Lamentaciones 5:1-22
5 Jéeoba Dios, kʼaʼajaktech le baʼax tsʼoʼok u yúuchultoʼonoʼ.
Ilawil bukaʼaj suʼtsilil baʼax ku yúuchultoʼon.+
2 Tuláakal baʼax k-tiaʼaleʼ tsʼoʼok u tsʼaʼabal tiʼ yaanal máakoʼob. K-otocheʼ tsʼoʼok u tsʼaʼabal tiʼ j-táanxel luʼumiloʼob.+
3 Tsʼoʼok k-pʼáatal bey paalal minaʼan u taataʼobeʼ. K-maamaʼobeʼ beyoʼob koʼoleloʼob kimen u yíichamoʼobeʼ.+
4 Bejlaʼeʼ kʼaʼabéet k-boʼol utiaʼal u páajtal k-ukʼik le jaʼ k-tiaʼal kaʼachoʼ,+ le siʼ k-tiaʼal kaʼachoʼ bejlaʼeʼ konbil u beetaʼaltoʼon.
5 Le máaxoʼob chʼaʼpachtikoʼonoʼ jach taʼaytak u chukpachtikoʼonoʼob.
Tsʼoʼok k-sen kaʼanal, chéen baʼaleʼ maʼ tu chaʼikoʼob k-jeʼelel.+
6 Tsʼoʼok k-kʼáatik áantaj tiʼ Egipto+ yéetel tiʼ Asiria+ utiaʼal u yantal baʼal k-jaante.
7 Le k-láakʼtsiloʼob kʼebanchajoʼoboʼ bejlaʼeʼ minaʼanoʼob, chéen baʼaleʼ láayliʼ táan k-muʼyaj yoʼolal le baʼax tu beetoʼoboʼ.
8 Bejlaʼeʼ tiaʼanoʼon yáanal u páajtalil le máaxoʼob esclavoʼob kaʼachoʼ. Minaʼan mix máak jeʼel u páajtal u tokikoʼon tu kʼaboʼobeʼ.
9 Tu yoʼolal le kʼasaʼan máakoʼob yanoʼob teʼ desiertooʼ ku kʼaʼabéettal k-tsʼáaik k-kuxtal+ tu táan kíimil utiaʼal k-taasik baʼal k-jaante.
10 Le wiʼij k-muʼyajtikoʼ ku beetik k-chokwil, le oʼolal ku chokotal k-ootʼel jeʼex u chokotal junpʼéel hornoeʼ.+
11 Le atantsiloʼob yaan tu kaajil Siónoʼ tsʼoʼok u violartaʼaloʼob bey xan le x-chʼúupalaloʼob yaan tiʼ tuláakal u kaajiloʼob Judáoʼ.+
12 Le príncipeʼoboʼ kʼaʼaxoʼob tu kʼaboʼobeʼ ka chʼuykíintaʼaboʼob.+ U nuuktakil le kaajoʼ maʼ respetartaʼaboʼob xaniʼ.+
13 Le táankelmoʼoboʼ ku tsʼaʼabal u kuchoʼob le molino ikil u yúuchul juuchʼoʼ yéetel le xiʼipalaloʼoboʼ ku tʼóochpajloʼob tu yoʼolal u aalil le siʼ u kuchmoʼoboʼ.
14 U nuuktakil le kaajoʼ tsʼoʼok u lukʼloʼob tu joonajil le kaajoʼ.+ Le táankelmoʼoboʼ tsʼoʼok u xuʼulul u paaxoʼob.+
15 K-puksiʼikʼaleʼ tsʼoʼok u pʼáatal maʼ kiʼimak u yóoliʼ. Kaʼacheʼ k-óokʼot, bejlaʼeʼ chéen okʼol k-beetik.+
16 Tsʼoʼok u lúubul le corona yaan t-pooloʼ. ¡Yaj yaniloʼon tumen tsʼoʼok k-kʼebantal!
17 Le oʼolal tsʼoʼok u kʼojaʼantal k-puksiʼikʼal,+le oʼolal tsʼoʼok u pʼáatal istikyaj k-paakat.+
18 Le Montaña Siónoʼ tsʼoʼok u pʼáatal bey junpʼéel desiertoeʼ,+ chéen chʼomakoʼob ku máanoʼobiʼ.
19 Jéeoba Dios, techeʼ ka kutal ta trono utiaʼal mantatsʼkex jeʼel jaypʼéel generación ka máankeʼ.+
20 ¿Baʼaxten tsʼoʼok u xáantal a xúumpʼattoʼon yéetel junpuliʼ maʼ ta kʼaʼajsikoʼon?+
21 Jéeoba Dios, tsʼáatoʼon u páajtalil k-suut ta wiknal, toʼon túuneʼ yaan k-suut tu séebaʼanil.+
Beet u bintoʼon utsil jeʼex úuchjeakileʼ.+
22 Chéen baʼaleʼ techeʼ junpuliʼ maʼ taak a wilkoʼoniʼ,láayliʼ sen pʼujaʼanech t-éeteleʼ.+
