol le nojoch looboʼ.+
Chéen baʼaleʼ le kéen a béeykunt le baʼax a waʼalmaj a beetiktiʼoboʼ+ yaan xan u pʼáatloʼob jeʼex teneʼ.+
ת [Taw]
22 Kʼuchuk ta táan tuláakal le baʼaloʼob kʼaastak ku beetkoʼoboʼ ka a castigartoʼob,+jeʼex úuchik a castigarken tu yoʼolal tuláakal le baʼaloʼob maʼ maʼalob in beetmoʼ.
Teneʼ jach táan in muʼyaj yéetel yaachajaʼan u yóol in puksiʼikʼal.
Notas
^ Lelaʼ letiʼe yáax letra tiʼ le abecedario hebreooʼ. Le capítulo 1 tak 4 ku seguertik le abecedario hebreooʼ.
^ Wa «u amanteʼob».
^ Wa «u sen sufrir».
^ Ilawil página 2566.
^ Teʼelaʼ táan u yúuchul tʼaan tiʼ Jerusalén.
